Maan Ɲanmiɛn wawɛ’n sie e, nán akunndan nga sran’m be bu’n sie e

“Akunndan nga sran’m be bu’n, nɛ́n i wie yɛ Nyanmiɛn maan e bu-ɔ, sanngɛ Nyanmiɛn fɛ i Wawɛ’n mannin ye, kɛ e si like kwlaa ng’ɔ mannin ye i klun-ufue’n ti’n.”—1 KOR. 2:12.

1, 2. (a) ?Kɛ be se kɛ Klistfuɛ’m be o alɛ nun’n i bo’n yɛle benin? (b) ?Kosan benin mun yɛ é wá tɛ́ be su ɔ?

 KLISTFUƐ kpa’m be o alɛ nun! Sran ng’ɔ nin e kun’n ɔ le wunmiɛn kpa, yɛ ɔ boli alɛ kunlɛ bo nán andɛ sa ɔ. Ɔ maan ɔ si i kun kpa. I like ng’ɔ fa kun alɛ’n i ta dan m’ɔ le i’n ti’n, w’a ɲan sran’m be sunman lika. Sanngɛ nán e bu i kɛ e leman wunmiɛn annzɛ e bu i kɛ ɔ́ kwlá e. (Eza. 41:10) E le like kun mɔ e kwla fa jrɛn i ɲrun ɔn. Like sɔ’n like fi sa kwlɛmɛn i.

² Nán e nin klɔ sran yɛ e kun alɛ’n niɔn. E kpɔfuɛ’n yɛle mmusu’m be si Satan. “Akunndan nga sran’m be bu’n,” yɛ ɔ ti i like cinnjin m’ɔ fa kun alɛ’n niɔn. (1 Kor. 2:12) Like nga mɔ e fa jrɛn i ɲrun kpa kusu’n, yɛle Ɲanmiɛn wawɛ’n. Kɛ ɔ ko yo naan alɛ’n w’a diman e naan e nin Ɲanmiɛn e afiɛn’n w’a mantan’n, ɔ fata kɛ e srɛ i kɛ ɔ fɛ i wawɛ’n man e. Kpɛkun maan e yo like nga i wawɛ sɔ’n maan sran yo’n. (Gal. 5:22, 23) ?Sanngɛ akunndan nga sran’m be bu’n ɔ fin wan? ?Yɛ ɔ yoli sɛ yɛ w’a ɲan ta sran sunman be su sɔ ɔ? ?Sɛ e su bu akunndan sɔ’n wie annzɛ e buman wie’n, é yó sɛ naan y’a wun i wlɛ? ?Ngue yɛ Zezi i ajalɛ’n kle e Ɲanmiɛn wawɛ’n i ɲanlɛ’n ɔ nin akunndan nga sran’m be bu’n i ɲrun jranlɛ’n be su ɔ?

?Ngue ti yɛ akunndan nga sran’m be bu’n w’a tru sɔ ɔ?

3. ?Akunndan nga sran’m be bu’n fin wan? ?Yɛ ngue yɛ ɔ su sran’m be bo maan be yo ɔ?

³ Akunndan nga sran’m be bu’n, ɔ fin Satan mɔ i yɛ ɔ “sie mɛn wunmuan’n.” Kpɛkun akunndan sɔ’n tanndan Ɲanmiɛn wawɛ’n i ɲrun. (Zan 12:31; 14:30; 1 Zan 5:19) Akunndan sɔ’n yo maan sran’m be tanndan like nga Ɲanmiɛn klo’n, ɔ nin like nga i waan ɔ́ yó be’n be ɲrun.

4, 5. ?Ɔ yoli sɛ yɛ maan akunndan nga Satan ti’n sran’m be bu’n w’a tru sɔ ɔ?

⁴ ?Ɔ yoli sɛ yɛ maan akunndan nga Satan ti’n sran’m be bu’n w’a tru sɔ ɔ? Kɛ ɔ́ bó i bo’n, Satan lakali Ɛvu Edɛni fie’n nun lɔ. Ɔ yoli maan Ɛvu buli i kɛ sɛ ɔ kaci i sin si Ɲanmiɛn’n, i liɛ yó ye. (Bob. 3:13) Nanwlɛ, ɔ buali ato dan! (Zan 8:44) I sin’n, ɔ sinnin bla’n i lika naan Adam kaci i sin si Zoova wie. Ajalɛ nga Adam fali’n ti’n, ɔ fali klɔ  sran mun yili sa tɛ yolɛ’n nun. Ɔ maan Satan i ɲin kekle aeliɛ’n su yɛ klɔ sran’m be ɲin o titi ɔ.—An kanngan Efɛzfuɛ Mun 2:1-3 nun.

⁵ Satan lakali anzi kpanngban kpa wie mun ekun. Ɔ maan be kacili mmusu. (Ngl. 12:3, 4) Be dun mmua kpɔcili Ɲanmiɛn ka naan Nowe blɛ su nzue dan’n w’a tɔ. Anzi sɔ’m be buli i kɛ sɛ be yaci junman nga Ɲanmiɛn mannin be ɲanmiɛn su lɔ’n, naan be ba asiɛ’n su wa be wa fa be wun wlɛ i ɲannzuɛn sa’m be yolɛ nun’n, yɛ ɔ ti kpa ɔ. (Zid 6) Mmusu sɔ mɔ be wa sali be sin be kacili aolia nun sran ekun’n, be uka Satan yɛ “ɔ laka mɛn wunmuan nunfuɛ’m be kwlaa” ɔ. (Ngl. 12:9) Ng’ɔ ti tɛ’n yɛle kɛ klɔ sran’m be sunman lika be wunmɛn i wlɛ kɛ mmusu’m be sa o be aeliɛ’n i sunman nun.—2 Kor. 4:4.

?Akunndan nga sran’m be bu’n su ɲan ta amun su?

6. ?Ngue like cɛ yɛ ɔ kwla yo naan akunndan nga sran’m be bu’n w’a ɲan ta e su ɔ?

⁶ Sran kpanngban be wunmɛn i wlɛ kɛ Satan laka sran mun, sanngɛ Klistfuɛ kpa’m be liɛ’n, ɔ timan sɔ mlɔnmlɔn. Be si wafa ng’ɔ yo sɔ’n. (2 Kor. 2:11) Nanwlɛ, sɛ e bɔbɔ y’a mɛnmɛn i wun atin’n, mɛn nun akunndan’n kwlá ɲanman ta e su kaan sa. Maan e fa e ɲin e sie i kosan nnan be su. Sɛ akunndan nga sran’m be bu’n yɛ ɔ le ta e su o, annzɛ sɛ Ɲanmiɛn wawɛ’n nin o, kosan sɔ’m bé úka e naan y’a wun i wlɛ.

7. ?Like benin yɛ Satan fa laka e naan e nin Zoova e afiɛn’n w’a saci ɔ?

⁷ ?Ninnge nga n fa yiyi min ɲin su’n be kle kɛ n ti sran’n i wafa sɛ? (An kanngan  Zak 3:14-18 nun.) Satan fa nzaje sa’m be klolɛ’n fa laka e naan e nin Ɲanmiɛn e afiɛn saci. Mmusu’m be si Satan si kɛ sran kwlaa ng’ɔ klo sa kekleekle yolɛ’n, Zoova i ɲin ci i. (Jue. 11:5) Ɔ maan Satan fa ninnge wie mun laka e naan e tɔ sa sukusuku yolɛ nun. Ninnge sɔ’m be wie yɛle fluwa’m be nun ninnge mun, ɔ nin flimu nin jue mun, ɔ nin video nun ngowa kanlɛ mɔ wie’m be nun’n, sran’m be yo nzaje sa nin sa sukusuku mun’n. Satan liɛ’n, maan i li e klo sa kpa’n sɛ, sanngɛ sɛ e klo sa tɛ’n kaan sa’n, ɔ yo i fɛ.—Jue. 97:10.

8, 9. ?Be ɲin su yiyilɛ’n i su kosan benin yɛ ɔ fata kɛ e fa usa e wun ɔn?

⁸ Be nga Ɲanmiɛn fɛ i wawɛ’n man be’n, be liɛ’n sa tɛ kaan sa nunman be aeliɛ’n nun, be kloman ndɛnngan yɛ be si aunnvuɛ dan. Ɔ maan ɔ fata kɛ e fa kosan nga e usa e wun. Yɛle kɛ: ‘?Ninnge nga n fa yiyi min ɲin su’n, be yo maan min aeliɛ’n yo kpa?’ Ngwlɛlɛ m’ɔ fin ɲanmiɛn su’n ɔ “klo-man dunman.” Be nga Ɲanmiɛn wawɛ’n sie be’n be kanman sa kpa nin wɛtɛɛ yolɛ ndɛ be kleman be mantanfuɛ mun, naan be kunngba’n b’a klo sa tɛtɛ’m be nianlɛ be sua’m be nun.

⁹ Zoova klo kɛ e su i ngunmin cɛ. Satan liɛ’n, sɛ e yo like kunngba cɛ e mɛn i kɛ ng’ɔ kunndɛli kɛ Zezi yo mɛn i’n sa’n, ɔ ti i liɛ’n su. (Lik 4:7, 8) Ɔ maan ɔ nin i fata kɛ e usa e wun kɛ: ‘?Ninnge nga n fa yiyi min ɲin su’n, be kwla yo maan n su Ɲanmiɛn kunngba cɛ? ?Ninnge sɔ’m be yo maan n kwla jran akunndan nga sran’m be bu’n i ɲrun kekle annzɛ n kwlá jrɛnmɛn i ɲrun kekle? ?Ɔ fata kɛ n kaci n sa ninnge nga n fa yiyi min ɲin su’n be nun?’

10, 11. (a) ?Akunndan nga sran’m be bu’n, ɔ su sran’m be bo maan be bu aɲanbeun ninnge’m be sɛ? (b) ?Ngue yɛ Ɲanmiɛn Ndɛ’n wla e fanngan kɛ e yo ɔ?

¹⁰ ?Wafa sɛ yɛ n bu aɲanbeun ninnge mun ɔn? (An kanngan  Lik 18:24-30 nun.) “Akunndan nga be bu fa gua ninnge nga be wun be’n be su’n,” ɔ nin ninnge kpanngban klolɛ nin aɲanbeun ninnge’m be kunndɛlɛ’n, be o akunndan nga sran’m be bu’n i nun wie. (1 Zan 2:16) I sɔ akunndan’n maan sran kpanngban be klo kɛ bé ɲán be wun. (1 Tim. 6:9, 10) Akunndan sɔ’n maan e kwla bu i kɛ sɛ e ɲan ninnge mun tiantian su’n, ninnge sɔ’m bé sásá e. (Nya. 18:11) Sanngɛ, sɛ e klo sika e tra Ɲanmiɛn’n nn Satan w’a kwla e. I ti’n maan e usa e wun kɛ: ‘?Aɲanbeun ninnge nin pɔɔ nun tranlɛ’n su yɛ min ɲin o ɔ?’

¹¹ Ɲanmiɛn Ndɛ mɔ i wawɛ’n yɛ maan be klɛli’n kusu’n, ɔ wla e fanngan kɛ e mian e ɲin naan e ɲan sika e fa nian e fuɛ’m be lika, sanngɛ nán maan e klo sika’n tratra su. (1 Tim. 5:8) Be  nga Ɲanmiɛn i wawɛ’n o be su’n, ɔ uka be naan b’a sɔnnzɔn Zoova i aklunye’n. Be klo sran mun kpa tra ninnge mun. Kpɛkun sɛ be kwla uka be wiengu’n, be yo i aklunjuɛ su. (Nya. 3:27, 28) Be kplinman su kaan sa kɛ sika kunndɛlɛ’n yo be nnana tra Ɲanmiɛn sulɛ’n.

12, 13. ?Ye benin yɛ Ɲanmiɛn wawɛ’n kwla yo man e mɔ akunndan nga sran’m be bu’n kwlá yoman ɔn?

¹² ?Ɲanmiɛn wawɛ’n yɛ ɔ sie e ɔ, annzɛ akunndan nga sran’m be bu’n niɔn? (An kanngan  Kolɔsfuɛ Mun 3:8-10 nun.) Biblu’n Traduction du monde nouveau kɛn i Kolɔsfuɛ Mun 3:13 nun kɛ: “Sa nga amun wiengu yo mɔ amun wun i’n, maan ɔ sɔn amun nun, sɛ sran kun yo i wiengu sa’n, maan ɔ yaci cɛ i. Zoova yacili sa nga amun yoli i’n cɛli amun, ɔ maan amun kusu, sa nga be yo amun’n, amun yaci cɛ.” Akunndan nga sran’m be bu’n ɔ yo maan sran’m be yi klɔ sran nzuɛn’n i nglo. (Gal. 5:19-21) Kɛ ndɛ nunman lɛ’n, sɛ Ɲanmiɛn wawɛ’n yɛ ɔ sie e o annzɛ sɛ akunndan nga sran’m be bu’n yɛ ɔ sie e o, e kwlá wunmɛn i wlɛ. Sanngɛ, sɛ e niaan Klistfuɛ wie w’a buman e wie annzɛ ɔ loli e ngasi annzɛ ɔ fɔnnin e wun bɔbɔ’n, yɛ e kwla wun like ng’ɔ sie e’n i wlɛ ɔ. Asa ekun’n, kɛ e ngunmin e o e sua’n i nun lɔ’n yɛ e kwla wun i sɔ liɛ’n i wlɛ ekun ɔn. Ɔ fata kɛ e bɔbɔ e nian naan akunndan sɔ’m be nun kun ng’ɔ sie e’n, e wun i wlɛ. Maan e usa e wun kɛ: ‘?Anglo nsiɛn nga be sinnin lɛ nun’n, min aeliɛ’n fali Klistfuɛ’m be liɛ’n kpa annzɛ min ijɔlɛ nin min aeliɛ’n be wa sali be sin be yoli tɛ ekun?’

¹³ Ɲanmiɛn wawɛ’n kwla uka e naan y’a ‘wla e nzuɛn laa b’ɔ maan e yo sa tɛtɛ’n i ase yɛ e fa nzuɛn uflɛ.’ I liɛ’n é kló sran mun kpa é trá laa’n yɛ é yó aklunye. Ɔ maan sɛ sran yo e sa’n, naan e ndɛ yo fɛ bɔbɔ’n é yáci cɛ́ i. Sɛ e bu i kɛ sran kun w’a yo e sa tɛ wie’n, e su faman “klunwi’n, nin anwlɛn fufu’n, nin ya falɛ’n, nin ndɛnngan’n,” e fa tɛmɛn i su. Yɛ e su ‘sacimɛn i wun.’ Sanngɛ é mían e ɲin naan y’a ‘si e wun aunnvuɛ.’—Efɛ. 4:31, 32.

14. ?Mɛn’n nun’n, wafa sɛ yɛ sran kpanngban be bu Ɲanmiɛn Ndɛ’n niɔn?

¹⁴ ?N klo Biblu’n nun mmla mun yɛ min ɲin yi be? (An kanngan  Nyanndra Mun 3:5, 6 nun.) Sran’m be ɲin m’ɔ yiman Ɲanmiɛn Ndɛ’n i ɲin fite akunndan nga sran’m be bu’n nun. Be nga akunndan sɔ’n sie be’n, Biblu’n i bue ng’ɔ timan be liɛ’n su’n, be niɛnmɛn i lɔ. Be liɛ ng’ɔ lo be’n yɛle klɔ sran’m be ngwlɛlɛ nga be si i’n ɔ nin be nannan’m be nzuɛn’n be su falɛ. (2 Tim. 4:3, 4) Wie’m be kusu’n, Ɲanmiɛn Ndɛ’n i bɔbɔ ba’n yɛ be bumɛn i wie ɔ. I sɔ sran’m be bumɛn i kɛ Biblu’n ti like kpa naan ɔ fin Ɲanmiɛn sakpa. Be bu be wun ngwlɛlɛfuɛ. Ndɛ nga Biblu’n kɛn i be yi bo bla kunndɛlɛ annzɛ be wun bo bian kunndɛlɛ’n, ɔ nin yasua nin bla nga be nin be wiengu be la’n, ɔ nin be wun ralɛ’n su’n, be waan ɔ timan ndɛ cinnjin. Be ‘flɛ sa kpa’n kɛ sa tɛ,’ yɛ ‘be flɛ sa tɛ’n kusu kɛ sa kpa.’ (Eza. 5:20) ?Akunndan sɔ’n sie e wie? ?Kɛ sa ɲan e’n, e lafi klɔ sran’m be ngwlɛlɛ’n su annzɛ e bɔbɔ e liɛ’n  su yɛ e lafi ɔ? ?Annzɛ kusu e mian e ɲin naan y’a kwla nanti afɔtuɛ nga Biblu’n man’n su?

15. ?Kɛ ɔ yo naan e fa e wla’n e gua e bɔbɔ e ngwlɛlɛ liɛ’n su’n, ngue yɛ ɔ fata kɛ e yo ɔ?

¹⁵ Ɲanmiɛn wawɛ’n yo maan e bu Biblu’n i like cinnjin. Kɛ jue tofuɛ’n sa’n, e kusu e bu i kɛ Ɲanmiɛn i ndɛ’n ti kɛ kannin sa, ɔ kpaja e bo. Yɛ ɔ kpaja e ɲrun atin’n su weiin. (Jue. 119:105) E lafiman e bɔbɔ e ngwlɛlɛ liɛ’n su, sanngɛ e fa e wla’n kwlaa e gua Ɲanmiɛn Ndɛ’n su naan ɔ kle e sa ng’ɔ ti kpa’n ɔ nin ng’ɔ ti tɛ’n. Nán Biblu’n i like dan bulɛ ngunmin yɛ e suan ɔn. Sanngɛ e suan Ɲanmiɛn i mmla’n i klolɛ’n wie.—Jue. 119:97.

Maan Zezi i ajalɛ’n uka e

16. ?Sɛ e waan e nin “Krist ye akunndan’n” yo kun’n, ngue yɛ ɔ fata kɛ e yo ɔ?

¹⁶ Sɛ e waan é ɲán Ɲanmiɛn wawɛ’n, ɔ fata kɛ e yo naan e nin “Krist ye akunndan’n” yo kun. (1 Kor. 2:16) Kɛ ɔ ko yo naan e ‘akunndan’n w’a yo kun kɛ Krist-Jésus kle ye kɛ e yo’n sa’n,’ ɔ fata kɛ e si wafa ng’ɔ buli akunndan’n ɔ nin wafa ng’ɔ yoli ninnge mun’n, naan e yo kɛ i sa. (Rɔm. 15:5; 1 Piɛ. 2:21) Wafa nga e kwla yo sɔ’n, maan e nian be nun wie mun.

17, 18. (a) ?Ɲanmiɛn srɛlɛ’n i su like benin yɛ Zezi i ajalɛ’n kle e ɔ? (b) ?Ngue ti yɛ ɔ fata kɛ e ‘srɛ titi’ ɔ?

¹⁷ Maan e srɛ Ɲanmiɛn naan ɔ fɛ i wawɛ’n man e. Ka naan ɲrɛnnɛn w’a tɔ Zezi su’n, ɔ dun mmua srɛli Ɲanmiɛn kɛ ɔ fɛ i wawɛ’n suɛn i bo. (Lik 22:40, 41) Ɔ fata kɛ e kusu e srɛ Ɲanmiɛn naan ɔ fɛ i wawɛ’n man e wie. Be kwlaa nga be lafi Zoova su mɔ be srɛ i kɛ ɔ fɛ i wawɛ’n man be’n, ɔ tu i klun fa man be. (Lik 11:13) Zezi seli kɛ: “An srɛ [titi] bé fá mán amun, an kunndɛ [titi], amún nyɛ́n, an bobo [titi], bé tíke amun anuan. Afin sran kwlaa ng’ɔ srɛ like’n, be mɛn i, sran ng’ɔ kunndɛ like’n, ɔ nyɛn i, yɛ sran ng’ɔ bobo anuan’n, be tike.”—Mat. 7:7, 8.

¹⁸ Kɛ é srɛ́ Zoova kɛ ɔ fɛ i wawɛ’n man e yɛ ɔ uka e’n, nán maan e sa sin bubu e ndɛndɛ. Wie liɛ’n, ɔ fata kɛ e srɛ i titi yɛ e srɛ i cɛ kpa. Ɔ ju wie’n, Zoova yaci be nga be srɛ i’n be lɛ naan be kle kɛ ndɛ sɔ’n lo be kpa. Kpɛkun ɔ kunndɛ kɛ be yi i nglo kɛ be lafi i su kpa ka naan w’a tɛ be su. *

19. ?Ngue yɛ Zezi yoli i cɛn kwlaa ɔ? ?Yɛ ngue ti yɛ ɔ fata kɛ e yo kɛ i sa ɔ?

¹⁹ Maan e ɲin yi Zoova guɛ i ti nin i bo. Zezi yoli i Si i klun sa’n cɛn kwlaa. Ɔ juli wie’n, wafa nga Zezi kunndɛli kɛ sa’m be yo’n ɔ nin i Si i liɛ’n w’a yoman kun. Sanngɛ ɔ tuli i klun seli i Si kɛ: “Nán yo nga n klo kɛ ɔ yo su’n, sanngɛ yo nga a klo kɛ á yó i su’n.” (Lik 22:42) Maan e usa e wun kɛ: ‘?Kannzɛ like kun yolɛ’n timan pɔpɔ’n, sanngɛ like sɔ’n i yolɛ’n nun’n min ɲin yi Zoova?’ Ɔ fata kɛ e ɲin yi Ɲanmiɛn naan y’a kwla tran nguan nun. Kɛ mɔ i yɛ ɔ yili e mɔ e nguan’n i bo’n fin i’n, mɔ i yɛ maan e kwla tran nguan nun’n ti’n, ɔ fata kɛ e ɲin yi i guɛ i ti nin i bo. (Jue. 95:6, 7) E kwlá faman like uflɛ e kaciman aɲinyiɛ’n. Sɛ e ɲin w’a yiman Ɲanmiɛn’n, i klun kwlá jɔman e wun.

20. ?Kɛ be wuli Zezi lele’n, ngue yɛ ɔ yoli i cinnjin ɔn? ?Yɛ wafa sɛ yɛ e kwla sɔnnzɔn i ɔ?

²⁰ Maan e si Biblu’n nun ndɛ’n i kpa. Kɛ Satan sali Zezi i Ɲanmiɛn sulafilɛ’n niannin’n, Zezi fali Ɲanmiɛn Ndɛ’n fa jrɛnnin i ɲrun kekle. (Lik 4:1-13) Asa ekun’n, kɛ sran’m be tanndannin Zezi ɲrun’n, ɔ jrannin Ɲanmiɛn Ndɛ’n su yɛ ɔ tɛli be su ɔ. (Mat. 15:3-6) Kɛ be wuli Zezi lele’n, like ng’ɔ ko yo naan w’a si Ɲanmiɛn mmla’n naan ‘w’a yo i nuan su sa’n,’ yɛ ɔ yoli i cinnjin ɔn. (Mat. 5:17, NW) Ɲanmiɛn Ndɛ’n mɔ maan e Ɲanmiɛn sulafilɛ’n i bo’n wla ase kpa’n, e kusu e kunndɛ kɛ é súɛn i titi. (Fil. 4:8, 9) Kɛ ɔ ko yo naan y’a ɲan blɛ naan e ngunmin annzɛ e nin e awlobofuɛ mun y’a suan Biblu’n nun like’n, ɔ  kwla yo kekle man e nun wie mun. I ti’n ɔ fataman kɛ e bu i kɛ é ɲán blɛ sa naan y’a fa suan like, sanngɛ ɔ fata kɛ e bɔbɔ e kunndɛ blɛ nga e kwla fa suan like’n.—Efɛ. 5:15-17.

21. ?Ngue yɛ e kwla fa uka e wun naan y’a si Ɲanmiɛn Ndɛ’n i kpa naan y’a nanti su ɔ?

²¹ “Sran kpa nanwlɛfuɛ b’ɔ si ngwlɛlɛ’n” ɔ ukali e naan y’a ɲan blɛ naan le mɔcuɛ kwlaa nun’n, e bɔbɔ annzɛ e nin e awlobofuɛ mun y’a fa nnɔsua kun y’a su Ɲanmiɛn awlo lɔ. (Mat. 24:45) ?Like ng’ɔ fata kɛ e fa blɛ sɔ’n e yo’n e nian nun e fa yo i kpa liɛ su? Kɛ ɔ ko yo naan e nin Klist e akunndan w’a yo kun’n, nnɔsua kun nun sa’n, e kwla fa sa kun i su like nga Zezi kleli’n naan e suɛn i kpa. E kwla fa ndɛ akpasua nga be flɛ i kɛ “Like nga Zezi i ajalɛ’n kle e’n” mɔ be o Sasafuɛ Tranwlɛ’n afuɛ 2008 Sɛptamblu 1, ɔ nin afuɛ 2009 Zuɛn 1, yɛ afuɛ 2009 Desamblu 1, naan e fa wlɛ i e awlobo’n nun Ɲanmiɛn sulɛ’n nun.

E kwla mɛn’n ɔ yo ye

22, 23. ?Ngue yɛ ɔ fata kɛ e yo naan y’a kwla mɛn’n niɔn?

²² Sɛ e kunndɛ kɛ Ɲanmiɛn wawɛ’n sie e’n, ɔ fata kɛ e jran akunndan nga sran’m be bu’n i ɲrun kekle. Sanngɛ i sɔ yolɛ’n timan pɔpɔ. Wie liɛ’n ɔ fata kɛ e kpli kpa naan y’a kwla jran kekle. (Zid 3) Sanngɛ e yo i sɔ liɛ’n ɔ yo ye! Zezi seli i sɔnnzɔnfuɛ’m be kɛ: “Amún wá wún amun nyin su kpa, sanngɛ an tra amun anwlɛn, mɛn nga nun wa’n, min yɛ n kwla-a.”—Zan 16:33.

²³ Sɛ e jran akunndan nga sran’m be bu’n i ɲrun kekle naan e mian e ɲin kpa naan Ɲanmiɛn w’a fɛ i wawɛ’n w’a man e’n, e kusu é kwlá mɛn’n. “?Sɛ Nyanmiɛn jin e sin’n, wan yɛ ɔ kwla yo e sa-a?” (Rɔm. 8:31) Sɛ Ɲanmiɛn fɛ i wawɛ’n man e’n, naan e fa atin ng’ɔ kle e Biblu’n nun’n su’n, like kan nga e le i’n ɔ́ jú e. Kpɛkun é dí fɔundi nin aklunjuɛ, yɛ é kwlá láfi su kɛ é trán mɛn uflɛ mɔ w’a mantan koko yɛ’n i nun wie.

[Ja ngua lɛ ndɛ’n]

?Amun wla kwla kpɛn su?

• ?Ngue ti yɛ akunndan nga sran’m be bu’n w’a tru sɔ ɔ?

• ?Kosan nnan benin yɛ ɔ fata kɛ e fa usa e wun ɔn?

• ?Like nsan benin yɛ Zezi i ajalɛ’n kle e Ɲanmiɛn wawɛ’n i ɲanlɛ’n su ɔ?

[Kosan mun]

[Foto, bue 10]

?Wafa sɛ yɛ anzi wie’m be kacili mmusu ɔ?

[Foto, bue 12]

Satan fa mɛn’n nun akunndan’n sie sran mun sanngɛ e kwla yo naan w’a sieman e kun.