Maan e buabua e wun sie!
Maan e buabua e wun sie!
“An buabua amun wun sie, afin m bɔ n kacili Sran’n ḿ bá dɔ nga an bu-man min akunndan’n su.”—MAT. 24:44.
1, 2. (a) ?Ngue sa yɛ Biblu’n kannin kɛ bé wá jú mɔ e kwla fa sunnzun wafa nga kangale’n tɔ sran su yo i like’n niɔn? (b) ?Kɛ Klist wá núnnún Satan i mɛn’n i onga’n, ngue yɛ ɔ fata kɛ e yo naan y’a fite nun ɔn?
BIAN kun fa kangale m’ɔ loli be’n kan sran’m be ɲrun ngowa. Ɔ yoli i sɔ dili afuɛ kpanngban. Bian sɔ’n waan: “Kɛ nnɛn kun lo i wun man wɔ’n, i fɛ m’ɔ yo’n ɔ ti kɛ mɛn’n nun ninnge’m be nun klanmanfuɛ’n yɛ b’a fa cɛ wɔ sa.” Sanngɛ afuɛ nga be flɛ i 2003 i Ɔktɔblu le 3 su’n, ɔ nin nnɛn’m be wun aniɛn mɔ be ti i sɔ’n i bo’n wa kpɛli. Yɛle kɛ b’a wunman like ti’n, kpɛkun i nnɛn’m be nun kun m’ɔ ti kilo 172 wa tɔli i su ɔ yoli i like yaya. Bian sɔ’n siman mlɔnmlɔn kɛ nnɛn’n wá tɔ́ i su yó i like. Ɔ maan w’a siesiemɛn i wun kaan sa.
2 Biblu’n kusu kan “nnɛn” kun m’ɔ́ wá tɔ́ sran’m be su kpɛ kunngba’n i ndɛ. (An kanngan Sa Nglo Yilɛ 17:15-18 nun.) ?Ngue yɛle “nnɛn” sɔ’n? ?Wan yɛ nnɛn’n yó i like ɔ? Nnɛn sɔ’n ti nvle’m be Anuannzɛ nga be flɛ i ONU ɔ nin mɛn’n nun awa’m be kwlaa be nzɔliɛ. Ɔ́ wá kpɛ́ i ɲin Babilɔni klɔ dan’n m’ɔ ti Ɲanmiɛn sulɛ wafa nga be timan su’n be nzɔliɛ’n i wun lɔ, kpɛkun ɔ́ núnnún i tɛtɛ kpa. I sɔ liɛ’n wá bó sran kpanngban be nuan dan. Afin nnɛn sɔ’n nin Babilɔni klɔ dan’n be ti janvuɛ. Be kwlaa be ti Satan i mɛn’n nunfuɛ. ?Sanngɛ blɛ benin nun yɛ sa sɔ’n jú ɔ? E siman cɛn’n ɔ nin dɔ nga sa sɔ’n jú’n. (Mat. 24:36) Nga e si i’n, yɛle kɛ blɛ mɔ e lafiman su’n yɛ sa sɔ’n jú ɔ. Asa kusu’n blɛ sɔ’n nunman mmua kun. (Mat. 24:44; 1 Kor. 7:29) Ɔ maan ɔ fata kɛ e buabua e wun sie naan like nga Zoova nin Zezi bé wá yó’n, w’a fuman e nun. (Lik 21:28) Kɛ ɔ ko yo naan y’a buabua e wun y’a sie’n, e kwla nian ajalɛ nga laa Ɲanmiɛn i sufuɛ’m be fali’n su. I nun mɔ Ɲanmiɛn núnnún klunwifuɛ mun m’ɔ́ dé i sufuɛ mun’n, Ɲanmiɛn i sufuɛ sɔ’m be buabuali be wun sieli. Be wunnin kɛ ndɛ nga Ɲanmiɛn kan’n, ɔ kpɛn su. Maan e nian like nga be nun wie’m be yoli’n, ɔ nin wafa nga e kwla yo kɛ be sa’n.
An buabua amun wun sie kɛ Nowe sa
3. ?Sa benin mun yɛ be yoli maan Ɲanmiɛn i sulɛ’n yoli kekle mannin Nowe ɔ?
3 Kannzɛ lika’n yoli tɛ kpa asiɛ’n su Nowe blɛ su’n, sanngɛ ɔ buɛbuɛli i wun sieli naan kɛ Ɲanmiɛn wá yó like nga i waan ɔ́ yó’n, w’a wun nun. Kɛ anzi wie’m be fali klɔ sran wunnɛn mɔ be bali asiɛ’n su wa be wa kunndɛli bla nglanmannglanman mun’n, wafa nga lika jrannin Nowe su’n amun bu i akunndan nian! Kɛ be wa jali bla sɔ mun’n, ba nga be wuli be’n be ti jajraajra. Be wunmiɛn mɔ be le i ti’n be kleli sran’m be yalɛ kpa. (Bob. 6:4) Amun bɔbɔ amun bu nzaje sa nga sran sɔ’m be yoli be sinnin lika’n nun’n i sin kan be nian. Klunwi yolɛ’n trannin lika kwlaa, kpɛkun sran’m be akunndan’n nin be aeliɛ’n yoli tɛtɛ mlɔnmlɔn. I sɔ’n ti’n, Ɲanmiɛn Zoova m’ɔ sie mɛn wunmuan’n ɔ kleli cɛn nga ɔ́ wá núnnún klunwifuɛ sɔ mun’n.—An kanngan Bo Bolɛ 6:3, 5, 11, 12 nun. *
4, 5. ?Andɛ’n, wafa sɛ yɛ lika’n ti kɛ ng’ɔ fa yoli Nowe blɛ su’n sa ɔ?
4 Zezi kɛnnin i kɛ wafa nga Nowe i blɛ su’n lika’n fa yoli’n, i sɔ yɛ e blɛ liɛ’n fá yó ɔ. (Mat. 24:37) I kun yɛle kɛ e wun i kɛ mmusu’m be sa o ninnge’m be nun andɛ. (Ngl. 12:7-9, 12) Mmusu sɔ’m be kacili be wun kɛ klɔ sran sa Nowe blɛ su. Kannzɛ be manman be atin kɛ be kaci sɔ kun’n, sanngɛ be mian be ɲin kpa sie sran’m be kwlaa, i kpɛnngbɛn o, i bakan o. Kɛ mmusu’m be wun kɛ sran’m be su yo sa tɛtɛ mun asiɛ’n su wa’n, ɔ yo be fɛ kpa liɛ su.—Efɛ. 6:11, 12.
5 Ɲanmiɛn Ndɛ’n kan mmusu’m be si Satan i ndɛ se kɛ “ɔ ti sran kunfuɛ,” naan i yɛ ‘maan wie’n kwla sran mun’ ɔn. (Zan 8:44; Ebr. 2:14) Ɔ kwlá kunman sran mun trele sa. Sanngɛ aolia nun sran klunwifuɛ sɔ’n lakalaka sran mun maan be yo ninnge tɛtɛ ng’ɔ kwla kle be ɲrɛnnɛn lele be wu’n. Asa ekun’n, ɔ yo maan sran’m be kpɔ be wiengu yɛ be bu sran kunlɛ’n i akunndan. Andɛ’n, nzaje sa yolɛ’n w’a tru lika’n nun. Nowe blɛ su’n kɛ be yoli sɔ’n, Zoova w’a yacimɛn i lɛ sa ngbɛn. ?Ɔ maan, amun bu i kɛ e blɛ liɛ nga su’n, ɔ́ yáci i lɛ sa ngbɛn? ?Ɔ su kwlaman like fi yo?
6, 7. ?Wafa sɛ yɛ Nowe nin i awlobofuɛ’m be yili i nglo kɛ be lafi Ɲanmiɛn su naan be ɲin yi i ɔ?
6 I sin’n, Ɲanmiɛn kan kleli Nowe kɛ ɔ́ wá tɔ́ anannganman su nzue dan kpa, naan ɔ́ fá núnnún ninnge nga be o asiɛ’n su’n be kwlaa. (Bob. 6:13, 17) Zoova seli Nowe kɛ ɔ bobo mmeli kɛ alaka dan kpa kun sa. Nowe nin i awlobofuɛ’m be boli mmeli i bobolɛ’n bo. ?Ngue yɛ ɔ ukali be maan be ɲin yili Ɲanmiɛn mɔ i ti’n, be buabuali be wun ka naan Ɲanmiɛn i jɔlɛ dilɛ blɛ’n w’a ju ɔ?
7 Nowe nin i awlobofuɛ’m be lafili Ɲanmiɛn su yɛ be ɲin yili i kpa. I ti yɛ maan be fali Ɲanmiɛn i ndɛ’n su ɔ. (Bob. 6:22; Ebr. 11:7) Nowe nin Zoova be afiɛn’n mantannin kpa. Yɛ w’a fɛmɛn i wun w’a wlɛmɛn i sa tɛtɛ nga i mantanfuɛ’m be yo’n nun wie. (Bob. 6:9-10) Ɔ si kɛ ɔ ti cinnjin maan i awlobofuɛ mun kɛ be nian be wun su naan nzaje sa nga sran’m be yo’n, ɔ nin be ɲin su kekle aeliɛ’n, b’a yoman wie. Ɔ ti cinnjin kɛ nán be fa be wun wlɛ i sran’m be ninnge nga be yo be titi’n be nun. Ɲanmiɛn mannin be junman kɛ be di. I ti’n, ɔ fata kɛ junman sɔ’n su yɛ i awlobofuɛ’m be kwlaa be ɲin tran ɔn.—An kanngan Bo Bolɛ 6:14, 18 nun.
Nowe nin i awlobofuɛ’m be buabuali be wun sieli
8. ?Ngue yɛ ɔ kle kɛ Nowe i awlobofuɛ’m be ɲin yili Ɲanmiɛn ɔn?
8 Biblu’n fa e ɲin sie i Nowe m’ɔ ti awlobo kpɛn’n i su. Sanngɛ Nowe i yi’n nin i mma mun, yɛ i mma’m be yi’m be kusu be suli Zoova wie. Ɲanmiɛn nuan ijɔfuɛ Ezekiɛli kleli kɛ ndɛ sɔ’n ti nanwlɛ. I waan sɛ Nowe o lɛ Ezekiɛli blɛ su’n nn sɛ ɔ ti mɔ be de i mma mun’n, nán be si i sa kpa m’ɔ yo’n i ti yɛ bé dé be ɔ. Ba’m be ti kaklaakla. I ti’n, be kwla fa ajalɛ kɛ bé nánti Ɲanmiɛn mmla’n su annzɛ be nantiman su. Ɔ maan, be bɔbɔ be yili i nglo kɛ be klo Ɲanmiɛn yɛ be klo i mmla mun. (Eze. 14:19, 20) Nowe i awlobofuɛ’m be fali like ng’ɔ kleli be’n su. Be lafili Ɲanmiɛn su kɛ i sa wie. Ɔ maan, b’a yaciman sran’m be lɛ naan be tanndan be ɲrun junman nga Ɲanmiɛn fa mannin be’n i dilɛ’n nun.
9. ?E blɛ liɛ’n su’n, wan mun yɛ be yo kɛ Nowe sa ɔ?
9 Andɛ kusu’n, e niaan nga be o asiɛ’n wunmuan’n su’n be nun awlobo kpɛn’m be mian be ɲin be nian Nowe i ajalɛ’n su. Kɛ e wun i sɔ liɛ’n, nanwlɛ, ɔ wla e fanngan kpa! Be wun i wlɛ kɛ sɛ be man be awlobofuɛ’m be aliɛ nin tralɛ nin lawlɛ naan be wla ba’m be suklu’n, ɔ ti kpa. Sanngɛ ɔ fata kɛ be yo like uflɛ uka su. Yɛle kɛ maan be uka be naan be nin Ɲanmiɛn be afiɛn sɛ kpa. Sɛ be yo sɔ’n, nn ɔ ti kɛ be su buabua be wun be minndɛ like nga ɔ ka kaan Zoova wá yó’n sa.
10, 11. (a) ?Kɛ Nowe nin i awlobofuɛ’m be o mmeli’n i klun lɔ’n, wafa sɛ yɛ be wun yoli be ɔ? (b) ?Kosan benin yɛ ɔ fata kɛ e fa usa e wun ɔn?
10 Ɔ dili afuɛ ko ju 50 naan Nowe nin i awlobofuɛ’m b’a wie mmeli’n i bobo. Kɛ e niɛn i sa’n, e kwla se kɛ junman’n w’a yoman blɛblɛ. Be fali gudrɔn kannin mmeli’n i are. Be fali aliɛ sieli nun. Be fali nnɛn mun wlali nun. Be wlu be fiteli kpɛ ko ju wie. Afuɛ nga be flɛ i 2370 nun ka naan b’a wu Zezi’n, i anglo nɲɔn su’n be wieli junman’n i kwlaa di. Anglo sɔ’n i le blu le nso su (Nowe i afuɛ 600 su’n) yɛ nzue’n tɔli ɔ. Maan amun bu i akunndan nian. Cɛn sɔ’n nun liɛ’n, kɛ be wluli mmeli’n nun’n, b’a fiteman kun. Zoova ɲinnin mmeli’n i anuan’n kpɛkun nzue’n boli tɔlɛ’n bo. Nzue ng’ɔ tɔli’n w’a yoman kaan. Ɔ ti kɛ jenvie’n yɛ ɔ fin ɲanmiɛn su lɔ utuli sa. (Bob. 7:11, 15, 16) Sran nga be o mmeli’n i klun lɔ’n be fiteli nun. Sanngɛ be nga be o gua su wa’n, be wuli. ?Kɛ amun niɛn i sa’n, wafa sɛ yɛ Nowe nin i awlobofuɛ’m be wun yoli be ɔ? Ɲanmiɛn i mo cɛ yɛ bé yó ɔ. Asa ekun’n, be kwla seli be klun lɔ kɛ: ‘Kɛ e fali ndɛ nga Ɲanmiɛn kannin’n su mɔ e buabuali e wun sieli’n, ɔ yo e fɛ o!’ (Bob. 6:9-10) Maan ɔ yo amun kɛ Armagedɔn w’a sin naan amun a fite nun naan amun su di aklunjuɛ sa. ?Ɔ su yoman amun fɛ kɛ ng’ɔ fa yoli Nowe nin i awlobofuɛ’m be sa wie?
11 Ɲanmiɛn m’ɔ kwla like kwlaa yo’n, ɔ tali nda kɛ ɔ́ núnnún Satan i mɛn nga. Like fi sa kwlá tɛnndɛnmɛn i ɲrun i sɔ yolɛ’n nun. Ɔ maan amun usa amun wun kɛ: ‘?N lafi su kpa kɛ kasiɛ nga Ɲanmiɛn boli’n, wie fi sa su kaman ngbɛn? ?Yɛ n lafi su wie kɛ, kɛ be su kpɛnlɛ blɛ’n ko ju’n, saan bé kpɛ́n su?’ Sɛ ɔ ti sɔ’n, amun buabua amun wun sie. Yɛle kɛ maan amun akunndan tran “Nyanmiɛn i cɛn’n” mɔ w’a mantan koko yɛ’n, i su titi.—2 Piɛ. 3:12.
Moizi i ɲin trannin su titi
12. ?Ninnge benin mun yɛ sɛ Moizi fɛli i ɲin sieli be su’n, nn w’a kwlá yoman Ɲanmiɛn klun sa ɔ?
12 Maan e fa e ɲin e sie i sran uflɛ su. Sran sɔ’n yɛle Moizi. Sran wie’m be kwla se kɛ Moizi ti sran dan Ezipti mɛn’n nun lɔ. Afin kɛ mɔ Ezipti Famiɛn i wa bla’n fɛ i kacili i bɔbɔ klun ba’n ti’n, ɔ ɲannin ɲrun kpa. Ɔ maan sɛ ɔ ti aliɛ o, tralɛ o annzɛ tranwlɛ o, like kwlaa ng’ɔ bo sin yiɛ i’n, ɔ ti kpakpa ngunmin. Asa ekun’n, be kleli i ninnge kpanngban kpa. (An kanngan Sa Nga Be Yoli’n 7:20-22 nun.) Kpɛkun atrɛkpa’n, ɔ kwla ɲan aja like dan kpa ekun.
13. ?Ngue ti yɛ Moizi i ɲin trannin kasiɛ nga Ɲanmiɛn boli i nannan mun’n, be su ɔ?
13 Moizi i kaan nun’n, like nga i si nin i nin be kleli i’n, ɔ ukɛli i naan w’a wun kɛ Eziptifuɛ’m be amuɛn sɔlɛ’n timan like kpa mlɔnmlɔn. (Tul. 32:8) Eziptifuɛ’m be suklu’n, ɔ nin ninnge kpakpa nga be o famiɛn i awlo nun’n, b’a kwlá yoman naan Moizi w’a yaci Ɲanmiɛn sulɛ kpafuɛ’n. Kasiɛ nga Ɲanmiɛn boli i nannan mun’n, ɔ buli be su akunndan kpa. Kpɛkun ɔ kunndɛli kpa kɛ ɔ́ síesíe i wun naan ɔ́ yó Ɲanmiɛn klun sa’n. I kpa’n, Moizi seli Izraɛlifuɛ’m be kɛ: “Anannganman [“Zoova,” NW] b’ɔ ti [...] Abraam, nin Izaak, nin Zakɔb be Nyanmiɛn’n yɛ ɔ sunmannin min amun sin-ɔn.”—An kanngan Ezipt Lɔ Tulɛ 3:15-17 nun.
14. ?Ngue ti yɛ Ɲanmiɛn sulafilɛ’n ɔ nin yakpa yolɛ’n be yoli kekle mannin Moizi ɔ?
14 Moizi lafili su kɛ Ɲanmiɛn Kpli Zoova o lɛ sakpa. Ɔ timan kɛ Ezipti lɔ amuɛn mɔ be leman nguan’n be sa. Wafa ng’ɔ fa nantili’n, ɔ ti kɛ nn w’a wun “Nyanmiɛn bɔ be wun-mɛn i’n” sa. Moizi lafili su kɛ cɛn kun’n, Ɲanmiɛn i sran’m bé fín kanga nun fíte. Sanngɛ ɔ siman cɛn sɔ’n. (Ebr. 11:24, 25, 27) Le kun’n, kɛ ɔ wunnin kɛ Eziptifuɛ kun su yo Izraɛlifuɛ kun i tɛtɛ’n, ɔ jrannin Izraɛlifuɛ’n i sin. I sɔ’n kle weiin kɛ ɔ klo kpa kɛ Ebre’m be fin kanga nun fite. (Tul. 2:11, 12) Kɛ mɔ blɛ nga Zoova siesieli i kɛ ɔ́ fá dé be’n nin a juman’n ti’n, Moizi wanndili ɔli nvle uflɛ nun mmua kpa. Ɔ ti weiin kɛ aawlɛ flɛnnɛn’n nun lɔ tranlɛ’n yoli kekle mannin Moizi. Afin laa’n, ɔ trannin pɔɔ nun Ezipti famiɛn’n i awlo lɔ. Sanngɛ, Moizi buɛbuɛli i wun sieli. Like ng’ɔ kle sɔ’n, yɛle kɛ ndɛ kwlaa nga Zoova kannin’n, ɔ fali su. Ɔ maan kɛ ɔ dili afuɛ 40 Madian nvle’n nun lɔ’n, Ɲanmiɛn kwla fɛli i kɛ ɔ ko de i niaan Izraɛlifuɛ mun. Kɛ Ɲanmiɛn seli Moizi kɛ ɔ sɛ i sin Ezipti lɔ’n, w’a sisimɛn i bo kaan sa. Blɛ nga Ɲanmiɛn klo kɛ Moizi ko di i junman’n wafa ng’ɔ ti Ɲanmiɛn bɔbɔ liɛ’n su’n, w’a ju siɛn’n. (Tul. 3:2, 7, 8, 10) Kɛ Moizi m’ɔ ‘ti wun ase kanfuɛ dan’n,’ ɔ juli Ezipti lɔ’n, ɔ nin i fatali kɛ ɔ lafi Ɲanmiɛn su kpa yɛ ɔ jran kekle naan w’a kwla ɔ Faraɔn i ɲrun lɔ. (Kal. 12:3) I sɔ yɛ ɔ yoli ɔ. Sanngɛ w’a yoman sɔ kpɛ kunngba cɛ. Ɔ yoli sɔ lele naan Ɲanmiɛn w’a jran ɲrɛnnɛn ng’ɔ fali be yili i Eziptifuɛ’m be su’n. ?Sanngɛ ɲrɛnnɛn nɲɔn be afiɛn’n, Moizi kó jrán Faraɔn i ɲrun kpɛ nɲɛ? I lɛ’n, ɔ simɛn i.
15. ?Kannzɛ Moizi i wla boli wun kpɛ sunman’n, sanngɛ ngue yɛ maan ɔ kunndɛli kɛ ɔ́ mánmán i Si m’ɔ o ɲanmiɛn su lɔ’n titi ɔ?
15 Afuɛ 40 nga Izraɛlifuɛ’m be wlannin aawlɛ flɛnnɛn’n nun lɔ’n, ninnge wie’m be boli Moizi i wla. Sanngɛ, Zoova i manmanlɛ’n i wun atin yɛ ɔ kunndɛli ɔ. Asa ekun’n, ɔ tuli i klun wlɛli i niaan Izraɛlifuɛ’m be fanngan kɛ be yo sɔ wie. (Mml. 31:1-8) ?Ngue ti ɔ? Afin Zoova i dunman’n ɔ nin atin’n m’ɔ le i sie nglo’n nin asiɛ’n, be yoli i cinnjin trɛli i bɔbɔ i dunman’n liɛ’n. (Tul. 32:10-13; Kal. 14:11-16) Kannzɛ e wla bo e wun annzɛ e wun sa wie w’a yoman ye’n, ɔ fata kɛ e kusu e suan Ɲanmiɛn i sielɛ’n bo titi. Afin e lafi su kɛ ɔ yo ninnge mun ngwlɛlɛ su tra sran kwlaa. Yɛ wafa ng’ɔ fa yo ninnge mun’n ɔ ti su, kpɛkun ɔ ti kpa tra sran kwlaa liɛ’n. (Eza. 55:8-11; Zer. 10:23) ?Kɛ ɔ yo amun sɔ wie ɔ?
An tran minndɛ!
16, 17. ?Ngue ti yɛ ndɛ ng’ɔ o Mark 13:35-37 nun’n, ɔ ti e cinnjin ɔn?
16 “An fa sie amun klun kpa, an tran minndɛ, afin an si-man cɛn nga sa sɔ’m bé yó’n.” (Mar. 13:33) I nun mɔ Zezi kán nzɔliɛ ng’ɔ́ klé kɛ mɛn nga su wa nunnun’n i ndɛ’n, yɛ ɔ mannin afɔtuɛ sɔ’n niɔn. Amun nian Zezi i ndɛ nanndoliɛ sɔ’n i atabo’n mɔ Mark klɛli’n. I waan: “An tran minndɛ i, afin an si-man cɛn nga awlo kpɛn’n bá-a, sɛ nnɔsua o, sɛ kɔnguɛ o, sɛ akɔ nyinman klikli su o, sɛ nglɛmun o. An tran minndɛ i, nán maan ɔ w’a to amun nvlunuɛn nun kɛ an su lafi. Ndɛ nga ń kán klé amun yɛ’n, n kan kle sran’m be kwlaa kɛ be tran minndɛ.”—Mar. 13:35-37.
17 Zezi i afɔtuɛ ng’ɔ mannin’n, ɔ yo maan e bu akunndan. Ɔ kan blɛ fanunfanun nnan be ndɛ. Blɛ fanunfanun nnan sɔ’m be nun kasiɛnfuɛ’n, ɔ kwla yo kekle man sran ng’ɔ kunndɛ kɛ ɔ́ trán mínndɛ naan ɔ lafiman’n. Afin blɛ sɔ’n fɛ i kɔnguɛ afiɛn dɔ nsan su lele fa ju nglɛmun nun kɛ wia’n ɔ́ tú i bo’n. I sɔ blɛ liɛ nun yɛ alɛ difuɛ’m be waan ɔ ti kpa kɛ be ko fu be kpɔfuɛ’m be nun ɔn. Afin i sɔ blɛ liɛ nun’n, atrɛkpa’n be kpɔfuɛ’m be “su lafi.” I kunngba’n, kɛ é bó Ɲanmiɛn Sielɛ’n i jasin fɛ’n mɔ sran’m be sieman be su’n, kɛ ɔ yo naan e tran minndɛ’n, ɔ kwla yo kekle man e. Zezi seli kɛ e “tran minndɛ” mɛn’n i awieliɛ’n ɔ nin e delɛ’n be su ndɛ ng’ɔ kannin’n, naan e ‘fa sie e klun kpa.’ ?E bu i kɛ Zezi i ndɛ yo fɛ?
18. ?Cenjele like benin yɛ e mɔ e ti Zoova i Lalofuɛ mun’n, e le i ɔ?
18 Bian ng’ɔ fa nnɛn kan sran’m be ɲrun ngowa mɔ e dun mmua kɛnnin i ndɛ kɛ nnɛn’m be nun kun tɔli i su’n, w’a wuman. Sanngɛ Biblu’n kle weiin kɛ, i Ɲanmiɛn sulɛ wafa ng’ɔ timan su’n nin o, i mɛn tɛ nga i nun sran mun o, be wie fi su kwlá finman Ɲanmiɛn i cɛn’n nun fiteman. (Ngl. 18:4-8) Maan Ɲanmiɛn sufuɛ’m be kwlaa, i kpɛnngbɛn o, i gbanflɛn nin talua mun o, be wun i kɛ ɔ ti cinnjin kɛ be buabua be wun be minndɛ Zoova i cɛn’n kɛ Nowe nin i awlobofuɛ’m be fa yoli’n sa. Mɛn nga e o nun yɛ’n i nun sran’m be saci Ɲanmiɛn i dunman. Ɲanmiɛn sulɛ wafa ng’ɔ timan su’n be like klefuɛ mun, ɔ nin be nga be lafiman Ɲanmiɛn su’n, be yo like Yifuɛ’n i finfin be ndɛ nga be kan’n nun. Sanngɛ e liɛ’n, e su yaciman e wun nun kɛ be saci e. Maan e fa sran nga e kannin be ndɛ fluwa nga nun’n, be ajalɛ’n su naan e buabua e wun naan y’a kwla jran Zoova sin y’a mɛnmɛn i. Afin Zoova “ti dan tra amuɛn’m be ngba.” Nanwlɛ, “ɔ ti Nyanmiɛn Kpli, ɔ lɛ wunmiɛn, ɔ yo sro.”—Mml. 10:17.
[Ja ngua lɛ ndɛ’n]
^ Sɛ amun waan amún wún “afuɛ ya [kun] ablaɔn” nga Bo Bolɛ 6:3 kɛn i ndɛ’n i wlɛ’n, amun nian Sasafuɛ Tranwlɛ’n afuɛ 2010, Desamblu 15 i bue 30 nun (Blɔfuɛ nun).
Amun wla kwla kpɛn su?
• ?Ngue ti yɛ ɔ nin i fatali kɛ Nowe yo naan ɔ nin i awlobofuɛ’m be Ɲanmiɛn sulɛ’n yo be cinnjin tra like kwlaa ɔ?
• ?Ngue nun yɛ e blɛ liɛ’n nin Nowe liɛ’n be fa be wun ɔn?
• ?Kannzɛ Moizi i wla boli i wun’n, sanngɛ ngue ti yɛ ɔ fɛli i ɲin sieli i Zoova i kasiɛ’m be su ɔ?
• ?Biblu’n nun kasiɛ benin yɛ ɔ uka amun naan amun a kwla tran b’a minndɛ ɔ?
[Kosan mun]
[Foto, bue 25]
Nowe nin i awlobofuɛ’m be niannin nun dili junman nga Zoova mannin be’n.
[Foto, bue 26]
Ɲanmiɛn i kasiɛ’m be kaman ngbɛn. I sɔ liɛ’n ukali Moizi naan i ɲin w’a tran su titi.