Maan e suan Ɲanmiɛn Ndɛ’n nun like

?Wan yɛle Ɲanmiɛn Kpli?

Ndɛ akpasua nga, ɔ tɛ kosan wie mun mɔ atrɛkpa’n, amun fa usali amun wun’n be su. Yɛ ɔ kle e Biblu’n i bue nga e kwla kanngan nun’n, naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?Wan yɛle Ɲanmiɛn Kpli?

Ɲanmiɛn Kpli yɛ ɔ ti ninnge’m be kwlaa be Yifuɛ’n niɔn. Biblu’n flɛ i “Famiɛn b’ɔ ti anannganman’n.” Ɔ kɛn i sɔ fa kle kɛ Ɲanmiɛn wuman, ɔ o lɛ titi. (1 Timote 1:17) Kɛ mɔ nguan’n fin Ɲanmiɛn ti’n, ɔ fata kɛ i kunngba cɛ yɛ e su i ɔ.—An kanngan Sa Nglo Yilɛ 4:11 nun.

2. ?Ɲanmiɛn Kpli ti wafa sɛ?

Sran fi nin a wunman Ɲanmiɛn le afin ɔ ti aolia nun sran. Aolia nun sran’m be le ɲrun be tra asiɛ’n su wa ninnge kwlaa nga be le nguan’n, mɔ e ɲin kwla ta be’n. (Zan 1:18; 4:24) Sran’n i wafa nga Ɲanmiɛn ti’n, i ɲin fite ninnge kwlaa ng’ɔ yili be’n nun. I wie yɛle kɛ, kɛ e bo e ɲin ase e nian waka mma mun, ɔ nin waka nɲa fanunfanun mun’n, e wun i wlɛ weiin kɛ Ɲanmiɛn klo sran. Naan kusu’n, ɔ ti akunndanfuɛ. Kɛ e nian asiɛ’n ɔ nin wafa nga ɲanmiɛn m’ɔ la nglo lɔ plaii’n i tɛtrɛ’n fa ti’n, e wun wafa nga Ɲanmiɛn i tinmin’n kusu’n fa ti’n.—An kanngan Rɔmfuɛ Mun 1:20 nun.

Biblu’n kwla uka e kpa ekun naan y’a wun sran’n i wafa nga Ɲanmiɛn ti’n. I wie yɛle kɛ Biblu’n kle e like nga Ɲanmiɛn klo i’n, ɔ nin ng’ɔ kpɔ i’n. Asa’n, ɔ kle e wafa ng’ɔ nin sran be tran’n. Yɛ kɛ sa wie tɔ’n, ɔ kle e ajalɛ nga Ɲanmiɛn fa’n.—An kanngan Jue Mun 103:7-10 nun.

3. ?Ɲanmiɛn Kpli le dunman?

Zezi seli kɛ: “N Si, yo maan ɔ dunman’n fu.” (Zan 12:28) Kannzɛ Ɲanmiɛn i manmanlɛ dunman’n sɔnnin’n, sanngɛ i dunman bɔbɔ ba sa’n, ɔ ti kunngba cɛ. Kɛ be bo dunman sɔ’n, ɔ le wafa nga ɔ tɛ aniɛn kun nun ɔn. Wawle nun’n e sɛ kɛ “Zoova.”—An kanngan Jue Mun 83:18 nun *

Biblu’n kaka nun’n, be fali Ɲanmiɛn i manmanlɛ dunman wie kɛ Min annzɛ Ɲanmiɛn annzɛ Anannganman sa, be sieli i dunman bɔbɔ ba’n i osu. Sanngɛ i klikli nun’n, kɛ be klɛli Biblu’n, Ɲanmiɛn i dunman’n wo nun kpɛ kɔe 7.000. Kɛ Zezi yíyí Ɲanmiɛn Ndɛ’n nun klé sran mun’n, ɔ yoli maan be sili Ɲanmiɛn i dunman’n. Ɔ maan, ɔ ukali sran mun maan be sili Ɲanmiɛn.—An kanngan Zan 17:26 nun.

 4. ?E wun sa lo Zoova?

Kɛ e srɛ Zoova’n, i bɔbɔ yɛ ɔ tie ɔ. I sɔ’n kle kɛ e ndɛ lo i. (Jue Mun 65:3) ?Ɲrɛnnɛn mɔ w’a tru yɛ’n, ɔ kle kɛ e wun sa loman Ɲanmiɛn? Sran wie’m be waan Ɲanmiɛn fa ɲrɛnnɛn’n fa yi e su. Naan ɔ yo i sɔ fa sa e nian. I sɔ mɔ be kan’n, ɔ timan nanwlɛ. Afin Biblu’n se kɛ: “Klunwi yolɛ’n [...] timan Ɲanmiɛn i nzuɛn mlɔnmlɔn.”—Zɔb 34:10; an kanngan Zak 1:13 nun.

Ɲanmiɛn buli e sran. Yɛle kɛ, kɛ ɔ boli e’n, ɔ yoli maan e tinuntinun e kwla fa e tiaun ajalɛ. Kɛ e bɔbɔ e fa e klunklo ajalɛ e su Ɲanmiɛn’n, ɔ yo e fɛ. ?Nɛ́n i ɔ? (Zozie 24:15) Klunwifuɛ’m b’a sɔn. I ti yɛ sran’m be wun be ɲrun’n niɔn. Zoova klun jɔman abɔlɛ sa sɔ’m be su kaan sa.—An kanngan Bo Bolɛ 6:5, 6 nun.

Ɔ ka kan’n, Zoova maan Zezi núnnún be kwlaa nga be fa ɲrɛnnɛn yi sran su’n. Ɔ maan, ɲrɛnnɛn kwlaa wíe. Sanngɛ ikisa’n, sɛ Zoova yaci sran’m be lɛ naan be fɛ kan’n, nán ngbɛn ti ɔ. Ndɛ akpasua kunngba nga i like suanlɛ uflɛ nun’n, é wá wún sa nga ti yɛ Ɲanmiɛn yaci sran mun lɛ mɔ be wun ɲrɛnnɛn’n.—An kanngan Ezai 11:4 nun.

5. ?Ngue like yɛ Ɲanmiɛn Kpli kunndɛ kɛ e yo ɔ?

Kɛ Zoova boli e’n, ɔ yoli maan e kwla suɛn i silɛ, ɔ nin i klolɛ. Ɔ kunndɛ kɛ e suɛn i su ndɛ nanwlɛ’n. (1 Timote 2:4) Sɛ e suan Biblu’n nun like’n, e kwla kaci Ɲanmiɛn i janvuɛ.—An kanngan Nyanndra Mun 2: 4, 5 nun.

E nguan’n fin Zoova. I sɔ’n ti’n, ɔ fataman kɛ e klo sran uflɛ e tra Ɲanmiɛn. Kɛ e nin i e koko yalɛ’n, mɔ e yo i klun sa’n, e yi i nglo kɛ e klo i. (Nyanndra Mun 15:8) Zoova waan e nin sran mun e tran klolɛ su.—An kanngan Mark 12:29, 30; 1 Zan 5:3 nun.

[Ja ngua lɛ ndɛ’n]

Sɛ amun kunndɛ kɛ amún sí nun ekun’n, amun kwla nian fluwa ?Ngue like yɛ Biblu’n kle i sakpasakpa ɔ? i ndɛ tre 1 nun. Zoova i Lalofuɛ mun yɛ be yili ɔ.

[Foto, bue 23]

?Kɛ Ɲanmiɛn yaci sran’m be lɛ mɔ be fɛ kan’n, i su ɔ?