Kingdom News Num. 36

An Bagong Milenyo—Ano an Tagama kan Ngapit Para sa Saindo?

 An Bagong Milenyo—Kapinonan daw nin Bagong Panahon?

KAN matangang banggi nin Disyembre 31, 1999, natapos an ika-20 siglo. a Idto sarong siglo na kadakol na grabeng kariribokan an inagihan. Alagad inagihan man kaiyan an kapinonan nin bagong mga teknolohiya, pambihirang mga pag-oswag sa medisina, biglang pagdakol nin impormasyon, asin lakop sa globong ekonomiya na marikas an pag-asenso. Kun siring, an bagong milenyo sinabat nin dakol bilang simbolo nin paglaom asin pagbago. Maeeksperyensiahan daw kaiyan an pagkatapos nin guerra, kadukhaan, polusyon kan palibot, asin helang?

Iyan an paglaom nin dakol. Alagad gurano an posibilidad na an bagong milenyo magbubunga nin mga pagbago na pakikinabangan nindo​—mga pagbago na gigibohon na salbado asin tiwasay an buhay para sa saindo asin sa saindong pamilya? Estudyare kun gurano kagrabe kan nagkapira sana sa mga problemang inaatubang niato.

Polusyon

An industrialisadong mga nasyon “ginigikanan nin lakop sa globo na danyos sa palibot asin nin lakop na polusyon saka pagkaraot kan mga sistema nin ekolohiya.” Kun magpapadagos an presenteng dalagan nin mga bagay, “an natural na palibot paorog nang paorog na masasakitan.”​—“Global Environment Outlook​—2000,” United Nations Environment Programme.

Helang

“Sa taon 2020, an mga helang na dai nakaoolakit inaantisipar na magin pangenot na dahelan kan pito sa kada sampulong pagkagadan sa mga rehion na nagpoprogreso pa sana, kun ikokomparar sa mayo pang kabanga ngonyan.”​—“The Global Burden of Disease,” Harvard University Press, 1996.

Sinasabi nin nagkapirang eksperto na “sa 2010, maiinaan nin 66 milyones katawo [an buhay] sa 23 na nasyon na pinakagrabe an epidemya [nin AIDS].”​—“Confronting AIDS: Evidence From the Developing World,” sarong report kan European Commission asin kan World Bank.

Kadukhaan

“Haros 1.3 bilyones katawo an nabubuhay sa mayo pang sarong dolyar kada aldaw, asin haros 1 bilyon an dai napaninigoan an saindang kaipuhan na kakanon.”​—“Human Development Report 1999,” United Nations Development Programme.

Guerra

“An kadahasan sa mismong [manlaenlaen na nasyon] puedeng umabot sa mga sokol na dai pa nangyari kaidto. Gikan sa [pagkabaranga] sa rasa, tribo, asin relihion, . . . an siring na kadahasan iyo . . . an magigin pinakalakop na klase nin iriwal sa masunod na 25 anyos . . . , na ginatos na ribo katawo an gagadanon kada taon.”​—“New World Coming: American Security in the 21st Century,” U.S. Commission on National Security/21st Century.

Kun siring, tinatahoban kan mga pasale asin kaogmahan huli sa bagong milenyo an bagay na mas grabe kisa kasuarin man an polusyon, helang, kadukhaan, asin guerra. An pinakagamot kan mga problemang ini kahanaban, pagdeskompiar, asin kaimotan​—mga ugale na dai basta mahahale nin sientipikong pag-estudyar, teknolohiya, o politika.

 An Milenyo na Mabendisyon sa Katawohan

Sarong beses nagkomento an sarong suanoy na parasurat: “Bakong kapot nin daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jeremias 10:23) Mayo sa tawo bako sanang an abilidad kundi pati an diretso na mamahala sa daga. Solamente an Kaggibo sa sato, si Jehova Dios, an may diretso asin may pakatatao na resolberan an mga problema nin katawohan.​—Roma 11:​33-36; Kapahayagan 4:11.

Alagad noarin? Paano? Dakulaon an ebidensia na harani na kita sa katapusan kan “huring mga aldaw.” Buksi tabi an saindong Biblia, asin basaha nindo an 2 Timoteo 3:​1-5. Buhay na buhay na isinasaysay kaiyan an mga ugaleng ipaheheling nin mga tawo durante kaining “delikadong mga panahon.” Ilinaladawan man kan Mateo 24:​3-14 asin Lucas 21:​10, 11 an “huring mga aldaw.” Iyan nagkokonsentrar sa pisikal na mga nangyari poon kan 1914, arog baga kan guerrang lakop sa globo, mga peste, asin lakop na kakulangan nin kakanon.

Dai na mahahaloy matatapos an “huring mga aldaw.” Sabi kan Daniel 2:​44: “An Dios nin kalangitan mapatindog nin sarong kahadean na dai noarin man malalaglag. . . . Iyan an maronot asin matapos kan gabos na ining [daganon na] kahadean, asin iyan mismo magdadanay sagkod sa mga panahon na daing talaan.” Sa siring ihinula na an Dios maestablisar nin sarong Kahadean, o gobyerno, na mamamahala sa daga. Segun sa Kapahayagan 20:​4, an gobyernong ini mamamahala sa laog nin sangribong taon​—sarong milenyo! Estudyare an nagkapira sana sa mga paagi na marahay an pamumuhay para sa bilog na katawohan durante kan mamuraway na Milenyong ini:

Ekonomiya. “Sinda siertong matogdok nin mga harong asin maontok sinda dian; asin siertong matanom sinda nin mga ubasan asin kakakanon ninda an bunga kaiyan. Dai sinda matogdok asin iba an maontok; dai sinda matanom asin iba an makakan.”​—Isaias 65:​21, 22.

Salud. “Sa panahon na iyan an mga mata kan mga buta magkakaburuklat, asin an mismong mga talinga kan mga bungog magkakaburukasan. Sa panahon na iyan an pilay matukad na garo lalaking usa, asin an dila kan pula makurahaw sa kaogmahan.” “Asin mayo nin nag-eerok na masabi: ‘Naghehelang ako.’”​—Isaias 33:​24; 35:​5, 6.

Palibot. ‘Lalaglagon nin Dios an mga naglalaglag kan daga.’​—Kapahayagan 11:18.

Relasyon nin Tawo. “Dai sinda magibo nin maraot o manraraot sa bilog kong banal na bukid; huli ta an daga mapapano nanggad kan kaaraman dapit ki Jehova.”​—Isaias 11:9.

Minilyon an may pagtubod sa mga panugang ini kan Biblia asin huli kaini nagkamit nin optimista, positibong punto de vista manongod sa ngapit. Bilang resulta, mas nakakaya ninda an mga sakit asin problema sa buhay. Paano daw an Biblia magigin naggigiyang puersa sa saindong buhay?

 An Kaaraman na Minagiya Pasiring sa Buhay!

Kun beses nakagugulat an siensia asin teknolohiya! Pero, dai nagibo kan kaaraman nin tawo na magin tiwasay asin maogma an buhay para sa kadaklan na tawo. An solamenteng kaaraman na makagigibo kaini sinasabi sa Biblia sa Juan 17:​3, na nagsasabi: “Ini nangangahulogan nin buhay na daing katapusan, an saindang paglaog sa isip nin kaaraman dapit sa saimo, na iyo sanang tunay na Dios, asin dapit sa saro na saimong sinugo, si Jesu-Cristo.”

An siring na kaaraman yaon sa mga pahina kan Biblia. Minsan dakol an nagpapahayag nin mapuersang mga opinyon mapadapit sa sagradong librong iyan, pipira an siniyasat na mismo iyan. Kumusta man kamo? Totoo, an pagbasa kan Biblia nagkakaipo nin awad-awad na paghihingoa. Alagad iyan bakong sayang. An Biblia an solamenteng libro na “ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan.”​—2 Timoteo 3:16.

Kun siring, paano kamo makapopoon na magin pamilyar sa Biblia? Taano ta dai patabang sa Mga Saksi ni Jehova? Sinda nagtotokdo sa minilyon sa sadiri nindang harong, na daing bayad. Tanganing matabangan kamo sa bagay na ini, ginagamit ninda an manlaenlaen na publikasyon na basado sa Biblia, arog baga kan brosyur na Ano an Kahagadan sa Sato nin Dios? Itinatao kaiyan an diretso sa puntong mga simbag sa dakol sa tibaad hapot nindo mapadapit sa Biblia, arog baga kan: Siisay an Dios? Ano an katuyohan nin Dios para sa daga? Ano an Kahadean nin Dios? Paano mapararahay kan Biblia an saindong buhay pampamilya?

Kun gusto nindo na sumongko sa saindong harong an saro sa Mga Saksi ni Jehova, tabi llenaran an kupon sa ibaba. Maoogma sindang tawan kamo nin dugang na impormasyon manongod sa mamuraway na Milenyal na Paghade kan Kahadean nin Dios!

□ Gusto kong makaresibi kan brosyur na Ano an Kahagadan sa Sato nin Dios? Isurat an lenguaheng gusto

□ Tabi kaolayon ako may labot sa daing bayad na pag-adal sa Biblia

[Nota sa Ibaba]