Nagdakula ako sa Los Angeles, California, U.S.A., sa mga lugar na bantog dahil sa mga gang asin droga. Ikaduwa ako sa anom na magturugang.

Pinadakula kami ni Nanay bilang miyembro kan sarong evangelical church. Pero kan tin-edyer ako, nagkaigwa ako nin dobleng pamumuhay. Pag Domingo, nagkakanta ako sa choir sa simbahan. Tapos sa ibang mga aldaw, pirmi akong nakikiparti, nagdodroga, saka naggigibo nin seksuwal na imoralidad.

Arangguton ako saka bayolente. Maski ano ginagamit kong armas para lang madaog an iba. Dai nakatabang sako an mga nanudan ko sa simbahan. Parati kong sinasabi kaidto, “Sa Kagurangnan an pagbalos—asin ako an instrumento niya!” Kan hayskul ako kan huring mga taon kan dekada ’60, naimpluwensiyahan ako kan Black Panthers, sarong pulitikal na grupo na midbid sa agresibong pakikipaglaban para sa mga isyu sa mga deretso sibil. Nagbali ako sa sarong unyon nin mga estudyante na ipinapakipaglaban an mga deretso sibil. Nagkapirang beses kaming nagprotesta, asin sa kada pagprotesta mi, temporaryong isinasara an eskuwelahan.

Pero garo baga kulang an pagpoprotesta para makontento ako sa pagigin bayolente ko. Kaya nakiiba ako sa paggibo nin mga krimen na dahil sa pagkaungis. Halimbawa, may pagkakataon na naghiling kaming pelikula kan mga amigo ko kun sain ipinapahiling duman an mga pagsakit na inagihan kaidto sa Estados Unidos kan mga uripon na Aprikano. Sa grabeng kaanggutan dahil sa mga inhustisyang idto, nambugbog kami nin mga hoben na puti duman mismo sa laog kan sinehan. Pagkatapos, nagduman kami sa mga lugar na pig-iistaran nin mga puti para maghanap pa nin mga mabubugbog.

Kan madali na akong mag-20 anyos, naimbuwelto na ako saka an mga tugang ko sa madadahas na krimen. Nagkaproblema kami sa mga awtoridad. An saro sa nguhod kong tugang na lalaki miyembro nin sarong kinakatakutan na gang, asin nagbali ako sa sainda. Lalong napaparaot an buhay ko.

May saro akong amigo na mga Saksi ni Jehova an mga magurang. Inimbitaran ninda ako sa saindang pagtiripon kan kongregasyon, asin nag-atender ako. Sa puon pa sana, nahiling kong ibang-iba an mga Saksi. Gabos igwa nin Bibliya tapos ginagamit ninda iyan sa pagtiripon. May mga hoben pa ngani na may mga kabtang sa pagtiripon! Napangalas ako kan maaraman kong may pangaran an Diyos, Jehova, asin kan madangog kong ginagamit iyan. (Salmo 83:18) Igwa nin iba-ibang nasyonalidad sa saindang kongregasyon, pero hiling-hiling na mayo duman nin pagkabaranga huli sa rasa.

Kan inot, habo kong makipag-adal nin Bibliya sa mga Saksi, pero gusto kong mag-atender sa mga pagtiripon ninda. Sarong banggi, mantang nag-aatender ako sa pagtiripon kan mga Saksi, sarong grupo nin mga amigo ko an naghiling nin sarong concert. Binugbog ninda duman an sarong tin-edyer sagkod na magadan dahil habo niyang itao sainda an jacket niyang leather. Kan sunod na aldaw, ipinaghambog pa ninda an ginibo nindang paggadan. Pigngisihan pa ngani ninda su ginibo nindang krimen kan pigbibista sinda sa korte. An kadaklan sa sainda nasentensiyahan nin habangbuhay na pagkapreso. Kaya pasalamat akong marhay na dai ninda ako kaibanan kan bangging idto. Determinado na akong baguhon an sakong buhay asin mag-adal nin Bibliya.

Dahil dakulon na akong nahiling na pagpapalain-lain huli sa rasa, napangalas akong marhay sa nahiling ko sa mga Saksi. Halimbawa, kan magbiyahe pasiring sa ibang nasyon an sarong Saksi na puti, iwinalat niya an saiyang mga aki sa sarong pamilyang itom. Saro man na pamilyang puti an nagpadagos sa sarong hoben na itom na nangangaipo nin maiistaran. Nagin kumbinsido ako na totoo sa mga Saksi ni Jehova an sinabi ni Jesus sa Juan 13:35: “Paagi kaini, maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” Aram kong nanumpungan ko na an tunay na kasararuan nin magturugang.

Dahil sa pag-adal ko nin Bibliya, narealisar kong kaipuhan kong baguhon an sakong kaisipan. Kaipuhan kong baguhon an sakong isip, bako lang para magin mapagpatuninong kundi dahil nahiling ko man na iyo ini an pinakamarahay na paagi nin pamumuhay. (Roma 12:2) Padikit-dikit akong nag-uswag. Kan Enero 1974, nabawtismuhan ako bilang saro sa mga Saksi ni Jehova.

Pero dawa bawtisado na ako, kaipuhan kong padagos na kontrulon an sakong pagigin arangguton. Halimbawa, sarong beses mantang naghuhulit sa harong-harong, linapag ko an sarong parahabon na kuminua kan radyo sa awto ko. Kan maaabutan ko na siya, binutasan niya an radyo asin duminulag na. Kan inistorya ko sa iba kun paano ko nabawi su radyo ko, hinapot ako kan sarong elder sa grupo, “Stephen, anong gigibuhon mo kun nadakop mo idto?” Napaisip ako kan hapot na idto asin namotibar na padagos na hinguwahon na magin mapagpatuninong.

Kan Oktubre 1974, nagpuon akong maglingkod bilang bilog na panahon na ministro, na naggagamit nin 100 na oras kada bulan para magtukdo nin Bibliya sa iba. Paghaloy-haloy, nagkapribilehiyo ako na magboluntaryo sa world headquarters kan Mga Saksi ni Jehova sa Brooklyn, New York. Kan 1978, nagbalik ako sa Los Angeles para atamanon an naghihilang kong ina. Pakalihis nin duwang taon, nagpakasal kami kan namumutan kong agom na si Aarhonda. Nagin dakulang tabang nanggad siya sako mantang inaataman mi an sakong ina sagkod sa magadan ini. Pag-abot nin panahon, nagklase kami ni Aarhonda sa Watchtower Bible School of Gilead asin inasignaran sa Panama, kun sain kami padagos na naglilingkod bilang mga misyonero.

Puon kan mabawtismuhan ako, napaatubang ako sa dakul na sitwasyon na puwede kutang nagin bayolente an reaksiyon ko. Nanudan kong rumayo na lang sa mga tawo na nagpupurbar na paangguton ako o kaya pakalmahon na lang an sitwasyon sa ibang paagi. Kinomendaran ako kan dakul, kaiba na an agom ko, sa kun ano an ginibo ko sa mga sitwasyon na idto. Dawa ako nasurpresa! Aram kong dai ko magigibo an mga pagbabagong ini sa personalidad ko na ako sana. Imbes, nagtutubod ako na pruweba ini kan kakayahan kan Bibliya na baguhon an sarong tawo.—Hebreo 4:12.

Dahil sa Bibliya, nagkaigwa nin katuyuhan an buhay ko asin tinukduan ako kaiyan na magin tunay na mapagpatuninong. Dai na ako nambubugbog nin tawo; imbes, tinatabangan ko sinda ngunyan na magkaigwa nin marahay na relasyon sa Diyos. Nagin Bible study ko pa ngani su saro kong kaiwal kan hayskul! Pagkatapos niyang mabawtismuhan, nagin mag-roommate kami sa halipot na panahon. Sagkod ngunyan, mag-amigo kaming marhay. Igwa na kaming natabangan ni agom na labing 80 katawo na magin mga Saksi ni Jehova paagi sa pagtukdo sa sainda sa Bibliya.

Nagpapasalamat nanggad ako ki Jehova na tinawan niya ako nin makahulugan asin maugmang buhay sa tahaw nin tunay na kasararuan nin magturugang.