Kingdom News Num. 37

Sarong Mensahe Para sa Bilog na Kinaban

Harani Na an Katapusan kan Falsong Relihion!

▪ Ano an falsong relihion?

▪ Paano iyan matatapos?

▪ Paano ka maaapektaran?

 Ano an Falsong Relihion?

Napupurisaw daw kamo sa mga krimen na nakokomiter sa ngaran nin relihion? Huling kamo may pakamate nin hustisya, nakokolgan daw an saindong boot kan mga guerra, terorismo, asin karatan na ginigibo kan mga naghihingakong naglilingkod sa Dios? Taano daw an relihion ta garo baga iyong ginigikanan nin kadakol na problema?

An depekto yaon, bakong sa gabos na relihion, kundi sa falsong relihion. Sinabi nin sarong iginagalang nin dakol na personahe sa langtad nin relihion, si Jesu-Cristo, na an falsong relihion nagpapaluwas nin maraot na mga gibo, kun paanong an sarong “kahoy na raot nagbubunga nin daing data.” (Mateo 7:15-17) Ano daw an bunga kan falsong relihion?

An Falsong Relihion . . .

◼ NAG-EENTREMETER SA GUERRA ASIN POLITIKA: “Sa Asia saka sa iba pang lugar,” an sabi kan magasin na Asiaweek, “an mga namomoon na gutom sa kapangyarihan mapagtuyang minamanipular an relihiosong mga sentimiento kan mga tawo para sa sadiri nindang mga pangangaipo.” Bilang resulta, an magasin nagpapatanid: “An kinaban garo baga madali nang mabua.” An sarong prominenteng namomoon sa relihion sa Estados Unidos nagsabi: “Kaipuhan na gadanon an mga terorista tanganing mapondo an saindang panggadan.” An solusyon nia? “Uboson sindang gadanon sa ngaran kan Kagurangnan.” Sa kabaliktaran, an Biblia nagsasabi: “Kun an siisay man nagsasabi: ‘Namomoot ako sa Dios,’ pero naoongis sia sa saiyang tugang, sia putikon.” (1 Juan 4:20) Nagsabi pa ngani si Jesus: “Padagos na kamotan an saindong mga kaiwal.” (Mateo 5:44) Pirang relihion an naiisip nindo na an mga miembro kaiyan nagpapartisipar sa guerra?

◼ NAGTOTOKDO NIN FALSONG DOKTRINA: An kadaklan na relihion nagtotokdo na an kalag o espiritu sarong dai naheheling na kabtang nin tawo na nagdadanay na buhay pagkagadan kan pisikal na hawak. Paagi sa katokdoan na ini, dakol sa mga relihion na ini an inaaprobetsaran an saindang mga miembro, na nagpapabayad sa pagpamibi para sa kalag kan mga gadan. Minsan siring, an Biblia nagtotokdo nin laen na doktrina. “An kalag na nagkakasala—iyan mismo magagadan.” (Ezequiel 18:4) “An mga buhay nakakaaram na sinda magagadan; alagad kun dapit sa mga gadan, mayo man lamang sinda nin pakaaram.” (Eclesiastes 9:5) Itinokdo ni Jesus na an mga gadan bubuhayon liwat—bagay na dai na kaipuhan na gibohon kun an mga tawo igwa nin inmortal na kalag. (Juan 11:11-25) An saindo daw na relihion nagtotokdo na an kalag dai nagagadan?

◼ NAGKOKONSINTE SA INMORAL NA SEKSO: Sa mga nasyon sa Solnopan, an mga relihiosong grupo inoordenan na magin mga miembro kan klero an mga binabae asin linalaki asin sinasadol ninda an mga gobyerno na rekonoseron an mga pag-agoman nin magkasekso. Dawa an mga iglesia na nagkokondenar sa inmoralidad kinokonsinte an mga namomoon sa relihion na seksuwal na nan-abuso nin mga aki. Pero, ano daw an itinotokdo kan Biblia? Iyan sayod na nagsasabi: “Dai kamo palagalag. Bakong mga parapakisaro, ni mga parasamba sa idolo, ni mga parasambay, ni mga binabae, ni mga lalaki na minadorog sa kapwa lalaki . . . an magmamana kan kahadean nin Dios.” (1 Corinto 6:9, 10) May aram daw kamong mga relihion na nagkokonsinte sa inmoral na sekso?

 Ano an magigin ngapit kan mga relihion na nagpapaluwas nin raot na bunga? Si Jesus nagpatanid: “An lambang kahoy na dai nagbubunga nin marahay pinuputol asin iinaapon sa kalayo.” (Mateo 7:19) Iyo, an falsong relihion papalodon asin sosoloon! Alagad paano asin noarin mangyayari ini? An simbag itinatao kan sarong makahulang bisyon na nakasurat sa libro kan Biblia na Kapahayagan, kapitulo 17 asin 18.

Paano Matatapos an Falsong Relihion?

Imahinara an eksena. Sarong patotot an nakakabayo sa sarong makatatakot na hayop. An hayop may pitong payo asin sampulong sungay. (Kapahayagan 17:1-4) Siisay an irinerepresentar kan patotot? Sia may impluwensia “sa mga hade kan daga.” Sia nakagubing nin purpura, naggagamit nin insenso, asin mayamanon. Dugang pa, paagi sa saiyang espiritistikong gawe, “an gabos na nasyon ikinalagalag.” (Kapahayagan 17:18; 18:12, 13, 23) Tinatabangan kita kan Biblia na masabotan na an patotot na ini sarong pambilog na kinaban na relihiosong organisasyon. An irinerepresentar nia, bakong sarong relihion, kundi gabos na relihion na nagpapaluwas nin raot na bunga.

An hayop na kinakabayoan kan patotot naglaladawan sa politikal na mga kapangyarihan sa kinaban. * (Kapahayagan 17:10-13) An falsong relihion nakakabayo sa politikal na hayop na ini, na nagpoprobar na impluwensiahan an mga desisyon kaini asin kontrolon an direksion kaini.

Minsan siring, dai mahahaloy, may makangangalas na mangyayari. “An sampulong sungay na naheling mo, asin an mabangis na hayop, an mga ini maoongis sa patotot asin lalaglagon patin huhubaan sia, asin kakakanon an saiyang laman asin biyo siang sosoloon sa kalayo.” (Kapahayagan 17:16) Sa sarong bigla, labi-labi kanakakakubhan na paghiro, an politikal na mga kapangyarihan sa kinaban bibirikan an falsong relihion asin biyo ining lalaglagon! Ano an magigin dahelan kan paghirong ini? An libro sa Biblia na Kapahayagan nagsisimbag: “Ibinugtak nin Dios sa saindang puso na otobon an saiyang kaisipan.” (Kapahayagan 17:17) Iyo, papaninimbagon nin Dios an falsong relihion sa gabos na makababaldeng gibo na nakomiter kaini sa saiyang ngaran. Sa paghirong may sangkap na hustisya, gagamiton nia an politikal na mga kaalyado kaini bilang saiyang instrumento sa paggadan.

Ano an kaipuhan na gibohon nindo kun habo nindong madamay sa kaaabtan kan falsong relihion? “Lumuwas kamo sa saiya, banwaan ko,” an sadol kan mensahero nin Dios. (Kapahayagan 18:4) Tunay nanggad, ngonyan na an panahon na dumulag hale sa falsong relihion! Alagad pasiring saen kamo puedeng dumulag? Bakong sa ateismo, huling iyan mayo man nin malalaoman sa ngapit. (2 Tesalonica 1:6-9) An solamenteng pailihan manonompongan sa laog kan tunay na relihion. Paano daw nindo mamimidbid an tunay na relihion?

 Kun Paano Mamimidbid an Tunay na Relihion

Anong marahay na bunga an maninigong paluwason kan tunay na relihion?—Mateo 7:17.

An Tunay na Relihion . . .

◼ NAG-OOTOB SA PAGKAMOOT: An tunay na mga parasamba “bakong kabtang kan kinaban,” dai nagkakabaranga huli sa rasa o kultura, asin “nagkakaminorootmootan.” (Juan 13:35; 17:16; Gibo 10:34, 35) Imbes na maggaradanan, andam sindang magadan para sa lambang saro.—1 Juan 3:16.

◼ NAGTITIWALA SA TATARAMON NIN DIOS: Imbes na itokdo an “tradisyon” asin “an mga pagboot nin mga tawo” bilang doktrina, an tunay na relihion ibinabasar an doktrina kaiyan sa Tataramon nin Dios, an Biblia. (Mateo 15:6-9) Taano? Huli ta “an gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay.”—2 Timoteo 3:16.

◼ NAGPAPAKOSOG SA MGA PAMILYA ASIN NAGSUSUPORTAR SA HALANGKAW NA MGA PAMANTAYAN SA MORAL: An tunay na relihion nagtotokdo sa mga agom na lalaki na “mamoot sa saindang agom na babae siring sa saindang sadiring hawak,” nagtatabang sa mga agom na babae na magpatalubo nin ‘hararom na paggalang sa saindang agom,’ asin nagtotokdo sa mga aki na ‘magin makinuyog sa saindang mga magurang.’ (Efeso 5:28, 33; 6:1) Dugang pa, an mga pinaniwalaan nin katongdan na may autoridad kaipuhan na magin arogan sa moral.—1 Timoteo 3:1-10.

Igwa daw nin relihion na nakakasunod sa mga pamantayan na ini? An librong Holocaust Politics, na ipinublikar kan 2001, nagsasabi: “Kun mas dakol na tawo an namumuhay sono sa mga katokdoan asin gawe-gawe kan Mga Saksi ni Jehova, nalikayan kutana an Holocaust asin mayo kutana nin mga paglaglag sa sarong bilog na rasa na nagpapasakit sa kinaban.”

Tunay nanggad, sa 235 nasyon, an Mga Saksi ni Jehova dai sana naghuhulit kan moral na mga pamantayan kan Biblia—iinaaplikar ninda iyan sa saindang buhay. Sinasadol niamo kamo na hagadon sa mga Saksi ni Jehova na tabangan kamong manodan kun ano an kahagadan nin Dios sa saindo tanganing masamba nindo sia sa maaakong paagi. Ngonyan na an panahon na humiro. Dai mag-atraso. Harani na an katapusan kan falsong relihion!—Sofonias 2:2, 3.

Kun gusto nindo nin dugang na impormasyon manongod sa basado sa Bibliang mensahe na ihinuhulit kan Mga Saksi ni Jehova, dai kamo mag-alangan na kontakon sinda sa adres na nasa ibaba.

□ Gusto kong maghagad, na daing obligasyon, nin sarong kopya kan brosyur na Magdanay Kamong Mapagbantay!

□ Kontakon tabi ako para sa daing bayad na pag-adal sa Biblia.

[Nota sa Ibaba]

[Blurb sa pahina 3]

An falsong relihion may impluwensia “sa mga hade kan daga”

[Blurb sa pahina 3]

“Lumuwas kamo sa saiya, banwaan ko”