Jehova—Siisay Sia?

TINATAGA an mga nakaoolang sa saiyang agihan sa kadlagan duman sa Cambodia, si Henri Mouhot, sarong eksplorador na Pranses kan ika-19 siglo, nakaabot sa sarong halakbang na trintsera na nakapalibot sa sarong templo. Idto an Angkor Wat, an pinakadakulang relihiosong monumento sa ibabaw nin daga. Naaraman tolos ni Mouhot na an estrukturang pano nin lumot gibo nin mga kamot nin tawo. “Itinogdok nin dai maaraman kun siisay na suanoy na Michelangelo,” an isinurat nia, “iyan mas grande kisa sa ano man na iwinalat sa sato kan Grecia o Roma.” Apisar na iyan ginatos nang taon na inabandonar asin napabayaan, sia daing pagduda na sa likod kan komplikadong estruktura, igwa nin kagdisenyo.

Interesante nanggad, an sarong libro nin kadonongan na isinurat ginatos nang taon an nakaagi naggamit nin kaagid na pangangatanosan, na sinasabi: “Siempre, an lambang harong igwa nin kaggibo, alagad an naggibo kan gabos na bagay iyo an Dios.” (Hebreo 3:4) Alagad tibaad may mga magsabi, ‘An pagpunsionar nin naturalesa laen man sa gibo nin tawo.’ Minsan siring, bakong gabos na sientista oyon sa pagkontrang iyan.

Pakaadmitira na “an mga sistema biokimiko bakong mga bagay na daing buhay,” si Michael Behe, asosyadong propesor sa biokimika sa Unibersidad nin Lehigh, Pennsylvania, E.U.A., naghahapot: “Puede daw na disenyohon sa intelihenteng paagi an buhay na mga sistema biokimiko?” Dangan ipinaheling nia na an mga sientista nagdidisenyo ngonyan nin pundamental na mga pagbago sa buhay na mga organismo paagi sa mga metodo na arog kan inhenyeriya henetika. Iyo, puedeng “gibohon” pareho an mga bagay na may buhay asin daing buhay! Sa pagsiyasat kan mikroskopikong kinaban nin buhay na mga selula,  narisa ni Behe an makangangalas an pagkakomplikadong mga sistema na kompuesto nin mga elemento na nagsisinarigan tanganing makapunsionar. An konklusyon nia? “An resulta kaining nagpaparadakol na paghihingoa na siyasaton an selula​—na siyasaton an buhay sa gradong molekular—​makosog, klaro, malagting na kagsing nin ‘disenyo!’”

Siisay, kun siring, an Kagdisenyo sa likod kan gabos na komplikadong sistemang ini?

Siisay an Kagdisenyo?

An simbag makukua sa suanoy na libro nin kadonongan na kinotar sa kapinonan​—an Biblia. Sa enot na mga tataramon kaiyan, sinisimbag kan Biblia na may pambihirang pagkasimple asin pagkaklaro an hapot kun baga siisay an nagdisenyo sa gabos na bagay: “Sa kapinonan linalang nin Dios an kalangitan asin daga.”​—Genesis 1:1.

Minsan siring, sa pagpaheling na sia laen sa iba na sinasabing Dios, ipinamimidbid kan Kaglalang an saiyang sadiri paagi sa ngaran na daing kapareho: “Iyo ini an isinabi kan tunay na Dios, si Jehova, an Kaglalang kan kalangitan . . . , an Saro na nagpapamugtak sa daga asin sa mga bunga kaiyan, an Saro na nagtatao nin hinangos sa mga tawong nag-eerok dian.” (Isaias 42:​5, 8) Jehova an ngaran kan Dios na nagdisenyo kan uniberso saka naglalang kan mga lalaki asin babae sa ibabaw nin daga. Alagad ta siisay si Jehova? Anong klase siang Dios? Asin taano ta maninigo kamong maghinanyog sa saiya?

Kahulogan kan Saiyang Ngaran

Enot sa gabos, ano an kahulogan kan ngaran kan Kaglalang na Jehova? An ngaran nin Dios nasusurat sa apat na letrang Hebreo (יהוה) asin minalataw nin haros 7,000 na beses sa Hebreong kabtang kan Biblia. An ngaran na ini ibinibilang na an porma causativo kan berbong Hebreo na ha·wahʹ (“magin”) asin sa siring nangangahulogan “Saiyang Pinapangyayaring Magin.” Sa ibang pagtaram, madonong na pinapangyayari ni Jehova na sia magin an ano man na kaipuhan tangani na mahaman an saiyang mga katuyohan. Sia nagigin Kaglalang, Hokom, Paraligtas,  Parasustenir sa buhay, asin iba pa, tangani na maotob an saiyang mga panuga. Dugang pa, an berbong Hebreo nasa pormang gramatikal na nangangahulogan nin sarong aksion na inootob. Ipinaririsa kaini na sagkod ngonyan pinapangyayari ni Jehova na sia magin an paraotob kan saiyang mga panuga. Iyo, sia buhay na Dios!

An Nangingibabaw na mga Kualidad ni Jehova

Ipinaheheling kan Biblia na an Kaglalang na ini asin paraotob kan saiyang mga panuga sarong persona na nakaaakit na marhay. Ihinayag mismo ni Jehova an saiyang nagpapamidbid na mga kualidad asin sinabi: “Jehova, Jehova, Dios na maheherakon asin maugayon, maluway sa pagkaanggot asin mayaman sa mamomoton na kabootan asin katotoohan, nagpapadanay nin mamomoton na kabootan sa rinibo, na nagpapatawad sa sala asin paglapas patin kasalan.” (Exodo 34:​6, 7) Si Jehova ilinaladawan na Dios na may mamomoton na kabootan. An termino sa Hebreo na ginamit digdi matatradusir man na “maimbod na pagkamoot.” Sa paghaman kan saiyang daing sagkod na katuyohan, si Jehova may kaimbodan na padagos na nagpapaheling nin pagkamoot sa saiyang mga linalang. Dai daw nindo pakamamahalon an siring na pagkamoot?

Si Jehova maluway man sa pagkaanggot asin madaling magpatawad kan satong mga sala. Nakaoogmang makaibaiba an saro na bakong tatsador kundi andam na magpatawad sa sato. Pero dai boot sabihon kaiyan na kinokonsinte ni Jehova an paggibo nin sala. Saiyang sinabi: “Ako, si Jehova, namomoot sa hustisya, naoongis sa paghabon kaibanan na an karatan.” (Isaias 61:8) Bilang an Dios nin hustisya, dai nia pinababayaan sagkod lamang an daing sopog na mga parakasala na nagpapadagos sa saindang karatan. Sa siring, makasisierto kita na sa saiyang itinalaan na panahon, itatanos ni Jehova an inhustisya sa kinaban na nasa palibot niato.

An pagpapadanay na sangkap an pagkabalanse kan mga kualidad na pagkamoot asin hustisya nagkakaipo nin kadonongan. Binabalanse ni  Jehova an duwang kualidad na ini sa marahayon na paagi sa pagtratar nia sa sato. (Roma 11:​33-​36) Siempre, maheheling sa gabos na lugar an saiyang kadonongan. Nagpapatotoo dian an mga ngangalasan sa naturalesa.​—Salmo 104:24; Talinhaga 3:​19.

Pero, bakong igo an pagkaigwa nin kadonongan. Tanganing biyong magibo an minasabong sa saiyang isip, an Kaglalang dapat na igwa man nin lubos na kapangyarihan. Ipinaheheling kan Biblia na sia siring na Dios: “Tingagan an saindong mga mata asin helinga nindo. Siisay an naglalang kan mga bagay na ini? Iyan iyo an Saro na nagpapaluwas kan saindang hukbo nin oyon sa kabilangan . . . Huli sa kadakolan nin dinamikong kosog, . . . ni saro sa sainda mayong nawawara.” (Isaias 40:26) Tunay nanggad, si Jehova igwa kan “kadakolan nin dinamikong kosog” na biyo niang magagamit sa paggibo kan saiyang kabotan. Dai daw kamo naaakit ki Jehova kan siring na mga kualidad?

Mga Pakinabang sa Pakamidbid ki Jehova

Si Jehova ‘dai linalang an daga na dai nin kapakanan’ kundi ‘hinaman iyan tanganing pag-istaran’ nin mga tawo na may makahulogan na relasyon sa saiya. (Isaias 45:18; Genesis 1:​28) May pagmakolog sia sa saiyang daganon na mga linalang. An katawohan tinawan nia nin sangkap na kapinonan sa sarong erokan na garo hardin, sarong paraiso. An mga tawo man rinaraot iyan, sa grabeng kaanggotan ni Jehova. Pero, inootob nanggad an ipinaririsa kan saiyang ngaran, tataposon ni Jehova an saiyang orihinal na katuyohan para sa katawohan asin sa daga. (Salmo 115:16; Kapahayagan 11:18) Ibabalik nia an Paraiso sa daga para sa mga gustong kumuyog sa saiya bilang saiyang mga aki.​—Talinhaga 8:​17; Mateo 5:5.

Ilinaladawan kan huring libro kan Biblia an klase nin buhay na makakamtan nindo sa Paraisong iyan: “Papahidon nia an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis  na.” (Kapahayagan 21:​3, 4) Iyan an tunay na buhay na boot ni Jehova na kamtan nindo. Abaa kamatinaong Ama sia! Gusto daw nindong makanood nin orog pa manongod sa saiya asin sa kun ano an kahagadan sa saindo tanganing mabuhay sa Paraiso?

Laen sana kun may ibang tanda, an gabos na kotasyon sa Biblia trinadusir hale sa Ingles na New World Translation of the Holy Scriptures.