Kingdom News Num. 34

Taano ta Pano-Pano nin Problema an Buhay?

Posible daw an sarong paraiso na mayo nin problema?

 NAGGAGRABE AN DARAKULANG PROBLEMA—TAANO?

An mga tawo kaidto pa permi nang may problema. Minsan ngani an dakol naghona na mareresolberan iyan kan modernong teknolohiya, an darakulang problema naggagrabe.

Krimen: Kakadikit kan nakakamateng ligtas na maglakaw sa mga tinampo o maski magtukaw sa saindang sadiring harong. Sa sarong nasyon sa Europa, haros 1 sa 3 katawo an biktima nin sarong krimen sa sarong nag-agi pa sanang taon.

Palibot: An polusyon sa aire, daga, asin tubig orog na naglalakop. Sa nag-ooswag na mga nasyon, an un-kuwarto kan mga tawo dai nakakakua nin malinig na tubig.

Pagtios: Mas dakol an tawong dukha asin nagugutom kisa kasuarin pa man. Labing 90 porsiento kan mga tawo sa ibang kadagaan an nagtitios; 30 porsiento kan mga may kakayahan na magtrabaho sa kinaban, mga 800 milyones, an daing trabaho o bakong igo an trabaho—asin naglalangkaw an bilang.

Gutom: Dawa kun kamo mismo igwang igong kinakakan, an nagdadakol na minilyon mayo. Sa bakong maoswag na mga nasyon, kada taon kisuerra 13 milyones katawo, na an kadaklan aki, an nagagadan huli sa mga epekto nin gutom.

Guerra: Ginatos na ribo an ginadan sa dai pa sana nahahaloy na kadahasan nin mga tribo. Asin sa ika-20 siglo, an mga guerra guminadan nin labing sanggatos na milyon katawo.

Iba Pang Problema: Sa mga nasa enotan, idagdag pa an naggagrabeng pagkalaglag nin pamilya, mas dakol na ina na daing agom, nagdadakol na mayong harong, lakop na pag-abuso sa droga, lakop na inmoralidad. Tama nanggad, an sarong dating miembro kan gabinete sa E.U. nagsabi: “Kadakol nanggad kan tanda nin . . . sibilisasyon na nalapa na.” Sa nag-agi pa sanang 30 taon na peryodo, an populasyon sa E.U. luminangkaw nin 41 porsiento, alagad an madahas na krimen biglang luminangkaw nin 560 porsiento, an mga ipinangaki nin mga magurang na bakong kasal 400 porsiento, an mga diborsio 300 porsiento, an bilang nin mga naghugot na tin-edyer labing 200 porsiento. Pareho an situwasyon sa ibang nasyon.

Taano ta Naggrabe an mga Problema?

An satong Kaglalang nagtatao kan simbag. An saiyang Tataramon inaapod an pano nin problemang panahon na ini na “huring mga aldaw,” sarong panahon na maabot “an delikadong mga panahon na masakit pakibagayan.” (2 Timoteo 3:1) Huring mga aldaw nin ano? Bueno, an Biblia nagtataram dapit sa “katapusan kan kinaban.”—Mateo 24:3, King James Version.

An nag-oorog na mga problema ngonyan malinaw na ebidensia na harani na an katapusan kan palakaw na ini nin mga bagay, kabale na an katapusan nin karatan asin kan mga may paninimbagan kaiyan. (Mateo 24:3-14; 2 Timoteo 3:1-5; Kapahayagan 12:7-12) Sa dai na mahahaloy an Dios makikilabot asin sisiertohon na an gabos na problema ngonyan biyong maresolberan.—Jeremias 25:31-33; Kapahayagan 19:11-21.

 NASUDYA AN MGA RELIHIYON SA KINABAN NA INI

Imbes na tumabang na maresolberan an mga problema ngonyan, an mga palakaw nin relihiyon sa kinaban na ini dinadagdagan iyan. Sa panahon nin mga guerra, ginagadan nin mga Katoliko an mga Katoliko, ginagadan nin mga Protestante an mga Protestante—sa minilyon. Dai pa sana nahahaloy sa Rwanda, kun saen an kadaklan Katoliko, an mga tawo naggaradanan sa mananggatos na ribo! (Helingon an retrato sa wala.)

Si Jesus daw maduman sa guerra na may darang riple o sundang asin gagadanon an saiyang mga disipulo huli ta an saindang nasyonalidad laen kan saiya? Siertong dai! “An namomoot sa Dios,” an sabi kan Biblia, “maninigo man na mamoot sa saiyang tugang.” (1 Juan 4:20, 21) Nasudya an mga relihiyon sa kinaban na ini na gibohon iyan. “Sinda nagpapahayag na midbid ninda an Dios, alagad ta sinda nagpapainda sa saiya paagi sa saindang mga gibo.”—Tito 1:16.

Saro pa, paagi sa dai nanggad pagsuportar sa mga pamantayan kan Biblia dapit sa moralidad, an mga relihiyon sa kinaban nakadadagdag sa nakakukubhan na pagbagsak nin moral sa bilog na daga.

Si Jesus nagsabi na mamimidbid nindo an kalaenan kan falsong relihiyon sa tunay na relihiyon ‘paagi sa bunga kaiyan’—paagi sa ginigibo kan mga miembro kaiyan. Sia nagsabi man: “An gabos na kahoy na dai nagbubunga nin marahay pinuputol asin iinaapon sa kalayo.” (Mateo 7:15-20) Sinasadol kita kan Tataramon nin Dios na humale sa relihiyon na nagbubunga nin maraot asin sa siring napapaatubang sa kalaglagan.—Kapahayagan 18:4.

An Tunay na Relihiyon Dai Nasudya

An tunay na relihiyon “nagbubunga nin marahay,” nangorogna nin pagkamoot. (Mateo 7:17; Juan 13:34, 35) Anong nagkakasararong internasyonal na asosasyon nin magturugang na Kristiano an naggigibo kan siring na pagkamoot? Sairisay an nagsasayumang gadanon an sainda mismong mga karelihiyon o an siisay pa man?—1 Juan 3:10-12.

An mga Saksi ni Jehova midbid sa pagpaluwas kan ‘marahay na bungang iyan.’ Sa bilog na globo, sa labing 230 kadagaan, ‘dinaragopdop na ninda an saindang mga minasbad na magin tarom nin arado.’ (Isaias 2:4) An pagkamoot ninda sa tawo ipinaheheling man paagi kan saindang pagkuyog sa pagboot ni Cristo na ihulit an “maogmang bareta” kan Kahadean nin Dios sa bilog na kinaban. (Mateo 24:14) Sainda man na ginigibo asin pinalalakop an haralangkaw na moral na itinotokdo sa Biblia.—1 Corinto 6:9-11.

An tunay na relihiyon dai nasudya. Ginigiyahan kaiyan an mga tawo pasiring sa solamenteng Saro na may kakayahan na resolberan an mga problema nin katawohan. Sa dai na mahahaloy an Sarong iyan magpapangyari nin sarong lubos na bagong kinaban. Siisay an Sarong iyan? (Tabi helingon an pahina sa likod.)

 SEGURADO AN SARONG PARAISO NA MAYO NIN PROBLEMA

Kun kaya nindo, dai daw nindo reresolberan an gabos na problema na nagpapasakit sa katawohan? Siyempre iyo! Maninigo daw niatong isipon na an satong mamomoton na Kaglalang, na iyo sana an igwa kan kapangyarihan asin kadonongan sa pagresolber sa mga problema nin katawohan, bakong siring an gigibohon?

Ihinahayag kan Biblia na an Dios makikilabot sa mga aktibidad nin tawo paagi sa saiyang langitnon na gobyerno sa mga kamot ni Jesu-Cristo. ‘Roronoton’ kaiyan an maraot na mga gobyerno digdi sa daga. (Daniel 2:44; Mateo 6:9, 10) Asin taano? Kinakaolay an Dios, an salmista minasimbag: “Tanganing an mga tawo makaaram na ika, na an ngaran iyo si Jehova, ika sana an Kaharohalangkawe sa bilog na daga.”—Salmo 83:18.

Kun matapos na an kinaban na ini, magkakaigwa daw nin mga makakaligtas? “An kinaban maagi sana,” an sabi kan Biblia, “alagad an naggigibo kan kabotan nin Dios magdadanay sagkod lamang.” (1 Juan 2:17) Saen mabubuhay sagkod lamang an mga makakaligtas na ini? “An mga matanos mismo magmamana kan daga, asin sinda mag-eerok dian sagkod lamang,” an simbag kan Biblia.—Salmo 37:9-11, 29; Talinhaga 2:21, 22.

Sa bagong kinaban nin Dios, “an kagadanan mawawara na, dai na sagkod magkakaigwa nin pagmondo ni pagtangis ni kolog.” (Kapahayagan 21:4) Mayo nang krimen, pagtios, gutom, helang, pagmondo, o kagadanan! Tara, pati an mga gadan mabubuhay liwat! “Magkakaigwa nin pagkabuhay liwat.” (Gibo 24:15) Asin an daga mismo gigibohon na literal na paraiso.—Isaias 35:1, 2; Lucas 23:43.

Ano an dapat niatong gibohon tanganing magkamit nin buhay sa bagong kinaban nin Dios? Si Jesus nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.” (Juan 17:3) Minilyon na sadiosan an puso sa bilog na kinaban an nagkukua kan kaaraman na iyan. Ini nagpapangyari sa sainda na maatubang an dakol sa saindang personal na problema ngonyan, alagad orog na mahalaga, iyan nagtatao sainda nin lubos na kompiansa na an mga problema na dai ninda kayang resolberan lubos na reremedyohan sa bagong kinaban nin Dios.

[Picture Credit Line sa pahina 2]

Retrato para sa WHO ni P. Almasy

[Picture Credit Line sa pahina 3]

Jerden Bouman/Sipa Press