Nga ca kuti ulekonka amafunde, ulefikilisha ifyo walaya, kabili lyonse ulelanda icine, abafyashi bobe, ifibusa na bakwingisha incito bakakucetekela.

Ilingi line abantu nga bakucetekela e lyo bengakupeela sana insambu sha kucita ifintu fimo.

“Nga ulefwaya abafyashi bobe bakucetekele, lyonse ulingile ukulacita ifintu ngo mukalamba, nampo nga uli nabo nelyo uli weka.”—E fyalandile Sarahi.

ILEMBO ILINGAKWAFWA: “Muleilinga mwe bene.”—2 Abena Korinti 13:5.

Nga ulefwaya ukuti abantu bakucetekele sana nelyo ulefwaya bakucetekele na kabili, ufwile ukucita ifyakonkapo.

Uleba ne cishinka. Nga ca kuti ulebepa ubufi, tapakakokole abantu bakaleka ukukucetekela. Nomba nga ulelanda icishinka kabili taulefisa ifilubo ulepanga, abantu bakakucetekela.

“Cilanguka ukuba ne cishinka ifintu nga fili bwino. Na lyo line, ukukanafisa nga naucita ifingalenga waseebana, kuti kwalenga abantu bakucetekela sana.”—E fyalandile Caiman.

ILEMBO ILINGAKWAFWA: “Tufwaya ukuba aba cishinka muli fyonse.”—AbaHebere 13:18.

Ulebika amano ku fintu. Mu America, abafwailisha pa fintu basangile ukuti abengisha incito abengi bafwaya ukwingisha incito umuntu “uubika amano ku fintu.” Kanshi nga ulebika amano ku fintu pali ino inshita, ifintu fikakuwamina nga wakula.

“Abafyashi bandi balamona nga ca kuti ndebika amano ku fintu kabili ndebomba imilimo ukwabula ukuti baleimbapo fye ngo lwimbo. Balancetekela sana nga ca kuti ndebomba imilimo ukwabula ukunjeba.”—E fyalandile Sarah.

ILEMBO ILINGAKWAFWA: “Nalicetekela ukuti uli wa cumfwila, pantu ninjishiba ukuti ukacita ukucila na pa fyo nasosa.”—Filemone 21.

Uletekanya. Abantu balamona bwangu ukuti uwacaice nalepelako, nomba palapita inshita pa kuti bamone ukuti nakula mu mano.

“Abantu tabakakucetekele pa mulandu fye wa kuti wacita fye ifintu ifinono ngo mukalamba, lelo kuti bakucetekela fye nga ca kuti watwalilila ukucita ifintu ngo mukalamba.”—E fyalandile Brandon.

ILEMBO ILINGAKWAFWA: “Fwaleni . . . ukushishimisha [ukutekanya].”—Abena Kolose 3:12.