1, 2. Bushe umutumwa Paulo alangile shani ukuti aletasha pa cikuuku ca kwa Lesa?

UMUTUMWA Paulo alilandile ukwabula ukupita na mu mbali ukuti: “Icikuuku cakwe [Lesa] ico nalangilwe tacali ica fye.” (Belengeni 1 Abena Korinti 15:9, 10.) Paulo alishibe ukuti icikuuku ca kwa Lesa ico apokelele tacibombeele kabili talingile no kucipokelela pantu kale alecusha Abena Kristu.

² Ilyo ali mupepi no kufwa, Paulo alembeele Timote ati: “Ndetootela Kristu Yesu Shikulwifwe, uwankoseshe, pantu amwene ukuti nali uwa cishinka pa kumpeela uyu mulimo.” (1 Tim. 1:12-14) Mulimo nshi uo bamupeele? Paulo aebele baeluda abali mu cilonganino ca ku Efese pali uyu mulimo, atile: “Umweo wandi nshiumona ukuti walicindama, ine kulila fye napwisha ulubilo lwandi no mulimo uo napeelwe kuli Shikulu Yesu, uwa kubila sana imbila nsuma iya cikuuku ca kwa Lesa.”—Imil. 20:24.

3. Mulimo nshi uwaibela uo Lesa apeele Paulo? (Moneni icikope pa ntendekelo ya cino cipande.)

 ³ Ni “mbila nsuma” nshi iyo Paulo alebila iyalelanga icikuuku ca kwa Yehova? Paulo aebele Abena Kristu ba ku Efese ati: “Mwalyumfwa umulimo wa cikuuku ca kwa Lesa ico napeelwe pa mulandu wenu.” (Efes. 3:1, 2) Paulo balimupeele umulimo wa kubila imbila nsuma ku bena fyalo pa kuti nabo bengaba pa bali no kuteka na Kristu mu Bufumu bwa kwa Mesia. (Belengeni Abena Efese 3:5-8.) Apo Paulo ali uwacincila mu mulimo wa kubila imbila nsuma, aba ca kumwenako icisuma ku Bena Kristu muno nshiku, kabili ifyo acitile filanga ukuti icikuuku ico Lesa amulangile “tacali ca fye.”

4, 5. Cinshi twingalandila ukuti tapaba ubupusano pa “mbila nsuma iya Bufumu” e lyo ne mbila nsuma iya “cikuuku ca kwa Lesa”?

⁴ Muli shino nshiku sha ku mpela, abantu ba kwa Yehova balikwata umulimo wa kubila “imbila nsuma iyi iya bufumu . . . ku bantu bonse aba pe sonde ku kuba ubunte ku nko shonse.” (Mat. 24:14) Iyi mbila nsuma tubila itwa no kuti “imbila nsuma iya cikuuku ca kwa Lesa,” pantu amapaalo yonse ayo tukakwata ilyo Ubufumu bukalateka icalo tukayapokelela pa mulandu wa cikuuku ico Yehova atulanga ukupitila muli Kristu. (Efes. 1:3) Bushe ifwe bonse twalicincila mu mulimo wa kubila imbila nsuma nga fintu Paulo ali pa kuti tulelanga ukutasha pa cikuuku ca kwa Yehova?—Belengeni Abena Roma 1:14-16.

⁵ Mu cipande cafumineko, twalisambilile pa nshila ishalekanalekana isho fwe bantu ababembu tunonkelamo mu cikuuku ca kwa Yehova. Kanshi mulimo wesu ukwebako abantu ifyo Yehova alanga ukuti alitutemwa ne fyo benganonkelamo. Finshi fimo ifyaba mu cikuuku ca kwa Lesa ifyo tulingile ukusambilishako bambi?

6, 7. Bushe ukusambilisha abantu pa cilubula kwayampana shani no kubila imbila nsuma ya cikuuku ca kwa Lesa?

⁶ Abantu muli cino calo bamona ukuti ukucita ifyabipa kwaliba fye bwino, abengi tabaishiba ukuti babembu no kuti balakabila icilubula. Na lyo line, abantu abengi balishiba ukuti ukucita ifyo abene balefwaya takulenga baba ne nsansa. Abantu abengi tabaishiba ifyo ulubembu lwaba, ifyo lwacita e lyo ne fyo tulingile ukucita pa kuti tulubuke ku busha bwa lubembu. Beshiba ifi nga batendeka ukusambilila Baibolo ne Nte sha kwa Yehova. Abafwaya ukusambilila icine balatemwa nga basambilila ukuti Yehova alitemwa abantu kabili wa cikuuku, e co atumiine Umwana wakwe pano isonde ku kupeela ubumi bwakwe icilubula ku kulubula abantu ku lubembu ne mfwa.—1 Yoh. 4:9, 10.

⁷ Paulo alandile pali Yesu Umwana wa kwa Yehova ati: “Kristu alitulubula ku mulopa wakwe, kabili umulopa wakwe walenga ukuti tubelelwe uluse pa membu shesu, ukulingana no bukulu bwa cikuuku ca kwa Lesa.” (Efes. 1:7) Icilubula e nshila iikalamba iyo Lesa alangilamo ukuti alitutemwa no kuti wa cikuuku nga nshi kuli ifwe. Ala tulatemwa ukwishiba ukuti nga twaba ne citetekelo mu mulopa wa kwa Yesu, imembu shesu shikelelwa kabili tukaba na kampingu  iyasanguluka! (Heb. 9:14) Cine cine iyi ni mbila nsuma iyo tulingile ukwebako bambi!

8. Mulandu nshi abantunse ababembu balingile ukubwelela kuli Lesa?

⁸ Twalikwata umulimo wa kwafwa abantu ukwishiba ukutila kuti baba ifibusa na Kabumba wabo. Ilyo abantu tabalatetekela ilambo lya kwa Yesu, Lesa abamona ukuti balwani bakwe. Umutumwa Yohane alembele ukuti: “Uutetekela Umwana aba no mweo wa muyayaya; uushumfwila Mwana takabe no mweo, lelo ubukali bwa kwa Lesa bwaikala pali ena.” (Yoh. 3:36) Icawama ca kuti, ilambo lya kwa Kristu lyalenga ukuti tubwelele kuli Lesa. Paulo alandile ati: “Mwe baali kale ukutali na Lesa kabili abalwani bakwe pa mulandu wa fyabipa ifyo mwaletontonkanya no kucita, lelo nomba pa mulandu wa mfwa ya mwana wakwe, Lesa alimubwesesha kuli ena.”—Kol. 1:21, 22.

9, 10. (a) Mulimo nshi Kristu apeele abasubwa? (b) Bushe aba mu “mpaanga shimbi” bafwa shani bamunyinabo abasubwa?

⁹ Kristu alipeela abasubwa umulimo uo Paulo aitile ati “umulimo wa kubwesesha abantu kuli Lesa.” Pa kulondolola uyu mulimo, Paulo alembeele Abena Kristu ba mu nshita ya batumwa ati: “Fyonse fyafuma kuli Lesa, uwatulengele ukuti tubwelele kuli ena muli Kristu no kutupeela umulimo wa kubwesesha abantu kuli Lesa, e kutila, Lesa alelenga aba pano calo ukuti babwelele kuli ena muli Kristu, ukukanabapendela imembu shabo, kabili ni fwe apeele aya mashiwi aya kubwesesha abantu kuli ena. E ico ifwe tuli nkombe ishibomba umulimo wa kwa Kristu, caba kwati ni fwe Lesa alebomfya ukukunkumba abantu. Apo tuli beminishi ba kwa Kristu tupapaata, atuti: ‘Bweleleni kuli Lesa.’”—2 Kor. 5:18-20.

¹⁰ Aba mu “mpaanga shimbi” bamona ukuti lishuko nga nshi ukulayafwa bamunyinabo abasubwa umulimo wa kubila imbila nsuma. (Yoh. 10:16) Apo baba ni ntumi sha kwa Kristu, balikwata umulimo uukalamba uwa kusambilisha abantu icine no kubafwa ukuba ifibusa fya kwa Yehova. Uyu mulimo wa kubila imbila nsuma iya cikuuku ca kwa Lesa uukalamba.

11, 12. Mulandu nshi ukwafwa abantu ukwishiba ukutila kuti bapepa kuli Yehova kwabela ni mbila nsuma?

¹¹ Abantu abengi balapepa pa kuti fye bomfweko bwino, lelo bamona kwati Lesa tomfwa amapepo yabo. Balingile baishiba ukuti Yehova ‘alomfwa ipepo.’ Uwaimbile amalumbo Davidi aimbile ati: “Mwe bomfwa ipepo, kuli imwe e ko abantunse bakesa. Ifya bupulumushi fyafina ukuncila. Kumfwa bumpulamafunde bwesu, ni mwe mukabufimbapo.”—Amalu. 65:2, 3.

¹² Yesu afundile abasambi bakwe ati: “Nga mwalombela icintu conse mwi shina lyandi, nkacicita.” (Yoh. 14:14) Ukwabula no kutwishika, amashiwi ya kuti “icintu conse” yalosha ku cili conse icilingene no kufwaya kwa kwa Yehova. Yohane atile: “Uku e kucetekela uko twamucetekela, ukuti conse ico twalomba, cikulu fye nacilingana no kufwaya kwakwe, alatumfwa.” (1 Yoh. 5:14) Ala tulomfwa bwino ukusambilisha abantu ukuti tatupepa fye pa kuti tumfweko bwino, lelo ipepo ni nshila iisuma nga nshi iitwafwa ukupalama ku “cipuna ca bufumu ica cikuuku ca kwa Lesa”! (Heb. 4:16) Nga twabasambilisha  ifya kupepa, uo balingile ukulapepako, ne fintu ifyo balingile ukulapepela, tukabafwa ukuba ifibusa fya kwa Yehova kabili akalabasansamusha ilyo bali na mafya.—Amalu. 4:1; 145:18.

13, 14. (a) Lishuko nshi abasubwa bakakwata ku ntanshi? (b) Finshi abasubwa bakacitila abantunse?

¹³ Yehova akatwalilila ukutulanga icikuuku cakwe na mu calo cipya. Ilyo Paulo alelanda pe shuko ilikalamba ilyo ba 144,000 abakateka pamo na Kristu ku muulu bakwata, alembele ati: “Lesa, uwakwatisha uluse, kabili pa mulandu wa kutemwa kwakwe ukukalamba uko atutemenwe, atulengele ukuba aba mweo pamo na Kristu, na lintu fye twali abafwa mu membu—ni ku cikuuku ca kwa Lesa mwapusukila—kabili atubuushishe capamo nankwe no kutwikalika capamo mu muulu apo tuli ba kwa Kristu Yesu. Ico Lesa acitile ifyo, ni pa kuti mu nshita iikesa akalange ifyo icikuuku atukwatila cakula nga nshi ukupitila mu luse lwakwe kuli ifwe pa mulandu wa kwa Kristu Yesu.”—Efes. 2:4-7.

¹⁴ Te kuti twelenganye no kwelenganya ifintu ifisuma ifyo Yehova akapeela abasubwa ilyo bakalateka na Kristu ku muulu. (Luka 22:28-30; Fil. 3:20, 21; 1 Yoh. 3:2) Paulo alandile pa basubwa ukuti, Yehova ‘akabalanga ifyo icikuuku atukwatila cakula nga nshi.’ Aba abasubwa bakapanga “Yerusalemu Mupya,” nabwinga wa kwa Kristu. (Ukus. 3:12; 17:14; 21:2, 9, 10) Bakabombela pamo na Yesu pa ‘kundapa inko,’ no kwafwa abantu abacumfwila ukulubuka ku lubembu ne mfwa no kuba abapwililika.—Belengeni Ukusokolola 22:1, 2, 17.

15, 16. Bushe Yehova akalanga shani icikuuku cakwe ku ba mu “mpaanga shimbi” ku ntanshi?

¹⁵ Pa Abena Efese 2:7 tubelengapo ukuti “mu nshita iikesa” Lesa akalanga icikuuku cakwe. Ukwabula no kutwishika mu calo cipya, Yehova “akalange ifyo icikuuku atukwatila cakula nga nshi.” (Luka 18:29, 30) Inshila iikalamba sana iyo Yehova akalangilamo icikuuku cakwe icikalamba pano isonde, kubuusha abafwa ukufuma mu “Nshiishi.” (Yobo 14:13-15; Yoh. 5:28, 29) Abaume na banakashi abali ne citetekelo abafwile ninshi Kristu talaisa mu kutuula ilambo lya cilubula, na ba mu “mpaanga shimbi” abafwa muno nshiku sha kulekelesha bakabuushiwa no kutwalilila ukubombela Yehova.

¹⁶ Abantu abengi nga nshi abafwa ukwabula ukwishiba Lesa nabo bene bakabuushiwa. Nga babuushiwa bakabapeela ishuko lya kunakila bumulopwe bwa kwa Yehova. Yohane alembele ati: “Namwene abafwa, bashimucindikwa na bantu yaweyawe, nabeminina ku cinso ca cipuna ca bufumu, na mabuuku yapombwa yalifungulwilwe. E lyo ne buuku lyalifungulwilwe; ibuuku lya mweo. Na bafwa babapingwilile ku fyalembelwe mwi buuku ukulingana ne fyo balecita. Bemba alekele abafwa abalimo, ne mfwa ne Nshiishi na fyo fyalekele abafwa abalimo, kabili bonse bapingwilwe ukulingana ne fyo balecita.” (Ukus. 20:12, 13) Kanshi abakabuushiwa bakasambilila ifya kulakonka amafunde ya kwa Lesa ayaba mu Baibolo. Na kabili, Yehova akenekela ukuti bakalekonka ifipya ifyo akabeba ifikaba mu “mabuuku yapombwa.” Muli aya mabuuku ayapombwa mukaba ifyo Yehova akalafwaya abakekala mu calo cipya bakalekonka. Ifi Yehova akalenga tukeshibe ifikaba muli aya mabuuku  ayapombwa, ni nshila na imbi iyo akalangilamo icikuuku cakwe.

17. Cinshi tulingile ukulatontonkanyapo ilyo tulebomba umulimo wa kubila?

¹⁷ Apo impela naipalama sana, ino e nshita tulingile ukulabila sana imbila nsuma iya Bufumu! (Marko 13:10) Ukwabula no kutwishika, imbila nsuma ilalanga icikuuku ca kwa Yehova kabili tatulingile ukulaba ici cishinka ilyo tulebila imbila nsuma. Ico tufwaya ilyo tulebomba uyu mulimo kucindika Yehova. Kuti twamucindika nga tulesambilisha abantu ukuti amapaalo yonse ayo Yehova atulaya ukutupeela mu calo cipya ni nshila iyo alangilamo icikuuku cakwe.

18, 19. Bushe tulenga shani icikuuku ca kwa Yehova ukuba ica bukata?

¹⁸ Ilyo tulebila imbila nsuma tulingile ukulondolwela abantu ukuti ilyo Kristu akalateka isonde, e lyo abantu bakanonkelamo sana mu cilubula ca mfwa yakwe kabili panono panono bakasuka bakapwililike. Baibolo itila: “Ifibumbwa na fyo fikalubuka ku busha bwa kubola no kuba abana ba kwa Lesa.” (Rom. 8:21) Icikalenga ukuti ifi fikacitike, cikuuku ca kwa Yehova icikalamba.

¹⁹ Twalikwata ishuko lya kwebako abalefwaya ukukutika ku bulayo ubusuma nga nshi ubwaba pa Ukusokolola 21:4, 5 apatila: “[Lesa] akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.” Kabili Yehova uwaikala pa cipuna ca bufumu atile: “Moneni! Ndelenga ifintu fyonse ukuba ifipya.” Kabili, atile: “Lemba, pantu aya mashiwi ya cishinka kabili ya cine.” Nga tulebila sana imbila nsuma ninshi tulelumbanya Yehova pa cikuuku cakwe!