NARI snonggaku oso isya isouser pdef faro Allah rofyor ismai fafrowes ḇemarbak kaku ma rofyor soasuser ḇyenane rya nun nana arasai faro i ḇa ke? Iso fakfuken nari kawos na ma komam kankarem ḇyena. Ine ḇyefesepen kuker snon oso snoriso Ayub.

Rofyor er Israel sro sup Masir kaker, Abraham karyer oso ḇyedi Ayub i ḇyarek ro sup oso kirine kofawi na ḇe sup Arab. Ro nanggi malaikat sya sfanjur ro ḇarpon Allah, ma mansampampum ani, Setan i, isya kako rodiwa. Ro fananjur ḇero nanggi ani, Yahwe ikofen kakakyar ḇyeja faro Ayub i, snar ima manfamyan ḇesouser Ḇyediri. Yahwe ikofen kako snar snonggaku oso ḇaḇeri ḇesoasuser raris Ayub i. Imḇape, Setan doḇe Ayub ifarmyan faro Yahwe kukro Allah ḇyeḇarakas ma kyadaunwarek i. Setan kyara ido, fyor roi Ayub nyanakam neḇeyun bur i, nari isampum Allah I.

Allah byuk ijin ḇe Setan i fa dunpres roi Ayub nyanakam, ḇepon kaku iso arasai ḇyena, ramnai ido romawa ḇyesya wer, mura ḇye i fa idafduf wer. Ayub kyara ḇaḇeri sai ḇefnai fa Allah myam monda bo ismai kandera ri, inema snar ifawi ḇa roi nanema Setan fararur ḇyenari. Raryano Ayub dakkara fa ibur Yahwe I ḇa.

Bati rikyor ḇekaku ḇa Ayub ḇyanskoya srama ḇe i. Bar ḇeba ro syap Ayub nasero awawos ine, snon anskoya imbe skobuk karkara ḇesasar skoḇena insamaido Ayub kyara Allah byuk samamyai ḇe i snaro sasar ḇeyokef ḇyena. Ma kako skokofen snaro Allah imarisen faro manfamyan ḇyesi ḇa ma ikyar si ḇa. Ayub pyampum karkara ḇesasar senane. Kuker kakyar Ayub ikofen kaku snar isof ro imar nari ryir kakyar ḇyena ḇaḇeri!

Ḇape Ayub ifrur roi ḇesasar isoine syewar kaku fa ibriwarek manggundi ima syasar ḇa. Elihu, snon oso ḇebabo syadi ro sko, ryower famfaḇri senanekam mura dawos beri ḇe sko. Elihu isonek Ayub i snar fyawi ḇa snar ibriwarek Allah Yahwe hak Ḇyedi fa ḇyepoik ima fyandun syadi buro ibriwarek snonggaku sya. Elihu kako isonek bati ḇekaku ḇa Ayub ḇyanskoya.

Allah Yahwe dawos faro Ayub i fa isonek nyan karkara ḇyena. Yahwe ifnoḇek Ayub i fa kyarauser braur bramin ḇepyum ifrur kwar na, rarirya ifnoḇek Ayub i fa myam snonggaku koine koḇe royoḇa ḇardiḇuro Yahwe I Baba Ḇyena. Kuker randun sne, Ayub imarisen Allah isonek i. Yahwe ’saswar ḇeba ḇyedi’ ifrur fa Ayub iprei kaḇer ro dafduf ḇyena, ma I kako ifrur fa Ayuḇ arasai ḇyena dek rarwan ri suru syadi ro ḇepondi, ma kako ḇyeḇarakas i fa nya romawa ri samfur wer. (Yakobus 5 :11) Snar Ayub ryir kakyar ḇyena ḇaḇeri faro Yahwe I ro samswen ismai ya, inja Setan safsof ḇyena ḇeyoḇe snonggaku oso ḇa na ḇesouser pdef faro Allah fyor nya fafrowes ima nkaku ḇa.

​—Ḇeḇeknam ro syap Ayub.