Insape Yafawi Mansei Na Ḇepyos Roi Ḇenapes Ḇa Na

Ḇefawar ya iso Ursula Menne

Yaswarepen kaker, yamander kaku fa yamam snonggaku sya sifur pyum si ma smamfarfir si ḇa. Roi ine nafnai ra sisun aya ḇe bui ḇero Jerman Timur Komunis. Imbape ro diwa, ro mob ḇeradine insape yafawi roi ḇenapes ḇa na nari neḇepyos. Yamarisen yafar na ḇe mgo.

YAḆEAḆEN ro sup Jerman taun 1922, ro kota Halle, moḇ ḇena sarisa sejarah ro swaf nasyadi ro taun ri 1.200. Kota ine isya ro sup Berlin bar wambarek, swaf ya indokada kilometer ri 200. Ro kota Halle ine agama Protestan iso ḇesun randak ma ḇyeknam kaku ro dine. Kasun yedi, Käthe, ḇyeḇeaḇen ro taun 1923. Kamam fyararur ḇe sordade. Awini idisen ro teater.

Kamam iso ḇewar fa yaḇe yasewar kaku fa yafrur mnis ḇaḇenanapes ḇa na. Fyor Kamam ḇye sordade wer ḇa, kyowes toko oso. Ḇebor ḇekawkowes sya sima snonggaku ḇesabarar, Kamam iswar si inja ḇye si fa sun resari sape sḇak na. Ḇape snar frur pyum ḇyenane nafnai ra nana arasai ḇyena kam nabro. Kamam fawar ḇyedine fyarkor aya imbe yapyos roi ḇenapes ḇa ma mamfarfir na nama fararur ḇepyan naisya ḇa ro yakara na. Ḇape snar yababo kaker nyan kakara ḇeradine namnis ra for ḇepok ḇembrer ḇa.

Roro Awini, yasmai fawawi seni, ma Awin fyasnai ḇe aya ma Käthe nu songger ḇerok, dasdisen, ma fafyer. Ayama yamsik kaku, ma Käthe nukenem pyum kaku. Imbape ro taun 1939, nakam nfadwer beri.

Yasmai Mafu Ḇeḇye Ḇa

Yafarkor ro SD fa yamnai mura yasun wer ro rumfarkor balet, yafarkor kako Ausdruckstanz (fafyer ekspresif), ḇefarkor inggo iso Mary Wigman. Iso ḇerandak kaku ḇefrur fafyer Ekspresionis ine, na sor ḇefyer ya fa fyasnabair roi ḇyaḇir na roro fafyer ḇyena. Aya kako yafur kamara. Inja, randak fafisu yababo anya yamarisen ma yaryaḇ kaku fa yafarkor. Raimnai ro taun 1939 Mamun Dunya II ḇyejadi. Roi ḇeḇye ḇa ḇese ḇekur nggo wer iso Kamam ryoe snar dafduf TBC.

Mamamun yama mafu ḇeḇye ḇa diri. Rofyor mamamun ya ḇyerak anya insape yaḇe umur taun ri 17, mboi yakara dunya ine ḇyenapnap kwar. Yamam makakak faro Nazi nakyaren kaker kawasa ḇebor sya. Nane ramnai, marmar, ma farmakakok. Snar bom sisawen na, rum nggoḇedi iḇye ḇa ma kina nggobansi sino simar fafisu mamamun ani.

Fafisu mamamun ya imnai ro taun 1945, Awin, Käthe, ma aya inggo isya kaker ro Halle. Fafisu ya, yana snonswa ma inai mgun kwar, ḇape yasmai payamyum ro farḇakḇuk yena ḇa. Mura ido nuḇesisye, snar fandun fa yamam faduru manggundaya ma inaimos yedi, inja yafararur fa yafafyer ma yafrur kamara.

Mamamun raposa, sirwas Jerman ḇye bar ri fyak, kota nggoḇarek ya iso bar Uni Soviet ḇyepoik roro ya. Iso ḇewar fa nggosewar fa nggokenem pyum ro baḇ rezim Komunis ine. Ro taun 1949, mob inggoḇedi, sap ker ḇe Jerman Timur, ḇye Republik Demokrasi Jerman (RDJ).

Kankenem Ro Baḇ Komunis

Ro taun anna, Awin idufe, ma aya iso ḇemam faduru i. Yafararur ro kantor pamerenta ḇero moḇ nggoḇedi. Ma fafisu ya yasrow kuker romawa farkor ḇesewar fa ḇekofenḇair roi ḇenapes ḇa ḇejadi ya. Imnis ra romawa oso simewer i fa daksun ro farkarkor ḇekaki snar fyor iwara kmari dakḇe anggota partai Nazi. Yamamḇir pyum kaku romawa farkor anine snar nufnak kayam ker musik. Yakara, ’Sai ḇefnai fa ḇyekandera snar roi kmari ifrur ya?’ Yasowanan fa yakḇe mbroḇ, ma yakso ro demo. Ras oso yakpom pamflet ro tangga ḇero barpon kantor pengadilan ya.

Kakara yedi fa yafrur mnis roi ḇenapes ḇa na naba syadi wer snar yawasya syapram yaḇeketik fafisu yafararur ḇe sekretaris ro Komite Perdamaian Regional. Ras oso snar politik, Komite skara imbe sfarem fasfas ḇeser propaganda Komunis ḇe mansar oso ḇeḇarek ro Jerman Barat samaido skara sasar i. Yamsor kaku snar roi ḇeḇye ḇa sifrur ḇe snon ani inja yayokef roi imbe sfarem anya ro kantor yedi. Inja, sfarem na ḇa.

”Snonggaku Ḇeḇarḇor Kaku” Byuk Saneraro ḇe Aya

Paik Juni 1951, snon di suru susun ḇe kantor yedi ma sukofen bair, ”Imbe nufor au.” Suyun aya ḇe bui sifawi ḇe Roter Ocshe, ḇaido Sapi Ḇerik. Taun oser ramnai, skursof aya yaḇembroḇ faro Negara. Romawa farkor oso ikofenḇair ḇe Stasi, polisi rahasia, doḇe randak iwara yaso warpu ro demo ḇepake pamflet. Semankara aya mboi sanggar monda snar srower mnis sanowarek yakofen na ḇa. Sikofen yasmai ro bui swaf taun ri wonem. Ro swaf anya, yasmai dafduf ma sḇe fa yaḇarek ro sim ro rum ḇeduf ḇero bui ani, warpu bin di 40 sya. Yamam sikam sekandera fafayaḇa, rya yakandor kero. Yafrar ḇe kedwa ma yakuk kedwa ya.

Ḇemamwarek bui ifuken aya, ”Rosai wafrur ya?”

Yar naba bo yoḇe, ”Abe yabur moḇ ine. Roḇa ido ḇe fa yaḇarek ro manggundaya, ḇape yamewer yaro dine!” Imbo bae, ḇyefandun roi yakofen na ba. Fyoro ḇa mura, yaman bin oso iḇese kaku ro si. Kananon ro sne ḇyedi nasnai kaku ro mgasi, inja yakain fanam i.

Doḇe, ”Abe kwain fanam aya ido, iḇye kada wasasor kaku au.” Wos ḇyenane nafur kanandor aya. Ikofen wer, ”Ro sim ine, smam aya ḇe snonggaku ḇeḇarḇor kaku snar Saksi Yahwe risaya.”

Fafisu ya, yafawi ḇa smam Saksi Yahwe sya ḇe mbroḇ faro Negara Komunis. Ḇape roi yafawi ro si iso Siswa Alkitab ri suru (snonsnon randak sbuki dap Saksi Yahwe sya) surama kaki ḇe Kamam i fafisu yabaḇa mgun kaker. Kaku ya yaswarepen kaker Kamam ikofen, ”Siswa Alkitab siso ḇekaku ya!”

Yamarisen ra yakanes snar yasrow kuker bin ḇefrur pyum ine, snori Berta Brüggemeier. Yakofen ḇe i, ”Wakofenḇair Yahwe ḇe aya.” Ro fafisu ya beri nubuk swaf nabor fa nuḇe kayam ma nubuki farkor Refo. Roi yafarkor iso Yahwe ima Allah ḇekaku dirya, Allah ḇesaswar, ḇenapes, ma ḇeaski. Yafarkor kako na Allah ifur mnis roi ḇeḇye ḇa snonggaku ḇeḇarḇor sya sifur na. Mazmur 37:10,11 ikofen, ”Kniko wer, snonggaku ḇeḇarḇor nari sisyaḇa kwar . . . Ḇape snonggaku ḇena sne ḇemayar sya siso nari ḇena supswan, ma nari simarisen kaku snaro ḇaḇeaski ya ifo.”​—Mazmur 37:10, 11.

Yamkei ma Yafrar ḇe Bar Wambarek

Ro taun 1956 yamkei, yaro bui swaf taun ri 5 syadi. Yasae ro bui ras ri rim kwar ramnai, yafrar yabur RDJ fa yaḇarek ro Jerman Barat. Fafisu ya yun inaimos yesuya, Hannelore ma Sabine, fa suso kayam kuker aya. Ro diwa, aya ma swa yedi nuḇesisye ma yasrow kuker Saksi sya wer. Fyor yafarkor Refo anya insape yafawi fandun fa yafrur fararwei ḇeḇeso insama kenem yena namnis kuker Yahwe sasoser Ḇyena. Yafadwer kenem yena ma yakḇe baptis ro taun 1958.

Ḇarpur ya, yafarḇuk wer, ḇape kuker Saksi Yahwe oso snori Klaus Menne. Klaus ma aya nusmai payamyum ro farḇakḇuk nuḇedi ma nuna romawa ri suru, Benjamin ma Tabia. Imboi roi ḇeḇye ḇa ḇyejadi, Klaus imar ro swaf taun ri 20 aniwara snar ismai kecelakaan, inja fafisu ya yaḇe kabom. Ḇape saneraro kaḇakḇok ya byuk sneprei, snaro yafawi snonggaku ḇemar sya nari sikḇok kaḇer fa sikenem ro Firdaus ro supswan ine. (Lukas 23:​43; Farfyar 24:15) Roi befrur fa yamarisen kaku yaiso snar romawa ri fyak ayeskoya skofarmyan kam ḇe Yahwe I.

Snar yafarkor Refo ya, yafawi Yahwe I monda na ḇepyos roi ḇenapes ḇa na. Allah Yahwe iḇese ro snonggaku sya, ima ifawi pres snonggaku koine oser-oser, ma ḇaḇeḇarpur koḇena kako, roi snonggaku sya smam na ḇa. Fawawi nane nafnoḇek aya ro kirine kako, ḇesyadi fyor manggun yamam ma yasmai ḇaḇenapnapes ḇa. Pengkhotbah 5:8 doḇe, ”Rofyor mam sifur mnis snonggaku ḇesabarar sya ḇa ma sun bur hak sena baido roi ḇenapes ro sup ya ido, wakandor snar roi ine awer. Kukro oso ḇekaki syadi isya myamepen roi anna.” (Terjemahan Ende-Flores edisi 1968) ”Bekaki syadi” kyur kaku ḇe Manḇedaw koḇedi. Ibrani 4:13 ikofen, ”Ma roi ḇekenem oso kako iyokef ḇa ro Allah ḇarpon ḇyedi, snar roi ḇeḇor kam nbas ma nbaḇer ro Allah ḇarpon ḇyedi. Ma nari kokarem faro i.”

Yawasen Kaḇer Swaf Taun ri 90 Ine

Fyorno ido snonggaku sya sifuken aya rosai yaḇaḇir ya fyor yakenem ro baḇ papoik Nazi ma Komunis. Yasmai payamyum oḇaḇeri. Pamarenta surya kame, imnis ra pamarenta ḇese snonggaku sifur na, nfasnai kaku snonggaku syama sipok fa seprenta manggunsi ba. Refo ikofen bos fa nasnai, ”Snonggaku sḇepoik snonggaku isof sismai kandera ro manggunsi.”​—Pengkhotbah 8:9.

Fafisu yababo kaker ma yafawi royoḇa, yakyar snonggaku sya na separenta kuker napnapes. Kirine insape yafawi. Manḇedaw koḇedi monda na ḇefur fa roi ḇenapes ya ndarirya kaku ro supswan, ma na ifur na kuker myun snonggaku ḇeḇarḇor sya ma ḇye Roma Ḇyedi, Yesus Kristus, fa ḇyepoik supswan ine, kukro ima myam ḇepon snonggaku ḇesesya fandun sena bardi bur fandun manggun ḇyena. Refo ikofen ḇekur Yesus bo doḇe, ”Wamarisen ḇaḇenapnapesya ma wayin ḇarḇorya.” (Ibrani 1: 9) Yakofen kasumasa kaku ḇe Manseren Allah snar dun aya ḇe Raja ḇepyum kaku ma ḇenapes, ro baḇ ḇaḇepapoik ḇyedi yamarisen fa yakenem fyoro bis!

[Sonin]

Aya ma inai yesuya, Hannelore ma Sabine, rofyor nggorama ro Jerman Barat

[Sonin]

Baboine, aya, roma yedi, Benjamin, ma swari, Sandra