•  Opening Komen 2

•  Ol Sas Samting Long Baebol 3-5

  •  Tok 3

  •  Ol Gudgudfala Samting 4

  •  Baebol Riding 5

•  Kamgud Moa Long Wok Blong Prij 6-14

  •  Statem Wan Storian 7

  •  Gobak Visitim Man 8

  •  Mekem Disaepol 9

  •  Eksplenem Bilif Blong Yu 10

  •  Tok 11

  •  Samting We Yu Tokbaot 12

  •  Ol Defren Rod Blong Storian Wetem Man 13

  •  Yusum Ol Video Mo Ol Buk 14

•  Laef Blong Ol Kristin 15-16

  •  Baebol Stadi Blong Kongregesen 16

•  Klosing Komen 17

•  Ol Tok Blong Leftemap Tingting Mo Advaes 18

•  Taem 19

•  Visit Blong Eria Elda 20

•  Wik Blong Wan Dei Asembli o Bigfala Asembli 21

•  Wik Blong Memoriol 22

•  Elda We i Lukaot Long Kristin Wok Mo Laef Miting 23

•  Jeaman Blong Kristin Wok Mo Laef Miting 24

•  Nambatu Brata Blong Givim Advaes 25

•  Skul Namba Tu 26

•  Ol Video 27

1. Ol instraksen long haf ya oli blong givhan long olgeta we oli gat wan haf long miting blong Kristin Wok Mo Laef. I gud olgeta we oli gat haf oli ridim gud ol instraksen we oli mas folem, taem oli stap rere haf blong olgeta. I gud evri pablisa oli rere blong stap mo mekem tok blong olgeta. Ol narafala we oli no pablisa, be oli stap kam long miting oltaem mo oli stap folem ol tijing mo ol rul blong Baebol long laef blong olgeta, olgeta tu oli save kam ol studen. Brata we i lukaot long miting blong Kristin Wok Mo Laef i mas storian wetem man we i wantem joen long skul, blong tokbaot ol mak we hem i mas kasem blong hem i save joen, mo talem long hem sipos hem i naf blong joen. Hem i mas storian wetem hem long fored blong brata o sista we i mekem Baebol stadi blong hem (sipos wan yangfala, long fored blong papa o mama blong hem we i stap long trutok). Ol mak we hem i mas kasem oli sem mak long ol mak we man i mas kasem blong i save kam wan pablisa we i no baptaes.—od jap. 8 haf 8.

2. Wan minit. Afta long faswan singsing mo prea, jeaman blong Miting Blong Kristin Wok Mo Laef bambae i tokbaot ol bigfala poen we bambae i kamaot long miting, speseli ol poen we bambae oli givhan moa long kongregesen.

  3. Tok: Ten minit. Long haf ya i gat wan stamba tok wetem tu o tri bigfala poen i stap long Kristin Wok Mo Laef Miting Wokbuk. Wan elda o wan man blong givhan we i naf, i mekem tok ya. Sipos yumi statem wan niufala buk long Baebol riding blong wik, bambae yumi wajem video we i tokbaot buk ya. Brata we i mekem tok ya bambae i soemaot olsem wanem sam bigfala poen long video oli laenap wetem stamba tok blong haf ya. Be hem i mas meksua se hem i tokbaot ol poen we oli stap long wokbuk. Sipos hem i gat naf taem, hem i save tokbaot pija we i stap long buk, blong sapotem ol save long tok ya. Hem i save yusum sam poen we hem i faenem long wan narafala buk, be oli mas sapotem ol poen long wokbuk.

 4. Ol Gudgudfala Samting: Ten minit. Hemia wan haf blong kwestin mo ansa, mo i no gat fastok mo lastok. Wan elda o wan man blong givhan we i naf, i mekem haf ya. Brata ya i mas askem tufala kwestin, mo tu, hem i luk sipos i gat nid blong ridim ol vas o nogat. Olgeta we oli givim ansa oli no mas bitim 30 seken.

 5. Baebol Riding: Fo minit. Hemia wan haf we ol man nao oli mekem. Hem i no mas talem wan fastok o lastok, be hem i ridim ol vas nomo. Jeaman blong miting i mas wantem blong givhan long ol studen blong oli save rid gud, kasemsave long riding ya, mekem toktok blong olgeta i rongud, makem ol tok we i givim stret mining, jenisim voes, spel smol long ples we i stret, mo toktok olsem we hem i storian nomo. Sam Baebol riding oli sot mo sam oli longfala moa, taswe taem elda we i lukaot long Kristin Wok mo Laef miting i givimaot ol tok, hem i mas tingbaot samting we ol wanwan studen oli naf blong mekem.

6. Fiftin minit. Haf ya i blong trenem ol studen blong oli kam gud moa long fasin blong storian wetem ol man mo blong prij mo tij. Sipos i nidim, ol elda tu oli save mekem haf ya olsem studen. Wanwan studen i mas wok long poen we i stap long Tij buk o buk ya Lavem Ol Man, we oli putum long braket. Samtaem i gat wan tok wetem kwestin mo ansa. Wan elda o wan man blong givhan we i naf i mekem haf ya.—Luk  haf 15 blong save olsem wanem blong mekem tok wetem kwestin mo ansa.

 7. Statem Wan Storian: Wan man o wan woman we i joen long skul i save mekem haf ya. Taem wan man i mekem, man blong haos i mas wan man tu o wan memba blong famle blong hem, sem mak wetem ol woman. Tufala i save sidaon o stanap.—Blong save moa wanem we bambae yu tokbaot mo fasin blong mekem tok ya, luk  haf 12 mo  13.

 8. Gobak Visitim Man: Wan man o wan woman we i joen long skul i save mekem haf ya. Taem wan man i mekem, man blong haos i mas wan man tu o wan memba blong famle blong hem, sem mak wetem ol woman. (km 5/97 p. 2) Tufala i save sidaon o stanap. Studen i mas soemaot samting we yumi save talem taem yumi gobak visitim man we i intres.—Blong save moa long wanem we bambae yu tokbaot mo fasin blong mekem tok ya, luk  haf 12 mo  13.

 9. Mekem Disaepol: Wan man o woman we i joen long skul i save mekem haf ya. Taem wan man i mekem, man blong haos i mas wan man tu o wan memba blong famle blong hem, sem mak wetem ol woman. (km 5/97 p. 2) Tufala i save sidaon o stanap. Tufala i mas mekem olsem se tufala i stap stadi Baebol. I no nid blong talem wan fastok o lastok, be sipos studen i wok long poen ya, hem i save talem. I no nid blong ridim olgeta haf blong stadi, be sipos i gat naf taem, hem i save ridim ol haf.

 10. Eksplenem Bilif Blong Yu: Sipos haf ya i wan tok, wan man nao i mas mekem haf ya. Be sipos hem i wan pleplei, wan man o woman i save mekem. Taem wan man i mekem, man blong haos i mas wan man tu o wan memba blong famle blong hem, sem mak wetem ol woman. Studen i mas yusum ol save we i stap long refrens blong ansarem klia kwestin we i stap mo i mas toktok long fasin we i waes. Studen i save jusum se bambae hem i ridim sam haf we i stap insaed long refrens o nogat.

 11. Tok: Wan brata nao i mekem haf ya, mo hem i mekem olsem we i stap givim tok long kongregesen. Sipos tok ya i stanap long wan poen long apendiks A blong buklet ya Lavem Ol Man, studen i mas makem gud olsem wanem blong yusum ol vas ya long wok blong prij. Eksampol, studen i save eksplenem wetaem i stret blong yusum wan vas, mining blong vas ya, mo olsem wanem blong tokbaot vas ya wetem wan man. Taem tok i stanap long wan poen we i stap long wan lesen blong buklet ya Lavem Ol Man, studen i mas soemaot gud olsem wanem blong folem poen ya taem yumi prij. Hem i save tokbaot eksampol we i stap long poen 1 long lesen ya, o eni narafala vas long lesen ya sipos hem i luk se i stret.

   12. Samting We Yu Tokbaot: Ol save long haf 12 mo 13 oli kamaot nomo long haf blong “Statem Wan Storian” mo “Gobak Visitim Man.” Sipos wokbuk i no talem samting we studen i mas tokbaot o wan narafala samting, hem i save serem wan isi trutok blong Baebol we i stret long man, mo i stanemap wan kwestin blong i save gobak visitim hem. Studen i mas jusum wan topik we ol manples oli glad blong tokbaot mo i stret long samting we i stap hapen long eria blong hem. Hem i save jusum se bambae hem i yusum wan buk o soem wan video long Tijing Tulboks, o nogat. I moa gud we ol studen oli no lanem baehat ol toktok blong olgeta, be oli traehad blong storian gud, soem intres long man, mo toktok olsem we oli storian nomo.

   13. Ol Defren Rod Blong Storian Wetem Man: Studen i folem fasin blong mekem tok we wokbuk i talem, be i mekem i laenap wetem ples blong hem. Eksampol:

1.  (1) Prij Long Haos Wanwan: Hemia i min se yu prij long haos wanwan, prij long telefon, o long leta, mo yu gobak visitim man we yu bin storian wetem hem taem yu prij long ol haos wanwan.

2.  (2) Tekem Janis Blong Prij: Hemia i min se taem yu storian wetem wan man, yu traem tekem evri janis blong jenisim storian blong yutufala mo prij long hem. Maet yu serem wan tingting blong Baebol wetem wan man long wok blong yu, long skul, long komuniti, long pablik transpot, o long wan narafala ples we yu stap go long hem oltaem.

3.  (3) Prij Long Pablik Ples: Hemia i min se yu prij long troli, long ol stoa, ofis, prij long rod, long ol ples blong spel, paking, o eniples we i gat man.

 14. Yusum ol Video Mo Buk: Maet studen i wantem yusum wan video o wan buk, sipos i stret long tok blong hem. Taem wokbuk i talem wan video we studen i mas yusum o studen i wantem yusum wan, hem i save tokbaot be i no mas plei video ya.

15. Afta long singsing, haf ya blong 15 minit we samtaem i gat wan o tu haf long hem, i blong givhan long evriwan blong oli folem Tok blong God long laef blong olgeta. Wan elda o man blong givhan we i naf, i mekem haf ya sipos i no gat narafala instraksen. Be sipos hem i wan lokol nid, wan elda nao i mas mekem. Taem i gat wan tok wetem kwestin mo ansa, brata i save askem sam narafala kwestin antap long olgeta we oli stap long wokbuk. Fastok blong hem i mas sot, blong hem i save gat naf taem blong tokbaot ol bigfala poen mo letem ol man oli ansa. Sipos i gat wan intaviu, i moa gud brata o sista i kam antap long stej sipos hem i naf, i bitim we hem i sidaon nomo long jea blong hem.

  16. Baebol Stadi Blong Kongregesen: Teti minit. Wan elda we i gat gudfala fasin blong tij i mekem haf ya. (Sipos i no gat naf elda, wan man blong givhan we i naf i save mekem.) Bodi blong ol elda i mas jusum se hu bambae i lidim Baebol Stadi Blong Kongregesen. Olgeta we oli mekem haf ya, oli mas folem taem, makem ol impoten vas, mo givhan long evriwan blong luk olsem wanem oli save mekem i wok long laef blong olgeta. Brata we i lidim haf ya i save faenem plante gudfala advaes long ol instraksen blong mekem ol haf blong kwestin mo ansa. (w23.04 p. 24, bokis) Sipos evriwan i mekem ol poen blong stadi ya i kamaot klia finis, i no nid blong mekem stadi ya i kam longfala moa. I nogud blong yusum sem brata nomo blong lidim haf ya evri wik, mo sem brata blong ridim ol haf. Sipos jeaman blong Kristin Wok Mo Laef Miting i askem blong sotem Baebol Stadi, brata we i lidim stadi ya i mas save olsem wanem blong sotem. Maet hem i jus blong no ridim sam paragraf.

17. Tri minit. Jeaman blong Kristin Wok Mo Laef Miting bambae i mekem tingtingbak long ol gudfala poen blong miting ya, mo tokbaot sam poen blong nekis wik. Mo maet hem i save talemaot nem blong ol studen blong nekis wik sipos i gat naf taem. Be sipos i no gat naf taem mo i gat sam mesej o leta blong ridim, hem i mas ridimaot olgeta long taem blong klosing komen. Hem i no nid blong talemaot program blong wok blong prij mo klinim Haos Kingdom, be oli save putum long notis bod. Sipos i gat plante mesej o leta blong ridimaot, mo i no gat naf taem, jeaman i save askem long ol brata we oli gat haf long Laef Blong Ol Kristin, blong oli sotem ol haf blong olgeta. (Luk  haf 16 mo  19.) Miting bambae i finis wetem singsing mo prea.

18. Taem wan studen i mekem haf blong hem, jeaman i gat wan minit nomo blong leftemap tingting mo givim advaes long hem, folem poen we hem i wok long hem. Taem jeaman i talemaot weswan haf studen bambae i mekem, hem i no talemaot poen we bambae hem i wok long hem. Be afta we studen i finisim haf blong hem, jeaman i save talem tangkiu, i talemaot poen we studen ya i wok long hem, olsem wanem hem i wok gud long poen ya, mo long fasin we i kaen hem i save eksplenem long studen from wanem mo olsem wanem hem i save wok gud moa long poen ya. Jeaman i save tokbaot sam narafala samting long tok o pleplei ya, we hem i ting se bambae i givhan long studen o long kongregesen. Afta we miting i finis o long wan narafala taem, jeaman i save yusum buklet ya Lavem Ol Man, o Tij buklet o buk blong Tiokratik Skul, blong givim sam moa advaes long poen we studen i wok long hem o long wan narafala poen bakegen.—Blong save moa long wok blong jeaman blong Kristin Wok Mo Laef Miting mo nambatu brata blong givim advaes, luk  haf 19,  24, mo  25.

19. I no mas gat wan haf blong miting we i bitim taem, sem mak long ol komen blong jeaman. Nating se long Miting Blong Kristin Wok Mo Laef Miting Wokbuk, oli putum stret taem blong ol wanwan haf, be sipos yu kavremap finis olgeta poen long tok blong yu, i no nid blong yu ademap sam moa save blong mekem se i go finis gud long stret taem we oli putum. Sipos sam haf blong miting oli bitim taem, jeaman o nambatu brata blong givim advaes i save toktok long ol brata ya long wan narafala taem. (Luk  haf 24 mo  25.) Ful miting ya wetem ol singsing mo prea, hem i 1 aoa mo 45 minit.

20. Taem eria elda i visitim kongregesen, program i mas folem Kristin Wok Mo Laef Miting Wokbuk. Be samting we i defren hemia se: Tok blong 30 minit we eria elda i mekem i tekem ples blong Baebol Stadi Blong Kongregesen. Bifo we eria elda i mekem laswan tok blong hem, jeaman i mekem tingtingbak mo i tokbaot miting blong nekis wik, i talemaot ol mesej mo ridim ol leta sipos i gat. Biaen, hem i invaetem eria elda blong givim tok blong hem. Afta long tok ya, eria elda bambae i finisim miting wetem singsing we hem i jusum. Hem i save askem long wan narafala brata blong mekem laswan prea. I no gat namba tu skul long taem blong visit blong eria elda. Sipos i gat wan grup we i toktok defren lanwis we kongregesen i lukaot long hem, oli save mekem miting blong olgeta long lanwis, be long taem blong tok blong eria elda, olgeta tu oli joen.

21. I no gat miting blong kongregesen long wik blong wan dei asembli o bigfala asembli. Talemaot long kongregesen se wanwan brata mo sista o wanwan famle oli save stadi long ol haf blong miting long haos.

22. Sipos Memoriol i foldaon long wan dei blong wik, bambae i no gat Miting Blong Kristin Wok Mo Laef.

23. Bodi blong ol elda i jusum wan elda blong lukaot long Kristin Wok Mo Laef Miting. Hem i meksua se miting i oganaes gud mo i folem ol instraksen ya. Hem i mas toktok plante wetem nambatu brata blong givim advaes. Taem Kristin Wok Mo Laef Miting Wokbuk i kamaot, elda we i lukaot long miting ya bambae i kwik blong givimaot olgeta tok blong tu manis we i kam. Hemia i no minim ol tok we ol studen nomo oli givim, be ol narafala tok tu, mo hem i mas jusum jeaman blong miting tu. Be hem i mas jusum nomo ol brata we bodi blong ol elda i agri finis blong oli save mekem jeaman long taem blong miting. (Luk  haf 3-16 mo  24.) Taem hem i givimaot ol haf long ol studen, hem i tingbaot yia blong olgeta, ekspiriens we oli gat, mo sipos oli naf mo no fraet blong tokbaot topik ya. Hem i mekem sem mak taem i givimaot ol narafala haf blong miting tu. Hem i mas yusum pepa ya Tok Blong Yu Long Kristin Wok Mo Laef Miting (S-89) blong givimaot ol tok ya tri wik bifo long dei we oli mas givim. Elda we i lukaot long Kristin Wok Mo Laef Miting i mas meksua se i putum wan kopi blong ful miting wetem olgeta we oli givim tok, long notisbod. Bodi blong ol elda i save askem long wan narafala elda o man blong givhan blong i givhan long hem, be ol elda nomo oli mas mekem ol haf long miting we i no blong ol studen.

24. Evri wik, wan elda bambae i jeaman long Miting Blong Kristin Wok Mo Laef. (Sipos i no gat naf elda, wan man blong givhan we i gat gudfala fasin blong tij i save mekem.) Hem i mas rerem fastok mo lastok blong miting, mo i singaot ol wanwan man blong oli kam mekem haf blong olgeta. Sipos i no gat naf elda, maet hem tu i mas mekem sam nara haf blong miting, speseli haf we i gat video be i no gat kwestin mo ansa long hem. Ol komen we hem i talem afta long ol wanwan haf oli mas sot nomo. Bodi blong ol elda i mas jusum ol elda we oli naf blong mekem jeaman. Ol elda we oli jusum, olgeta nao bambae oli stap mekem haf blong jeaman. Maet elda we i lukaot long Miting Blong Kristin Wok Mo Laef i jeaman moa i bitim ol narafala elda, be hemia i dipen nomo long situesen long wanwan kongregesen. Sipos wan elda i naf blong lidim Baebol Stadi Blong Kongregesen, i min se hem i naf tu blong mekem jeaman blong miting. Plis, tingbaot se elda we i jeaman, i mas talem ol gudfala toktok blong leftemap tingting, mo sipos i nidim, hem i save givim advaes long ol studen we oli gat haf. Mo tu, hem i mas meksua se miting i finis long stret taem. (Luk  haf 17 mo  19.) Sipos jeaman i wantem, mo sipos i gat naf spes, oli save putum wan narafala maekrofon long platfom, olsem nao taem jeaman i singaot nekiswan brata blong kam mekem haf blong hem, be brata ya i stanap rere finis long narafala maekrofon. Mo tu, blong sevem taem, maet jeaman i wantem sidaon long wan jea long platfom long taem we i gat haf blong Baebol riding mo Kamgud Moa Long Wok Blong Prij.

25. I gud sipos wan elda we i gat ekspiriens blong mekem ol tok, i save mekem wok ya. Sipos i gat nid, hem i givim advaes long ol elda mo ol man blong givhan, long saed blong eni tok we oli mekem, olsem haf blong Miting Blong Kristin Wok Mo Laef, pablik tok, lidim o ridim Wajtaoa Stadi mo Baebol Stadi Blong Kongregesen. Hem i go luk olgeta wanwan blong givim advaes ya. (Luk  haf 19.) Sipos i gat plante elda long kongregesen we oli givim ol gudfala tok mo oli tij gud, oli save jusum defren elda evri yia blong mekem wok ya. I no nid blong hem i givim advaes long evri tok we ol elda o man blong givhan oli mekem.

26. Sipos i gat plante studen, kongregesen i save gat skul namba tu o i save gat moa. Long skul namba tu, i gud sipos brata blong givim advaes i wan elda. Be sipos i no gat plante elda, wan man blong givhan we i naf, i save mekem wok ya. Bodi blong ol elda i mas jusum brata we bambae i mekem wok ya, o sipos wan nomo bambae i mekem o ol defdefren brata. Brata we i givim advaes i mas folem ol save long  haf 18. Sipos i gat skul namba tu, ol studen bambae oli go long narafala rum afta long haf ya Ol Gudgudfala Samting. Mo bambae oli kambak afta long haf blong Kamgud Moa Long Wok Blong Prij.

27. I gat ol video we oli jusum finis blong yumi wajem long taem blong miting. Ol video blong miting long medel wik oli stap long JW Library^® mo oli save daonlodem long fon, tablet o laptop.

© 2023 Watch Tower Bible and Tract Society of Pennsylvania

S-38-LM 11/23