1, 2. (1) ?Hu i “King we rul blong hem i stap oltaem nomo, gogo i no save finis,” mo from wanem? (Yu luk pija long stat blong stadi.) (2) ?From wanem yumi wantem blong Jehova i rul long yumi?

KING SOBHUZA 2 blong Swasilan i rul klosap 61 yia. Plante man oli sapraes se king ya i rul longtaem olsem. Nating se i olsem, i gat wan narafala king we laef blong hem i longfala moa i bitim laef blong ol man. Baebol i talem se hem i “King we rul blong hem i stap oltaem nomo, gogo i no save finis.” (1 Tim. 1:17) Wan man blong raetem Sam i talemaot nem blong King ya we i rul long heven mo wol. Hem i talem se: ‘Hae God [Jehova], bambae i stap King oltaem, gogo i no save finis.’—Sam 10:16.

² God i King oltaem gogo i no save finis. From samting ya, rul blong hem i defren long rul blong man. Be samting we i pulum yumi i kam klosap long Jehova, hemia fasin blong hem blong rul. Wan king we i rul 40 yia long Isrel bifo, i presem Jehova se: “Hae God, hem i gat sore, mo oltaem hem i glad tumas blong mekem i gud long man. Hem i no save kros kwik, fasin blong hem we oltaem i stap lavem man tumas, hem i gud we i gud, i bitim mak. Hae God, hem i King. Hem i stap long ples blong hem long heven, mo i stap rul long olgeta samting.” (Sam 103:8, 19) Jehova i King blong yumi, be i no hemia nomo. Hem i Papa blong yumi we i stap long heven mo hem i lavem yumi. ?Long wanem fasin Jehova i olsem wan Papa? ?Jehova i soemaot olsem wanem se hem i King yet, taem Adam mo Iv  tufala i agensem hem long Iden? Ansa blong tufala kwestin ya bambae i pulum yumi i kam klosap long Jehova, mo i mekem yumi trastem hem moa.

3. ?Hu i fas man long bigfala famle blong Jehova? ?Mo hu ol narafala we God i mekem olgeta oli olsem “ol pikinini” blong hem?

³ !Jehova i mas harem gud tumas taem hem i mekem fasbon Pikinini blong hem! Jehova i no ting nating long Jisas. Be hem i lavem hem olsem wan papa we i lavem pikinini blong hem. Mo hem i letem Pikinini blong hem i joen wetem hem, blong mekem ol narafala milian enjel we oli stret gud olgeta. Hemia wan wok we tufala i harem gud tumas blong mekem. (Kol. 1:15-17) Baebol i talem se ol enjel ya oli “man blong wok blong [Jehova].” Oli glad blong mekem “ol samting we hem i wantem.” Mo Jehova i ona long olgeta taem hem i talem se oli “ol pikinini” blong hem. Olgeta oli stap long bigfala famle blong hem.—Sam 103:20-22; Job 38:7, NW.

4. ?Wanem i mekem se ol man tu oli stap long bigfala famle blong Jehova?

⁴ Taem Jehova i mekem heven mo wol finis, hem i mekem famle blong hem i kam bigwan moa. ?Hem i mekem samting ya olsem wanem? Hem i mekem wol ya i kam olsem wan naesfala hom, mo afta hem i mekem fas man ya, Adam, we i tekem fasin blong hem. (Jen. 1:26-28) Jehova i mekem Adam, taswe i stret nomo blong Adam i obei long hem. Jehova i olsem wan Papa we i lavem ol man mo i kaen long olgeta, taswe hem i talemaot loa blong hem long Adam. Hem i no givim ol rul we oli blokem Adam blong mekem samting we hem i wantem.—Ridim Jenesis 2:15-17.

5. ?Wol ya bambae i fulap long ol man olsem wanem?

⁵ Jehova i no olsem ol narafala king blong wol. Hem i luk ol man blong hem se oli famle blong hem. Hem i trastem olgeta bigwan, ale hem i glad blong givim plante wok long olgeta mo i givim raet long olgeta blong oli mekem ol wok ya. Yu traem tingbaot. Hem i givim wok long Adam blong i putum nem blong ol anamol. Hemia wan wok we i no isi, be i save mekem Adam i harem gud. (Jen. 1:26; 2:19, 20) God i no fulumap wol ya wetem plante man we oli stret gud. Be hem i jusum blong mekem wan woman we i stret gud, blong i kam woman blong Adam. Woman ya hemia Iv. (Jen. 2:21, 22) Biaen, hem i givim janis long tufala blong tufala i fulumap wol ya wetem ol pikinini blong tufala. Bambae oli mekem se sloslo, fulwol i kam wan Paradaes. Ale, oli save joen gud wetem ol enjel long heven, blong oli wosipim Jehova blong olwe. Jehova i lavem Adam mo Iv olsem ol pikinini blong hem, taem hem i givim nambawan hop long fiuja long tufala.

6. (1) ?Samfala long famle blong God oli stat blong agensem God olsem wanem? (2) ?Olsem wanem yumi save se Jehova i bos yet long olgeta samting?

⁶ Sore tumas, Adam mo Iv tufala i no glad blong Jehova i King blong tufala. Be tufala i jusum blong folem Setan, wan enjel we i agensem God. (Jen. 3:1-6) From samting ya, tufala i harem nogud, tufala i safa, mo tufala i ded, mo sem samting i hapen long ol pikinini blong tufala. (Jen. 3:16-19; Rom 5:12) God i no moa gat ol man blong hem long wol ya we oli obei long hem. ?Olsem wanem? ?Hemia i min se Jehova i no moa save bos long olgeta samting, mo hem i lego raet we hem i gat blong rul antap long wol ya? !Nogat! Jehova i bos yet long olgeta samting from we hem i ronemaot Adam mo Iv long garen blong Iden, mo hem i putum ol Jerubim oli gad long garen ya, blong blokem tufala blong tufala i no moa kambak long garen ya. (Jen. 3:23, 24) Long semtaem ya, hem i soemaot se hem i wan Papa we i lavem ol man. Hem i promes se wan dei bambae hem i gat wan bigfala famle blong ol gudfala enjel mo ol gudfala man. Mo hem i promes se wan “pikinini” we bambae i kamaot biaen long Adam bambae i kilim Setan i ded, mo i karemaot ol  trabol we i kamaot from sin blong Adam.—Ridim Jenesis 3:15.

7, 8. (1) ?Long taem blong Noa, laef i kam nogud olsem wanem? (2) ?Jehova i mekem wanem blong klinim wol mo blong sevem famle blong hem long wol ya?

⁷ Plante handred yia biaen, sam man olsem Ebel mo Inok, oli jusum blong obei long Jehova. Be bighaf blong ol man oli no wantem se Jehova i King mo i Papa blong olgeta. Long taem blong Noa, olbaot long evri ples, ol man oli stap “faet mo oli stap kilim man i ded.” (Jen. 6:11) ?Yu ting se hemia i min se Jehova i no moa bos long ol samting long wol? ?Baebol i talem wanem?

⁸ Long Baebol, Jehova i talem se Noa i mas mekem wan bigfala sip, mo hem i talemaot klia plan blong sip ya. Bigfala sip ya bambae i sevem Noa mo famle blong hem. Jehova i soemaot tu se hem i lavem ol man, taem hem i jusum Noa blong i kam “wan prija we i stap talemaot stret fasin.” (2 Pita 2:5) Noa i talem long ol man se oli mas tanem tingting blong olgeta. Mo hem i givim woning long olgeta long saed blong bigfala trabol we i stap kam, be oli no wantem lesin long hem. Blong plante yia, Noa mo famle blong hem oli laef long medel blong ol man we oli stap kilim man i ded, mo oli stap mekem ol rabis fasin. Jehova i olsem wan Papa we i lavem ol man, taswe hem i protektem mo i lidim Noa mo famle blong hem. Taem Jehova i mekem bigfala wota i ron, hem i tekemaot ol stronghed man mo ol rabis enjel long wol ya. Hemia i soemaot se hem i bos long olgeta samting.—Jen. 7:17-24.

9. ?Afta long bigfala wota, ol man oli gat wanem janis?

⁹ Taem Noa mo famle blong hem oli kamaot long bigfala sip ya, ating oli wantem tumas blong talem tangkiu long Jehova from we hem i kea mo i protektem olgeta. Ale Noa i wokem wan olta, i tekem ol anamol, mo i mekem sakrefaes long olgeta blong mekem wosip long Jehova. Jehova i blesem Noa mo famle blong hem, mo i talem long olgeta se: “Yufala i mas gat plante pikinini, blong bambae wol ya i kam fulap long olgeta.” (Jen. 8:20–9:1) Stat long taem ya bakegen, ol man oli gat janis blong joen gud blong mekem wosip long Jehova mo blong fulumap wol ya.

10. (1) ?Ol man oli stat blong agensem Jehova bakegen olsem wanem, mo long weples? (2) ?Jehova i mekem wanem blong meksua se samting we hem i wantem i kamtru?

¹⁰ Be afta long bigfala wota, ol man oli sinman yet. Setan mo ol rabis enjel blong hem oli gat paoa yet long olgeta. I no longtaem biaen, ol man oli stat blong agensem hae rul blong Jehova. Wan man we i agensem Jehova, hemia Nimrod we hem i smol bubu blong Noa. Nimrod i “wan strong man blong ronem anamol blong kilim olgeta, we hem i agensem Jehova.” (NW) Hem i wokem ol bigbigfala taon mo i putumap hem wan blong i rul olsem king “long kantri ya Babilonia.” Mo hem nao i lukaot long wok ya blong bildim Taoa blong Babel. (Jen. 10:8-12) King ya i traehad blong agensem samting we Jehova i wantem. ?Jehova bambae i mekem wanem long hem? Jehova i mekem lanwis blong ol man i paspas, nao ol man blong Nimrod oli go stap olbaot long evri ples long wol. Long olgeta ples we oli go long hem, oli tekem giaman wosip blong olgeta mo fasin blong rul blong man, i go wetem olgeta.—Jen. 11:1-9.

11. ?Jehova i soemaot olsem wanem se hem i stap tru long fren blong hem Ebraham?

¹¹ Plante man we oli laef afta long taem blong Noa, oli mekem wosip long ol giaman god. Be i gat sam gudfala man we oli wosipim Jehova. Wan long olgeta hemia Ebraham. Hem i gat wan gudfala laef long Uru, be hem i obei long Jehova, i lego taon ya, mo i go stap long ol haos tapolen blong plante yia. (Jen. 11:31; Hib. 11:8, 9) Ebraham i no trastem ol king mo ol bigbigfala stonwol blong ol taon se oli save protektem hem. Jehova nao i protektem Ebraham mo famle blong hem. Man blong raetem Sam i tokbaot Jehova olsem wan papa we i protektem ol man blong hem. Hem i talem se: “Hae God i no letem ol man long ol  ples ya oli spolem olgeta. Hem i tok long ol king from olgeta.” (Sam 105:13, 14) Jehova i stap tru long fren blong hem Ebraham, taswe hem i promes long hem se: “Bambae mi mekem we yu yu gat plante pikinini we bambae oli kamaot biaen long yu, mo sam long olgeta bambae oli king.”—Jen. 17:6; Jem. 2:23.

12. ?Jehova i soemaot olsem wanem se hem i hae moa long King Fero? ?Mo samting ya i givhan long ol man blong hem olsem wanem?

¹² God i promes long Aesak mo boe blong hem Jekob se bambae hem i blesem tufala, mo se ol man long laen blong tufala bambae oli kam king. (Jen. 26:3-5; 35:11) Be bifo we samting ya i hapen, oli kam slef long Ijip. ?Olsem wanem? ?Hemia i min se Jehova bambae i no moa mekem promes blong hem i kamtru? ?Hem i lego raet we hem i gat blong rul antap long wol? !Nogat! Long stret taem blong hem, Jehova i mekem wan samting blong soemaot se hem i gat paoa, mo se hem i hae moa long stronghed king ya Fero. Ol man Isrel oli bilif long Jehova mo Jehova i mekem wan bigfala merikel blong sevem olgeta, taem oli pastru long Red Si. I klia se Jehova i Hae King yet blong heven mo wol. Hem i wan Papa we i kea long ol pikinini blong hem, taswe hem i yusum bigfala paoa blong hem blong protektem ol man blong hem.—Ridim Eksodas 14:13, 14.

13, 14. (1) ?Long singsing we ol man Isrel oli mekem, oli talemaot wanem long saed blong Jehova? (2) ?Jehova i mekem wanem promes long Deved?

¹³ Stret afta we Jehova i tekemaot ol man Isrel long Ijip, olgeta oli singsing blong presem hem from we oli win. Singsing ya i stap long Eksodas japta 15. Long vas 18 i talem se: “Yu bambae yu King oltaem nomo, gogo i no save finis.” Yes, Jehova i kam King blong niufala neson blong Isrel. (Dut. 33:5) Be ol man Isrel oli no harem gud yet se Jehova i King blong olgeta. Klosap 400 yia afta we oli aot long Ijip, oli askem long God blong i putumap wan king we bambae i rul long olgeta, olsem we ol narafala kantri oli mekem. (1 Saml. 8:5) Be long taem we King Deved i rul, i klia se Jehova i King yet.

¹⁴ Deved i karem tabu bokis blong kontrak i go long Jerusalem. Long taem ya, ol man Isrel oli glad tumas, mo ol Livaet oli singsing blong presem Jehova. Oli talem impoten toktok ya long 1 Kronikel 16:31 (NW) we i talem se: “Yufala i talemaot long ol man blong ol narafala kantri se, ‘!Jehova i kam King!’” ?Be olsem wanem Jehova we i King blong olwe finis, i kam King long taem ya? Jehova i kam King, taem hem i yusum paoa blong hem, no i jusum wan man blong i rul long nem blong  hem. I impoten tumas blong kasem mining blong tok ya. Bifo we Deved i ded, Jehova i promes long hem se rul blong hem bambae i stap blong olwe. Hem i talem se: “Bambae mi mekem wan long ol pikinini blong yu i kam king, mo bambae mi stap lukaot gud long kingdom blong hem blong i stanap strong oltaem.” (2 Saml. 7:12, 13) Promes ya i kamtru bitim 1,000 yia biaen, taem “pikinini” ya we i kamaot biaen long Deved, i kamtru. ?Pikinini ya hem i hu, mo hem i kam King wetaem?

15, 16. ?Wetaem God i jusum Jisas blong i King long Kingdom? ?Taem Jisas i stap long wol, hem i mekem wanem blong rerem Kingdom blong hem?

¹⁵ Long yia 29, Jon Baptaes i stat blong talemaot se: “Taem blong God i kam King blong olgeta man long wol [“Kingdom blong God,” NW] i kam klosap finis.” (Mat. 3:2) Taem Jon i baptaesem Jisas, Jehova i jusum Jisas olsem Mesaea we hem i promes blong sanem, mo King long Kingdom blong God. Jehova i soemaot se hem i olsem wan papa we i lavem Jisas tumas, taem hem i talem se: “Hemia pikinini blong mi, we mi lavem hem tumas. Mi mi glad tumas long hem.”—Mat. 3:17.

¹⁶ Long olgeta yia we Jisas i stap prij, hem i leftemap nem blong Papa blong hem. (Jon 17:4) Hem i mekem olsem taem hem i stap talemaot Kingdom blong God. (Luk 4:43) Hem i tijim ol man blong hem tu blong oli prea from Kingdom ya blong i kam. (Mat. 6:10) From we God i jusum Jisas blong i King, Jisas i save talem long ol enemi blong hem se: “Fasin we God i stap kam King blong ol man blong hem [“Kingdom blong God,” NW], hem i stap finis long medel blong yufala.” (Luk 17:21) Long naet bifo we Jisas i ded, hem i stanemap wan kontrak wetem aposol blong hem, long saed blong wan kingdom. Hemia i min se sam long ol man blong hem, bambae oli save rul olsem ol king wetem hem long Kingdom blong God.—Luk 22:28-30.

17. ?Long wanem fasin Jisas i stat rul long yia 33, be from wanem hem i mas wet yet?

¹⁷ ?Wetaem bambae Jisas i stat blong rul olsem King long Kingdom blong God? Hem i no stat rul wantaem nomo. Afta we hem i mekem kontrak wetem ol man blong hem, ol man oli kilim hem i ded mo ol man blong hem oli ronwe i go wanwan. (Jon 16:32) Be Jehova i bos yet long ol samting we hem i mekem, olsem we hem i mekem bifo. Long namba tri dei, hem i mekem Pikinini blong hem i laef bakegen. Mo long dei blong Pentekos long yia 33, Jisas i stat blong rul long Kristin kongregesen. (Kol. 1:13) Be Jisas we i “pikinini” ya we God i promes se bambae i kamaot biaen long Deved, i mas wet gogo hem i kasem ful paoa, blong i rul antap long wol. Jehova i talem long Pikinini blong hem se: “Yu sidaon long raet saed blong mi, yu wet. Bambae mi mekem ol enemi blong yu oli stap aninit long paoa blong yu, oli slef blong yu.”—Sam 110:1.

18, 19. ?Ol samting we Jehova i mekem oli pulum yumi blong mekem wanem? ?Bambae yumi lanem wanem long nekis stadi?

¹⁸ Plante taosen yia finis, sam enjel mo ol man oli stap agensem rul blong Jehova. Be Jehova i neva lego raet we hem i gat blong rul long heven mo wol. Hem i bos yet long ol samting we hem i mekem. Hem i wan Papa we i lavem ol man blong hem, taswe hem i protektem mo i kea long ol gudfala man blong hem, olsem Noa, Ebraham, mo Deved. Ol samting ya oli pulum yumi blong yumi kam klosap long Jehova, mo blong yumi obei long hem olsem King blong yumi.

¹⁹ Be maet yumi stap askem se: ?Jehova i kam King olsem wanem long taem blong yumi? ?Yumi mas mekem wanem blong yumi save kam ol gudfala man blong wok blong Jehova? ?Yumi mas mekem wanem blong yumi save kam ol pikinini blong hem we oli stret gud olgeta long bigfala famle blong hem? ?Taem yumi prea blong Kingdom blong God i kam, hemia i minim wanem? Bambae yumi kasem ansa blong ol kwestin ya long nekis stadi.