1, 2. (1) ?God i pulum Solomon blong i talem wanem long ol yangfala? (2) ?From wanem i gud we ol Kristin we oli gat bitim 50 yia, oli tingbaot advaes blong Solomon?

JEHOVA i pulum King Solomon blong talem long ol yangfala se: “God i mekem yumi, mo naoia we yufala i yangfala yet, oltaem yufala i mas tingbaot hem. I nogud yufala i stap wet go kasem taem ya we evri dei, ol trabol bambae oli stap kam kasem yufala.” ?Wanem ya taem blong “ol trabol”? Tok ya i minim taem we man i kam olfala. Solomon i tokbaot ol hadtaem we ol olfala oli kasem olsem ol han oli seksek, ol leg oli kam slak mo oli no moa strong, ol tut oli folfoldaon, ae i kam nogud, sora i fas, hea i waet, baksaed i ben, mo bodi i no moa strong. Hemia nao from wanem Solomon i talem se yumi mas tingbaot God taem yumi yangfala yet.—Ridim Prija 12:1-5.

² Plante Kristin we oli gat bitim 50 yia, oli gat plante paoa yet. Maet oli gat sam waet hea, be maet oli no kasem ol narafala trabol ya we Solomon i tokbaot. ?Olsem wanem? ?Ol Kristin ya tu oli save folem advaes ya we Solomon i talem long ol yangfala? ?Advaes ya se ‘yufala i mas tingbaot God ya we i mekem yumi’ i minim wanem?

3. ?I minim wanem se yumi tingbaot God we i mekem yumi?

 ³ Maet yumi stap mekem wok blong Jehova plante yia finis, be i gud we sam samtaem yumi tingbaot bakegen olgeta samting we Jehova i mekem. Laef i wan nambawan presen we hem i givim. Fasin blong Jehova blong wokem ol defdefren samting, i nambawan tumas mo yumi no naf blong kasem save fulwan long hem. Ol defdefren samting we Jehova i mekem, oli givim janis long yumi blong yumi save harem gud long laef long plante rod. Taem yumi tingting dip long ol samting we Jehova i mekem, bambae yumi tingbaot bakegen se hem i lavem yumi, hem i gat paoa mo i waes. (Sam 143:5) Be taem yumi talem se yumi tingbaot God we i mekem yumi, hemia i minim tu se yumi tingbaot samting we hem i wantem yumi blong mekem. Taem yumi tingting dip long olgeta samting ya, bambae yumi wantem talem tangkiu long Jehova, ale bambae yumi yusum ful laef blong yumi blong mekem evri samting we yumi naf blong mekem long wok blong hem.—Pri. 12:13.

4. ?Wanem kwestin we ol Kristin we oli mekem wok blong Jehova plante yia finis, oli save askem? ?Mo from wanem?

⁴ Sipos yu yu wan Kristin we yu mekem wok blong Jehova plante yia finis, i gud yu askem se: ‘?Bambae mi mi mekem wanem long laef blong mi naoia, we mi gat sam paoa yet?’ From we yu yu stap longtaem long trutok, yu gat sam janis we ol narafala oli nogat. Yu save tijim ol yangfala long ol samting we yu lanem long saed blong Jehova. Yu save tokbaot ol gudfala samting we oli hapen taem yu mekem wok blong Jehova. King Deved i prea blong hem i save gat janis blong mekem olsem. Hem i raetem se: “God, i stat long taem we mi mi yangfala, yu yu stap tijim mi. . . . Naoia mi mi olfala, hea blong mi i waet. Mo sipos mi stap talemaot yu long ol man we oli bon biaen long mi, se yu yu strong, yu gat paoa, plis yu stap wetem mi, yu no lego mi.”—Sam 71:17, 18.

5. ?Ol Kristin we oli stap kam olfala, oli save mekem wanem blong serem samting we oli lanem wetem ol narafala?

⁵ ?Bambae yu yu mekem wanem blong yu serem waes blong yu long ol narafala? ?Yu yu save singaot ol yangfala oli kam long haos blong yu, blong yufala i save harem gud blong kampani wanples? ?Yu yu save mekem plan blong prij wetem olgeta, blong oli save luk glad we yu kasem long wok blong Jehova? Elihu i talem se: “I gud yufala nomo i tok, i gud yufala ol olfala nomo i talemaot ol waes blong yufala.” (Job 32:7) Aposol Pol i talem se ol Kristin woman we oli mekem wok blong Jehova plante yia finis, oli mas talem ol tok mo mekem ol fasin we i leftemap tingting blong ol narafala. Hem i talem se: ‘Ol olfala woman oli mas soemaot ol stret fasin’ blong bambae oli save tijim ol narafala long ol gudfala fasin ya.—Taet. 2:3.

6. ?From wanem yumi nidim ol Kristin we oli stap longtaem long trutok?

⁶ Sipos yu yu wan Kristin we yu stap longtaem long trutok, i gat plante samting we yu save mekem blong givhan long ol narafala. Yu traem tingbaot samting we yu kasem save long hem naoia, we yu no bin save 30 no 40 yia bifo. Yu save yusum gud ol rul blong Baebol long laef blong yu. Yu gat gudhan blong mekem trutok blong Baebol i kasem hat blong ol narafala. Sipos yu yu wan elda, yu save olsem wanem blong givhan long wan brata we i mekem wan desisen we i no waes. (Gal. 6:1) Maet yu yu lanem blong lukaot long ol wok blong kongregesen, ol defren wok blong asembli, mo blong bildim ol Haos Kingdom. Maet yu yu save olsem wanem blong toktok wetem ol dokta blong oli yusum ol rod blong katem man, we oli no nid blong yusum blad. Nating sipos yu yu baptaes i no longtaem, be yu yu save plante samting long laef. Sipos yu gat pikinini, yu yu lanem plante gudfala fasin we oli save givhan long yu. Yes, i gat plante gudfala samting we ol olfala Kristin oli save mekem blong givhan long ol man blong Jehova. Oli save tijim ol Kristin brata mo sista, oli  save lidim olgeta, mo oli save leftemap tingting blong olgeta.—Ridim Job 12:12.

7. ?Wanem gudfala trening we ol Kristin we oli stap kam olfala oli save givim long ol yangfala Kristin?

⁷ Sipos yu yu naf blong mekem sam samting, ?bambae yu yu givhan long ol narafala olsem wanem? Maet yu save givhan long ol yangfala blong oli save olsem wanem blong statem mo mekem ol Baebol stadi. Sipos yu yu wan sista, ?yu save givhan long ol yangfala mama blong oli lanem blong mekem wok blong Jehova mo long semtaem, oli lukaot long ol smol pikinini blong olgeta? Sipos yu yu wan brata, ?yu save tijim ol yangfala brata blong oli mekem ol tok long fasin we oli glad, mo blong oli kam ol gudfala man blong talemaot gud nius? ?Yu yu save soemaot long olgeta se yu yu mekem olsem wanem taem yu go visitim ol olfala Kristin blong leftemap tingting blong olgeta? Nating se yu no moa strong olsem bifo, be yu gat sam nambawan janis yet blong trenem ol yangfala Kristin. Baebol i talem se: “Naesfala samting long saed blong ol yangfala man, hemia paoa blong olgeta. Be samting we i naes tumas long saed blong ol olfala, hemia waet hea blong olgeta.”—Prov. 20:29, NW.

8. ?Aposol Pol i mekem wanem taem hem i stap kam olfala?

⁸ Taem aposol Pol i stap kam olfala, hem i yusum taem ya blong mekem moa long wok blong Jehova. Bifo we hem i kamaot long kalabus long Rom, samwe long yia 61, hem i bin mekem plante wok finis olsem wan misinari, mo hem i bin stanap strong long plante trabol. Sipos hem i wantem, hem i save stap nomo long Rom blong prij. (2 Kor. 11:23-27) Ating ol brata long Rom oli wantem tumas se Pol i stap wetem olgeta blong givhan long olgeta. Be Pol i luk se i nidim moa man blong prij long narafala kantri. Ale, hem i mekem misinari trip blong hem bakegen. Hem wetem Taetas mo Timoti, oli go long Efesas, biaen long Krit, mo maet oli go long Masedonia tu. (1 Tim. 1:3; Taet. 1:5) Yumi no save sipos hem i go long Spen, be hem i bin plan blong go long ples ya tu.—Rom 15:24, 28.

9. ?Wetaem Pita i go long ples we i nidim moa man blong prij? (Yu luk pija long stat blong stadi.)

⁹ Maet aposol Pita i gat bitim 50 yia taem hem i go long ol ples we i nidim moa man blong prij. ?Yumi save samting ya olsem wanem? Sipos hem i gat klosap sem yia olsem Jisas, no hem i olfala moa long Jisas, hemia i min se hem i gat samwe 50 yia long yia 49, taem hem i stap wetem ol narafala aposol blong mekem miting long Jerusalem. (Wok 15:7) Sam taem afta long miting ya, Pita i go stap long Babilon from we hem i wantem prij long plante man Jiu we oli stap long ples ya. (Gal. 2:9) Taem hem i stap longwe, hem i raetem fas leta blong hem, hemia samwe long yia 62. (1 Pita 5:13) Nating se i no isi blong go stap long ol ples we i nidim moa man blong prij, mo nating se Pita i stap kam olfala, be hem i no letem ol samting ya oli blokem hem, nao hem i no moa kasem glad long wok blong Jehova.

10, 11. ?Robert mo woman blong hem tufala i mekem wanem?

¹⁰ Tede, plante Kristin we oli gat bitim 50 yia, oli luk se laef blong olgeta i jenis, mo oli luk se oli save mekem wok blong Jehova long sam niufala rod bakegen. Samfala oli go long ol ples we i nidim moa man blong prij. Hemia nao samting we Robert mo woman blong hem tufala i mekem. Tufala i gat samwe 55 yia taem tufala i luksave se tufala i gat plante janis blong mekem moa long wok blong Jehova. Boe blong tufala i no moa stap long haos, mo papa mo mama blong tufala tu, oli ded finis. Tufala i kasem wan smol mane long papa mama blong tufala, mo tufala i luksave se sipos tufala i salem haos blong tufala, bambae tufala i save pem lon blong haos ya, mo bambae tufala i gat inaf mane kasem taem we Robert i ritae mo i kasem smol mane we gavman i givim long hem. Tufala i harem se long Bolivia, plante man oli wantem stadi Baebol, mo i no sas tumas blong laef longwe. Ale, tufala i go long Bolivia. Robert i talem se: “I no isi blong lan long niufala ples ya. Evri samting oli defren long ol samting long ples blong  mitufala long Not Amerika. Be nating se i olsem, mitufala i kasem plante blesing from desisen we mitufala i mekem.”

¹¹ Robert i gohed i se: “Naoia mitufala i bisi blong givhan long kongregesen. Samfala we mitufala i stadi Baebol wetem olgeta, oli baptaes. Wan famle we mitufala i stadi wetem olgeta, oli pua lelebet mo oli stap long wan vilej we i stap longwe. Be evri wik, oli wokbaot i kam long taon blong joen long ol miting, nating se i no isi long olgeta. !Yu traem tingbaot glad we mitufala i kasem taem mitufala i luk we famle ya i stap gohed gud, mo fasbon boe i mekem wok blong paenia!”

12, 13. Afta we Brian i ritae, ?hem mo woman blong hem tufala i mekem wanem?

¹² Eksampol blong ol Kristin brata mo sista we oli stap kam olfala, i save givhan bigwan long ol kongregesen mo ol grup, we ol pablisa oli toktok narafala lanwis. Yumi save harem gud tumas taem yumi prij long ol man we oli toktok narafala lanwis. Yu traem tingbaot Brian we i blong Briten. Hem i talem se taem hem i gat 65 yia mo i ritae, hem wetem woman blong hem tufala i harem se tufala i no moa gat plante samting blong mekem. Hem i talem se: “Tufala pikinini blong mitufala, tufala i no moa stap wetem mitufala. Mo i no isi blong faenem wan man we i glad blong stadi Baebol. Be biaen, mi mitim wan yangfala Jaenis man we i wok long yunivesiti long taon we mifala i stap long hem. Mi singaot hem i kam long miting, mo hem i glad blong kam. Afta, mi statem Baebol stadi wetem hem. Sam wik biaen, hem i kam wetem wan Jaenis fren blong hem long miting. Tu wik biaen, namba tri i folem tufala i kam, mo biaen namba fo.

¹³ “Bifo we wan narafala Jaenis man i askem mi blong mi stadi Baebol wetem hem, mi mi stap tingting se: ‘Nating se mi gat 65 yia, be hemia i no min se mi mas ritae long wok blong Jehova.’ Ale mi askem long woman blong mi, we hem i gat 63 yia, sipos hem i wantem lanem lanwis Jaenis. Mitufala i lesin long sam kos we oli rikodem nomo, blong lanem lanwis ya. Hemia 10 yia i pas finis. Taem mitufala i stap prij long ol man we oli toktok narafala lanwis, mitufala i harem olsem we mitufala i yangfala bakegen. !Naoia, mitufala i stadi Baebol wetem 112 Jaenis man! Bighaf blong olgeta oli stap kam long ol miting. Mo wan long olgeta i stap mekem wok blong paenia.”

14. ?Ol Kristin we oli gat bitim 50 yia oli no mas fogetem wanem? ?Eksampol blong Pol i save leftemap tingting blong olgeta olsem wanem?

¹⁴ I no evri Kristin we oli gat bitim 50 yia, we oli naf blong mekem sam niufala samting long wok blong Jehova. Samfala oli sik, mo sam narafala oli lukaot long ol pikinini blong olgeta, no long ol olfala papa mo mama blong olgeta. Be yu no mas fogetem se Jehova i tinghae long samting we yu yu naf blong mekem long wok blong hem. Taswe, nating se samtaem yu harem nogud from samting we yu no naf blong mekem, be i gud yu glad long samting we yu naf blong mekem. Yu traem tingbaot aposol Pol. Hem i stap long kalabus blong plante yia, mo from samting ya hem i no save gohed long ol misinari trip blong hem. Be taem ol man oli kam visitim hem, hem i tokbaot Baebol long olgeta, mo i givhan long olgeta blong oli kam strong long bilif blong olgeta.—Wok 28:16, 30, 31.

15. ?From wanem Jehova i tinghae long ol Kristin we oli olfala?

¹⁵ Jehova tu i glad long ol samting we ol olfala Kristin oli naf blong mekem long wok blong hem. Solomon i talem se i no isi long ol olfala taem “ol trabol” i kasem olgeta, be nating se i olsem, Jehova i tinghae long ol samting we oli mekem blong presem hem. (Luk 21:2-4) Ol brata mo sista long kongregesen oli tinghae long gudfala eksampol we ol olfala Kristin ya oli soemaot, blong stap longtaem long trutok.

16. ?Wanem sam samting we Ana bambae i no gat janis blong mekem, be hem i save mekem wanem blong wosipim Jehova?

¹⁶ Baebol i tokbaot wan olfala woman we nem blong hem Ana. Hem i wan wido mo hem i gat 84 yia taem Jisas i bon. From we hem i olfala, hem i no gat semfala janis olsem ol narafala, blong mekem wok blong Jehova. Bambae hem i no gat janis blong kam wan disaepol blong Jisas, mo blong tabu spirit i makemaot hem, mo blong go prij. Nating se i olsem, hem i glad blong mekem wok blong Jehova long wan narafala rod. Evri moning mo evri sapa, hem i go long yad blong haos tempol, mo i stap prea kwaet nomo blong haf aoa, taem pris i stap bonem insens blong mekem sakrefaes long Jehova. Baebol i talem se: “Oltaem nomo, hem i stap long haos blong God, nao long moning mo long sapa, hem i stap joen long ol man blong oli mekem wosip.” (Luk 2:36, 37) Long wan long ol taem ya nao hem i luk pikinini ya Jisas. Hem i talemaot long evriwan se pikinini ya bambae i kam Mesaea, mo bambae hem i mekem Jerusalem i fri bakegen.—Luk 2:38.

17. ?Kongregesen i save mekem wanem blong givhan long ol olfala mo olgeta we oli sik, blong oli wosipim Jehova?

¹⁷ Tede, yumi mas lukaot rod blong givhan long ol brata mo sista we oli olfala mo oli sik. I gat plante olfala Kristin we oli wantem tumas blong stap wetem yumi long ol miting mo ol asembli, be oli no naf blong mekem olsem. ?Kongregesen i save givhan long olgeta olsem wanem? Long sam ples, kongregesen i save mekem plan blong olgeta ya oli save lesin long ol miting long telefon. Long sam narafala ples, maet oli no save mekem olsem. Nating se ol olfala oli no save go long ol miting, be oli save mekem sam samting blong wosipim Jehova. Oli save prea blong kongregesen i gohed gud.—Ridim Ol Sam 92:13, 14.

18, 19. (1) ?Ol olfala Kristin oli save leftemap tingting blong ol narafala olsem wanem? (2) ?Hu i save folem advaes ya se: ‘Yufala i mas tingbaot God ya we i mekem yumi’?

¹⁸ Maet ol olfala Kristin oli no luksave se oli stap leftemap tingting blong ol narafala bigwan. Yu traem tingbaot Ana bakegen. Hem i stap go oltaem long haos prea mo blong plante yia hem i stap mekem olsem. Ating hem i no luksave se eksampol blong hem mo lav we hem i gat long Jehova, bambae i stap long Baebol mo bambae i gohed yet blong leftemap tingting blong yumi tede. Long sem fasin, ol brata mo sista bambae oli no save fogetem lav we yu yu gat long Jehova. Hemia nao from wanem Baebol i talem se: “Waet hea i olsem wan hat we i naes tumas long man we i mekem stret fasin.”—Prov. 16:31, NW.

¹⁹ Yumi evriwan i gat wan mak long wanem we yumi naf blong mekem long wok blong Jehova. Be taem yu gat sam paoa yet mo bodi blong yu i strong, i gud yu folem advaes ya se: ‘Yu mas tingbaot God ya we i mekem yumi. I nogud yu stap wet go kasem taem ya we evri dei, ol trabol bambae oli stap kam kasem yu.’—Pri. 12:1.