?Yu bin ridimgud ol Wajtaoa blong yia ya? Traem luk sipos yu save ansarem ol kwestin ya:

?I minim wanem blong “jenisim tingting blong yufala blong yufala i jenis fulwan”? (Rom 12:2)

Hemia i no min se yumi mas mekem sam gudfala samting nomo. Yumi mas jekemgud ol fasin we oli stap insaed long yumi, mo yumi mekem evri jenis we yumi naf blong mekem blong laef blong yumi i laenap wetem ol tingting blong Jehova.—w23.01, pej 8-9.

?Olsem wanem yumi soemaot se yumi gat klia tingting long ol samting we oli stap hapen long wol?

Yumi intres blong luk olsem wanem ol samting we oli stap hapen, oli mekem ol profet tok oli kamtru. Be i bitim we yumi talem prapa tingting blong yumi long samting we bambae i hapen we i save seraotem kongregesen, i moa gud storian blong yumi i stanap long ol buk blong oganaesesen. (1 Kor. 1:10)—w23.02, pej 16.

?Olsem wanem baptaes blong Jisas i defren long baptaes blong yumi?

Hem i no nid blong givim laef blong hem long Jehova, from we hem i bon long wan nesen we i blong God. Hem i stret gud olgeta mo i no gat sin. Hem i no nid blong tanem tingting from eni sin.—w23.03, pej 5.

?Olsem wanem yumi save halpem ol narafala blong givim ansa long ol miting?

Yumi save givim ol sot ansa, mo yumi no tokbaot tumas poen. Olsem nao, ol narafala oli save gat janis blong ansa tu.—w23.04, pej 23.

?“Rod Blong Tabu Fasin” we Aesea 35:8 i tokbaot hem i wanem?

Jehova i komperem rod we i stat long Babilon i go kasem Isrel olsem wan bigrod, mo i singaot se “Rod Blong Tabu Fasin.” ?Hemia i minim wanem long yumi tede? Long ol yia bifo long 1919, wok blong mekem rere rod ya i stat, hemia tru long wok blong transletem mo printim ol Baebol, mo ol narafala samting. Ol man blong God oli bin travel long “Rod Blong Tabu Fasin” blong go insaed long paradaes ya long saed blong spirit, we i mekem se oli save kasem ol blesing blong Kingdom.—w23.05, pej 15-19.

?Advaes long Ol Proveb japta 9, i stanap long fasin blong tu woman we tufala i pijarem wanem?

Proveb i talem se invetesen blong “woman we i stupid” i lidim man i go “long Gref,” mo woman we i pijarem “trufala waestok,” invetesen blong hem i lidim man blong i “folem rod blong save” mo i kasem laef. (Prov. 9:​1, 6, 13, 18)—w23.06, pej 22-24.

?Olsem wanem God i soemaot se hem i gat tingting daon mo i no mekem i strong long narafala taem i dil wetem Lot?

Jehova i talem long Lot blong i aot long Sodom mo ronwe i go long rijen blong ol hil. Be taem Lot i askem blong i ronwe i go long Joa, Jehova i letem hem i go.—w23.07, pej 21.

?Wan waef i save mekem wanem sipos hasban blong hem i stap lukluk ponografi?

Hem i no mas blemem hem wan. Be i mas tingbaot moa frensip blong hem wetem Jehova mo tingting dip long stori blong ol woman we oli harem gud taem oli prea blong God. Hem i save halpem hasban blong hem blong blokem ol samting we i save pulum hem blong foldaon long trap ya.—w23.08, pej 14-17.

Taem wan man i kwestinim yumi from bilif blong yumi, ?olsem wanem fasin luksave i halpem yumi blong stap kwaet?

Kwestin we man i askem, i save halpem yumi blong kasemsave tingting mo bilif blong hem. Mo i halpem yumi blong ansa long wan fasin we i kwaet.—w23.09, pej 17.

?Samting we Meri i mekem blong kasem paoa, i tijim yumi long wanem?

Taem Meri i save se bambae hem i kam mama blong Mesaea, hem i lukaot help long ol narafala. Gabriel mo Elisabet i yusum Tok blong God blong leftemap tingting blong hem. Yumi tu yumi save kasem paoa long ol brata mo sista.—w23.10, pej 15.

?Olsem wanem Jehova i stap ansarem ol prea?

Hem i promes blong lesin long ol prea blong yumi mo luk olsem wanem oli joen wetem stamba tingting blong hem. (Jer. 29:12) Ol man oli save askem sem samting, be maet hem i ansa long ol defdefren rod. Nating se i olsem, oltaem bambae hem i sapotem yumi.—w23.11, pej 21-22.

Rom 5:2 i tokbaot “hop,” be ?from wanem vas 4 i tokbaot bakegen?

Taem wan man i harem gud nius, maet hem i gat hop ya se bambae hem i harem gud blong laef olwe long paradaes long wol ya. Be taem hem i fesem trabol, i stanap strong, mo i haremsave se God i glad long hem, naoia hop ya i gru i kam strong moa, mo i olsem we God i mekem promes ya stret long hem.—w23.12, pej 12-13.