Etẹn wa loo e tẹknọlọgi ni da ladian, ya gu ẹgbẹe ọghe iran guan kevbe etẹn ne iran gba ga. Sokpan te ọ khẹke ne etẹn vbenian kọ ibude na ye orhiọn: “Avbe umẹwaẹn sẹtin rẹn vbe orueghe a gha dee, iran ghi gban egbe nẹẹn; sokpan, ọmwa ne ẹi ro iro ghi wa ye owẹ eveva khian la rọ, ọ ghi ya gha gbe l ma rẹn vbe okiekie.”—Itan 27:12.

Ma rẹnrẹn wẹẹ e Jehova hoo nọ gbogba ga ima. Rhunmwuda ọni, ma i gu emwa ni si ighaegbe, emwa na kan fua vbuwe iko, ra emwa ni mu imamwamwi ọghe ohoghe khian mu obọ. (Rom 16:17; 1 Kọr 5:11; 2 Jọn 10, 11) Etẹn eso vbe rrọọ nẹi ya ilele ọghe Baibol ru emwi, ọ vbe khẹke ne ima gha begbe vbe egbe iran. (2 Tim 2:20, 21) Ọ khẹke ne ima kọ ọna ye orhiọn vbe ima gha khian zẹ ọse. Sokpan ẹi re emwi nọ khuẹrhẹ, na do sẹtin zẹ ọse nọ maan vbe intanẹt.

Ọ khẹke ne ima gha hannọ emwa ne ima gu mu obọ, katekate vbe ọ gha de ọghe group chat. Etẹn eso rrọọ ni te rhie egbe ye egbe group chat vbenian, sokpan okiekie ẹre ma gha maan. De vbene ọtẹn khian ya gha begbe hẹ, vbe group chat vbenian ne emwa ni gberra iyisẹn ra arriaisẹn ye? Ọ gha lọghọ ne ọ sẹtin rẹn emwa hia ni rre group chat nii sẹ owa, ẹi khian vbe sẹtin rẹn deghẹ emwa ni deziẹn vbe odẹ ọghe orhiọn ẹre iran khin. Ebe Psalm 26:4 khare wẹẹ: “Mẹ i gu emwa ewobi mu obọ, mẹ i gu emwa ni fian yan egbe khian.” Ọna ma ya ima rẹn wẹẹ, emwa na rẹnrẹn sẹ owa ọkpa, ẹre ọ khẹke na gha gu guan vbe intanẹt?

Ọ gha khọnrẹn wẹẹ, e group chat ne emwa i na mobọ bun nọ, ọ ma khẹke ne Ovbiotu e Kristi fiegbua; ọ khẹke nọ mu ukpa mu uwerhẹn ghee emwi ne iran ta vbe egbe group chat vberriọ, ọ ma vbe khẹke nọ gha mu ẹghẹ rhia vba. Ẹi re esalabẹ wẹẹ, ẹghẹ ke ẹghẹ ne emwa ya gie uhunmwu gie ima, ẹre ima khian wa ya gha khuẹnniẹn iran. E Pọl keghi tama e Timoti nọ gha begbe vbe egbe emwa ni “na iyẹn ẹrrẹe” kevbe ni fi “ukpẹ ye ẹmwẹ nọ ma khẹke iran.” (1 Tim 5:13) Vbe ẹdẹnẹrẹ, emwa sẹtin ya intanẹt ru egbe emwi vbenian.

Ovbiotu e Kristi nọ deziẹn vbe odẹ ọghe orhiọn, i khian gha zan ọtẹn ọvbehe vbe iyeke, ra ne ọ do gha tama emwa ọvbehe, emwi eso vbekpae ọtẹn nii nọ ma te khẹke ne iran họn; deghẹ ọmwa ọvbehe ẹre ọ mu iyẹn vberriọ rre, ẹi rhie ehọ yọ. (Psm 15:3; Itan 20:19) Ọ khẹke nọ vbe gha begbe vbe egbe avbe okha nọ ru ọmwa ehọ gboo kevbe avbe iyẹn nẹi mwẹ ẹzi, ẹi khian vbe gha na iyẹn vbenian ma emwa ọvbehe. (Ẹfis 4:25) Adeghẹ ima gualọ iyẹn ni mwẹ ẹzi, ra avbe adia ni hẹnhẹn egbe yan e Baibol, ima ghi gha rrie jw.org ra JW Broadcasting^®.

Etẹn eso vbe loo avbe application ne a ya gie uhunmwu gie emwa ya do ẹki, iran vbe loo ẹre ya tama emwa ni gualọ iwinna wẹẹ, iran gha rhie iwinna ne iran. Sokpan ọna i mwẹ vbene ọ ya dekaan ugamwẹ e Jehova. Rhunmwuda ọni, Ọvbiotu e Kristi nọ hoo nọ “fannọ obọ igho ne a hoẹmwẹ ọnrẹn hin ẹdẹ agbọn [rẹn] rre” i khian gha ya etẹn ne iran gba ga khuan igho.—Hib 13:5.

Ọ khẹke na gha loo avbe application na, ya rinmwian igho ne etẹn ni rre ivbabọ ra ne odekun ẹrhia sunu daa ra? Ẹmwata nọ wẹẹ, ma hoo ne ima gha ru iyobọ ne etẹn ima kevbe ne ima gha rhie igiọdu ne iran. (Jems 2:15, 16) Sokpan, ẹi re group chat ne ẹbu emwa loo ya gie uhunmwu gie egbe, ẹre ima khian ya ru ọna rhunmwuda, ọna sẹtin do mu idobọ ye emwamwa ne abotu kevbe ediọn ni rre iko ru, na ya ru iyobọ ne etẹn vberriọ. (1 Tim 5:3, 4, 9, 10, 16) Vbene ẹmwata, orhunmwu ọkpa i rrọọ vbe uwu ima, ne ọ hoo nọ ya emwa gha roro ẹre wẹẹ, irẹn ẹre a zẹ nọ gha gbaroghe etẹn ni rre uwu iko.

Emwi nọ gha rhie uyi gie Jehova ẹre ima hoo ne ima gha ru vbe ẹghẹ hia. (1 Kọr 10:31) Nọnaghiyerriọ, ma ke loo avbe application ne a ya gie uhunmwu gie emwa ra e tẹknọlọgi nọ rhirhi gha khin, te ọ khẹke ne ima rẹn ẹbe nọ lelẹe khian, ma ghi vbe gha begbe.