Na Gbẹn Gie Failimọn 1:1-25
1 E Pọl nọ re oleghan rhunmwuda e Kristi Jesu kevbe Timoti ne ọtẹn ima nokpia giotuẹ uwẹ ne Failimọn ne ọtẹn ima nọ ghaan, ne ima gba winna,
2 kevbe Afia ne ọtẹn ima nokhuo, kevbe Akipọs ne ima gba re ivbiyokuo e Kristi, kẹ kevbe etẹn hia ni do iko vbe owa ruẹ:
3 Te uwa gha miẹn ẹse ne kpataki* kevbe ọfunmwegbe nọ ke obọ Osanobua ne Erha mwa kevbe Enọyaẹnmwa e Jesu Kristi rre.
4 E Failimọn ne ọtẹn mwẹ, ẹghẹ ke ẹghẹ ne I ya so eni ruẹ vbe erhunmwu, I ghi kpọnmwẹ Osanobua mwẹ,
5 rhunmwuda, ẹghẹ hia ẹre I ya họn wẹẹ, u mu ẹtin yan Enọyaẹnmwa e Jesu, erriọ ẹre u vbe ya hoẹmwẹ ọnrẹn kevbe emwa ni huanrẹn hia.
6 Erhunmwu ne I na ọre wẹẹ, ne iyayi ne ima hia gba mwẹ ya ruẹ do rẹn afiangbe hia ne ima he miẹn rhunmwuda e Kristi.
7 Ọtẹn mwẹ, vbe I ghi họn vbekpa ahoẹmwọmwa ne u mwẹ, ọyẹnmwẹ keghi sẹ mwẹ ẹsẹse, erriọ ẹre ọ vbe ya fu mwẹ ẹko rre rhunmwuda, emwi ne u ru wa rhie igiọdu ne emwa ni huanrẹn.*
8 Nọnaghiyerriọ, ne I na re ukọ ọghe Kristi, I gha te sẹtin si agbada vbe unu tama ruẹ emwi nọ khẹke ne u ru,
9 sokpan, rhunmwuda ahoẹmwọmwa ne u mwẹ, I gha rinmwian ruẹ, ugbẹnvbe a miẹn wẹẹ imẹ ne Pọl vbe khian ọmaẹn nẹ, kevbe wẹẹ I rre eghan rhunmwuda e Kristi Jesu.
10 Ẹmwẹ Onẹsimọs ne ovbi mwẹ, ẹre I khian rhunmwuda ẹre rinmwian ruẹ, rhunmwuda, te I ghi rhie ẹre zẹvbe ọmọ vbe I rre eghan.*
11 Ẹ i ka mwẹ esa nọ ye nuẹn, sokpan, vbe ẹghẹ na nian, te ọ ghi mwẹ iyobọ nọ ye ne imẹ vbe ruẹ.
12 I khian we nọ werriegbe bu ruẹ gha dee nian, vbene ẹmwata, I wa ya ekhọe hia hoẹmwẹ ọnrẹn.
13 Ugbẹnvbe a miẹn wẹẹ, wẹ i gu mwẹ rre emwa nian, ọ gha te yẹẹ mwẹ nọ tota ke mwẹ mwa, ne irẹn gha ru iyobọ mẹ vbe uwu ẹghẹ ne I ya rre eghan rhunmwuda iyẹn nọ maan.
14 Sokpan, I ma hoo ne I ru emwi rhọkpa vbene u ma na kue yọ, ne u mieke na ya ekhọe obọ ruẹ ru emwi nọ khẹke, nẹ ghẹ yevbe na miẹn wẹẹ, te a gbagbae yọ ruẹ egbe.
15 Egbọre, ọna ẹre ọ si ẹre nọ na ka lẹẹ sẹ ruẹ rae vbe ovbi ẹghẹ kherhe,* ne uwa eva mieke na dọlegbe gha rrọọ, vbene uwa i khian na ghi sẹ egbe rae.
16 Agharhemiẹn wẹẹ ọviẹn ruẹ khian ye gha nọ vbe ọ gha dọlegbe rre, ọ khẹke ne u rẹn wẹẹ ọtuẹn ghi vbe nọ. I hoẹmwẹ ọnrẹn ẹsẹsẹmwẹse, sokpan, wẹ tobọ ruẹ, ẹre ọ khian ghi kue hoẹmwẹ ọnrẹn sẹ rhunmwuda, te uwa khian ghi gba gha rrọọ nian, deba ọni, ọtẹn ne uwa gba ga Enọyaẹnmwa ghi vbe nọ.
17 Nọnaghiyerriọ, deghẹ ọse ruẹ ẹre I gele khin, lahọ ya ekhọe hia miẹn ọnrẹn yi, vbene u gha ya miẹn mwẹ yi.
18 Yevbesọni, deghẹ ọ mwẹ emwi nọ ru ruẹ re, ra deghẹ ọ mwẹ ruẹ osa rhọkpa, kae yọ mwẹ urhu.
19 Mẹ ne Pọl ẹre ọ tobọ mwẹ gbẹn ẹmwẹ na: I gha ha ẹre werriegbe nuẹn, sokpan, a gha we na ghee ẹre, emwi ne uwẹ mwẹ imẹ re, sẹ ne Onẹsimọs mwẹ ruẹ re; ẹdagbọn uwẹ hia ẹre uwẹ mwẹ imẹ re.
20 Lahọ ọtẹn mwẹ, ru iyobọ na mẹ rhunmwuda Enọyaẹnmwa; ru emwi nọ gha mu mwẹ orhiọn sotọ rhunmwuda e Kristi.
21 Te I gbẹn ebe na guẹ rhunmwuda, I wa rẹn wẹẹ, u gha ru vbene I khare, uhiẹn, u gha kue ru enọ sẹ ọni.
22 Deba ọni, mwamwa eke ne I khian dia vbe I gha rre, rhunmwuda, I ya aro yọ wẹẹ, a gha fan mwẹ vbe eghan rhunmwuda erhunmwu ne uwa na mẹ, ẹghẹ nii, I ghi do miẹn uwa.
23 Ẹpafras ne ima gba rre eghan rhunmwuda e Kristi Jesu gie na tuọ.
24 E Mak, Aristakọs, e Dimas kevbe Luk ni re etẹn ne ima gba winna, vbe gie na tuọ.
25 Te Enọyaẹnmwa e Jesu Kristi gha ru ẹse ne kpataki* ne uwa rhunmwuda ekhọe esi ne uwa mwẹ.
Avbe Futnot
^ Ra “wa mu orhiọn emwa ni huanrẹn sotọ.”
^ Vbe Grik, “vbe a ya ọgiọrọ gbalọ mwẹ.”
^ Vbe Grik, “ughaẹdẹ ọkpa.”