“Ðɛ séín ɓě céè ɖé Gèɖèpɔ́ɔ̀-cèè-ɖɛ̀ ɓěɔ̀ múɛɛ, Gèɖèpɔ́ɔ̀ mɔ̀ nyɔ cɛ̃ wa.”—2 Tímétè 3:16, Dèè-Wùɖù Sùà Kèɛ̀ Ðie.

Báɓòɔ̀ ɓɛ́ìn dyi-diè-ɖɛ̀ kpa ɖɛ ɓě ɓá cĩ́-cĩ́ jè dyíɛɛ gɔ̃̌ jǔɛ.—Nɔ́ɔ́ 2:1-5.

M̀ ɓɛ́ìn Báɓòɔ̀ nyɔ-hwìè-dà-zàìn-zàìnɔ̀ hwòɖǒ múin dèɛ̀ ɖé nì cĩ́-cĩ́ɔ̀ mú ɓó wé séín ɓaɖa.—Wɛ́ɖɛ́ 119:105.

M̀ ɓɛ́ìn Jǎà hwòɖǒ-kɔ̃-dè-dè ɓéɖéɛ ɓá ɖé dyúa jè dyí.—Wóɖómà 15:4.

Ǹdye, ɓó xwíníín tã ɓě nìà kɛ jè:

• Báɓòɔ̀ muìn gbo. Nyɔ-kpò 40 kò-kò ɓě céè ma Báɓòɔ̀ ɓó zɔ̃ 1,600 xwíníín. Wa ɓáún-ɓáún se ma dyéìn dyɛo, kɛɛ ɖɛ séín ɓě ɓɛ́ wa céè ma kà kɛɛ muìn gbo, ké wa kpa wuɖu dyúáɖò.

• Báɓòɔ̀ cɛ̃ jǎà-wùɖù ɓě. Ɓóɖó-kpàà céè-ɖɛ̀ céè-nyɔ̀ ɓěɔ̀ fṹà ɓɛ́ wa ké ɖɛ ɓě ɓá waà nyɔ ɓěɔ̀ toún ɖù jè dyíɛɛ vǐè. Kɛɛ Báɓòɔ̀ céè-nyɔ̀ ɓěɔ̀ se ná nì. Wa céè ma ɖɛ séín ɓě ɓɛ́ wa mìɔùn bĩ xwa kè ɖɛ ɓě ɓɛ́ waà nyɔ ɓěɔ̀ bĩ xwaa nyɛ̀nɛ̀ɛ̀.—2 Kánáníkɔ̀ 36:15, 16; Wɛ́ɖɛ́ 51:1-4.

• Kpáá-ɖɛ̀ séín ɓě céèà ɖé Báɓòɔ̀ múɛɛ mɔ̀ jǎà. Báɓòɔ̀ cɛ̃ó zɔ̃̌ɔ̀ Báɓèɖɔ́ùn-hwɔ̀ɖɔ̀ sùàɔ̀ mú gbɔɔ̀ jè, ké zɔ̃ 200 zi ma hwɛ̀ ké ɔ kpá ma. (Àzédyà 13:17-22) Ɔ zaìn kɔ̃in kà Báɓèɖɔ́ùn mu ma wáɖáa nyuùn wɛ̃. Ké ɔ ɖá ma nyɔ mu ma toɔ̀ dyúa nììn nyɛɛ nyɛ́nɛ́.—Àzédyà 45:1-3.

  Kpáá-ɖɛ̀ vò-vò ɓě ɓɛ́ Báɓòɔ̀ cɛ̃ ma wa jè kɛɛ séín kpá ma nyɛ̀nɛ̀ɛ̀. Kɛɛ má kǎà Gèɖèpɔ́ɔ̀ wuɖu ɓéɖé ɔ ké nìee?—2 Píɖɛ̀ 1:21.