Ester 8:1-17
8 Bas wari e, bereken Raja Ahasweros kerina erta Haman,+ eme musuh kalak Jahudi+ man Ratu Ester. Mordekai pe reh ndahi raja perban enggo kataken Ester uga perkade-kadenna ras Mordekai.+
2 Kenca e, tangtangi raja cincin stempelna+ si buatna arah Haman, jenari berekenna man Mordekai. Suruh Ester me Mordekai ngurus kerina erta Haman.+
3 Kenca si e, ngerana ka Ester man raja. Sujud ia i nahe raja. Janahna ngandung, mindo kel ia gelah batalken raja rencana jahat si ban Haman kalak Agak e nandangi kalak Jahudi.+
4 Dudurken raja tongkat emasna man Ester,+ emaka tedis Ester i lebe-lebe raja.
5 Nina Ester, “Adi meriah ukurndu Raja, adi keleng atendu aku, adi jadi kin atendu aku, adi cocok akapndu, perentahkenndulah gelah iban sada surat si mbatalken kerina surat Haman,+ anak Hamedata kalak Agak,+ si isina rencana jahat Haman guna engkernepken kalak Jahudi si lit bas kerina propinsi si kuasaindu.
6 Ngasup kin akapndu aku ngidah bencana e engkenai bangsaku, ngasup kin akapndu aku ngidah kade-kadeku ibunuh?”
7 Emaka nina Raja Ahasweros man Ratu Ester bage pe man Mordekai kalak Jahudi e, “Enggo kubereken erta Haman man Ester,+ enggo kugantung Haman bas tiang,+ perban rencanakenna munuh kalak Jahudi.
8 Tapi surat perentah si itulisken bas gelar raja janah isahken alu cincin stempel raja, lanai banci ibatalken. Amin pe bage, tuliskenndulah surat bas gelar raja kerna kai si akapndu mehuli guna kalak Jahudi, janah sahkenlah e alu cincin stempel raja.”+
9 Bas wari si pe-23-ken, bas bulan peteluken, eme bulan Siwan,* ilebuh me sekertaris-sekertaris raja guna nulisken kerina perentah Mordekai man kalak Jahudi, termasuk man kepala-kepala gubernur,+ gubernur-gubernur, bage pe pejabat-pejabat propinsi+ arah India nari seh ku Etiopia, lit 127 propinsi buena. Surat e iban bas bahasa ras tulisen si ipake tiap bangsa bas tiap propinsi, surat e pe iban ka bas bahasa ras tulisen kalak Jahudi.
10 Tulisna surat e bas gelar Raja Ahasweros janah sahkenna alu cincin stempel raja.+ Ikirimken me surat-surat e arah kalak si dahinna mpeseh berita, si lawes nangkih kuda kerajan si meter perkiamna.
11 Isi surat e, ibere raja ijin man kalak Jahudi arah kerina kota gelah pulung guna njagai dirina. Banci lawan kalak e ras bunuhna kerina pasuken si reh nyerang kalak e, la soal arah bangsa ntah propinsi si apai pe, termasuk diberu ras anak-anak. Banci ka jarah kalak Jahudi erta kalak si nyerang ia.+
12 Perentah enda arus idalanken bas kerina propinsi si ikuasai Raja Ahasweros, bas wari si pe-13-ken, bulan pe-12-ken, eme bulan Adar.*+
13 Isi surat e jadi undang-undang bas kerina propinsi. Undang-undang e arus iumumken man kerina bangsa, gelah kerina kalak Jahudi banci ersikap ngelawan musuhna bas wari si enggo itetapken.+
14 Bagi si perentahken raja, mis lawes kalak si mpeseh berita e alu nangkih kuda kerajan si meter perkiamna. Undang-undang e pe iumumken bas Istana Susan.*+
15 Lawes Mordekai arah lebe-lebe raja nari alu paken kerajan si iban arah kain biru ras mbentar. Pakena ka mahkota emas si mehaga ras jubah si iban arah kain ungu si mejile kel bahanna.+ Kerina kalak i Kota Susan* ersurak-surak perban riahna ukurna.
16 Senang akap kerina kalak Jahudi. Puas janah meriah ukur kalak e. Kalak e pe ihamati kalak si deban.
17 Meriah kel akap kalak Jahudi bas tiap kota bage pe propinsi paksa surat perentah bage pe undang-undang raja ibacaken, emaka rayaken kalak enda alu erbahan pesta. Enterem kalak arah bangsa si deban ngaku jadi kalak Jahudi+ perban mbiar ia man kalak Jahudi.
