Za nnye a ne mekua?
Nge minju’u mi nji so be Zambe, amu jé bia yene mam ane mfumbale ya zaé, mbia azoé, mewôé me bôt a zene ya bita, mbia b’akon, a bibubua bi mame bia kui atemetem? Mejô me Zambe ma ve beamu bela ba bo na bi tôbane minjuk:
Ôkôlôt, ôzañ akum, a ziñ. ‘Môt a jôô nyô mbok njôane ya ndamane nye.’ (Ecclésiaste 8:9) Bôte be wô’ô tôbane minjuk amu be ne éjôé mbia be bôte si, bôte be n’ôkôlôt, nge njet.
Éyoñ a mam ma kui atemetem. Môta binam a wô’ô fe tôbane minjuk amu “éyoñ a ndôba’ane bi akui be [bôte] bese.” (Ecclésiaste 9:11) Nalé a tinane na, bôte be wô’ô bo mbia vôm e mbia éyoñ, a bibubua bia kui, bôte ba juk amu be nji tabe ntyel nge amu ba bo bikop.
Mbia njôô ya émo ji. Kalate Zambe a liti ne ngeññ amu ôsu a bo na bôte be juk. A jô na: “Si nyô ése é jô’ô be mbia môt.” (1 Jean 5:19) “Mbia môt” ate a ne Satan Diable, ngungul ététéa é ne nsisim, nyô a mbe éngele Zambe atata’a, ve “a nji [tabe benya mejôô] été.” (Jean 8:44, Mfefé Nkôñelan) Bitétéa bife bi nga ke ngame Satan a bo Zambe éngana’a, amu be nga to be jeñe’e na, be jalé mbia miñyiane miap a be nga bo bebiene mimbia minsisim. (Metata’a 6:1-5) Nté ane be nga ke Zambe ngame yat, Satan a mimbia minsisime mié mia belane ngule jap a mam me ne abé na be jôé émo ji mbia njôan. Nalé a dañe yené biyoñe biangane bi. Éyoñe ji, Diable a bili beta ayaa, a a ‘du’u si se,’ a nalé a soo “angônda jam mfa’a ya si.” (Nlitan 12:9, 12) Satan a ne njôô a ne mbia njet. A wô’ô benya meva’a éyoñ a yene bôte ba juk. Nde ñhe, Satan nnye a bo na bôte be juk, sa ke Zambe.
BI TAME FAS: Fo’o ve mbia môt a bili nsisim Satan, a teke nleme ya nkoon engôngol nnye a ne bo na, bôte be nji bo jôm be vañe tôbane minjuk. Kalate Zambe ki a jô na: “Zambe a ne nye’an.” (1 Jean 4:8) Amu fulu nye’an a bili, é ne “Zambe ôyape na, a bo abé, a bo Nyô a ne Ngul Ése ôyape na, a bo mbia jam.”—Job 34:10.
Ve jame da, ô ne fe sili womiene na, ‘Nté avé Nyô a ne Ngul Ése é ke ôsu a kañese na Satan a tibili bôt?’ Avale bia te yen, Zambe a vini abé a éyoñe bia tôbane minjuk, jam ete da taé nye nlem. A jame da dañ e ne na, Mejô mé ma jô na: “Va’ane nye mam mese me atyelé mia minleme yôp, amu nnye a ba’ale bia.” (1 Pierre 5:7) Zambe a nye’e bia, a bili fe ngule ya vaa minju’u mise a bikotekote bise ane bia zu yene nlô ajô wo tôñe valé. *
^ É.N. 7 Nge wo kômbô yeme mam mefe a lat a amu jé Zambe a kañese na bi tôbane minjuk, kele’e yene kabetôlô 11 ya kalate Jé Kalate Zambe a ne ye’ele bia? Bengaa be Yéhôva mbe be nga kuli kalate ate, a ô nto ngule ya limiti nye zezé e www.pr418.com.
You May Also Like
NKUME MMOMBÔ A BETE
Zambe a mbeme zu vaa minju’u mise
Aval avé bia yeme na Zambe a mbeme bo na minju’u mise a ékotekot bi man?
