1 Timothée 4:1-16
4 Ve, mejô ma so be Zambe ma* kôme liti na, biyoñe bia su’ulan, bôte béziñe ba ye jañele mbunan, amu ba ye vô’ôlô miñye’elane minsos* a mi mia so be mbia minsisim,
2 a zene ya bôte medu’ane ba laane minsos, mbe bete mone môte ya nleme wop a bili ndem étyé é maneya véé a nduan.
3 Ba tyili bôt aluk a telé atiñe na, be bo te di bidi Zambe a nga té asu na bôte be bili mbunan a nya ñyemane ya benya mejôô be di, be va’a Zambe akiba.
4 Amu jôm ése Zambe a nga té, é ne mvaé, a jôm éziñ é nji yiane beneban nge ja nyoñeban a mvean akiba,
5 amu bidi bi ne mfuban amu Zambe a nga jô na bi ne mfuban, a amu bia ye’elan a ve akiba amu bie.
6 Éyoñe wo ye ve bobenyoñe melebe ma, wo ye liti na ô ne mbamba mbo ésaé Krist Yésus, nyu a nga yale mbunane wé a benya mejôô, a mbamba ñye’elan ô nga tôñe nya ntôñane.
7 Ve, bene’e bivuse minkañete bia biasé Zambe, aval ane mi minnôme mi binga mia kañete. Ve yañele’e womien a nsôñane ya kañe Zambe ngumba ngumba.
8 Amu mfô’ane nyule wo* volô mone jôm, ve e bo Zambe ésaé a nlem ôse a volô asu mame mese, a jam éte é bili ngaka’a asu ényiñe ji, a ényiñe ja zu.
9 Njôan ôte ô ne été a wo yiane kañeseban a nlem ôse.
10 Ajô te nde, bia yiane ke ôsu a saé teke wo’on, a ve ngule jangan ése, bia bo de amu ndi nleme jangan é ne be vevea Zambe, nnye a ne Nyii ya kane bôt ése, e dañedañe ba ba bo Zambe ésaé ngumba ngumba.
11 Kele’e ôsu a ve metiñe ma, a ye’ele me.
12 Môt a bo’o te biasé wo amu ô ne ésoé. Ve jame da, bo’o mbamba éve’ela asu ba ba kañe Zambe ngumba ngumba, mfa’a ya nkobô, ntaban, nye’an, mbunan, mfuban été,*
13 akekui éyoñe ma ye so, kele’e ôsu a yeme ngule jôé ése mfa’a ya nlañan e bôt été, a mveane melep* a ñye’elan.
14 Te biasé mvean ô nga vebane be wo a zene ya nkulan ajô, éyoñ ékôane bemvendé é nga beté wo mo map.
15 Tuka’a fase mame mete; va’a nleme wôé ôse été, ndembene meyaé môé me yené ne fômelé be bôte bese.
16 Tabe’e ntyele kom ése a womien a ñye’elane wôé. Bo’o mbane mfa’a ya mame mete, amu éyoñe wo bo de, wo ye nyii womien a ba ba vô’ôlô wo.
Notes
^ Nkobô Grec, “nsisime wo.”
^ Nkobô Grec, “minsisime medu’an.”
^ Nge ke, “bivôé bia.”
^ Nge ke, “a bo teke bo ayas.”
^ Nge ke, “mveane ngule nyul.”
