2 Becorinthien 8:1-24
8 Éyoñe ji a bobejañ, bia yi na bi kobô mia ajô ya beta mvame Zambe a nga vebane be bikôane bekristene ya Macédoine.
2 Éyoñe be mbe minjuk été amu étibila’a, be nga ve a abui mevak akusa bo abui azoé dap, nalé a nga liti na be ne abui anyep.*
3 Amu be nga ve abime be mbe be bili, ôwé, ma bo’olô de, be nga ve a lôt abime be mbe be bili,
4 nté bebiene be nga nyoñe ntyi’ane ya ye’elane bia abui na, be bo mimvean a nlem ôse mfa’a ya suk ésaé ya volô mimfufup.
5 A sa ke ve avale bi nga buni, ve be nga taté ve bebiene be Tate a be bia a zene ya nkômbane Zambe.
6 Nalé a nga bo na, bi ve Tite ngule nyule na, a mane nyoñe mimveane mi nga bo a mbamba nlem, amu nnye a nga taté jam éte zañe jenan.
7 Ve jame da, fo’o ve avale mi nga bo mame mese a nlem ôse mfa’a ya mbunan, nkobô, ñyeman a ôdidi’i ôse a nye’ane bia nye’e mia, kelané fe ôsu a bo avale mimveane di a nlem ôse.
8 Ve ma jô mame mete, sa ke na me ve mia atiñ, ve asu na mi yeme fulu ôdidi’i bôte bevo’o be nga liti mfa’a ya yeme nge nye’ane wônan ô ne fo’o été.
9 Amu mia yeme beta mvame Tate wongane Yésus Krist na, akusa bo a mbe nkukum, a nga bo nzôzoé asu denan, ndembene mia ye bo minkukum a zene ya azoé dé.
10 A mfa’a ôte, ma ve ôsimesane wom: Jam éte é ne asu mfi wônan, amu den a ntoo ngume mbu, mi nji jô ve na mia ye bo jam éte, ve mi nga liti fe nkômbane ya bo de.
11 Ajô te éyoñe ji, sonda’ané fe jame mi nga taté na mia bo, ndembene nkômbane mi nga bi mfa’a ya bo jam éte ô ne jaléban a zene ya abime mi bili.
12 Amu nge môt a taté bi mbamba nkômban, a dañe fo’o bo a abime môt a bili, sa ke a abim a nji bi.
13 Amu me nji yi na jam éte é bo tyi’ibi asu bôte bevok, ve ayaé asu denan;
14 ve mfa’a ya na mame mese me bo abime da,* abui denane ya éyoñe ji é jalé njembane wop, ndemben abui dap é zu jalé fe njembane wônan a mame mese me bo abime da.
15 Fo’o ve aval é ne ntilane na: “Nyu a mbe a bili abui a nji be a bili étua ya abui, a nyu a mbe a bili tyôtyoé a nji be a bili étua ya tyôtyoé.”
16 Bia ve Zambe akiba amu a nga futi nleme Tite na, a wô’ô mia mintaé fo’o ve avale bia fe bia wô’ô mia mintaé,
17 amu a nga kañese melebe bi nga ve nye, ve amu a jeñ a ngul ése na a volô, émien a nga nyoñe ntyi’ane ya zu be mia.
18 Ve bia lôme nye a mojañe bikôane bekristene bise bia sek, amu mbamba ésaé a nga bo asu mbamba foé.
19 Sa ke amu jam éte étam, ve amu bikôane bekristene bi nga telé nye na, a ke a bia mfa’a ya ke a nyoñe mimvean, a a zen éte, a volô bia bo ésaé ya kabe mimveane bi nga tôkan; bia ye kabe mimveane mite mfa’a ya ve Tate duma. A mboon ôte, bia ye liti na bi ne nkômesane ya volô bôte bevok.
20 A zen éte, bia jeñe na môt éziñ a bo te ve bia bijô ajô ya mimveane bia tebele.
21 Amu bia ‘bo mame mese e zôsô été, sa ke ve e mise me Yéhôva* étam, ve e mise me bôte fe.’
22 Bia lôme mia nsamba ôte a mojañe bi nga fombô a yene na a ne ôdidi’i mfa’a ya abui mam, ve éyoñe ji a dañ ôdidi’i mfa’a wônan amu beta ndi a bili be mia.
23 Nde, nge mi bili nsili asu Tite, a ne môte bia nye bia saé a ébe mbo ésaé wom asu mfi wônan; nge mi bili minsili mfa’a ya bobejañ, be ne minlômane ya bikôane bekristen a duma Krist.
24 Lita’ané be ndeme ya nye’ane mi bili be be, lita’ané fe bikôane bekristen amu jé bi too mia mebun.
