2 Becorinthien 9:1-15
9 Éyoñe ji, mfa’a ya ésaé é ne asu mimfufup, é nji fo’o bo mfi na me tili mia,
2 amu ma yeme mbamba nkômbane wônan, a me nga kate bôte ya Macédoine ajô ya mbamba nkômbane wônane me jô’ô na, bôte ya Achaïe be ntoo nkômesane den a nga ke ngumba mbu, a ayôñe denane ya volô bôte bevok é nga tindi abui ya be be na é tyendé.
3 Ve ma lôme bobejañ, ndembene mese’esa bi nga bo ajô denane mfa’a ôte, me bo te bo momo, a na mia ye fo’o bo nkômesan, fo’o ve avale me nga jô na mia ye bo.
4 Nalé momo, nge bôte ya Macédoine ba so a ma, a koone na mi nji bo nkômesan, mamien a mia, bia ye woban ôson amu ndi bi nga futi be mia.
5 Nde me nga simesane na, é ne mfi na me jô bobejañe be taté zu be mia ôsusua na bia suan, na be nyoñe mveane mi nga kak a mbamba nlem ase, ndemben a ye bo mveane mia ve amu anyep, sa ke jôme ba nyoñ a ngul.
6 Ve mfa’a ya jam éte, nyu a bé tyôtyoé a ye fe yô tyôtyoé, a nyu a bé abui a ye fe yô abui.
7 Môt ase a bo’o aval a nga tyi’i nleme wé été, sa ke ngule yôp,* nge metyi yôp, amu Zambe a nye’e nyu a ve a mevak.
8 Nde fe, Zambe a ne ngule ya bo na beta mvame wé ase, a fuluku be mia, ndembene mi ne bo te jembane jôm éziñ, ve na mi bi abui mam ése da sili mfa’a ya bo mbamba jam ase.
9 (Fo’o ve aval é ne ntilan: “A nga kap teke lañ;* a nga ve minzôzoé. Zôsô wé a tabe nnôm éto.”
10 Nyu a ve mbé mvoñ abui mvoñ a bidi ba di, a ye tu’a ve mia mvoñe na mi bé, a ye bo na mi yô abui amu zôsô wônan.)
11 Zambe a bota’ane mia mezene mese, ndembene mi ne bo anyep mimfa’a mise a zene ya mame bia bo; aval anyep éte da tindi bôte na be ve Zambe akiba;
12 amu ésaé mia bo é nji bo ve na mi jalé miñyiane ya mimfufup, ve na, mi tindi abui bôte na é ve Zambe akiba.
13 A zene ya mimveane mite, mia ye liti aval avé mi ne mbamba be bôt, a ba ye ve Zambe duma, amu mame mia bo ma wô’an a mbamba foé mia kañete ajô Krist, a amu mi ne anyep mfa’a wop a mfa’a bôte bese.
14 Nde fe, ba ye nye’e mia a ba bo meye’elane me nja’an ajô denan, amu beta mvame Zambe a ne be mia.
15 Bia ve Zambe akiba amu mveane wé a ve zezé ô ne teke atoté.