Mame minlôman 22:1-30
22 “A bôt, bobejañ a beésa, éyoñe ji vô’ôlané nkate wom.”
2 Éyoñe be nga wôk ane a kobô be nkobô Hébreu, be nga ku bivôl bese, ane a nga jô na:
3 “Me ne mone juif, me nga bialé Tarse ya Cilicie, Gamaliel émiene nnye a nga ye’ele ma na me yem a tôñe metiñe bemvamba ntene ntene tisone nyi, a me mbe ayôñ asu Zambe fo’o ve avale mia bese mi ne môse ya den.
4 Me nga tibili bôte ba tôñe Zene* nyi a me nga bo na bevo’o ya été be wu, me mbe me biik befam a binga a kee be mimbôk
5 avale beta prêtre a émo’o bemvendé be ne bo’olô. Be nga ve ma bekalate asu bobejañe ya Damas, me mbe zene na ma ke bi bôte ya wôé, be too nka’ane na me kee be Jérusalem, na be ke foñesô be wôé.
6 “Ve nté me mbe dulu zañ, a na me ntoo bebé Damas, bebé zañe môs, e teme na beta éfufup a nga so yôp a bômane ma,
7 a me nga ku tyia a wô’ô tyiñ é jô’ô ma na: ‘A Saul, a Saul, amu jé wo tibili ma?’
8 Me nga sili nye na: ‘Ô ne za, a Tate?’ A nga yalane ma na: ‘Me ne Yésus ya Nazareth, nnye wo tibili.’
9 Bôte be mbe a ma be nga yen éfufup, ve be nji wô’ô tyiñe nyu a mbe a kobô’ô a ma.
10 Ane me nga jô na: ‘Jé ma yiane bo a Tate?’ Tate a nga jô ma na: ‘Kôlô’ô si, ô ke Damas, e wôé ba ye kate wo jôm ése wo yiane bo.’
11 Ve amu me nji be ve yene jôm éziñ amu étôto’o ya éfufup éte, me nga kui Damas, bôte bia be be bi mbe nsamba be bili ma wo.
12 “Nde môt a mbe jôé na Ananias a mbe a ko Zambe woñ, a tôñe’e fe Metiñe me Moïse, bejuif bese be mbe be nyiñi’i valé, be mbe be se’e nye amu mbamba ntabane wé,
13 a nga zu vôme me mbe a tebe ma fefel a jô ma na: ‘A Saul, a mojañ, beta’a yen!’ A awolo éte ébien, me nga bete mis a yene nye.
14 A nga jô na: ‘Zambe ya bemvamba bangan a tobeya wo na, ô yeme nkômbane wé a yene nyu a ne zôsô a wô’ô tyiñe jé.
15 Amu wo ye bo ngaa wé be bôte bese, mfa’a ya mam ô nga yen a wôk.
16 A amu jé wo beta jañele éyoñ, tebe’e tetele ô ke dubane jôé Tate Yésus, a Zambe a ye jamé minseme miôé.’
17 “Ve éyoñe me nga bulane Jérusalem, a nté me mbe me ye’ela’ane Temple, me nga ku avem
18 a me nga yene nye a jô’ô ma na: ‘Avôl, kôlô’ô Jérusalem, amu ba ye ke kañese jame wo ye jô mfa’a wom.’
19 Ane me nga jô na: ‘A Tate, ba kôme yeme na me mbe me kele’e besynagogue besynagogue, me futi’i bôte mimbôk, a bôme* bôte bese be mbe be buni’i wo;
20 a éyoñe be nga wôé Étienne, ngaa wôé, me mbe valé a me nga nye’e jam ése be mbe be bo’ok a me nga ba’ale biyé ya yôbe bi bôte be mbe be wôék nye.’
21 Ve a nga jô ma na: ‘Kelek, amu ma ye lôme wo meyoñe me ne ôyap.’”
22 A be nga ke ôsu a vô’ôlô nye akekui éyoñ éte. Ane be nga bete metyiñe yôp a jô na: “Avale môte di da yian awu, é nji yian ényiñ!”
23 Amu be mbe be yôta’an, be febela’ane biyé biap a bete ôdumu yôp,
24 évete bezimbi é nga ve tyiñe na bezimbi be kee Paul yate bezimbi été, ndembene ba ye sili nye minsili be bôme’e nye a jôme* ba bôme je bôte na a tu’a yem amu jé nsamba bôte wo wô’ô nye abé avale di.
25 Ve éyoñe be nga buti nye si na be nga zu bôme nye, Paul a nga jô évete bezimbi é mbe é tele valé na: “Ye atiñe da kañese na be bôme mone romain* a jôme ba bôme je bôt a too ki na be ngenane te tyi’i nye ajô?”*
26 Éyoñ évete bezimbi é nga wô’ô nalé, é nga ke be njôô bezimbi a kate nye mame mete a jô na: “Jé mia kômbô bo môte nyi? Amu môt ate a ne mone romain.”
27 Nde njôô bezimbi a nga zu vôm a mbe a jô na: “Kate’e ma, ye ô ne mone romain?” A nga yalane nye na: “Ôwé.”
28 Njôô bezimbi a nga beté na: “Me nga ve abui moné na me bo mone romain.” Paul a nga jô nye na: “Ve ma, me nga bialé me too mone romain.”
29 Nde été été, bôte be mbe na ba zu sili nye minsili be bôme’e nye, be nga jô’é; ane njôô bezimbi a nga ko woñ éyoñ a nga yeme na Paul a ne mone romain a na ba te tiñeti nye a bengôkop.
30 Nde môs ô nga tya’a valé, amu a mbe fo’o a kômbô’ô yem amu jé bejuif ba bo’olô Paul abime mame di, ane a nga tiine nye bengôkop a jô bejô beprêtre a Sanhédrin* ase na be tôkan. Ane a nga nyoñe Paul a telé nye ézezañe jap.
Notes
^ Nalé a tinane na avale bekristene ba nyiñ a miñye’elane miap.
^ Nalé a tinane na be nga yite minlôman a nkasa.
^ Jôm éte é ne bo ôlé nge nkasa.
^ Nge ke, “môte ya Rome.”
^ Nge ke, “be ngenane te kobô ajô dé.”
^ Lañe’e Atinane bifia.
