Ñwaʼni Nsi naʼ tshob ndù ngelañ Kristô kwù là, ghatswide kebwô tsho netèt mbwe benkristô mbwede nenùn Ñwaʼni Nsi. (Mfaʼ Ghantum 20:29, 30) A kuaʼ ju zʼa naʼ ntôg là. Bo naʼ bwede ntswide Yésu bo ntswide ba kelèn Nsi, a ghù ndùlala mfuni benkristô toʼ nesine. (2 Timôtio 4:3, 4) Be lèn à ndùke mbe sènni bag bin tshwèt njuʼ ju ze Ñwaʼni Nsi tshwèt ntswide là kuaʼ mebwô à?

Ngelañ naʼ kuʼu ze Yaweh Nsi laʼde nenùn nà. A naʼ tshob mbe ntùm miagde ngelañ, lènde nenùn aʼ kwiʼde. (Daniel 12:4) Ntùm nguʼnjù 1870, benntùn bo naʼ nke ndiag nenùn nà, naʼ juʼ mbe bwoñ ntswide tshôssi keʼ bʼa ju ze Ñwaʼni Nsi tshwèt ntswide là. Ndùlala, bo toʼ nediag mba be bo juʼ kuaʼ tshu tse Ñwaʼni Nsi naʼ nke ntswide là, Yaweh Nsi nañ mbotni num bo, mbèn mfà zenu nejuʼ tshu ywèt bo.

Ben ntù ntshùʼ naʼ tshét miag num neziʼde Ñwaʼni Nsi. Tshen ghaziʼde Ñwaʼni Nsi tse nenùn bo be mbwe ben nà, naʼ nke nziʼde Ñwaʼni Nsi à bo mat ntshùʼ, ze bag bin tshwèt nziʼde yi sènni là. Bo naʼ nke nziʼde Ñwaʼni Nsi à tu ntshob tu ntshobe. Ngelañ bo naʼ nke nkum num taʼ bag Ñwaʼni Nsi a ta nejuʼ là, bo diag tsemoʼ bag tse tsʼa kuʼni nebagdʼé là. Ngelañ bo be miagde njen ju a zin ku ntshùʼ bo ntshob Nsi là, bo kide yennà. Mba bo fañ mbe Ñwaʼni Nsi bagde wul i ze tu là, bo bèn mfon nenùn num lén Nsi, num ze Nufen, num ze nekô num nsitshaʼ mba num benntùn, num fe ben mba nywinde nelo num vù. Yub nediag sô yub ndà nkuan ntswide boa ngùninu kebwô.​—Yohané 8:31, 32.

Ntùm nguʼnjù 1879 Ghaziʼde Ñwaʼni Nsi naʼ juʼ mbe ngelañ seʼe neghù njoñ benntùn fa lèn nenùne. Ndùlala num yen nguʼ là, bo toʼde nekide kam buʼ ñwaʼni ze be tshwèt nkeʼ nkide sènni là, Ñwaʼni Ndiañ Ntom zʼa num nsoñ Nufen Yaweh Nsi là. Sènni bag tshwèt nsoñde nenùn Ñwaʼni Nsi ntùm ntshob 900 ntshùade, ntùm ngô 240 ngù ntañlaʼ. Lènde nenùn keʼ toʼ yàm mba sènni là!

• Ke zʼa naʼ ntum nenùn Ñwaʼni Nsi mba Yésu kwù à?

• Ke zʼa naʼ njwimde yag nebèn mfon Nenùn ntùm Ñwaʼni Nsi à?