•  Inchrodokshan 2

•  Chrezhaz Fahn di Werd a Gaad 3-5

  •  Taak 3

  •  Spirichwal Chrezhaz 4

  •  Baibl Reedin 5

•  Werk Haad fi Du Beta Eena di Minischri 6-14

  •  How fi Staat Wahn Kanvasayshan 7

  •  How fi Mek Ritern Vizit 8

  •  How fi Mek Disaiplz 9

  •  How fi Eksplayn Weh Yu Bileev 10

  •  Taak 11

  •  How fi Du Yu Asainment 12

  •  Di Way Wi Preech 13

  •  How fi Yooz di Veedyo ahn Poblikayshan Dehn 14

•  Liv Yu Laif az Wahn Kristyan 15-16

  •  Kangrigayshan Baibl Stodi 16

•  Fainal Koments 17

•  Komendayshan ahn Kongsl 18

•  Taimin 19

•  Wen di Serkit Oavaseeya Vizit 20

•  Di Week Wen Wi Ga Asembli er Kanvenshan 21

•  Di Week Wen Wi Ga di Memoaryal 22

•  Laif ahn Minischri Meetin Oavaseeya 23

•  Laif ahn Minischri Meetin Chyaaman 24

•  Agzilari Kongsla 25

•  Agzilari Klaas 26

•  Veedyo 27

1. Dehnya da di inschrokshanz fi di Wi Kristyan Laif ahn Minischri meetin. Enibadi weh geh wahn asainment fi di midweek meetin fi reed di inschrokshanz fahn di Laif ahn Minischri Meetin Werkbuk ahn fahn dis dakyument bifoa dehn pripyaa fi du dehn asainment. Mek aala di poblisha dehn noa dat wi di invait dehn fi mek dehnself avaylabl fi tek paat eena di difrent styoodent asainment dehn. Enibadi weh di kohn da meetin regyula ku tek paat eena dehnya asainment az lang az dehn agree wid weh di Baibl teech ahn dehn don di fala Baibl prinsiplz eena dehn laif. Di standadz weh sohnbadi haftu meet fi kwalifai fi du wahn styoodent asainment da di saym standadz fi bee wahn poblisha weh noh baptaiz. Soh if sohnbadi weh da noh wahn poblisha waahn sain op fi du styoodent asainments, di Laif ahn Minischri Meetin oavaseeya fi meet wid ahn fi eksplayn dehnya standadz. If da wahn Baibl styoodent, di brada er sista weh stodi wid ahn fi deh wid ahn wen dehn meet wid di oavaseeya. If da wahn Witnis pikni, ih ma er pa weh da wahn Witnis fi jain dehn. Afta dehn diskos di standadz fi kwalifikayshan, di Laif ahn Minischri Meetin oavaseeya fi mek dehn noa weda er nat dehn kwalifai.—od-E chapta 8 paragraaf 8.

2. Wan minit. Eech week, di meetin wahn staat wid wahn sang ahn wahn pryaa. Afta dat, di Laif ahn Minischri Meetin chyaaman wahn taak wahn lee bit bowt di proagram fi di meetin fi mek evribadi noa weh dehn ku luk faawod tu. Di chyaaman shuda bring owt di points weh wahn bee di moas helpful fi di kangrigayshan.

 3. Taak: Ten minits. Di Laif ahn Minischri Meetin Werkbuk wahn gat een wahn taitl fi di taak ahn too er chree mayn points fi mek op di taak. Wahn elda fi gi dis taak, er wahn ministeeryal servant weh kwalifai. Wen di Baibl reedin fi di week di staat wahn nyoo buk a di Baibl, wi wahn play wahn veedyo fi inchrojoos it. Di speeka ku koment pahn how di veedyo goh lang wid di taak if ih waahn, bot ih fi mek shoar ih kova di points eena di werkbuk. If ih ga inof taim, ih ku yooz di picha dehn weh goh lang wid di taak fi mek di points klyaa. Ih ku inklood ada infamayshan tu, az lang az ih help mek di points eena di werkbuk klyaa.

 4. Spirichwal Chrezhaz: Ten minits. Dis paat da fi wahn elda er wahn ministeeryal servant weh kwalifai. Dehn fi aks di too kweschanz weh deh eena di werkbuk an inkorij di aadyans fi ansa. Dehn ku disaid weda er nat dehn wahn reed di skripchaz weh goh lang wid di kweschanz. Enibadi weh koment fi dis paat fi gi dehn koments eena 30 sekants er les.

 5. Baibl Reedin: Foa minits. Dis styoodent asainment da fi bradaz. Di styoodent fi reed di Baibl pasij fi di asainment widowt wahn inchrodokshan er wahn kankloozhan. Di meetin chyaaman wahn chrai ih bes fi help di styoodents fi reed eena di karek way ahn wid andastandin. Ih fi chrai help dehn mek dehn ku reed smood, paaz eena di rait playsiz, yooz dehn vais eena di rait way, ahn song nachral. Som Baibl reedin asainment wahn bee lang ahn som wahn bee shaat, soh di Laif ahn Minischri Meetin oavaseeya fi mek shoar ih asain eech reedin tu wahn styoodent weh ku handl it.

6. Fifteen minits. Dis sekshan a di meetin giv evribadi wahn chaans fi praktis how fi preech ahn teech. Dis wahn help dehn fi du beta wen dehn staat kanvasayshanz ahn wen dehn teech peepl weh di Baibl seh. If nesiseri, eldaz ku du styoodent asainments tu. Eech styoodent fi werk pahn di stodi point weh deh eena brakits saida dehn asainment eena di Laif ahn Minischri Meetin Werkbuk. Som a di stodi point dehn wahn bee fahn di Reed ahn Teech broashoar ahn som wahn bee fahn di Lov Peepl broashoar. Sohntaim, di skejul wahn ga wahn diskoshan paat. Dehndeh paat fi asain tu wahn elda er wahn ministeeryal servant weh kwalifai.— Paragraaf 15 taak bowt how fi du diskoshan paats.

 7. How fi Staat Wahn Kanvasayshan: Dis da wahn styoodent asainment fi eeda wahn brada er wahn sista. If wahn brada geh di asainment, den ih howshoalda fi bee wahn brada, an if da wahn sista geh di asainment, den ih howshoalda fi bee wahn sista. Di onli taim di howshoalda ku bee fahn di opozit seks da if da faamli tu di styoodent. Dehn ku du di paat stan op er sidong wail dehn du di asainment; ih op tu dehn.— Paragraaf 12 ahn  13 gat een moa infamayshan weh ku help yu wid dis asainment.

 8. How fi Mek Ritern Vizit: Eeda wahn brada er wahn sista ku du dis asainment. Di howshoalda noh fi bee sohnbadi fahn di opozit seks. (km-E 5/97 payj 2) Dehn ku eeda sidong er stan op; ih op tu dehn. Di styoodent fi shoa wahn egzampl a weh yu ku seh wen yu di taak tu sohnbadi weh yu taak tu bifoa.— Paragraaf 12 ahn  13 gat een moa infamayshan weh ku help yu wid dis asainment.

 9. How fi Mek Disaiplz: Eeda wahn brada er wahn sista ku du dis asainment. Di howshoalda noh fi bee sohnbadi fahn di opozit seks. (km-E 5/97 payj 2) Dehn ku eeda sidong er stan op; ih op tu dehn. Dehn fi shoa paat a wahn Baibl stodi laik if ih don staat aredi. Dehn noh haftu shoa di biginin ner di en a di stodi anles di stodi point weh dehn di werk pan kaal far it. Dehn noh haftu reed owt aala di stodi mateeryal joorin di asainment, bot dehn kud if dehn waahn.

 10. How fi Eksplayn Weh Yu Bileev: Wen dis asainment da wahn taak, da wahn brada fi du it. Wen da wahn demonschrayshan, ih ku asain tu wahn brada er wahn sista. Di howshoalda noh fi bee fahn di opozit seks anles da faamli tu di styoodent weh ga di asainment. Di styoodent fi yooz di refrens infamayshan fi ansa di kweschan eena di taitl fi dis paat eena wahn klyaa ahn rispekful way. Di styoodent ku disaid weda er nat ih wahn menshan di poblikayshan weh di asainment bays pan wail ih di du dis paat.

 11. Taak: Dis asainment da fi bradaz onli. Dehn fi handl it az wahn taak tu di kangrigayshan. Wen di taak bays pahn wahn point fahn apendiks A eena di Lov Peepl broashoar, di styoodent fi help di aadyans fi si how dehn ku yooz di vers dehn eena di minischri. Fi egzampl, ih mait eksplayn wen dehn ku yooz wahn vers, weh di vers meen, ahn how fi help ada peepl fi andastan weh di vers reeli meen ahn how ih ku help dehn. Wen di taak bays pahn wahn point fahn wan a di lesn dehn eena di Lov Peepl broashoar, di styoodent fi help di aadyans fi si how dehn ku yooz weh dehn laan eena di minischri. Ih mait disaid fi bring owt di egzampl eena point 1 er yooz eni a di ada skripchaz eena di lesn, if dat wuda help di kangrigayshan.

   12. How fi Du Yu Asainment: Dis paragraaf ahn di neks wan gat een infamayshan fi di asainments “How fi Staat Wahn Kanvasayshan” ahn “How fi Mek Ritern Vizit.” Anles di inschrokshanz seh adawaiz, di styoodent fi chrai fi shayr wahn baysik Baibl teechin weh ku help di persn weh ih di taak tu ahn fi mek araynjments fi taak tu ahn agen. Di styoodent fi pik wahn tapik weh peepl eena yu kangrigayshan teritori wuda waahn taak bowt. Ih ku chooz weda er nat fi yooz wahn poblikayshan er wahn veedyo fahn wi Teechin Toolbaks. Ih noh fi shoa how fi yooz wahn prezentayshan weh ih memoraiz heda taim. Rada, ih fi shoa tingz laik how fi taak eena wahn nachral way, how fi shoa dat wi kay bowt peepl, er how fi yooz ada skilz weh wahn help wi fi taak tu peepl ahn teech dehn di chroot.

   13. Di Way Wi Preech: Di styoodent fi shoa how fi preech eena yu kangrigayshan teritori akaadn tu di way weh di inschrokshanz seh fi yooz. Fi egzampl:

1.  (1) Hows tu Hows: Dis inklood aala di wayz how wi preech ahn mek ritern vizit eena di hows tu hows minischri, weda wi du foan witnisin, leta raitin, er goh da peepl hows.

2.  (2) Preech Enitaim: Dis da wen wi tek eni chaans weh wi get joorin naamal evriday kanvasayshan fi taak tu peepl bowt di chroot. Ih ku bee wen wi shayr sohnting fahn di Baibl wid peepl da werk, da skool, eena wi naybahud, pahn bos, er eniway els weh wi meet peepl wail wi di goh bowt wi bizniz.

3.  (3) Poblik Witnisin: Dis ku bee wen wi du tingz laik kyaat witnisin er schreet witnisin, wen wi preech eena bizniz teritori, da paak, er da eni ada plays weh wi ku fain peepl fi taak tu.

 14. How fi Yooz di Veedyo ahn Poblikayshan Dehn: Wahn styoodent ku chooz fi yooz wahn veedyo er wahn poblikayshan eena dehn asainment if di sichuwayshan kaal far it. If di asainment inklood wahn veedyo er if di styoodent disaid fi yooz wan, ih fi inchrojoos di veedyo ahn diskos it, bot ih noh fi play it.

15. Afta di sang, di neks 15 minits a dis sekshan a di meetin wahn ga wan er too paat weh dizain fi help di aadyans yooz di Werd a Gaad eena dehn laif. Asain dehnya paat tu eldaz er tu ministeeryal servants weh kwalifai, anles di inschrokshanz seh adawaiz. Eni loakal needz paat shuda geh asain tu wahn elda. Wen wahn paat da wahn diskoshan, di speeka fi aks di kweschanz eena di paat, bot ih ku aks ada kweschanz enitaim joorin di paat tu. Ih mos kip di inchrodokshan shaat soh dat ih ku ga inof taim fi kova aala di mayn points eena di diskoshan ahn fi mek di aadyans ga taim fi koment tu. If di inschrokshanz seh fi intavyoo sohnbadi, ih beta fi mek dehn goh pahn di stayj fi di intavyoo if dat pasabl, rada dan dehn ansa di kweschanz fahn dehn seet.

  16. Kangrigayshan Baibl Stodi: Terti minits. Asain dis paat tu wahn elda weh da wahn gud teecha. (Eni kangrigayshan weh shaat a eldaz ku yooz ministeeryal servants weh da gud teechaz, if nesiseri.) Di badi a eldaz need fi disaid hoo kwalifai fi kandok di Kangrigayshan Baibl Stodi. Di bradaz weh dehn pik fi bee aybl fi kandok di stodi eena wahn way weh benifit di kangrigayshan, kip di stodi pahn taim, bring owt di mayn skripcha dehn, ahn help di aadyans fi si how dehn ku yooz weh dehn stodi eena dehn evriday laif. Ih wuda gud if dehndeh bradaz goh oava di inschrokshanz fahn di aaganaizayshan fi bradaz weh kandok kweschan an ansa paats. (w23.04 baks pahn payj 24) Afta dehn don kova aala di mateeryal fi di week, dehn noh need fi jreg owt di stodi fi di res a di terti minits. If pasabl, yooz difrent bradaz fi kandok ahn reed eech week. If di Laif ahn Minischri Meetin chyaaman aks fi mek di stodi finish lee erli, den di brada weh di kandok need fi disaid how hihn wahn shaatn it. Ih ku disaid noh fi reed som a di paragraaf dehn.

17. Chree minits. Di Laif ahn Minischri Meetin chyaaman wahn goh oava som a di points fahn di meetin weh ku benifit evribadi, ahn den goh oava som a di points weh wi ku luk faawod tu pahn neks week meetin. Ih ku goh oava hoo aal ga paat pahn neks week meetin if ih ga inof taim fi du it. If di chyaaman need fi reed eni anonksment er leta fi di kangrigayshan, ih wahn reed it joorin dis paat a di meetin. Regyula infamayshan, laik regyula feel servis araynjments ahn di kleenin skejul, shudn anonks fahn di platfaam. Jos put dehn pahn di infamayshan boad. If eni anonksment er leta fi reed tu di kangrigayshan tu lang fi di chree minits weh deh pahn di skejul fi dis paat a di meetin, di chyaaman wahn haftu aks di bradaz weh ga paat pahn di Liv Yu Laif az Wahn Kristyan sekshan a di meetin fi shaatn dehn paat fi mek taim. ( Paragraaf 16 ahn  19 gat een moa infamayshan bowt dis asainment.) Di meetin wahn finish wid wahn sang ahn wahn pryaa.

18. Afta eech a di styoodent asainment dehn, di Laif ahn Minischri Meetin chyaaman ga bowt wan minit fi gi di styoodent komendayshan ahn kongsl bays pahn di stodi point weh dehn werk pan. Wen di chyaaman inchrojoos di styoodent, ih noh wahn anonks ih kongsl point. Wen di styoodent finish di asainment, di chyaaman fi komen ahn fi sohnting weh ih du gud eena di asainment. Afta dat, di chyaaman mait seh weh stodi point di styoodent mi-di werk pan an eena weh way ih mi du gud pan it, er ih ku tel ahn eena wahn nais way wai ih wahn need fi kantinyu werk pan it. Di chyaaman ku aalso koment pahn eni ada deetaylz weh ih tink di styoodent er di aadyans ku benifit fram. Akaadn tu weh eech styoodent need, di chyaaman ku gi praivit kongsl afta di meetin er wahn nada taim. Dis kongsl shuda bays pahn di Lov Peepl broashoar, di Reed ahn Teech broashoar, er di Ministry School buk, an ih ku bee bowt di stodi point weh di styoodent mi-di werk pan er ih ku bee bowt wahn nada stodi point.— Paragraaf 19,  24, ahn  25 eksplayn moa bowt di Laif ahn Minischri Meetin chyaaman ahn di agzilari kongsla.

19. No paat a di meetin fi goh oavataim, noh eevn di koments fahn di Laif ahn Minischri Meetin chyaaman. Eevn doa di Laif ahn Minischri Meetin Werkbuk set wahn taim fi eech paat, dat noh meenz di styoodent er di brada weh asain di paat haftu ad moa infamayshan jos fi yooz di ful amonk a taim. If dehn don kova di infamayshan gud, dehn ku en di paat. If enibadi goh oavataim wid dehn paat, di Laif ahn Minischri Meetin chyaaman er di agzilari kongsla fi gi dehn praivit kongsl. (Moa infamayshan deh eena  paragraaf 24 ahn  25.) Di hoal meetin, inkloodin di sang ahn pryaa dehn, shuda laas 1 owa ahn 45 minits.

20. Wen di serkit oavaseeya vizit di kangrigayshan, wi wahn stil du di meetin jos laik how di skejul seh eena di Laif ahn Minischri Meetin Werkbuk eksep fi di Kangrigayshan Baibl Stodi. Insteda di stodi, di serkit oavaseeya wahn gi wahn 30-minits servis taak. Di Laif ahn Minischri Meetin chyaaman wahn goh oava di points fahn di meetin, koment pahn di neks week meetin, ahn mek eni anonksment er reed eni leta bifoa ih inchrojoos di serkit oavaseeya. Di serkit oavaseeya wahn kloaz di meetin afta ih gi di servis taak. Hihn wahn pik di sang fi en di meetin, an ih mait aks wahn neks brada fi seh di pryaa. Joorin di serkit oavaseeya vizit, no agzilari klaas wahn deh anles da fi wahn farin langwij groop. If di kangrigayshan di sponsa wahn langwij groop, dehn ku stil ga dehn meetin joorin di serkit oavaseeya vizit. Bot dehn stil need fi jain op bak wid di hoas kangrigayshan fi di servis taak.

21. No meetin wahn deh joorin di week wen yu ga asembli er kanvenshan. Rimain eech famili er poblisha fi goh oava di infamayshan fi da week joorin dehn Famili Wership er persnal stodi.

22. Wen di Memoaryal jrap pahn wahn day joorin di week, no Laif ahn Minischri Meetin wahn deh.

23. Di badi a eldaz wahn pik wan a di elda dehn fi bee di Laif ahn Minischri Meetin oavaseeya, ahn dehn wahn pik wich bradaz ku bee chyaaman fi di midweek meetin. Di Laif ahn Minischri Meetin oavaseeya wahn rispansabl fi mek shoar di meetin wel aaganaiz ahn goh akaadn tu dehnya inschrokshanz. Hihn wahn need fi ga gud kamyoonikayshan wid di agzilari kongsla. Az soon az di Laif ahn Minischri Meetin Werkbuk kom owt, di Laif ahn Minischri Meetin oavaseeya wahn asain owt aala di midweek meetin paat dehn fi di too monts. Dis inklood di styoodent asainment dehn, aala di paats weh kohn bifoa an afta di styoodent asainment dehn, ahn hoo wahn bee chyaaman. (Moa infamayshan deh eena  paragraaf 3-16 ahn  24.) Wen ih di asain owt di styoodent paats, ih fi tink bowt di styoodent dehn ayj, ekspeeryens, ahn weda er nat di styoodent di liv op tu weh di paat di taak bowt. Ih fi tink bowt di saym tingz wen ih di asain owt di ada paats pahn di meetin tu. Evribadi weh geh wahn paat pahn di meetin fi geh dehn asainment at lees chree weeks bifoa di day wen dehn fi du dehn asainment. Eech styoodent fi geh wahn Wi Kristyan Laif ahn Minischri Meetin Asainment (S-89) slip wid aala di infamayshan fi dehn asainment. Di Laif ahn Minischri Meetin oavaseeya fi mek shoar dat wahn kapi a di skejul wid aala di asainment dehn fi deh pahn di infamayshan boad da di Kingdom Haal. Di badi a eldaz ku asain wahn nada elda er wahn ministeeryal servant fi help ahn. Bot onli yooz eldaz fi asain owt di paats weh kohn bifoa an afta di styoodent asainment dehn.

24. Eech week, wan a di elda dehn wahn bee di chyaaman fi di Laif ahn Minischri Meetin. (If di kangrigayshan shaat a eldaz, dehn ku yooz ministeeryal servants weh kwalifai fi handl asainments laik dis.) Di chyaaman fi pripyaa koments fi di inchrodokshan ahn fi di fainal koments. Da hihn wahn inchrojoos eech paat pahn di meetin, an ih mait eevn haftu du ada paats pahn di meetin tu, espeshali if da jos fi play wahn veedyo widowt diskos it, if di kangrigayshan noh ga inof eldaz fi kova aala di paats. Ih ku mek lee koments bitween paats pahn di meetin, bot ih noh fi taak lang. Di elda badi wahn disaid wich eldaz kwalifai fi bee chyaaman. Aala di eldaz weh dehn pik wahn geh dehn tern fi bee chyaaman. If nesiseri, di Laif ahn Minischri Meetin oavaseeya mait need fi bee chyaaman moa aafn dan di ada eldaz weh kwalifai. If wahn elda kwalifai fi kandok di Kangrigayshan Baibl Stodi, den ih praabli kwalifai fi bee di meetin chyaaman tu. Bot pleez memba dat di elda weh da chyaaman fi di meetin wahn haftu komen di styoodent dehn fi dehn asainment ahn gi dehn kongsl if dehn need it, ahn dehn need fi du dat eena wahn lovin ahn kain way weh wahn help di styoodent. Di chyaaman fi mek shoar di meetin finish pahn taim tu. (Moa infamayshan deh eena  paragraaf 17 ahn  19.) If di chyaaman waahn an if inof spays deh pahn di stayj, dehn ku set op wahn standin maik fi mek ih ku anonks di difrent paat fahn deh wail di speeka goh stan op da di mayn maik widowt haftu wayt. Er di chyaaman mait waahn sidong da wahn taybl pahn di stayj joorin di Baibl reedin ahn di Werk Haad fi Du Beta Eena di Minischri sekshan a di meetin. Dehnya opshan mait help sayv taim.

25. Ih gud fi mek wahn elda weh ga lata ekspeeryens bee di agzilari kongsla if dat pasabl. Wen eldaz ahn ministeeryal servants gi paats pahn di Laif ahn Minischri Meetin, gi poblik taak, er kandok er reed fi di Wachtowa Stodi er di Kangrigayshan Baibl Stodi, di agzilari kongsla wahn rispansabl fi gi dehn praivit kongsl if dehn need it. (Moa infamayshan deh eena  paragraaf 19.) If lata di eldaz eena di kangrigayshan da gud speeka ahn teecha, den wahn difrent brada ku bee di agzilari kongsla eech yaa. Di agzilari kongsla noh haftu kongsl bradaz afta evri asainment weh dehn du.

26. Dipendin pahn humoch styoodents eena di kangrigayshan, ih mait pasabl fi ga agzilari klaas fi di styoodent asainment dehn. Eech agzilari klaas need fi ga wahn kongsla, an ih beta if da wahn elda. If di kangrigayshan shaat a eldaz, dehn ku yooz ministeeryal servants weh kwalifai. Di badi a eldaz fi disaid hoo kwalifai fi dis an if wan brada wahn du it evri taim er wahn difrent brada eech week. Di kongsla fi fala di inschrokshanz eena  paragraph 18. If di kangrigayshan ga wahn agzilari klaas, di styoodents weh ga asainment gwehn da di klaasroom rait afta di Spirichwal Chrezhaz paat eena di Chrezhaz Fahn di Werd a Gaad sekshan a di meetin. Den dehn wahn jain op bak wid di mayn aadyans afta di Werk Haad fi Du Beta Eena di Minischri sekshan a di meetin.

27. Sertn veedyo wahn skejul fi play joorin di meetin dehn. Aala di veedyo dehn fi di midweek meetin wahn avaylabl eena di JW Library® ap, ahn yu wahn ku play dehn pahn aal kaina divais.

© 2023 Watch Tower Bible and Tract Society of Pennsylvania

S-38-BZK 11/23