DI CHROOT bowt wat? Bowt som a di moas impoatant kweschan dehn weh peepl eva aks. Maybi yu aks yuself wan a dehnya kweschan aredi:

• Ah wanda if Gaad reeli kay bowt wi?

• Wi wahn eva stap si waar ahn sofarin?

• Weh hapm tu wi wen wi ded?

• Eni hoap deh fi dehn wan weh ded?

• How Ah ku pray if Ah waahn Gaad lisn tu mi?

• How Ah ku reeli bee hapi?

Wehpaa yu wuda luk fi fain di ansa tu dehnya kweschan? If yu goh da wahn laibri er wahn bukshap, yu wuda fain lata buk weh klaym seh dehn ga di ansa. Bot lata taim, di buk dehn kanchradik wan anada. Som mait help fi wahn lee wail, bot soon di infamayshan geh oal ahn dehn geh rid a it er chaynj it.

Bot, dehn ga wahn buk weh tel di chroot, ahn yu ku pen pahn di ansa dehn weh ih gat een. Jeezas Krais mi pray tu Gaad ahn seh: “Fi yoo werd dehn da di chroot.” (Jan 17:17) Da Werd da di Hoali Baibl. Pahn di neks kopl a payj, yu wahn geh wahn klayr ahn chroo ansa fahn di Baibl tu dehndeh siks kweschan.

WAI DIS KWESCHAN KOM OP: Wi liv eena wahn werl weh ful a injostis ahn peepl weh kruwil. Wahn lata rilijan teech dat wen wi di sofa da Gaad wil.

WEH DI BAIBL TEECH: Gaad noh kaaz notn weh wikid. Job 34:10 seh: “Ih noh pasabl fi mek di chroo Gaad du wikidnis, fi mek di Almaiti du weh rang!” * Gaad ga wahn lovin perpos fi hyoomanz. Dat da wai Jeezas mi teech wi fi pray: “Fi wee Faada weh deh da hevn . . . kohn kohn set op yu Kingdom, ahn mek evribadi obay yu pahn ert jos laik how evribadi obay yu da hevn.” (Machyu 6:9, 10) Gaad kay soh moch bowt wi dat ih mi sakrifais wahn lat fi mek shoar fi hihn perpos kohn chroo.—1 Jan 4:9, 10.

Luk op Genesis 1:26-28; Jaymz 1:13; ahn 1 Peeta 5:6, 7.

WAI DIS KWESCHAN KOM OP: Wahn lata peepl kantinyu fi ded sayka waar. Aala wi gaan chroo sohn kaina sofarin, wan way er di ada.

WEH DI BAIBL TEECH: Gaad mi pramis dat wahn taim wahn kohn wen hihn wahn mek di hoal werl ga pees. Anda fi hihn Kingdom, weh da wahn govament da hevn, peepl noh wahn “laan waar nohmoh.” Insteda dat, dehn wahn “beet dehn soad intu sohn tool fi plow.” (Isaiah 2:4) Gaad wahn put wahn en tu aala di injostis ahn sofarin weh di hapm. Di Baibl pramis dat “[Gaad] wahn waip weh aala dehn aiywaata fahn dehn aiy. Dehn noh wahn ded nohmoh ner sofa, ner krai ner feel payn nohmoh. Kaa aala dehndeh tingz weh mi deh eena di paas, [eevn aala di sofarin ahn injostis weh di hapm tudeh] dehn gaahn fareva.”—Revilayshan 21:3, 4.

Luk op Psalm 37:10, 11; 46:9; ahn Micah 4:1-4.

WAI DIS KWESCHAN KOM OP: Moas a di rilijan dehn rong di werl teech dat wen sombadi ded, wahn paat a dehn kantinyu di liv. Som bileev dat ded peepl ku hert wi er dat Gaad ponish di wikid ahn mek dehn bon op eena hel fareva.

WEH DI BAIBL TEECH: Wen sohnbadi ded, dehn noh egzis nohmoh. Ecclesiastes 9:5 seh: “Di ded noh noa notn ataal.” Soh if dehn noh noa notn ahn dehn kyaahn feel er du eniting needa, den dehn kyaahn help wi ner hert wi.—Psalm 146:3, 4.

Luk op Genesis 3:19 ahn Ecclesiastes 9:6, 10.

WAI DIS KWESCHAN KOM OP: Non a wi waahn ded, wi waahn liv ahn injai wi laif wid dehn wan weh wi lov. Ih onli nachral fi wi ga wahn schrang schrang feelin fi waahn si wi frenz ahn famili weh ded kom bak tu laif.

WEH DI BAIBL TEECH: Moas a di peepl dehn weh ded wahn rezorek. Jeezas mi pramis dat “dehn wan weh deh eena dehn grayv wahn . . . kom owt.” (Jan 5:28, 29) Sins Gaad perpos da fi gi evribadi di apachooniti fi liv fareva eena paradais pahn di ert, ih mek sens dat aal dehn wan weh geh rezorek geh dis chaans tu. (Look 23:43) Dis pramis fi di fyoocha wahn meen perfek helt ahn evalastin laif fi hyoomanz weh obeedyant. Di Baibl seh: “Gaad bles dehn wan weh hombl, kaa di hoal ert wahn bee fi dehn.”—Machyu 5:5.

Luk op Job 14:14, 15; Look 7:11-17; ahn Aks 24:15.

WAI DIS KWESCHAN KOM OP: Peepl eena moas rilijan pray. Bot, wahn lata dehn feel laik Gaad noh ansa dehn pryaaz.

WEH DI BAIBL TEECH: Jeezas mi teech wi fi noh di seh di sayhn ting dehn oava ahn oava wen wi pray. Hihn mi seh: “Wen unu pray, noh jos ratl aaf wahn hoal lata ting oava ahn oava.” (Machyu 6:7) If wee waahn Gaad lisn tu fi wee pryaaz, wee hafu pray di way how hihn tel wi fi pray. Fi du dat, wi need fi laan weh da Gaad wil ahn pray akaadn tu it. Fos Jan 5:14 eksplayn dat “if wi aks ahn eniting akaadn tu weh hihn waahn, ih lisn tu wi.”

Luk op Jan 9:31; 16:23, 24; ahn 1 Jan 3:22.

WAI DIS KWESCHAN KOM OP: Lata peepl tink dat if dehn ga moni, if dehn faymos, er luk gud, dehn wahn bee hapi. Soh, dehn chays aata dehndeh ting—onli fi fain owt dat dehn stil noh hapi.

WEH DI BAIBL TEECH: Jeezas shoa wi how fi reeli bee hapi wen ih seh: “Gaad bles dehn wan weh noa seh dehn need hihn.” (Machyu 5:3) Soh, fi mek wi reeli bee hapi, wi hafu riyalaiz dat wi need Gaad ahn du wateva wi need fi du fi laan di chroot bowt hihn ahn ih perpos fi wee. Wi kud fain datdeh chroot eena di Baibl. Wen wi noa di chroot, ih wahn help wi fi figa owt weh reeli impoatant fahn weh noh impoatant. If wi mek di chroot fahn di Baibl gaid wi disizhan ahn akshan dehn, wi laif wahn ga moa meenin.—Look 11:28.

Luk op Proverbs 3:5, 6, 13-18 ahn 1 Timoti 6:9, 10.

 Dis da-mi jos wahn kwik luk pahn di ansa dehn weh di Baibl ga fi dehndeh siks kweschan. Yoo wuda waahn laan moa? If yoo da wan a dehn wan weh ‘noa seh yu need Gaad,’ den yu wuda seh yes. Maybi yu don wanda bowt sohn ada kweschan laik: ‘If Gaad kay bowt wi, den wai hihn talarayt soh moch eevl ahn sofarin fi soh lang? How Ah ku ga wahn beta famili laif?’ Di Baibl gat een di ansa tu dehnya kweschan plos moa. Di ansa dehn reeli klayr ahn dehn wahn satisfai yu.

Tudeh, lata peepl hoal bak fahn stodi di Baibl. Dehn tink dat da wahn big buk weh haad fi andastan. Yoo wuda waahn geh help fi fain di ansa dehn fahn di Baibl? Jehoava Witnisiz ga too wayz fi help yu.

Di fos way da wid di buk What Does the Bible Really Teach? weh help peepl fain di klayr ansa dehn fahn di Baibl tu som a di moas impoatant kweschan eena laif. Di sekant way da wahn free Baibl stodi. Wan a Jehoava Witnisiz ku kohn da yu hows, er wahn neks plays weh gud fi yoo, ahn tek wahn lee taim evri week fi teech yu di Baibl fi free. Milyanz a peepl aal oava di werl don benifit fahn dis saym proagram. Lata dehn en op di seh: “Dis da di chroot!”

Yu noh wahn fain notn weh wot moa dan dis! Di chroot fahn di Baibl free wi fahn eni soopastishan, kanfyoozhan, ahn fyaa. Ih gi wi hoap, perpos, ahn jai. Jeezas mi seh: “Unu wahn noa di chroot bowt Gaad, ahn da sayhn chroot wahn mek unu free fi chroo.”—Jan 8:32.