Aala wi ku feel how sohnbadi els feel wen wi put wiself eena da persn sichuwayshan. Dakta Rick Hanson, hoo da wahn mental helt ekspert seh dat “aala wi baan wid di abiliti fi feel fi adaz.”

TINK BOWT DIS: Wai wee az hyoomanz ku andastan how adaz feel wen no ada kriyayshan pahn ert ku du di sayhn ting? Di Baibl seh dat Gaad mi mek hyoomanz eena fi hihn imij. (Genesis 1:26) Dis meenz dat wi ku shoa di sayhn kaina kwalitiz weh hihn gat. Soh, wen wahn persn help adaz bikaaz ih put ihself eena fi dehn sichuwayshan ahn feel how dehn feel, den ih di shoa di sayhn kaina kompashan weh wi Kriyayta, Jehoava, gat.—Proverbs 14:31.

Gaad feel fi wi an ih hayt wen peepl sofa. Wen di Izrelaits mi-di sofa az slayvz da Eejip ahn den wen dehn mi sofa fi 40 yaaz eena di wildanis, di Baibl seh: “Joorin aala fi dehn chroblz hihn mi feel lata payn.” (Isaiah 63:9) Gaad neva jos noa dat ih peepl mi-di sofa. Bot hihn kuda mi feel dehn payn. Hihn seh: “Ah si aala di sofarin weh mi peepl di goh chroo.” (Exodus 3:7) Gaad seh: “Enibadi weh toch unu, di toch mi aiybaal.” (Zechariah 2:8) Wen adaz hert wi, Gaad feel wi payn eena ih haat.

Weneva wi feel dat wi noh gud inof er dat wi noh dizerv Gaad kompashan, di Baibl inkorij wi an ih tel wi: “Gaad grayta dan wi haat ahn hihn noa evriting.” (1 Jan 3:19, 20) Gaad noa wi beta dan how wee noa wiself. Hihn noa wi sichuwayshan eena laif, weh wi di tink, ahn how wi feel. Hihn feel weh wee feel.

 Di Skripchaz pramis wi

• “Yu wahn kaal, ahn Jehoava wahn ansa yu; yu wahn krai fi help, ahn hihn wahn seh, ‘Si mi ya!ʼ”—ISAIAH 58:9.

• “Jehoava seh, ‘Ah noa gud-wan dat di tingz weh Ah di tink bowt fi unu, da loan tingz fi pees ahn noh fi sofarin, fi gi unu wahn fyoocha ahn wahn hoap. Unu wahn kaal mi ahn kom ahn pray tu mi, an Ah wahn lisn tu unu.ʼ”—JEREMIAH 29:11, 12.

• “Gyada aala mi tyaaz eena yu skin batl. Ah noa dehn deh eena yu memri.”—PSALM 56:8.

If wi noa dat Gaad feel wi payn, yu tink dat ku mek wi bayr op anda haad taimz? Kansida weh Maria mi gaahn chroo:

“Afta mi son mi-di fait kyansa fi too yaaz, Ih mi ded wen ih mi onli 18 yaaz oal. Dat mi mek Ah feel laik laif mi tu haad ahn dat ih neva fyaa. Ah mi beks wid Jehoava bikaaz ih neva du notn fi kyoar ahn!

“Siks yaaz layta, wahn lovin fren eena di kangrigayshan mi lisn tu mi az Ah mi-di tel ahn dat Ah feel laik Jehoava neva lov mi. Ih mi lisn tu mi fi owaz an ih neva intarop mi. Shee mi koat wahn skripcha weh reeli toch mi haat. Ih deh da 1 Jan 3:19, 20, weh seh: ‘Gaad grayta dan wi haat ahn hihn noa evriting.ʼ Shee mi help mi fi si dat Jehoava andastan weh Ah feel.

“Eevn doa Ah mi andastan dis, Ah mi stil feel beks! Den Ah mi reed Psalm 94:19, weh seh: ‘Wen Ah feel laik mi woriz da tu moch fi mek Ah deel wid, yu komfert mi ahn kaam mi soal.ʼ Ah mi feel laik dehndeh vers mi geh rait dong jos fi mee! Afta wahn wail, ih mi komfertin fi taak tu Jehoava bowt weh Ah di goh chroo kaaz Ah noa dat ih di lisn tu mi ahn dat ih andastan mi.”

Wen wi noa dat Gaad andastan wi ahn dat ih feel wi payn, dis gi wi lata komfert! Bot wai lata sofarin deh? Yoo tink da bikaaz Gaad di ponish wi fi di bad tingz weh wi du? Yu eva wanda if Gaad wahn du eniting fi stap sofarin? Di neks fyoo aatikl wahn taak bowt dehndeh kweschan.