Gaad kriyayt wi badi wid di amayzin abiliti fi heel. Wen wahn helti badi geh wahn kot, skrayp, er wahn stab, di “badi staat wahn komplikaytid proases weh heel ihself.” (John Hopkins Medicine) Rait away, di badi du sohnting fi stap di bleedin, fiks eni damij weh hapm, ahn schrentn di ayrya weh geh damij.

TINK BOWT DIS: If di Kriyayta mek wi badi fi heel ihself, yu noh tink wi ku chros eena ih pramis dat hihn ku help wi get oava eni imoashanal payn tu? Di Saamis seh: “Hihn komfert enibadi weh sad eena dehn haat, hihn heel dehn wen dehn geh hert.” (Psalm 147:3) Bot if yoo di sofa imoashanal payn bikaaz a sohnting weh mi hapm tu yu eena di paas er sohnting weh di hapm tu yu rait now, how yu ku bee shoar dat Jehoava wahn heel yoo now an eena di fyoocha?

Gaad pramis wi: “Noh bee frayd, kaaz Ai deh wid yu. Noh wori, kaaz Ai da yu Gaad. Ai wahn schrentn yu, fi shoar, Ai wahn help yu.” (Isaiah 41:10) Wahn persn weh noa dat Gaad kay bowt ahn wahn ga pees an ih wahn ga di schrent fi deel wid eni chraiyal weh ih mait goh chroo. Di apasl Paal rifaa tu dis az di “kaina pees weh peepl kyaahn andastan.” An ih kantinyu fi seh: “Ah geh di schrent fi fays evriting bikaaz a di wan weh gi mi powa.”—Filipiyanz 4:4-7, 9, 13.

Di Skripchaz help wi fi schrentn wi fayt eena Jehoava pramis dehn fi di fyoocha. Fi egzampl, Revilayshan 21:4, 5 (weh geh koat eena di neks payj) tel wi weh hihn wahn du ahn wai wi ku chros hihn fi du it:

• “Hihn wahn waip weh dehn tyaaz fahn dehn aiy.” Jehoava wahn geh rid a aal sofarin ahn woriz, eevn di woriz weh peepl noh tink impoatant.

• Di Almaiti King weh di “sidong pahn di chroan” da hevn eena aala ih gloari, wahn yooz ih powa an ih atariti fi geh rid a sofarin an ih wahn gi wi evriting weh wi need.

• Jehoava pramis dat weh hihn seh ‘da di chroot, ahn peepl ku bileev weh hihn seh.ʼ Bikaaz a weh ih naym stan fa an ih repyutayshan, wi ku bee shoar dat ih pramis dehn wahn kohn chroo.

“‘Ahn hihn wahn waip weh dehn tyaaz fahn dehn aiy, nobadi noh wahn ded nohmoh, nobadi noh wahn feel saro ner payn nohmoh ner krai bikaaz a sadnis. Di tingz weh yoostu hapm noh wahn egzis nohmoh.ʼ Ahn di Wan weh mi-di sidong pahn di chroan seh: ‘Ai di mek evriting nyoo.ʼ Den ih seh: ‘Rait dat dong, bikaaz dehndeh werdz da di chroot, ahn peepl ku bileev weh Ah di seh.’”—Revilayshan 21:4, 5.

Wi ku geh fi noa wi hevnli Faada kwalitiz beta chroo di Baibl ahn kriyayshan, laik di yoonivers. Wen wi luk pahn kriyayshan, da laik ih di invait wi fi geh fi noa wi Kriyayta. Di Baibl mek da invitayshan eevn moa klyaa wen ih seh: “Kohn kloas tu Gaad, ahn hihn wahn kohn kloas tu unu.” (Jaymz 4:8) An Aks 17:27 seh: “Hihn noh deh faar fahn eech wan a wi.”

Az yu tek di taim fi geh fi noa Gaad, yu wahn moa kanvins dat “hihn kay bowt yu.” (1 Peeta 5:7) How yoo wahn benifit if yu chros eena Jehoava?

Tink bowt di ekspeeryens a Toru, fahn Japan. Hihn mi geh rayz bai ih ma hoo da wahn Kristyan, stilyet, hihn mi geh involv wid di yakuza, weh da wahn gang da Japan. Hihn seh, “Ai mi tink dat Gaad mi hayt mi, an Ah feel laik ih mi-di ponish mi weneva peepl rong mi ded, espeshali dehn wan hoo Ah mi reeli kloas tu.” Toru mi seh dat di way how ih mi-di liv ahn di kaina tinkin weh ih mi gat mi mek ih bee sohnbadi weh “jos neva kay bowt notn er nobadi.” Dis da weh hihn seh ih mi reeli waahn du; ih seh: “Ah mi waahn ded yong, bot fers, Ah mi waahn kil sohnbadi weh mi moa faymos dahn mee ahn mek wahn naym fi miself.”

Bot den, Toru an ih waif, Hannah, mi staat stodi di Baibl. Toru mi staat tu mek sohn big chaynjiz eena ih laif an eena di way how ih mi tink ahn feel. Hannah seh: “Ah kuda mi reeli si how mi hozban  mi chaynj.” Now, Toru seh: “Dehn ga wahn Gaad weh kay bowt eech an evri wan a wi. Hihn noh waahn nobadi fi ded, an ih waahn fergiv dehn wan weh sari bowt di rang tingz weh dehn du. Ih lisn tu di tingz weh wi kyaahn tel nobadi els ahn weh nobadi els ku andastan. Eena di fyoocha, Jehoava wahn geh rid a wi prablemz, wi sofarin, ahn wi payn. Eevn now, hihn di help wi eena wayz weh wi noh eevn ekspek. Hihn lov wi an ih waahn help wi wen wi feel dong.”—Psalm 136:23.

Laik weh wi laan fahn Toru ekspeeryens, wi noa dat Gaad noh onli ku geh rid a aala di prablemz weh wi fays ahn waip weh aala di tyaaz fahn wi aiy dehn, bot wi noa dat hihn wahn du it tu. Dis noh onli gi wi wahn hoap fi di fyoocha, bot ih wahn aalso help wi fi liv wahn beta laif now. Yes, eevn eena wahn werl weh ful op a sofarin, yu ku stil benifit fahn Gaad lovin kyaa.