IMAJIN DIS: Yu di tek wahn toar eena wahn myuzeeyom weh ga lata stachu fahn way bak eena di day. Moas a dehn oal ahn dehn di wayr owt. Som a dehn eevn misn peesiz. Bot wan a dehn stil luk gud. Yu ku stil si evri deetayl. Soh yu aks yu toar gaid, “Dis wan noh soh oal laik di res, noh chroo?” Bot hihn tel yu, “Noh, dis wan oalda dan moas a dehn, ahn nobadi eva fiks it op.” Soh yu aks ahn if dehn mi protek dis wan moa dan di res, an ih tel yu, “Noh, dis wan mi deh owt eena schrang breez ahn rayn, ahn lata peepl mi chrai dischrai it.” Maybi den yu wuda wanda, ‘Wel da weh dehn mek dis ting owta, den?’

Eena wahn way, di Baibl da laik da stachu. Da wahn reeli oal buk—wan a di oaldis buk weh wi gat. Wi doo ga sohn ada oal-taim buk, bot jos laik di ada stachu dehn, moas a dehndeh buk geh damij oava di yaaz ahn di infamayshan weh dehn gat een noh karek. Fi egzampl, saiyentis dehn laan lata tingz weh proov dehndeh oal-taim buk rang. Di medikal advais weh dehn gat een ku hert yu moa dan help yu. Ahn fi som a dehndeh buk, aal wi ga lef da sohn lee peesiz. Sohn paats a dehn geh laas er damij bad.

Bot di Baibl difrent fahn aal di res. Dehn staat rait di Baibl oava 3,500 yaaz agoa, bot wi stil ga di hoal ting. Oava di yaaz, peepl chrai aal kaina way fi dischrai di Baibl er stap peepl fahn reed it. Dehn kandem it, bon it, ahn paas laa weh seh peepl noh fi reed it, bot stilyet di Baibl avaylabl fi wee tudeh. Ahn di infamayshan weh deh een deh noh owt-daytid needa. Eevn doa dehn mi rait di Baibl lang taim agoa, ih ku stil help wi tudeh an ih wahn help wi eena di fyoocha tu.

Bot yu mait wanda, ‘Wee ku stil yooz di advais weh deh eena di Baibl?’ Fi ansa da kweschan, tink bowt wat da som a di bigis prablemz eena di werl tudeh. Maybi yu tink bowt waar, polooshan, kraim, er koropshan. Now mek wi si weh kaina advais di Baibl gi wi. Az wi luk pahn weh di Baibl seh, aks yuself, ‘If peepl wuda fala dis advais, weh kaina plays di werl wuda bee?’

DI BAIBL SEH FI LOV PEES

“Di wan dehn weh peesabl wahn bee hapi, bikaaz adaz wahn kaal dehn chiljren a Gaad.” (Machyu 5:9) “Du aal weh unu kud fi liv eena pees wid evribadi.”—Roamanz 12:18.

DI BAIBL SEH FI SHOA MERSI AHN FERGIV WAN ANADA

“Di wan dehn weh shoa mersi wahn bee hapi, bikaaz adaz wahn shoa dehn mersi.” (Machyu 5:7) “Kantinyu fi put op wid wan anada ahn fergiv wan anada wid aala unu haat, eevn if sombadi du sohnting fi hert unu. Jos laik how Jehoava a fergiv unu wid aala fi hihn haat, unu mos fergiv wan anada di saym way.”—Koloashanz 3:13.

DI BAIBL SEH FI NOH BEE PREJUDIS

“Ahn fahn wan man [Gaad] mek aala di nayshan dehn fi liv aal oava di ert.” (Aks 17:26) “Gaad chreet evribadi di saym way. Ahn hihn aksep enibadi weh fyaa Gaad ahn du weh rait, noh mata weh nayshan dehn kohn fram.”​—Aks 10:34, 35.

DI BAIBL SEH FI TEK KAYR A DI ERT

“Jehoava Gaad mi put di man eena di gyaadn da Eedn fi mek ih liv deh, fi mek ih werk pahn di lan, ahn fi mek ih tek kayr a it.” (Jenisiz 2:15) Gaad wahn “dischrai di wan dehn weh di rooin di ert.”—Revilayshan 11:18.

DI BAIBL SEH FI NOH BEE GREEDI AHN FI KIP WEH FAHN SEKSHWAL IMORALITI

“Kip unu aiy oapm; bee kyaaful an avoid aal kaina greedinis, kaaz noh mata humoch tingz wahn persn gat, dehndeh tingz kyaahn giv ahn laif.” (Look 12:15) “Unu noh fi eevn taak bowt sekshwal imoraliti er eni kaina dotinis er greedinis, bikaaz hoali peepl noh fi ga notn fi du wid dehndeh kaina ting.”—Ifeezhanz 5:3.

DI BAIBL SEH FI BEE AANIS AHN HAAD WERKIN

“Wi waahn bee aanis eena evriting weh wi du.” (Heebrooz 13:18) “Enibadi weh teef noh fi teef nohmoh. Bot ih fi werk haad.”—Ifeezhanz 4:28.

DI BAIBL SEH DAT IH IMPOATANT FI HELP PEEPL

“Komfert dehn wan weh dipres, help dehn wan weh week, ahn bee payshent wid evribadi.” (1 Tesaloanyanz 5:14) “Unu fi luk afta di wido dehn ahn chiljren weh noh ga no payrents weh di goh chroo chribyulayshan.”—Jaymz 1:27.

Di Baibl noh jos tel wi weh wi fi du. Ih tel wi how wi ku du it tu. If moa peepl wuda fala di advais weh di Baibl gi wi, yu noh tink wi wuda ga les prablemz eena di werl? Soh di Baibl advais moa impoatant now dan eva bifoa! Bot how di Baibl ku help yoo rait now?

Di waizis persn fi eva liv pahn di ert mi seh: “Di raichos tingz weh wahn persn du wahn proov dat ih waiz.” (Machyu 11:19) Dat meenz di onli way fi noa if sohnbadi gi yu waiz advais da fi si how tingz werk owt wen yu fala it. Yoo agree wid dat? Soh if di Baibl advais soh gud, yu mait waahn noa how ih wahn chaynj yu laif. Yu mait waahn noa how ih ku help yu fi deel wid prablemz weh yu di fays rait now. Mek wi luk pahn wahn egzampl.

Delphine b mi-di liv wahn gud laif. Bot den sodn-wan aal kaina terabl tingz hapm wan afta di neks. Ih teenayj daata mi ded, ih marij faal apaat, an ih mi en op wid moni prablemz. Shee seh: “Ah neva feel laik miself nohmoh. Ah neva ga no daata, no hozban, no hoam. Ah mi feel laik Ai da notn, Ah neva ga no reezn fi liv.”

Afta aala dat, Delphine reeli kuda mi andastan weh Moaziz mi meen wen ih seh: “Wi laif laas fi 70 yaaz, er 80 yaaz if wi veri schrang. Bot wi laif ful op a chrobl ahn sadnis; ih goh bai faas ahn wi disapyaa.”—Saam 90:10.

Delphine mi reed di Baibl fi fain gud advais weh mi wahn help wen ih mi-di goh chroo dehndeh rof taimz. Dat mi help shee wahn lat. Lata ada peepl fain dat di Baibl help dehn fi deel wid dehn prablemz tu wen dehn fala di waiz advais weh ih gi dehn. Dehn geh fi si fi dehnself dat di advais fahn di Baibl stil gud, noh mata how oal di Baibl get. Da noh laik eni ada buk weh geh oal an owt-daytid. Wai? Yu tink maybi da bikaaz di Baibl kohn fahn Gaad, ahn noh fahn man?—1 Tesaloanyanz 2:13.