Ya engranda yo na Puerto Limón, un ciudad que na parte este del Costa Rica. Ocho kame man hermano y hermana, y ika-siete yo. Ya muri si Papang cuando ocho año yo. Desde quel, solo lang kanamon ya hace engranda si Mamang.

Parte ya del de mio vida el baseball. Desde bata, quierre-quierre ya yo juga con ese. Cuando teenager yo, ya queda yo miembro del un amateur team. Mientras ta juga yo na un liga cuando maga 20 año yo, tiene un hombre quien ta busca maga atleta que ya invita conmigo para queda miembro del un professional team na Nicaragua. Pero, ciendo tiene problema na salud el de mio nana aquel tiempo y iyo el ta cuida con ele, no quierre yo queda na Nicaragua. Poreso, nuay yo acepta con el de suyu invitacion. Despues del cuanto tiempo, tiene ya tambien otro quien ya invita conmigo para queda miembro del national baseball team del Costa Rica que donde el maga miembro de este estaba na maga amateur team. Ya acepta yo con el invitacion. Parte yo del national team principia 1949 hasta 1952. Ya juga kame na Cuba, na Mexico y Nicaragua. Baseman yo y bueno yo juga. Gane, ya puede yo juga 17 juego que nuay yo man kamali maskin una vez. Quierre-quierre yo oi si ta grita el maga gente con el de mio nombre!

Pero, maka-triste cay imoral el de mio manera de vida. Maskin uno lang el de mio novia, ya tiene yo relacion na otro-otro maga mujer. Burrachon tambien yo. Un dia, ya queda yo bien burracho y cuando ya dispierta yo alamañana, gendeh mas yo ta acorda si paquemodo yo ya puede bolbe. Ya juga tambien yo maga juego de sen, igual na domino y loto.

Aquel tiempo, ya queda un Testigo de Jehova el de mio nana. Ya pruba le man cuento conmigo acerca na Biblia pero ciendo bien focus yo na de mio sport, nuay yo queda interesao. Gane, si tan training kame, gendeh yo ta sinti con hambre maskin hora ya para come. Juego lang el laman del de mio pensamiento. Mas importante conmigo el baseball contra na otro cosas!

Pero cuando 29 año yo, ya tiene yo grabe injury cuando ya pricura yo ricibi con el bola durante el un juego. Cuando ya queda yo bueno, nuay mas yo sigui juga na maga professional team. Pero, nuay siempre yo deja con el baseball. Yan train yo con el maga player del un amateur team cerca na diamon casa.

Del 1957, ya acepta yo un invitacion para atende con el un convencion del maga Testigo de Jehova na un stadium onde ta juga yo baseball de antes. Cuando talla yo, ya puede yo nota que bien respetoso el maga Witness si compara con aquellos quien ta atende maga juego de baseball que bien alboroto y magulu. Ya manda se move conmigo para estudia con el Biblia junto con el maga Witness y atende na diila maga miting.

Yan bilib gayot yo na maga cosa yo ya aprende na Biblia. Por ejemplo, si Jesus ya habla que na ultimo maga dia, el de suyu maga dicipulo hay predica con el buen noticia del Reino del Dios na entero mundo. (Mateo 24:14) Ya aprende tambien yo que el maga deverasan Cristiano gendeh ta hace con el diila ministerio para tiene sen. Si Jesus ya habla: “Ya recivi ustedes libre; dale lang tamen libre.”​—Mateo 10:8, El Nuevo Testamento na Chavacano.

Mientras ta estudia yo con el Biblia, ya compara yo con el cosa este ta habla na cosa yo ta mira na maga Testigo de Jehova. Ya aprecia yo con el diila esfuerzo que predica con el buen noticia del Reino del Dios na entero mundo. Ya puede yo mira que ta hace sila maga sacrificio igual na cosa ya manda demonstra si Jesus con el maga Cristiano. Poreso, cuando ya le yo con el Marcos 10:21 y ya mira con el invitacion de Jesus, “Vene y sigui Conmigo,” ya sinti yo que quierre yo queda un Witness.

Pero, ya pasa pa cuanto tiempo antes yo ya puede hace maga cambio. Por ejemplo, manada año ya yo ta tayá con el de mio “lucky” number cada semana na loto. Pero, ya aprende yo na Biblia que gendeh aceptable con Dios aquellos quien ta adora con el “dios de Suerte” y aquellos quien canalla. (Isaias 65:11; Colosa 3:5) Poreso, ya decidi yo descanza juga maga juego de sen. Despues yo descanza tayá na loto, pagka-Domingo, ya ganá el de mio “lucky” number! Ya gangguia conmigo el maga gente cay nuay yo tayá ese semana y yan pressure gayot sila conmigo para juga otravez. Pero nuay yo se hace. Y nuay ya gayot yo juga maga juego de sen.

Ya enfrenta yo otro probanza na mismo dia cuando ya bautiza yo na un convencion del maga Testigo de Jehova. (Efeso 4:24) Aquel noche, cuando ya bira yo na hotel onde yo ta esta, talla ta espera apuera na de mio cuarto el de mio novia de antes. Ele ya habla, “Nyah, Sammy, man alegria kita!” Pero ya contesta yo dayun, “Gendeh yo!” Ya hace yo acorda con ele que ta vivi ya yo ahora asegun na maga principio na Biblia acerca na moral. (1 Corinto 6:18) “Cosa?” ele ya habla. Despues, ya hace le de menos con el mirada del Biblia na sexual imoralidad y ya insisti le que man birajan kame. Pero, ya entra yo na cuarto y yan lock con el puerta. Ahora, alegre yo puede habla que desde ya queda yo un Witness del 1958, nuay gayot yo bira na de mio manera de vida de antes.

Ta sinti yo que dol puede yo escribi un libro acerca na maga beneficio que ya ricibi yo cay ta sigui yo con el guia del Biblia. Ya tiene yo manada maga deverasan amigo, proposito na vida y deverasan alegria.

Tan enjoy siempre yo juga baseball pero gendeh ya se amo el de mio prioridad. Por causa na baseball, ya queda yo popular y rico pero todo se temporario lang. Gendeh igual con ese, el de mio relacion con Jehova y na maga hermano y hermana hay esta hasta para cuando. El Biblia ta habla: “El mundo y todo el disuyo maga mal deseo ay pasa lang. Pero el quien ta hace el querer del Dios ta queda hasta para cuando.” (1 San Juan 2:17) Ahora, mas ta ama yo con Dios Jehova y con el de suyu maga siervo contra na otro cosas!