Ya nace yo na un barrio na Saxony, que parte de antes del German Democratic Republic (GDR). Ya engranda yo na un familia que ta ama con uno y otro, y ya enseña conmigo el de mio mayores maga justo principio acerca na moral. Un Comunista lugar el GDR poreso para na mayoria de maga gente na Saxony, gendeh importante el religion. Y para conmigo, nuay Dios. Na primer 18 año na de mio vida, ya influencia conmigo el ateismo y Comunismo.

Porque yo ya queda interesao na Comunismo? Cay quierre yo el idea que el todo gente tiene igual derecho. Mas pa, ta creé yo que debe parti igual-igual con el maga propiedad con todo gente para nuay mas quien queda bien rico o bien pobre. Poreso, ya queda yo ocupao na un organizacion del maga jovenes que Comunista. Cuando 14 año yo, ya dale yo grande tiempo para hace con el un proyecto para man recycle con el maga papel que gendeh ya ta usa. Ya aprecia gayot el maga oficial del ciudad de Aue con el de mio maga esfuerzo y gane, ya dale sila conmigo un award. Maskin joven pa yo, manada yo ya conoce maga politico quien tiene alto posicion na GDR. Ya sinti yo que justo el de mio maga plano na vida y bonito el de mio futuro.

Despues, el todo cosa yo ya esperanza ya perde lang como bula. Del 1989, ya hace tumba con el Berlin Wall y ya perde el Comunismo na Eastern Europe. Puera con ese, ya discubri yo que manada ta sucede injusticia na GDR. Por ejemplo, ta considera sila como mas bajo con el maga gente quien gendeh ta suporta con el Comunismo. Paquemodo se ya sucede? Gendeh ba como maga Comunista ta creé kame que el todo maga gente tiene igual derecho? Ilusion lang ba el idea de Comunismo? Ya queda gayot yo bien malingasa.

Poreso, ya cambia yo con el de mio maga prioridad y yan focus na musica y art. Ciendo ya puede yo estudia na un music academy y tiene posibilidad que puede yo continua estudia na universidad, ya esperanza yo queda un musician-artist. Mas pa, nuay mas yo sigui con el maga principio na moral que ya aprende yo cuando bata. El cosa importante para conmigo ahora amo que man enjoy yo con el de mio vida, incluido ya el man date con el manada maga mujer. Pero el musica, art y el de mio manera de vida nuay puede hace perde con el de mio maga lingasa. Gane, el maga letrato que ta pinta yo ta dale mira que ta tiene yo miedo. Cosa gaha hay sucede na futuro? Y cosa el proposito del vida?

Ya espanta yo con el maga contestacion que ya puede yo incuntra. Un noche, na academy, ya sinta yo junto con el un grupo de maga estudiante que ta discuti acerca na futuro. Uno kanila si Mandy * que un Testigo de Jehova. Aquel noche, ya dale le conmigo un buen consejo. Ele ya habla, “Andreas, si quierre tu incuntra contestacion na de tuyu maga pregunta acerca na vida y na futuro, examina tu con el Biblia.”

Tan alang-alang yo pero quierre yo sabe. Ya manda si Mandy conmigo le el Daniel capitulo 2 y ya espanta yo na cosa yo ya puede le. Este profecia ta discuti acerca na maga poderoso nacion na entero mundo y na maga gobierno que tiene grande efecto hasta na diaton tiempo. Ya manda tambien conmigo mira si Mandy maga otro profecia na Biblia acerca na futuro. Ya puede ya gayot yo incuntra con el maga contestacion na de mio maga pregunta! Pero quien ba ya escribi con este maga profecia y quien ba exacto puede habla si cosa sucede na futuro? Posible gaha que tiene Dios ta existi?

Ya manda conoce conmigo si Mandy con Horst y Angelika, un man maridable Witness quien ya enseña conmigo acerca na Palabra del Dios. Ya puede yo mira que el maga Testigo de Jehova lang el ta usa y ta manda sabe con otro el personal nombre del Dios, Jehova. (Salmo 83:18; Mateo 6:9) Ya aprende yo que si Dios Jehova ta dale esperanza con el maga gente que puede sila vivi hasta para cuando na un paraiso tierra. El Salmo 37:9 ta habla: “Aquellos quien ta esperanza con Jehova hay hereda con el tierra.” Alegre yo cay abierto ese esperanza na todo quien ta hace esfuerzo para vivi asegun na maga principio del Dios alli na Biblia.

Pero yan dificil yo sigui con el maga principio na Biblia. Cay popular yo como un musician-artist, ya queda yo orgulloso so necesita yo aprende queda humilde. Omento pa, gendeh facil para conmigo que deja con el de mio imoral manera de vida. Ta rindi gayot yo gracias cay ta dale si Jehova mira paciencia, lastima y ta pricura le entende con aquellos quien ta hace esfuerzo para aplica el cosa ta enseña el Biblia!

Ya influencia conmigo el Comunismo y ateismo na primer 18 año del de mio vida pero ya puede cambia con el de mio vida el Biblia. Por causa na cosa yo ya puede aprende, gendeh ya mas yo tan lingasa na futuro y ya tiene proposito el de mio vida. Del 1993, ya bautiza yo como uno del maga Testigo de Jehova y del 2000, ya casa yo con Tabitha, quien un activo Witness. Ta usa kame diamon tiempo para ayuda con otro que aprende con el Biblia. Manada del con quien kame ya puede predica el igual conmigo de antes, quien ya queda influenciao na Comunismo y ateismo. Ta queda gayot yo alegre si ta enseña kanila acerca si paquemodo conoce con Jehova.

Cuando ya principia yo man junto con el maga Testigo de Jehova, ya rabia el de mio maga mayores. Pero ya puede sila mira el buen efecto del maga Witness na de mio vida. Alegre yo cay ta le ya sila ahora con el Biblia y ta atende con el maga miting del maga Testigo de Jehova.

Alegre kame de Tabitha na diamon matrimonio cay ta sigui kame con el maga consejo del Biblia para na maga man maridable. Por ejemplo, cay ta sigui kame con el consejo que queda leal na matrimonio, ta queda mas fuerte el diamon relacion.​—Maga Hebreo 13:4.

Gendeh mas yo malingasa na de mio vida y na futuro. Ta sinti yo que parte yo del un familia na entero mundo donde tiene deverasan paz y unidad. Na este familia, igual kame ta trata bueno con uno y otro. Ese el cosa yo quierre experiencia desde antes.