“Ang giproseso nga gatas para sa bata dili gyod makatupong sa natural nga gatas sa tawo,” sumala sa usa ka libro para sa mga midwife o mananabang. Maayo gyod ang gatas sa inahan para sa iyang anak. Ang usa ka rason mao nga ang lawas sa mama makapatunghag gatas nga mohaom sa panginahanglan sa bata.

 Hunahunaa: Matag higayon nga magpasuso ang inahan, ang iyang gatas mausab-usab gikan sa pagsugod niyag pasuso hangtod sa pagkahuman. Inigsugod ug suso sa bata, ang gatas mas daghag protina, bitamina, minerales, ug tubig. Ug dihang hapit na siyang mahuman ug suso, ang gatas mas daghan nag fat maong mabusog na ang bata. Ang gatas sa inahan mausab pa gani base sa edad sa bata ug sa panahon.

 Naay mga hormone sa gatas sa inahan, sama sa melatonin, nga modaghan kon magabii ug naa poy mga hormone nga modaghan kon maadlaw. Kini nga pag-usab-usab sa gidaghanon sa mga hormone makapaduka o makapaalerto sa bata, nga makatabang aron matulog o momata siya sa saktong oras.

 Sa unang mga adlaw human manganak, ang inahan magpatunghag may pagka-yellow nga gatas nga gitawag ug colostrum. Ang colostrum dali rang hilison sa tiyan ug sustansiyado kaayo, maong daghan nig kaayohan sa bata bisan pa ganig gamay ra siyag mainom. Daghan nig mga antibody nga makatabang aron ang bata dili daling masakit. Makatabang pod ni aron daling mapagawas sa bag-ong natawo nga bata ang iyang hugaw.

 Ang mga inahan dili angayng mabalaka kon makaigo ba ang ilang gatas bisan pag kaluha ang ilang anak kay awtomatikong modaghan ang ilang gatas sumala sa panginahanglan.

 Unsay imong hunahuna? Ang talagsaong gatas ba sa inahan resulta sa ebolusyon? O gidisenyo kini?