•  Introduksiyon 2

•  Bahandi Gikan sa Pulong sa Diyos 3-5

  •  Pakigpulong 3

  •  Espirituwal nga mga Bahandi 4

  •  Pagbasa sa Bibliya 5

•  Magmaepektibo sa Ministeryo 6-14

  •  Dihang Magsugod ug Panag-estorya 7

  •  Dihang Magbalikduaw 8

  •  Dihang Maghimog Tinun-an 9

  •  Pagpatin-aw sa Imong Tinuohan 10

  •  Pakigpulong 11

  •  Presentasyon 12

  •  Mga Setting 13

  •  Paggamit ug Video ug Literatura 14

•  Kristohanong Pagkinabuhi 15-16

  •  Pagtuon sa Kongregasyon sa Bibliya 16

•  Konklusyon 17

•  Komendasyon ug Tambag 18

•  Tayming 19

•  Duaw sa Tigdumala sa Sirkito 20

•  Semana sa Asembliya o Kombensiyon 21

•  Semana sa Memoryal 22

•  Tigdumala sa Tigom nga Kinabuhi ug Ministeryo 23

•  Tsirman sa Tigom nga Kinabuhi ug Ministeryo 24

•  Katabang nga Magtatambag 25

•  Mga Bahin sa Second Hall 26

•  Mga Video 27

1. Ang mga instruksiyon niini nga dokumento magtabang sa tanang naay bahin sa Atong Kristohanong Kinabuhi ug Ministeryo nga tigom. Kadtong naay bahin angayng mag-review sa mga instruksiyon sa ilang bahin nga makita sa Kinabuhi ug Ministeryo—Workbook sa Tigom ug niini nga dokumento sa dili pa mangandam sa ilang bahin. Ang tanang magmamantala angayng dasigon nga mahimong andam sa paghatag ug mga bahin. Ang uban nga aktibong nakig-uban sa kongregasyon puwedeng magpa-enroll kon uyon sila sa mga pagtulon-an sa Bibliya ug kon sila nagkinabuhi subay sa Kristohanong mga prinsipyo. Angayng hisgotan sa tigdumala sa Tigom nga Kinabuhi ug Ministeryo ngadto sa usa nga dili magmamantala nga gustong magpa-enroll ang mga kinahanglanon aron mokuwalipikar sa pag-enroll. Dayon, pahibaloon siya kon kuwalipikado ba siya. Kinahanglan ning himoon uban sa nag-Bible study niya (o kaha sa iyang magtutuong ginikanan). Ang mga kinahanglanon aron mokuwalipikar parehas ra sa mga kinahanglanon niadtong gustong mahimong dili bawtismadong magmamantala.—od kap. 8 par. 8.

2. Usa ka minuto. Matag semana, human sa pangbukas nga awit ug pag-ampo, ang tsirman sa Tigom nga Kinabuhi ug Ministeryo maghatag ug pasiuna sa makapahinam nga mga bahin sa programa. Ang tsirman angayng magpokus sa mga punto nga mas makabenepisyo ang kongregasyon.

 3. Pakigpulong: Diyes minutos. Ang tema ug ang duha o tulo ka pangunang punto makita diha sa Workbook sa Tigom nga Kinabuhi ug Ministeryo. Kini iasayn ngadto sa ansiyano o kuwalipikadong ministeryal nga alagad. Kon bag-ong basahon sa Bibliya ang gieskedyul sa senemanang pagbasa sa Bibliya, dunay video nga ipasalida ingong introduksiyon niini. Mahimong ipakita sa mamumulong ang koneksiyon sa video ug sa tema. Pero iyang seguroon nga makobrehan ang mga punto nga makita sa workbook. Kon itugot sa oras, angay sab niyang gamiton ang mga hulagway, nga gidisenyo aron mapasiugda ang materyal nga kobrehan. Puwede niyang ilakip ang ubang reperensiya nga mas magpasiugda sa mga punto sa outline.

 4. Espirituwal nga mga Bahandi: Diyes minutos. Kini maoy pangutanag tubag nga bahin nga walay introduksiyon o konklusyon. Dumalahon kini sa ansiyano o kuwalipikadong ministeryal nga alagad. Angay niyang ipangutana sa mamiminaw ang duha ka pangutana. Dugang pa, siya nay mag-igo kon kinahanglan bang ipabasa ang gisitar nga mga teksto. Kadtong mokomento dili angayng molapas sa 30 segundos.

 5. Pagbasa sa Bibliya: Kuwatro minutos. Lalaki nga estudyante ang hatagan niini nga bahin. Basahon sa estudyante ang giasayn nga materyal ug dili mohimog introduksiyon o konklusyon. Ang tsirman sa tigom magpokus sa pagtabang sa mga estudyante nga mouswag sa pagbasa uban ang katukma, pagsabot, kalarino, hustong pagpasiugda sa diwa, modulasyon, tukmang paghunong, ug pagkanatural. Naay mga asaynment sa pagbasa sa Bibliya nga mugbo ug ang uban tag-as, busa konsiderahon sa tigdumala sa Tigom nga Kinabuhi ug Ministeryo ang katakos sa mga estudyante dihang mag-asayn niini nga bahin.

6. Kinse minutos. Kini nga seksiyon sa tigom gidisenyo aron ang tanan mabansay para sa ministeryo ug mapauswag ang ilang kahanas sa pagpakig-estorya, pagsangyaw, ug pagpanudlo. Ang mga ansiyano puwedeng hatagag bahin ingong estudyante, kon gikinahanglan. Angayng konsiderahon sa matag estudyante ang punto sa tun-anan gikan sa brosyur nga Pagpanudlo o Higugmaa ang mga Tawo, nga naa sa parentesis tapad sa bahin diha sa Workbook sa Tigom nga Kinabuhi ug Ministeryo. Usahay, naay pakighisgot nga nakaeskedyul. Kini nga bahin dumalahon sa usa ka ansiyano o kuwalipikadong ministeryal nga alagad.—Tan-awa ang  parapo 15 kon unsaon pagdumala ang pakighisgot nga mga bahin.

 7. Dihang Magsugod ug Panag-estorya: Kini nga bahin puwedeng iasayn sa lalaki o babaye nga estudyante. Kon lalaki ang may bahin, ang assistant kinahanglang lalaki sab o membro sa pamilya. Kon babaye ang may bahin, ang assistant kinahanglang babaye sab o membro sa pamilya. Ang estudyante ug ang assistant puwedeng maglingkod o magtindog.—Para sa dugang impormasyon bahin sa presentasyon ug setting niini nga asaynment, tan-awa ang  parapo 12 ug  13.

 8. Dihang Magbalikduaw: Kini nga bahin puwedeng iasayn sa lalaki o babaye nga estudyante. Kon lalaki ang may bahin, ang assistant kinahanglang lalaki sab o membro sa pamilya. Kon babaye ang may bahin, ang assistant kinahanglang babaye sab o membro sa pamilya. (km 5/97 p. 2) Ang estudyante ug ang assistant puwedeng maglingkod o magtindog. Kinahanglang ipakita sa estudyante kon unsay isulti dihang magbalikduaw.—Para sa dugang impormasyon bahin sa presentasyon ug setting niini nga asaynment, tan-awa ang  parapo 12 ug  13.

 9. Dihang Maghimog Tinun-an: Kini nga bahin puwedeng iasayn sa lalaki o babaye nga estudyante. Kon lalaki ang may bahin, ang assistant kinahanglang lalaki sab o membro sa pamilya. Kon babaye ang may bahin, ang assistant kinahanglang babaye sab o membro sa pamilya. (km 5/97 p. 2) Ang estudyante ug ang assistant puwedeng maglingkod o magtindog. Ipakita niini nga bahin ang pagtuon sa Bibliya nga nasugdan na. Dili kinahanglan ang introduksiyon o konklusyon gawas kon kini ang espesipikong tun-anan nga ipadapat sa estudyante. Dili kinahanglang basahon ang tanang parapo sa materyal, pero puwede ra pod ning basahon.

 10. Pagpatin-aw sa Imong Tinuohan: Kon pakigpulong, angayng lalaki nga estudyante ang mohatag niini nga bahin. Kon pasundayag, puwede ning ihatag sa lalaki o babaye nga estudyante. Kon lalaki ang may bahin, ang assistant kinahanglang lalaki sab o membro sa pamilya. Kon babaye ang may bahin, ang assistant kinahanglang babaye sab o membro sa pamilya. Ang estudyante kinahanglang mohatag ug tin-aw ug mataktikanhong tubag sa pangutana sa tema gamit ang impormasyon sa gihatag nga reperensiya. Ang estudyante puwedeng modesisyon kon hisgotan ba niya ang reperensiya nga publikasyon sa iyang bahin o dili.

 11. Pakigpulong: Lalaki nga estudyante ang hatagan niini nga bahin ug ihatag ni ingong pakigpulong diha sa kongregasyon. Kon ang pakigpulong gibase sa usa ka punto sa apendise A sa brosyur nga Higugmaa ang mga Tawo, angayng ipasiugda sa estudyante kon unsaon paggamit ang (mga) teksto sa ministeryo. Pananglitan, mahimo niyang ipatin-aw kon kanus-a puwedeng gamiton ang usa ka teksto, ang kahulogan niini, ug kon unsaon ni pagpatin-aw ngadto sa usa ka tawo. Kon ang pakigpulong gibase sa usa ka punto gikan sa usa sa mga leksiyon sa brosyur nga Higugmaa ang mga Tawo, ang estudyante angayng magpokus kon unsaon ni pagpadapat nga punto sa ministeryo. Puwede niyang ipasiugda ang pananglitan nga gihisgotan sa punto 1 sa maong leksiyon o ipasiugda ang ubang teksto nga makita sa leksiyon, kon makatabang ni sa pakigpulong.

   12. Presentasyon: Kini nga parapo ug ang sunod nga parapo mapadapat sa bahin nga “Dihang Magsugod ug Panag-estorya” ug “Dihang Magbalikduaw.” Himoong tumong sa estudyante nga makahisgot ug simpleng kamatuoran sa Bibliya nga haom sa iyang kaestorya ug makahimog pundasyon sa pagbalikduaw, gawas kon naay laing gihatag nga instruksiyon. Ang estudyante kinahanglang magpilig topiko nga haom sa panahon ug epektibo sa lokal nga kahimtang. Naa ra niya kon mogamit ba siyag publikasyon o video gikan sa atong Teaching Toolbox. Imbes i-memorize ang ihatag nga bahin, kinahanglang pauswagon sa estudyante ang kahanas sa pagpakig-estorya, sama sa pagpakitag personal nga interes ug pagkanatural.

   13. Mga Setting: Angayng ipadapat sa estudyante ang naasayn nga setting ngadto sa lokal nga mga kahimtang. Pananglitan:

1. (1) Pagpamalaybalay: Apil niini nga setting ang pagsangyaw sa balay ug balay—in person man, pinaagig telepono, o sulat—ug ang pagbalikduaw ngadto sa usa ka tawo nga naestorya pinaagig pagpamalaybalay.

2. (2) Impormal nga Pagsangyaw: Kini nga setting maoy pagpangitag mga kahigayonan nga makasangyaw bisan sa ordinaryong panag-estorya. Mahimong apil niini ang paghisgot ug usa ka punto sa Bibliya diha sa trabahoan, eskuwelahan, mga silingan, pangpublikong transportasyon, o bisan asa samtang naghimo sa adlaw-adlawng mga kalihokan.

3. (3) Publikong Pagsangyaw: Apil niini nga setting ang cart witnessing, business witnessing, street witnessing, o pagsangyaw sa mga plasa, parkinganan, o bisan asa nga naay mga tawo.

 14. Paggamit ug Video ug Literatura: Depende sa kahimtang, ang estudyante puwedeng mogamit ug video o literatura. Kon ang bahin sa estudyante naay video o kaha pilion niya nga mogamit ug video, angay niyang isulti nga naa siyay ipakita nga video ug hisgotan ni, pero dili kini i-play.

15. Human sa awit, ang 15 minutos niini nga seksiyon dunay usa o duha ka bahin nga gidisenyo aron tabangan ang mga nanambong sa pagpadapat sa Pulong sa Diyos. Gawas kon may laing instruksiyon, kini nga mga bahin mahimong iasayn ngadto sa ansiyano o kuwalipikadong ministeryal nga alagad, gawas lang sa Lokal nga mga Panginahanglan nga angayng dumalahon sa ansiyano. Kon ang bahin maoy pakighisgot, ang giasaynan nga mamumulong puwedeng mogamit ug dugang pang mga pangutana gawas sa mga pangutana nga makita na daan sa workbook. Kinahanglang mubo lang ang iyang introduksiyon aron naay igong panahon para mahisgotan ang pangunang mga punto ug makakomento ang mga mamiminaw. Kon naay interbiyo, mas maayo nga ang interbiyohon mohatag sa iyang komento diha sa stage imbes nga maglingkod, kon posible.

  16. Pagtuon sa Kongregasyon sa Bibliya: Trayenta minutos. Kini nga bahin iasayn ngadto sa usa ka kuwalipikadong ansiyano. (Sa mga kongregasyon nga pipila ray ansiyano, puwede ning iasayn sa kuwalipikadong ministeryal nga mga alagad, kon gikinahanglan.) Ang lawas sa mga ansiyano mopili kon kinsay kuwalipikadong modumala sa Pagtuon sa Kongregasyon sa Bibliya. Ang mga naaprobahan angayng magdumala niini sa maayong paagi aron dili moobertaym ang pagtuon, mapasiugda ang pangunang mga teksto, ug matabangan ang tanan nga maapresyar ang praktikal nga mga leksiyon sa materyal. Kadtong mga naaprobahan makabenepisyo kon repasohon nila ang mga instruksiyon sa pagdumala sa pangutana ug tubag nga mga bahin. (w23.04 p. 24, kahon) Kon bug-os nang nakobrehan ang materyal, dili na kinahanglang patas-on ang pagtuon. Kon posible, lainlain ang modumala sa pagtuon ug ang mobasa sa mga parapo kada semana. Kon ang tsirman sa Tigom nga Kinabuhi ug Ministeryo moingon nga pamub-on ang pagtuon, ang magdumala nay mag-igo kon unsaon niya kini pagpamubo. Puwedeng dili na niya ipabasa ang ubang parapo.

17. Tres minutos. Ang tsirman sa Tigom nga Kinabuhi ug Ministeryo magrepaso sa mapuslanong mga punto sa tigom. Maghatag sab siyag pasiuna sa materyal nga hisgotan sa sunod semana. Kon naa pay oras, puwede niyang isulti ang ngalan sa mga estudyante nga may bahin sa sunod semana. Gawas kon may dugang instruksiyon, ang bisan unsang importanteng pahibalo ug mga sulat nga kinahanglang basahon diha sa kongregasyon angayng iapil sa tsirman sa iyang konklusyon. Ang mga impormasyon sama sa regular nga kahikayan sa pagsangyaw ug eskedyul sa paghinlo dili angayng ipahibalo sa plataporma, pero kinahanglang ibutang kini sa information board. Kon dili paigo ang gitakdang oras para sa konklusyon aron mabasa ang mga pahibalo ug sulat, ang tsirman mohangyo sa mga igsoong may bahin sa Kristohanong Pagkinabuhi nga pamub-on ang ilang bahin. (Tan-awa ang  parapo 16 ug  19.) Ang tigom taposon pinaagig awit ug pag-ampo.

18. Human sa matag bahin sa estudyante, ang tsirman sa Tigom nga Kinabuhi ug Ministeryo dunay mga usa ka minuto sa paghatag ug komendasyon ug tambag base sa giasayn nga punto sa tun-anan. Dihang isulti sa tsirman ang bahin nga ihatag sa estudyante, dili niya iapil pagsulti ang tun-anan nga giasayn para sa estudyante. Pero human sa bahin sa estudyante ug human mahatag ang haom nga komendasyon, puwedeng ipahibalo sa tsirman ang tun-anan ug isulti kon nganong maayo ang pagpadapat sa estudyante niini. Kon naay angayng pauswagon ang estudyante sa maong tun-anan, mahigugmaong ipatin-aw sa tsirman kon ngano angay ni niyang pauswagon ug kon unsaon kini niya paghimo. Puwede sab mokomento ang tsirman sa ubang bahin sa presentasyon kon makatabang kini sa estudyante o sa mga mamiminaw. Ang dugang tambag nga gibase sa brosyur nga Higugmaa ang mga Tawo, brosyur nga Pagpanudlo, o sa librong Tunghaan sa Ministeryo mahimong ihatag sa pribado human sa tigom o sa laing higayon, bahin man kini sa tun-anan nga giasayn sa estudyante o sa laing tun-anan.—Para sa dugang impormasyon bahin sa papel sa tsirman sa Tigom nga Kinabuhi ug Ministeryo ug sa katabang nga magtatambag, tan-awa ang  parapo 19,  24, ug  25.

19. Ang tanang bahin kinahanglang dili moobertaym, apil ang mga komento sa tsirman sa Tigom nga Kinabuhi ug Ministeryo. Bisag ang matag bahin sa Kinabuhi ug Ministeryo—Workbook sa Tigom naay espesipikong tayming, dili na kinahanglang magdugang ug impormasyon aron lang masakto sa tayming ang bahin, ilabina kon nakobrehan na ang materyal. Kon moobertaym ang mga bahin sa tigom, ang tsirman sa Tigom nga Kinabuhi ug Ministeryo o ang katabang nga magtatambag angayng mohatag ug pribadong tambag sa miobertaym. (Tan-awa ang  parapo 24 ug  25.) Ang katibuk-ang tigom, apil ang mga awit ug pag-ampo, maoy 1 ka oras ug 45 minutos.

20. Panahon sa duaw sa tigdumala sa sirkito, angayng sundon ang programa sa Workbook sa Tigom nga Kinabuhi ug Ministeryo gawas lang sa mosunod: Ang Pagtuon sa Kongregasyon sa Bibliya, nga apil sa seksiyong Kristohanong Pagkinabuhi, pulihan sa 30 minutos nga service talk sa tigdumala sa sirkito. Sa dili pa ang service talk, ang tsirman sa Tigom nga Kinabuhi ug Ministeryo magrepaso sa natapos nga programa, maghatag ug pasiuna sa programa sa sunod semana, magbasa sa importanteng mga pahibalo ug sulat, ug dayon iyang tawgon ang tigdumala sa sirkito. Human sa service talk, taposon sa tigdumala sa sirkito ang tigom pinaagig awit nga iyang napili. Puwede siyang mag-asayn ug laing brader nga mohatag sa paniklop nga pag-ampo. Walay hatagag bahin sa second hall, sa lokal nga pinulongan, panahon sa duaw sa tigdumala sa sirkito. Ang grupo sa laing pinulongan puwedeng magtigom bisag moduaw ang tigdumala sa sirkito sa host nga kongregasyon. Pero ang grupo kinahanglang motapo sa host nga kongregasyon para sa service talk sa tigdumala sa sirkito.

21. Sa semana sa asembliya o kombensiyon, walay tigom sa kongregasyon. Ang kongregasyon angayng pahinumdoman nga ang nakaeskedyul nga materyal sa tigom nianang semanaha angayng tun-an sa matag indibiduwal o pamilya.

22. Kon ang Memoryal matunong ug weekday (Lunes hangtod Biyernes), walay himoong eskedyul sa Tigom nga Kinabuhi ug Ministeryo.

23. Ang lawas sa mga ansiyano magpilig ansiyano nga mag-alagad ingong tigdumala sa Tigom nga Kinabuhi ug Ministeryo. Seguroon niya nga kini nga tigom hapsay ug nagsunod sa gihatag nga mga instruksiyon. Kinahanglang duna siyay maayong komunikasyon sa katabang nga magtatambag. Dihang mabatonan na ang Workbook sa Tigom nga Kinabuhi ug Ministeryo, ang tigdumala sa Tigom nga Kinabuhi ug Ministeryo mag-asayn sa tanang bahin sa midweek nga tigom para sa duha ka bulan. Naglakip kini sa mga bahin nga para sa mga estudyante, dili pang-estudyante, ug sa mga tsirman sa midweek nga tigom nga giaprobahan sa lawas sa mga ansiyano. (Tan-awa ang  parapo 3-16 ug  24.) Dihang mag-asayn ug bahin sa estudyante, angay niyang konsiderahon ang edad, eksperyensiya, ug kon naa bay kagawasan sa pagsulti ang estudyante sa topiko nga iasayn. Mao pod ni iyang himoon dihang mag-asayn sa ubang bahin sa tigom. Ang tanang asaynment angayng ihatag labing menos tulo ka semana nga abante. Ang Our Christian Life and Ministry Meeting Assignment (S-89) nga form angayng gamiton alang sa mga asaynment sa estudyante. Angayng paneguroon sa tigdumala sa Tigom nga Kinabuhi ug Ministeryo nga napaskin sa information board ang kopya sa eskedyul sa mga asaynment para sa tibuok nga tigom. Ang lawas sa mga ansiyano puwedeng mag-asayn ug laing ansiyano o ministeryal nga alagad sa pagtabang kaniya. Pero mga ansiyano lang ang angayng mag-asayn sa mga bahin nga dili pang-estudyante.

24. Matag semana, usa ka ansiyano ang iasayn ingong tsirman sa Tigom nga Kinabuhi ug Ministeryo. (Kon pipila ra ang ansiyano, puwedeng iasayn ang kuwalipikadong ministeryal nga mga alagad kon gikinahanglan.) Siya ang maghatag sa introduksiyon ug konklusyon sa tigom. Siya sab ang magpaila sa tanang bahin, ug depende sa gidaghanon sa mga ansiyano, puwedeng siya ang mohatag sa ubang bahin sa tigom, ilabina sa mga bahin nga magpatan-aw lang ug video nga walay himoong pakighisgot. Kinahanglang mubo ra ang iyang mga komento human sa matag bahin. Ang lawas sa mga ansiyano magpili kon kinsa nga mga ansiyano ang kuwalipikadong magtsirman. Ang kuwalipikadong mga ansiyano magpulipuli sa pagtsirman. Depende sa lokal nga kahimtang, ang tigdumala sa Tigom nga Kinabuhi ug Ministeryo mahimong mas pirmeng gamiton ingong tsirman kay sa ubang kuwalipikadong ansiyano. Kon ang usa ka ansiyano kuwalipikadong modumala sa Pagtuon sa Kongregasyon sa Bibliya, lagmit kuwalipikado sab siyang magtsirman sa tigom. Apan palihog hinumdomi nga ang ansiyano nga tsirman kinahanglang mohatag ug komendasyon ug, kon gikinahanglan, mohatag pod siyag tambag sa mga estudyante sa mahigugmaon ug mapuslanong paagi. Seguroon sab sa tsirman nga matapos ang tigom sa saktong oras. (Tan-awa ang  parapo 17 ug  19.) Kon gusto sa tsirman ug kon luag ra ang stage, puwede siyang mogamit ug standing microphone aron ipaila ang sunod nga bahin samtang ang may bahin moposisyon na sa speaker stand. Puwede sab maglingkod ang tsirman diha sa stage panahon sa bahin sa mga estudyante sa Pagbasa sa Bibliya ug sa Magmaepektibo sa Ministeryo nga seksiyon sa tigom. Makatabang kini sa pagdaginot sa oras.

25. Kon posible, mas maayong iasayn kini sa ansiyano nga maayong mamumulong. Ang papel sa katabang nga magtatambag mao ang paghatag ug pribadong tambag, kon gikinahanglan, ngadto sa mga ansiyano ug ministeryal nga mga alagad sa bisan unsang pakigpulong nga ilang gihatag, apil ang mga bahin sa Tigom nga Kinabuhi ug Ministeryo, pakigpulong publiko, ug pagdumala o pagbasa diha sa Pagtuon sa Bantayanang Torre o Pagtuon sa Kongregasyon sa Bibliya. (Tan-awa ang  parapo 19.) Kon daghang ansiyano sa kongregasyon ang maayong mamumulong ug magtutudlo, kada tuig puwedeng lahi na pod nga kuwalipikadong ansiyano ang iasayn ingong katabang nga magtatambag. Ang katabang nga magtatambag dili kinahanglang motambag human sa matag bahin.

26. Depende sa gidaghanon sa mga estudyante, ang mga kongregasyon puwedeng mag-organisar ug dugang klase para sa mga bahin sa estudyante. Ang matag klase kinahanglang may kuwalipikadong magtatambag, ug mas maayo kon ansiyano. Kon gikinahanglan, puwedeng iasayn ang kuwalipikadong ministeryal nga alagad. Ang lawas sa mga ansiyano maoy modesisyon kon kinsay iasayn alang niini ug kon kinahanglan bang magpulihanay sa maong asaynment. Angayng sundon sa magtatambag ang giya nga gihisgotan sa  parapo 18. Kon naay dugang nga klase, ang mga estudyante hangyoon sa pag-adto sa second hall human sa paghisgot sa Espirituwal nga mga Bahandi diha sa seksiyon sa tigom nga Bahandi Gikan sa Pulong sa Diyos. Mobalik sila sa main hall inighuman sa bahin sa kataposang estudyante.

27. Dunay gipiling mga video nga gamiton niini nga tigom. Ang mga video para sa midweek ma-download sa JW Library^® app ug matan-aw gamit ang lainlaing gadyet.

© 2023 Watch Tower Bible and Tract Society of Pennsylvania

S-38-CV 11/23