Kingdom News Num. 37

Mensahe Alang sa Tibuok Kalibotan

Ang Kataposan sa Bakak nga Relihiyon Haduol Na!

▪ Unsa ang bakak nga relihiyon?

▪ Sa unsang paagi kini matapos?

▪ Sa unsang paagi apektado ka niini?

 Unsa ang bakak nga relihiyon?

Naguol ka ba sa mga krimen nga gihimo sa ngalan sa relihiyon? Mibati ka ba ug inhustisya tungod sa panaggubat, terorismo, ug korapsiyon nga gihimo niadtong nag-angkon nga nag-alagad sa Diyos? Nganong morag relihiyon man ang hinungdan sa daghan kaayong problema?

Ang nakaingon niining daghang problema dili ang tanang relihiyon kondili ang bakak nga relihiyon. Usa ka tinamod kaayo nga persona sa relihiyon, si Jesu-Kristo, nag-ingon nga ang bakak nga relihiyon mamunga ug daotang mga bunga, sama nga “ang daot nga kahoy mamungag walay pulos nga bunga.” (Mateo 7:15-17) Unsang bunga ang gipatungha sa bakak nga relihiyon?

Ang Bakak nga Relihiyon . . .

◼ NAG-APIL-APIL SA GUBAT UG POLITIKA: “Sa Asia ug sa ubang mga dapit,” matod sa magasing Asiaweek, “ang uhaw-sa-gahom nga mga lider mapahimuslanong nagmaniobra sa relihiyosong pagbati sa mga tawo aron matuman ang ilang gusto.” Tungod niini, ang magasin nagpasidaan: “Ang kalibotan morag nabuang na.” Usa ka inila nga lider sa relihiyon sa Tinipong Bansa miingon: “Ang mga terorista kinahanglang patyon aron dili na sila makapatay.” Ang iyang solusyon? “Patyon silang tanan sa ngalan sa Ginoo.” Sa kasukwahi, ang Bibliya nag-ingon: “Kon adunay magpahayag: ‘Gihigugma ko ang Diyos,’ apan nagdumot sa iyang igsoon, siya bakakon.” (1 Juan 4:20) Si Jesus miingon pa: “Magpadayon sa paghigugma sa inyong mga kaaway.” (Mateo 5:44) Pila ka relihiyon ang imong nahibaloan nga dunay mga membro nga nakigbahin sa gubat?

◼ NAGTUDLO UG BAKAK NGA DOKTRINA: Kadaghanang relihiyon nagtudlo nga ang kalag o espiritu maoy dili-makita nga bahin sa tawo nga magpadayon sa pagkinabuhi inigkamatay sa lawas. Pinaagi niini nga pagtulon-an, gipahimuslan sa daghang relihiyon ang ilang mga membro, nga magpabayad sa ilang mga pag-ampo alang sa mga kalag sa nangamatay. Apan, ang Bibliya nagtudlo ug lahi nga doktrina. “Ang kalag nga makasala—kini mismo mamatay.” (Ezequiel 18:4) “Ang mga buhi nasayod nga sila mamatay; apan bahin sa mga patay, sila walay nahibaloan nga bisan unsa.” (Ecclesiastes 9:5) Si Jesus nagtudlo nga ang mga patay pagabanhawon—nga dili na unta gikinahanglan kon ang mga tawo dunay dili-mamatay nga kalag. (Juan 11:11-25) Ang imo bang relihiyon nagtudlo nga ang kalag dili mamatay?

◼ NAGKONSENTIR SA IMORAL NGA SEKSO: Sa daghang nasod, ang mga grupo sa relihiyon nag-ordinar sa mga bayot ug mga tomboy nga mahimong mga pari ug nag-awhag sa mga gobyerno nga himoong legal ang kaminyoon sa pareho ug sekso. Bisan ang mga relihiyon nga supak sa imoralidad nagkonsentir sa mga lider sa relihiyon nga nag-abuso ug mga bata sa seksuwal nga paagi. Apan, unsay gitudlo sa Bibliya? Kini klarong miingon: “Ayaw pagpahisalaag. Walay mga makihilawason, ni mga tigsimbag idolo, ni mga mananapaw, ni mga lalaking gihuptan alang sa dili-kinaiyanhong mga katuyoan, ni mga lalaking makigdulog sa mga lalaki . . . nga makapanunod sa gingharian sa Diyos.” (1 Corinto 6:9, 10) Ikaw ba adunay nahibaloang mga relihiyon nga nagkonsentir sa imoral nga sekso?

 Unsay palaaboton sa mga relihiyong namunga ug daot nga bunga? Si Jesus nagpasidaan: “Ang matag kahoy nga dili mamungag maayong bunga pagaputlon ug igasalibay ngadto sa kalayo.” (Mateo 7:19) Oo, ang bakak nga relihiyon pagapukanon ug pagalaglagon! Apan sa unsang paagi ug kanus-a? Kana gitubag sa usa ka matagnaong panan-awon nga gisulat diha sa basahong Pinadayag sa Bibliya, mga kapitulo 17 ug 18.

Sa Unsang Paagi Matapos ang Bakak nga Relihiyon?

Handurawa ang esena. Usa ka bigaon nagsakay sa likod sa makalilisang ug dagway nga mananap. Ang mananap dunay pito ka ulo ug napulo ka sungay. (Pinadayag 17:1-4) Kinsay gihawasan sa bigaon? Siya dakog impluwensiya “sa mga hari sa yuta.” Siya nagsul-ob ug purpura, naggamit ug insenso, ug adunahan kaayo. Dugang pa, pinaagi sa iyang espiritistikanhong mga buhat, “ang tanang kanasoran nahisalaag.” (Pinadayag 17:18; 18:12, 13, 23) Ang Bibliya motabang kanato sa pagsabot nga kini nga bigaon maoy usa ka tibuok-kalibotang organisasyon sa relihiyon. Siya naghulagway, dili sa usa lang ka relihiyon, kondili sa tanang relihiyon nga namunga ug daot nga bunga.

Ang mananap nga gisakyan sa bigaon naghulagway sa politikanhong mga gahom sa kalibotan. * (Pinadayag 17:10-13) Ang bakak nga relihiyon nagsakay sa politikanhong mananap, nga naningkamot sa pag-impluwensiya sa mga desisyon niini ug sa pagkontrolar sa padulngan niini.

Apan, sa dili madugay usa ka makapakurat nga hitabo ang mahitabo. “Ang napulo ka sungay nga imong nakita, ug ang mapintas nga mananap, kini sila magadumot sa bigaon ug magalaglag ug magahubo kaniya, ug magakaon sa iyang unod ug magaugdaw kaniya sa kalayo.” (Pinadayag 17:16) Sa kalit ug makapakurat nga paagi, atakehon sa politikanhong mga gahom sa kalibotan ang bakak nga relihiyon ug laglagon siya sa bug-os! Unsay magtukmod kanila sa pagbuhat niana? Ang basahong Pinadayag sa Bibliya nagtubag: “Gibutang kini sa Diyos sa ilang mga kasingkasing aron buhaton ang iyang hunahuna.” (Pinadayag 17:17) Oo, papanubagon sa Diyos ang bakak nga relihiyon tungod sa tanang talamayong mga butang nga gihimo niini sa iyang ngalan. Agig pagpasundayag ug hingpit nga hustisya, iyang gamiton ang politikanhong mga hinigugma sa bakak nga relihiyon sa paglaglag kaniya.

Unsay imong kinahanglang buhaton kon dili ka gustong maapil sa dangatan sa bakak nga relihiyon? “Gumula kamo kaniya, katawhan ko,” nag-awhag ang mensahero sa Diyos. (Pinadayag 18:4) Sa pagkatinuod, karon na ang panahon sa pagkalagiw gikan sa bakak nga relihiyon! Apan asa ka mokalagiw? Dili sa ateyismo, sanglit mangiob usab ang palaaboton niini. (2 Tesalonica 1:6-9) Ang bugtong kadangpan mao lang ang matuod nga relihiyon. Sa unsang paagi imong mailhan ang matuod nga relihiyon?

 Kon unsaon Pag-ila sa Matuod nga Relihiyon

Unsang maayong bunga ang angayng ipatungha sa matuod nga relihiyon?—Mateo 7:17.

Ang Matuod nga Relihiyon . . .

◼ MAILHAN PINAAGI SA GUGMA: Ang matuod nga mga magsisimba “dili bahin sa kalibotan,” dili nabahinbahin tungod sa rasa o kultura, ug nagpasundayag ug ‘gugma sa ilang taliwala.’ (Juan 13:35; 17:16; Buhat 10:34, 35) Imbes magpinatyanay sa usag usa, sila andam nga mamatay alang sa usag usa.—1 Juan 3:16.

◼ NAGTUO SA PULONG SA DIYOS: Imbes magtudlo ug “tradisyon” ug “mga sugo sa mga tawo ingon nga mga doktrina,” ang matuod nga relihiyon nagpasukad sa doktrina niini diha sa Pulong sa Diyos, ang Bibliya. (Mateo 15:6-9) Ngano? Tungod kay “ang tibuok Kasulatan inspirado sa Diyos ug mapuslanon sa pagpanudlo, sa pagpamadlong, sa pagpanul-id sa mga butang.”—2 Timoteo 3:16.

◼ NAGPALIG-ON SA MGA PAMILYA UG NAGTUBOY SA TAAS NGA MGA SUKDANAN SA MORAL: Ang matuod nga relihiyon nagbansay sa mga bana sa ‘paghigugma sa ilang mga asawa sama sa ilang kaugalingong mga lawas,’ nagtabang sa mga asawa sa pag-ugmad ug ‘halawom nga pagtahod sa ilang mga bana,’ ug nagtudlo sa mga anak sa ‘pagsugot sa ilang mga ginikanan.’ (Efeso 5:28, 33; 6:1) Dugang pa, kadtong gihatagan ug mga katungdanan kinahanglang sulondan sa moralidad.—1 Timoteo 3:1-10.

Aduna bay relihiyon nga nakakab-ot niini nga mga sukdanan? Ang librong Holocaust Politics, nga gipatik sa 2001, nag-ingon: “Kon daghan pa untang mga tawo ang nagkinabuhi subay sa mga pagtulon-an nga gisangyaw ug gipadapat sa mga Saksi ni Jehova, ang Holocaust nalikayan unta ug wala na untay mahitabo pang pagpuo sa mga tawong lahi ug rasa nga makahatag ug dakong kasakit sa kalibotan.”

Sa pagkatinuod, diha sa 235 ka nasod, ang mga Saksi ni Jehova wala lamang magsangyaw bahin sa moral nga mga sukdanan sa Bibliya kondili sila nagkinabuhi gayod subay niini. Ikaw among giawhag sa paghangyo sa mga Saksi ni Jehova sa pagtabang kanimo sa pagkat-on kon unsay gikinahanglan sa Diyos kanimo aron ikaw makasimba kaniya sa dalawatong paagi. Karon na ang panahon sa paglihok. Ayaw paglangan. Ang kataposan sa bakak nga relihiyon haduol na!—Sofonias 2:2, 3.

Kon gusto ka ug dugang impormasyon bahin sa binase-sa-Bibliya nga mensaheng gisangyaw sa mga Saksi ni Jehova, ayaw pagpanuko sa pagkontak kanila diha sa adres sa ubos.

□ Interesado akong makadawat ug kopya sa brosyur nga Padayon sa Pagbantay!

□ Palihog kontaka ako mahitungod sa usa ka libreng pagtuon sa Bibliya sa balay.

[Footnote]

[Blurb sa panid 3]

Ang bakak nga relihiyon dakog impluwensiya “sa mga hari sa yuta”

[Blurb sa panid 3]

“Gumula kamo kaniya, katawhan ko”