Komandante sa Militar Nahimong “Sundalo ni Kristo”

SUMALA SA GIASOY NI MARK LEWIS

“Maayong buntag, Imong Kamahalan.” “Maayong hapon, Imong Kahalangdon.” “Maayong gabii, Prime Minister.” Kini ang pipila sa akong mga pangatahoran ingong piloto ug Komandante sa Royal Australian Air Force VIP eskwadron. Akoy tighatod sa mga dagkong tawo sa Estado ug sa gobyerno ngadto sa tibuok Australia ug sa tibuok kalibotan. Apan, aduna akoy gikalingahan karon nga mas mapuslanon. Paasoya ako.

NATAWO ako sa Perth, sa Kasadpang Australia, sa 1951 ug gimatuto sa usa ka amahang sundalo. Sa nag-edad ako ug 15, nagpamembro ako sa gliding club o pundok sa mga tigpalupad ug glider. Busa niining paagiha nagsugod ang akong tinguha sa pagkahimong piloto.

Sa ulahi, ang akong mga ginikanan nagbulag, ug ang among pamilya nabungkag. Gipaipon ako ug puyo sa komandante sa Air Force jet eskwadron ug sa iyang pamilya samtang gitapos nako ang akong pagtuon sa hayskul. Ako naimpluwensiyahan niya sa pagtungha sa Royal Australian Air Force Academy aron mahimong opisyal nga kadete.

Migraduwar Ako sa Pagkapiloto

Paglabay sa mga unom ka tuig, migraduwar ako ingong opisyal sa Air Force nga nakabaton ug diploma sa kurso sa siyensiya ug sa pagkapiloto. Ang akong unang trabaho mao ang pagpiloto sa ayroplano nga tighatod ug mga gamit sa militar sa tibuok Australia, sa Habagatang Pasipiko, ug sa Habagatan-Sidlakang Asia. Sagad moagi ang among ayroplano sa kilid sa mga pangpang ug ngadto sa mga walog diin molanding kami sa dili sementadong mga tugpahanan. Kuyaw kini nga trabaho. Daghang ayroplano sa among eskwadron ang nahagsa ug namatyan kami ug daghang tawo niadtong mga tuiga. Bisan pa niana, ang among mga misyon nakatabang niadtong nagpuyo sa hilit nga mga dapit. Maghatod kamig mga materyales nga gamiton sa pagtukod ug mga taytayan, gagmayng mga buldoser nga gamiton sa paghimog mga dalan, hinabang nga mga pagkaon panahon sa emerhensiya, ug mga doktor ug mga nars. Among ipanghatod usab ang mga masakiton o nangasamdan sa emerhensiya nga mga kahimtang.

Niadtong 1978, nakuwalipikar ako sa pagkahimong instruktor sa mga magpiloto ug mibalik sa Air Force Academy aron magtudlo. Dinhi nakita nako pag-usab si Diane, nga batan-ong biyuda nga may tres anyos nga anak nga babaye. Ang bana ni Diane kauban nako sa Academy apan namatay sa aksidente sa ayroplano. Sa misakna ako kaniya nga magpakasal, nangayo siya nakog panahon sa pagpamalandong niana. Nagduhaduha siya sa pagpamana ug laing piloto.

Kasamtangan, gidawat nako ang 12 ka bulan nga posisyon ingong Asistant sa Gobernador-Heneral sa Australia. Tungod sa akong pagpuyo diha sa residensiya sa Gobernador-Heneral, sa Canberra, nahibaloan nako kon unsaon pagpalakaw sa politika ug nasuod ako sa dagkog ranggong mga tawo sa gobyerno,  militar, ug relihiyon. Sa dihang natapos nako ang gitagal nga panahon sa akong trabaho, mibalik ako sa pagka-instruktor niadtong gustong mahimong piloto. Wala magdugay nagpakasal kami ni Diane, sa 1980.

Sa 1982, gidawat nako ang duha ka tuig nga asaynment sa United States Air Force ingong opisyal nga nagtagad sa kahilwasan sa paglupad ug imbestigador sa mga aksidente sa ayroplano. Tungod niini, nalibot nako ang tanang estado sa Amerika ug hangtod pa sa halayong Amihanang Irlandia. Lakip sa akong trabaho mao ang pag-imbestigar sa mga aksidente sa ayroplano ug sa pagsusi sa disenyo sa ayroplano ug sa pamaagi sa pagpalupad aron mouswag ang kahilwas sa paglupad.

Balik sa Australia

Human nga nakabalik ako sa Australia, nahimong upat kaming tanan sa pamilya sa natawo ang among anak nga babaye nga si Kerry. Tungod sa kadaghan sa akong trabaho, si Diane ang nahimong inahan ug amahan sa among mga anak nga babaye, ug ang among kinabuhi ingong pamilya naapektohan. Paglabay sa tulo ka tuig, nadawat nako ang akong unang asaynment nga akoy komandante​—ang Air Force VIP eskwadron, nga gihisgotan sa sinugdanan. Sa dihang mibuto ang Gubat sa Persian Gulf sa 1991, ang akong eskwadron mitabang sa operatiba sa UN ug dayon sa uban pang operatiba niini sa Pakistan, Afghanistan, Aprika, ug sa Israel.

Sa 1992, nahimo akong Asistant sa Hepe sa Puwersa Militar. Kay nagtrabaho ingong personal nga asistant sa kinatas-an ug ranggo nga komandante sa militar sa Australia, nakasabot ako sa koneksiyon sa militar, politika, ug sa UN. Nakaingon ako nga ang UN depektoso kaayo. Bisan pa niana, morag mao lang kini ang atong paglaom aron makabaton ug mas maayong kalibotan. Dayon tungod sa panghitabo sa akong panimalay, nausab ang akong panglantaw.

Ang mga Pangutana ni Diane Natubag

Sa namatay ang iyang unang bana, si Diane, nga usa ka Katoliko, nangitag tubag sa iyang mga pangutana, apan wala siya makakitag tubag. Misamot hinuon ang problema dihang ang among kamagulangang anak nga babaye, si Renee, nainteres sa okulto. Samtang diha sa balay sa usa ka higala, si Diane nakakitag usa ka isyu sa Pagmata! nga nagpahibalo sa umaabot nga artikulo bahin sa Satanismo. a Wala pa gayod siya makakitag magasing Pagmata! sukad. Sa iyang pagpauli, siya naghunahuna, ‘Asa kaha ako makakuha nianang isyuha sa magasin?’

Paglabay sa tulo ka adlaw ang mga Saksi ni Jehova miduaw, ug nabatonan ni Diane kanang magasina. Sa ulahi siya midawat ug pagtuon sa Bibliya ug nagsugod sa pagtambong sa Kristohanong mga tigom. Nalipay ako nga nagtuon siya ug ubanan pa gani nako siya sa pipila ka tigom, apan ako dili gustong magtuon ug Bibliya. Dili ako relihiyoso. Nagtuo ako ug Diyos apan nakita nako nga salingkapaw kaayo ang relihiyon busa wala akoy interes niana. Pananglitan, wala ako makasabot kon nganong ang mga kapilyan sa militar mowali nga kinahanglang maghigugmaay ang usag usa ug magmakigdaiton apan sa samang higayon nagsuportar sa gubat.

Si Diane mohinok pagbilin ug mga kopya sa Ang Bantayanang Torre ug Pagmata! sa balay aron akong mabasa. Akong basahon ang uban niini ug mainampingong iuli kini sa eksaktong pagkaplastar niini. Dili nako gustong maghunahuna siya nga interesado ako. Sa miuswag ang akong kahibalo sa Bibliya, duha ka teksto ang nakatugaw kanako. Ang usa mao ang Pinadayag 19:17, 18, nga naghisgot bahin sa mga langgam nga mangaon sa mga unod sa “mga komandante militar.” Ang usa pa mao ang Pinadayag 17:3, nga naghisgot ug ‘pula nga mapintas nga mananap.’ Nasabtan sa mga Saksi nga kining mananapa nagsimbolo sa UN, nga usa ka ideya nga sukwahi sa akong mga ideya may kalabotan nianang maong internasyonal nga organisasyon. b Apan wala nako tagda kining mga teksto nga nakapatugaw nako.

Niadtong 1993, gidapit ako ni Diane sa pagtambong sa iyang bawtismo. Nakalitan ako sa iyang gihangyo. Gipangutana nako siya, “Kon ikaw ang papilion, kinsay imong pilion si Jehova o ako?” Siya  mitubag: “Si Jehova. Apan hinaot nga dili ko kinahanglang magpili. Kamong duha hinungdanon sa akong kinabuhi.” Akong naamgohan nga kinahanglang magkuha akog dugang kahibalo bahin niining laing persona sa iyang kinabuhi. Gitanyagan ako sa usa ka Kristohanong ansiyano ug pagtuon sa Bibliya, ug gidawat nako kini.

Naikag kaayo ako sa tagna sa Bibliya, ilabina may kalabotan sa militar ug sa kasaysayan sa politika. Pananglitan, sa gibansay ako sa Air Force, gitun-an nako ang mga gubat sa karaang mga Grego. Akong nakat-onan karon nga ang kadaghanan sa kasaysayan niana nasulat diha sa Daniel kapitulo 8 gatosan ka tuig una pa kini nahitabo. Kining tagnaa, ug uban pa, anam-anam nga nakapakombinsir kanako nga ang Bibliya dinasig sa Diyos.

Nabag-o usab ang akong kaisipan bahin sa UN. Nahibaloan nako nga ang militar dili makasulbad sa problema sa katawhan, nga ang tinuod nga pakigdait dili moabot pinaagig gubat, ug nga ang UN dili makasulbad sa panagbahin-bahin sa politika, relihiyon, ug rasa nga maoy hinungdan sa gubat. Akong nasabtan nga ang Diyos lang ang makasulbad sa suliran sa katawhan. Sa pagkamatuod, siya nagsugod na sa pagsulbad niining mga problemaha diha sa tibuok-kalibotang panag-igsoonay sa mga Saksi ni Jehova. (Salmo 133:1; Isaias 2:2-4) Gipangutana nako ang akong kaugalingon, ‘Makabiya kaha ako sa akong pagkasundalo aron makaalagad sa Diyos?’

Mihimog Desisyon Aron Magkinabuhi Sumala sa Kamatuoran sa Bibliya

Niadtong 1994 kinahanglang mohimo na ako ug desisyon sa mitambong ako sa distritong kombensiyon sa mga Saksi ni Jehova sa Sydney. Dihay bahin sa programa nga nagpasundayag ug drama sa Bibliya nga naghisgot bahin sa pagpili sa karaang nasod sa Israel sa pag-alagad kang Jehova o kang Baal, nga diyos sa mga Canaanhon. Gihagit sa manalagna ni Jehova nga si Elias ang mga Israelinhon: “Hangtod kanus-a ba nga kamo magakiangkiang sa duha ka lainlaing hunahuna? Kon si Jehova mao ang matuod nga Diyos, sumunod kamo kaniya; apan kon si Baal man, sumunod kamo kaniya.” (1 Hari 18:21) Natandog kaayo ako niadtong mga pulonga. Sama sa mga Israelinhon, ako nagduhaduha. Kinahanglang mohimo akog desisyon: Moalagad ba ako kang Jehova o magpadayon sa pagkasundalo?

Sa mipauli ako nianang gabhiona, akong giingnan si Diane nga moluwat na ako sa Air Force aron mahimong Saksi ni Jehova. Nakurat siya sa akong kalit nga desisyon apan mapaluyohon kaayo siya. Paglabay sa daghang adlaw, ang akong desisyon wala gihapon mausab, busa gitunol ko ang akong sulat sa pagluwat.

Niadtong panahona, ako ang Komandante sa mga Kadete sa Defence Force Academy sa Australia, Canberra, nga kaulohan sa nasod. Akoy nagdumala sa pagbansay-bansay sa militar ug sa klase sa duolan sa 1,300 ka opisyal nga mga kadete ug kawani sa Army, Navy, ug Air Force. Sa kataposang adlaw nianang tuiga sa pagtungha, akong gisultihan ang pundok sa 400 ka senyor nga mga kadete ug kawani nga moluwat na ako sa militar aron sa pagsangyaw sa balay ug balay sa pagtudlo sa mga tawo ug Bibliya ingong usa ka boluntaryong Kristohanong ministro. Daghan ang napukaw sa pagpangutana bahin niini.

Nahimong Bug-os Panahong Ministro

Pagkasunod adlaw human giaprobahan ang akong pagluwat nagsugod ako sa pagsangyaw. Paglabay sa tulo ka bulan, sa Abril 1995, ako gibawtismohan. Dayon, sa nakahigayon ako, nagpalista ako ingong regular payunir nga ministro, nga nagpasabot nga igugol ko ang akong bug-os panahon sa pagsangyaw.

Daghan akog kausabang gihimo gikan sa pagkahimong komandante sa militar ngadto sa pagkahimong “sundalo ni Kristo.” (2 Timoteo 2:3) Ang usa sa akong unang mga asaynment mao ang pagtunol sa mga mikropono panahon sa Kristohanong mga tigom. Imbes magsigeg mandar, ako nakakat-on sa pagpamalihog. Ang konsiderasyon ug gugma nahimong mas importante kay sa pagkaepisyente, bisag naglisod gihapon ako sa pagpanimbang niining mga hiyasa. Ug tungod kay gamay na lang ug kita, gipasimple sa among pamilya ang among kinabuhi.

Malipayon kaayo ako sa buluhatong pagsangyaw. Kas-a sa nagsangyaw ako uban sa akong anak nga si Kerry nga nuybe anyos niadtong higayona, akong  gihangyo siya sa pag-obserbar sa reaksiyon sa mga tagbalay. Among nakita nga ang kadaghanan dili interesado apan ang uban maayo ug interesado pa gani. Nadasig kaayo kami niana. Ang among usa pa ka anak nga babaye nagtuon ug Bibliya makadiyot apan wala pa gihapon mag-alagad kang Jehova.

Among gidasig ni Diane si Kerry nga himoon niyang tumong ang bug-os panahong pag-alagad. Di pa dugay, nalipay ako nga nakauban nako siya sa pagtungha sa Pioneer Service School. Kadto maoy iyang unang higayon ug ikaduha nako kadto. Nalipay kaayo ko nga nagtan-aw niya ug sa ubang mga batan-on nga dasig sa pag-alagad sa Diyos ug nagtinguha sa pagsulod sa Kristohanong pag-alagad!​—Salmo 110:3.

Daghan Kaayong Panalanging Nadawat

Sa mamalandong ako, akong nakita ang kaamgiran ug kalainan sa pag-alagad sa militar ug sa pagkahimong sundalo ni Kristo. Ang duha nagkinahanglan ug pagkamaunongon, pagkamasinugtanon, integridad, pagdisiplina sa kaugalingon, ug pagsakripisyo sa kaugalingon. Bisag daghan sa nag-alagad sa militar andam magpakamatay alang sa ilang nasod ug mga higala, ang matuod nga mga Kristohanon gisugo sa paghigugma bisan sa ilang mga kaaway. (Mateo 5:43-48) Ug samtang ang bayaning mga sundalo makadawat ug medalya alang sa usa ka bayanihong buhat sa kaisog, ang matuod nga mga Kristohanon makabaton ug pag-uyon sa Diyos pinaagi sa paglahutay sa matinumanong pag-alagad​—nga nagpasabot nga magpasundayag ug kaisog bisan pa sa mga pagsupak, pagbiaybiay, ug ubang mga pagsulay. (Hebreohanon 10:36-39) Ang mga isigka-Kristohanon mao ang labing maayong mga tawo nga akong nailhan.

Lahi sa akong pangatahoran nga gihisgotan sa sinugdan niini nga sugilanon, ang akong mga pangatahoran karon maoy “Maayong buntag Ter,” o “Maayong gabii Brad.” Malipayon kaayo ako diha sa Kristohanong pag-alagad uban sa mga tawo nga tinuod gayod nga nahigugma sa Diyos! Apan ang kinadak-ang dungog mao ang pag-alagad sa Labing Hataas, si Jehova! Wala na akoy lain pang mahunahunaang mas makapalipayng paagi sa paggamit sa akong kinabuhi.

[Mga footnote]

[Blurb sa panid 14]

Bisag daghan sa nag-alagad sa militar andam magpakamatay alang sa ilang nasod ug mga higala, ang matuod nga mga Kristohanon gisugo sa paghigugma bisan sa ilang mga kaaway

[Hulagway sa panid 12, 13]

Nagpalupad ug Air Force VIP jet ibabaw sa Parliament House, Canberra

[Hulagway sa panid 15]

Drama bahin sa estorya sa Bibliya, 1994 distritong kombensiyon sa Sydney, Australia

[Hulagway sa panid 15]

Uban kang Kerry sa Pioneer Service School

[Hulagway sa panid 15]

Uban kang Diane ug Kerry karon