Ang Hunahuna sa Bibliya

Mahimo Kahang Paraiso ang Tibuok-Yuta?

DIHAY panahon diin ang tawo hingpit, may suod nga relasyon sa Diyos, ug dili masakit o mamatay. Kini ang kanunayng madunggan diha sa karaang mitolohiya sa daghang tawo​—sama sa mga Ehiptohanon, Mehikano, Peruviano, ug Tibetano. Gihisgotan usab niini kon sa unsang paagi nakasala ang tawo.

Bisan pag natuis ug nadugang-dugangan, daghan kaayong elemento niini ang sulagmang managsama. Busa daghan ang mihinapos nga ang maong mga mitolohiya maoy aktuwal nga panghitabo sa kasaysayan. Sa pagkatinuod, kon suma-sumahon, kaamgid kini sa gihisgotan sa unang mga kapitulo sa basahon sa Bibliya nga Genesis. Apan dili sama sa mga mitolohiya, kini naghisgot ug tin-aw, espesipiko, ug tukmang mga detalye sa mga panghitabo sa kasaysayan.​—2 Timoteo 3:16.

Usa ka Hingpit nga Sinugdanan

Ang basahon sa Genesis nagbutyag kanato nga sa dihang gilalang sa Diyos ang unang tawo​—si Adan ug Eva—​iya silang gipapuyo sa usa ka hardin nga maayong pagkatubig, ang Tanaman sa Eden. Duna silay hingpit nga panglawas ug kahigayonan nga mabuhi sa walay kataposan. Ang kamatayon maoy bayad sa sala. (Genesis 2:8-17; Roma 5:12) Ang Diyos nagsugo kanila nga ‘magmabungahon ug magdaghan ug sa ngadtongadto ilang pun-on ug gamhan ang yuta.’ (Genesis 1:28) Kini maoy usa ka globonhong paraiso nga pagapuy-an sa hingpit nga mga tawo nga malipayong nagpasakop sa Diyos ingong ilang Magmamando.

Ikasubo, si Adan ug Eva misupak sa Diyos, ug ingong resulta, nawala nila ang kahigayonan sa pagtuman sa katuyoan sa ilang Maglalalang ug ang kinabuhing walay-kataposan. Bisan pa niini, tumanon gihapon ni Jehova nga Diyos ang iyang katuyoan sa yuta. “Ang akong pulong nga mogula gikan sa akong baba . . . dili mobalik kanako nga walay sangpotanan,” siya miingon, apan “kini tinong magpalampos.” (Isaias 55:11) Sa pagkatinuod, ang pangunang tema sa Bibliya mao ang paghimo sa yuta nga paraiso nga pagapuy-an sa mga tawong nagbanaag sa mga hiyas ni Jehova.​—Roma 8:19-21.

“Ikaw Makauban Nako sa Paraiso”

Dihadiha human makasala si Adan ug Eva, ang Diyos nagsaad ug usa ka “binhi” nga sa bug-os maglaglag sa “orihinal nga halas,” si Satanas nga Yawa, ug sa pagbungkag sa iyang daotang mga buhat. (Genesis 3:15; Pinadayag 12:9; 1 Juan 3:8) Ang maong “binhi” sa panguna nagtumong kang Jesu-Kristo. (Galacia 3:16) Dugang pa, ang  Diyos nagtudlo kaniya ingong Hari sa langitnong Gingharian nga magmando unya sa yuta.​—Daniel 7:13, 14; Pinadayag 11:15.

Sa bug-os, tumanon ni Kristo ang butang nga wala malampos ni Adan. Gani, ang Bibliya nagtawag kang Jesus ingong “ang kataposang Adan.” (1 Corinto 15:45) Dugang pa, diha sa iyang modelong pag-ampo, gilambigit ni Jesus ang kaugmaon sa yuta sa Gingharian sa Diyos, sa pag-ingon: “Paanhia ang imong gingharian. Matuman unta ang imong kabubut-on, maingon sa langit, mao man usab sa yuta.”​—Mateo 6:10.

Sa dinhi pa si Jesus sa yuta, siya​—ingong umaabot nga Hari niana—​may awtoridad sa pagsulti ngadto sa usa ka mahinulsolong kriminal nga gilansang sa iyang tupad: “Ikaw makauban nako sa Paraiso.” (Lucas 23:43) Ang Paraiso nga gihisgotan ni Jesus maoy dinhi sa yuta, ug uyon kini sa orihinal nga katuyoan sa Diyos. Ang Bibliya tin-awng nagsuportar niini. Tagda kining mosunod nga mga teksto.

“Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.” (Salmo 72:16) “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana.” (Proverbio 2:21) “Dili sila [ang walay-ikasaway] magadaot ni magagun-ob sa tibuok nakong bukid nga balaan; tungod kay ang yuta mapuno sa kahibalo kang Jehova ingon sa katubigan nga nagtabon sa dagat mismo.”​—Isaias 11:9.

Uyon niining mga pulonga, si Jesus miingon diha sa iyang bantog nga Wali sa Bukid: “Malipayon ang mga malumog-buot, sanglit sila magapanunod sa yuta.” (Mateo 5:5) Sa ulahi, si apostol Juan misulat: “Ang tolda sa Diyos anaa uban sa mga tawo . . . Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” (Pinadayag 21:3, 4) Tin-aw gayod nga kining mga tekstoha wala maghisgot ug usa ka “paraiso” didto sa langit, hinunoa, naghisgot kini sa usa ka literal nga paraiso dinhi sa yuta.

Kon Unsay Giingon sa mga Eskolar sa Bibliya

Daghang eskolar sa Bibliya ang nagtuo nga ubos sa pagmando sa Gingharian ni Kristo, ang yuta mahimong usa ka paraiso. Ang teologo nga si Joseph A. Seiss miingon: “Ilawom sa pagmando sa Mesiyas ang tibuok yuta mahisama na sa kahimtang niini kon wala pa makasala si Adan.” Diha sa komentaryo sa The New Testament for English Readers, si Henry Alford misulat: “Ang gingharian sa Diyos . . . padayong molihok hangtod nga mahimo kanang usa ka gingharian nga magmando sa yuta, ug ang iyang mga ginsakpan magapanunod niana . . . , ubos sa napasig-uli ug napanalanginang kahimtang sa walay kataposan.”​—Italiko iyaha.

Ang iladong siyentipikong si Isaac Newton kinsa masiboton usab nga nagtuon sa Bibliya misulat: “Ang yuta padayong pagapuy-an sa mga tawo human sa adlaw sa paghukom ug dili lamang sulod sa usa ka libo ka tuig, kondili sa walay kataposan.”

Sanglit si Jesu-Kristo na man ang magmando sa yuta, mawala na ang pagkadaotan. (Isaias 11:1-5, 9) Oo, ang tibuok-yuta mahimo nang paraiso, alang sa kadayeganan sa Maglalalang niini hangtod sa kahangtoran.

NAKAPAMALANDONG KA BA?

◼ Unsa ang orihinal nga katuyoan sa Diyos sa katawhan ug sa yuta?​—Genesis 1:28.

◼ Unsay mapalampos sa Gingharian sa Diyos?​—Mateo 6:10.

◼ Nganong mawala na sa bug-os ang pagkadaotan?​—Isaias 11:1-5, 9.

[Blurb sa panid 11]

“Malipayon ang mga malumog-buot, sanglit sila magapanunod sa yuta.”​—Mateo 5:5