Gugma nga Mas Kusog pa sa Bagyo!
Gugma nga Mas Kusog pa sa Bagyo!
Dihang mihugpa ang Bagyong Katrina ug Rita sa Gulf Coast sa Tinipong Bansa niadtong 2005, kini nakahimog dako kaayong kadaot ug mihunos ug daghang kinabuhi. Libolibong Saksi ni Jehova ang naapektohan.
Milihok dayon ang mga komite sa buluhatong panghinabang nga gidumala sa sangang buhatan sa Tinipong Bansa sa mga Saksi ni Jehova. Sa Louisiana, nagtukod silag 13 ka sentro sa panghinabang, 9 ka bodega, ug 4 ka gasolinahan. Nakatabang sila sa mga molupyo sa 80,000 ka kilometro kuwadrado nga luna. Duolag 17,000 ka boluntaryong Saksi ang nangabot gikan sa tanang bahin sa Tinipong Bansa ug sa 13 ka ubang nasod alang sa emerhensiyang buluhaton ug pagpanukod. Gipakita sa mga resulta nga ang Kristohanong gugma mas kusog pa sa mga puwersa sa kinaiyahan.—1 Corinto 13:1-8.
Giayo sa mga boluntaryo ang kapig 5,600 ka balay sa mga isigkamagtutuo ug 90 ka Kingdom Hall, ang tigomanan sa mga Saksi ni Jehova. Kining mga numeroha nagpakita nga giayo ang halos tanang naguba nga mga tinukod. Uyon sa Galacia 6:10, nga nag-awhag sa mga Kristohanon sa ‘pagbuhat ug maayo ngadto sa tanan,’ gitabangan usab sa mga Saksi ni Jehova ang ubay-ubayng mga dili-magtutuo.
ANG buluhatong panghinabang naglangkit ug personal nga sakripisyo, apan kini daghag balos. Tagda ang mga komento sa pito ka Saksi nga nagdumala sa nagkalainlaing matang sa buluhaton.
“Usa ka Talagsaong Bahin sa Akong Kinabuhi”
Robert: Ang pagkamembro sa komite sa buluhatong panghinabang maoy usa ka talagsaong bahin sa akong kinabuhi. Ako 67 anyos na ug ang kinatigulangang membro sa komite. Nakauban ko ang daghang boluntaryo nga naglakip sa batan-on ug aktibong mga Saksi. Makapalig-on gayod ang pagkakitag mga batan-on nga nagpasundayag ug masakripisyohong gugma alang kang Jehova ug sa isigka-Kristohanon!
Usa ka maayo kaayong katimbang ang akong asawa nga si Veronica. Aron makaboluntaryo mi, siya miuyon sa akong desisyon nga mohunong sa akong kapig 40-anyos nang trabaho. Nagtrabaho mi karon ug usa ra ka gabii sa usa ka semana nga manglimpiyo ug mga opisina. Nakakat-on mi sa pagdaginot ug pagkinabuhi nga yano. Mas nasabtan namo kon unsay kahulogan nga unahon ang Gingharian sa Diyos diha sa kinabuhi tungod sa pagtrabaho kauban sa mga tawo nga buot magpahimuot kang Jehova. (Mateo 6:33) Nakita namo kanunay nga si Jehova nag-atiman sa iyang katawhan.
Frank: Ako ang magtatan-aw sa departamento sa pagpakaon diha sa Baton Rouge nga sentro sa panghinabang. Sa sinugdan, nagtrabaho mig mga 10 ngadto 12 ka oras kada adlaw sa tibuok semana. Apan daghan ang panalangin, lakip ang pagkakita ko mismo sa gahom sa Kristohanong gugma.
Daghang boluntaryo nga mitabang sa pagpakaon sulod sa usa ka semana o kapin pa ang mihangyo nga mobalik, ug ang pipila nagpahayag sa ilang kinasingkasing nga pagpasalamat sa pribilehiyo
nga makatabang pinaagi sa pagpadalag mga postkard ug pagtelepono. Natandog gayod kami ni Veronica, nga akong asawa, sa ilang masakripisyohong tinamdan.Nanglimbawot ang Iyang Balhibo
Gregory: Gibaligya namo ni Kathy, nga akong asawa, ang among balay sa Las Vegas, Nevada, ug mipalit kamig gamayng trak ug treyler nga gihimo namong puy-anan. Kay gihimo namong yano ang kinabuhi, nakaboluntaryo kamig kapin sa duha ka tuig sa Louisiana. Labaw pa namong nasinati ang katumanan sa mga pulong sa Bibliya diha sa Malaquias 3:10: “‘Sulayi ako, palihog, . . .’ miingon si Jehova sa mga panon, ‘[ug tan-awa] kon dili ko ba buksan nganha kaninyo ang mga ganghaan sa tubig sa kalangitan ug magbubo nganha kaninyo sa panalangin hangtod nga wala nay panginahanglan.’”
Kasagarang makapahiyom lang kami dihang adunay moingon, “Pagkadako sa inyong sakripisyo!” Trayenta anyos kanhi, buot namo ni Kathy nga moalagad sa sangang buhatan sa mga Saksi ni Jehova sa Tinipong Bansa, apan may mga anak kaming buhion. Ang buluhatong panghinabang nagtagbaw sa among tinguha nga dugang makaalagad sa Diyos. Lain pang pribilehiyo ang pagtrabaho kauban sa mga isigka-Saksi, nga pipila kanila maoy abilidaran kaayo. Pananglitan, usa sa among mga kosinero maoy maestro-kosinero sa usa ka maayong restawran, ug ang lain nahimong kosinero sa duha ka presidente sa Tinipong Bansa.
Alang sa daghang boluntaryo, ang buluhatong panghinabang dako kaayog epekto sa ilang kinabuhi. Nanglimbawot ang balhibo sa usa ka 57-anyos nga boluntaryo samtang naghubit sa iyang pagtabang sa mga biktima sa kusog kaayong bagyo. Bisan ang ubang Saksi nga wala makaboluntaryo nakapadasig usab. Pananglitan, duha ka boluntaryong nanglimpiyo sa mga tinukod nga gilumotan tungod sa baha ang nagpresentar kanamog banner nga gigama ug gipirmahan sa tanang sakop sa tulo ka kongregasyon, apil mga bata, sa ilang estado sa Nebraska.
‘Nakita Namo nga ang Diyos Nag-atiman sa mga Nag-antos’
Wendell: Pagkasunod adlaw human sa bagyong Katrina, ako gidapit sa sangang buhatan sa Tinipong Bansa sa pagbanabana sa gidak-on sa kadaot sa mga Kingdom Hall ug mga balay sa mga Saksi ni Jehova sa Louisiana ug Mississippi. Niana nagsugod ang akong partaym nga asaynment ug personal nga kasinatian. Kay 32 ka tuig na ming nagpuyo sa dapit nga dakog panginahanglan alang sa mga magmamantala sa Gingharian, amo gayong nakita ni Janine, nga akong asawa, ang pag-atiman ni Jehova sa iyang katawhan. Apan, niadtong higayona among nakita ang labaw nga pag-atiman sa Diyos.
Nakapribilehiyo ko nga mahimong tsirman sa komite sa buluhatong panghinabang sa Baton Rouge. Bisag lisod, ang maong asaynment nakapatagbaw kaayo kanako. Sa pagkatinuod, sa maong panahon sa panghinabang, daghang higayon nga nakita sa among komite kon giunsa sa Diyos pagsulbad ang mga problema, pagmugnag
kahigayonan, ug pag-atiman sa mga tawong nag-antos, sa mga paagi nga mahimo lamang sa usa ka mahigugmaon ug Labing Gamhanang Amahan.Daghan ang nangutana, “Sa unsang paagi ikaw ug ang imong asawa nakaboluntaryo gihapon paglabay sa kapig duha ka tuig?” Kadto dili kanunayng sayon. Kami naghimo gayod ug daghang pagpasibo sa among kinabuhi. Apan sa laing bahin, kami nakakita sa mga kaayohan sa paghupot ug ‘yano nga mata.’—Mateo 6:22.
Sa dihang nangita pa kamig mga tawo nga nakalingkawas sa bagyo sa New Orleans ug nagtabang kanila, gamay ra kamig pahulay. Mas lisod pa ang kahimtang kay ang siyudad halos kontrolado sa kasundalohan tungod sa kagubot ug kapintasan diha sa kadalanan. Ang pagtan-aw lang sa daghan kaayong buluhaton sa unahan makapaluya na kanamo.
Nakigkita kami sa linibong Saksi nga nakaagom ug daghang kapildihan. Nag-ampo kami uban kanila ug naningkamot sa paghupay kanila. Dayon, sa tabang ni Jehova, misugod kami sa pagtrabaho. Usahay, gibati ko nga samag duha ka kinabuhi ang akong naagian tungod sa tanan kong nakita ug nasinati dinhi sa duha ka tuig.
Matag karon ug unya, dihang mobati kong daw di na makaagwanta, mangabot ang bag-ong grupo sa mga boluntaryo, nga ang pipila kanila sa pipila ra ka bulan, ug ang uban sa way-tinong gidugayon. Makapalig-on gayod kanamo ang pagkakitag daghang malipayong mga boluntaryo, lakip ang daghang batan-on.
Si Jehova kanunayng mitabang kanamo. Pananglitan, sa among pag-abot, nasayran namong kapig 1,000 ka balay sa mga igsoon ang natumbahag mga kahoy. Kay kami walay hiramenta o mga boluntaryo nga Salmo 65:2.
makahimo sa peligrosong trabaho sa pagkuha sa mga kahoy, giampo kana sa among komite. Pagkaugma, usa ka igsoon nga may dalang trak ug hiramenta nga maoy among gikinahanglan mitanyag nga motabang. Sa laing higayon, ang among pag-ampo gitubag sulod lang sa 15 minutos, ug sa lain pang higayon, nagsingabot na ang hiramenta nga among giapil sa among pag-ampo sa wala pa kami maka-amen! Si Jehova mao gayod ang “Tigpatalinghog sa pag-ampo.”—“Mapasigarbohon Ko nga Nahimong Saksi ni Jehova”
Matthew: Pagkasunod adlaw human mohugpa ang Bagyong Katrina, nahikay namo nga ikahatod ang 15 ka toneladang donasyon nga pagkaon, tubig, ug ubang kinahanglanon ngadto sa napayhag nga lugar. Mahinatagon gayod ang katawhan ni Jehova!
Aron maepektibo pa ang among mga paningkamot, namalhin mi ni Darline, nga akong asawa, sa usa ka lugar nga duha ka oras ra nga biyahe paingon sa gibagyo nga dapit. Gihatagan kamig partaym nga trabaho sa usa ka Saksi niadtong dapita aron ikaboluntaryo ang among kinadak-ang panahon sa buluhatong panghinabang. Ang laing Saksi mitagana kanamog apartment. Nagpasalamat gayod kami nga nahimong bahin sa organisasyon sa mahigugmaong mga igsoon ug mapasigarbohon ko nga nahimong Saksi ni Jehova.
Ted: Human sa Bagyong Katrina, miboluntaryo mi ni Debbie, nga akong asawa, sa buluhatong panghinabang. Sa pipila lang ka adlaw, nakakaplag kog segunda-mano, nuybe-metros nga gaang treyler nga maguyod ra sa among trak ug ang presyo niadto katunga ra sa among gibanabana, nga igo ra sa among badyet ug tubag sa among mga pag-ampo. Kanay among gipuy-an sulod sa kapig duha ka tuig.
Sa dihang gihunong usa ang trabaho, among gibaligya ang among balay ug ang kadaghanan sa among mga butang, mao nga libre na kaming moboluntaryo sa New Orleans, diin ako ang nagdumala sa proyekto. Ang among pagkakita nga si Jehova mao gayoy “Diyos sa tanang paghupay” sa iyang mga magsisimba maoy talagsaong kasinatian. Daghan ang nawad-an, dili lang mga balay ug Kingdom Hall, kondili mga kongregasyon pa ug tibuok teritoryo nga masangyawan sa maayong balita tungod sa ilang pagbakwet.—2 Corinto 1:3.
‘Ang Ilang Pagtuo Nakatandog sa Among mga Kasingkasing’
Justin: Niadtong Oktubre 2005, may panginahanglan ug mga boluntaryo alang sa buluhatong panghinabang sa Gulf Coast. Gipadala dayon namo ni Tiffany, nga akong asawa, ang among mga aplikasyon, ug sa Pebrero 2006 gidapit kami nga motabang sa grupong tig-atop didto sa Kenner nga sentro sa panghinabang duol sa New Orleans.
Kada adlaw motrabaho kamig usa ka balay ug makahimamat sa mga Saksi nianang dapita, kansang pagtuo ug pagsalig sa Diyos nakatandog sa among mga kasingkasing. Ug kada adlaw kami mapahinumdoman sa kabuangan sa pagsalig sa materyal nga mga butang. Dili ikahubit ug mga pulong ang kalipay tungod sa pagkakita nga gisangkapan ni Jehova ang iyang katawhan sa pagtabang sa ilang mga isigka-Kristohanon.
[Kahon/Hulagway sa panid 18]
Kasagarang Adlaw Diha sa Sentro sa Panghinabang
Alang sa mga boluntaryo sa kosina sa usa ka sentro sa panghinabang, magsugod ang trabaho sa mga 2:30 s.b. Pagkaalas 7:00 s.b. ang mga boluntaryo magtigom sa kan-anan aron hisgotan ang usa ka teksto sa Bibliya sulod sa diyes minutos sa dili pa mamahaw. Kanang okasyona magamit usab sa tsirman sa pag-abiabi sa mga bag-ong nangabot ug pagsugilon ug bag-ong makapadasig nga kasinatian.
Human sa pag-ampo, mangaon ang tanan ug sustansiyadong pamahaw ug dayon motrabaho na. Ang uban magpabilin sa sentro, nga tingali magtrabaho sa opisina, sa labhanan, o sa kosina. Maghikay ang mga kosinero ug mabalon nga paniudto nga kuhaon sa usa ka hawas sa matag tem pagkaudto.
Kada Lunes sa gabii, ang “pamilya” magtuon sa pinasukad-sa-Bibliya nga artikulo sa Bantayanang Torre, nga gipatik sa mga Saksi ni Jehova. Ang maong mga pagtuon makatabang sa tanan sa pagpabiling lig-on sa pagtuo, nga maoy sekreto aron makalahutay nga malipayon ug makahupot ug hustong tinamdan bahin sa trabaho.—Mateo 4:4; 5:3.
[Kahon sa panid 19]
“Sayop Gayod ang Akong Opinyon Kaninyo”
Usa ka babaye nga taga-New Orleans may karatula sa iyang pultahan: “Mga Saksi ni Jehova—Ayaw Mog Panuktok.” Unya usa ka adlaw ang mga boluntaryo misugod pag-ayo sa usa ka gubang balay tabok sa karsada. Adlaw-adlaw niyang napanid-an ang masadyaon ug mahigalaong mga trabahante. Kay wala na makaantos, mitabok siya aron mosusi. Sa pagkahibalo nga mga Saksi ni Jehova diay ang mga boluntaryo, siya miingon nga wala ganiy usa niya ka kauban sa relihiyon ang mitelepono kaniya sukad sa pagbagyo. “Sayop gayod ang akong opinyon kaninyo,” matod niya. Ang resulta? Iyang gitangtang ang karatula, ug gidapit ang mga Saksi sa pagduaw kaniya.
[Hulagway sa panid 16, 17]
Si Robert ug Veronica
[Hulagway sa panid 16, 17]
Si Frank ug Veronica
[Hulagway sa panid 17]
Si Gregory ug Kathy
[Hulagway sa panid 17]
Si Wendell ug Janine
[Hulagway sa panid 18]
Si Matthew ug Darline
[Hulagway sa panid 18]
Si Ted ug Debbie
[Hulagway sa panid 18]
Si Justin ug Tiffany