1. Unsay kinahanglang desisyonan sa usa ka batan-on maylabot sa iyang kaugmaon, pero nganong dili angayng mabalaka pag-ayo? (Tan-awa ang hulagway sa sinugdan sa artikulo.)

MGA batan-on, lagmit mouyon mo nga sa dili pa mobiyahe, mas maayong magplano daan kon asa moadto. Ang kinabuhi sama sa pagbiyahe, ug ang panahon sa pagplano mao ang panahon sa inyong pagkabatan-on. Siyempre, dili sayon ang magplano. Ang babaye nga si Heather miingon: “Hadlok kaayo. Kinahanglan kang modesisyon para sa imong kaugmaon.” Pero, magmaisogon. Giingnan ni Jehova ang iyang katawhan: “Ayaw iliraw ang imong panan-aw [o, kahadlok], kay ako imong Diyos. Ako magapalig-on kanimo. Ako sa pagkatinuod magatabang kanimo.”​—Isa. 41:10.

2. Nganong nahibalo ka nga gusto ni Jehova nga planohon nimo ang imong kaugmaon?

² Si Jehova nag-awhag nimo nga magmaalamon sa pagplano sa imong kaugmaon. (Eccl. 12:1; Mat. 6:20) Gusto niyang magmalipayon ka. Dayag kini diha sa imong makita, madungog, ug matilawan. Tagda sab ang iyang pag-atiman ug pagtudlo kanato sa kinamaayohang paagi sa pagkinabuhi. Niadtong wala modawat sa iyang tambag, si Jehova miingon: “Inyong gipili ang butang nga ako walay kahimuot. . . . Tan-awa! Ang akong mga alagad managmaya, apan kamo  manag-antos sa kaulawan. Tan-awa! Ang akong mga alagad managhugyaw sa kalipay tungod sa maayong kahimtang sa kasingkasing.” (Isa. 65:12-14) Madayeg si Jehova kon mohimog maalamong desisyon ang iyang katawhan.​—Prov. 27:11.

3. Unsay girekomendar ni Jehova kanimo?

³ Unsa ang girekomendar ni Jehova nga imong planohon? Iyang gilalang ang tawo nga magmalipayon diha sa pagkaila kaniya ug pag-alagad kaniya nga matinumanon. (Sal. 128:1; Mat. 5:3) Lahi ta sa mga hayop​—nga igo lang mokaon, moinom, ug manganak. Gusto sa Diyos nga magmalipayon ka pinaagi sa pagplanog mga buluhaton gawas nianang makapatagbaw sa mga hayop. Ang imong Maglalalang mao “ang Diyos sa gugma,” ang “malipayong Diyos,” kinsa naghimo nimo “sumala sa iyang larawan.” (2 Cor. 13:11; 1 Tim. 1:11; Gen. 1:27) Magmalipayon ka kon sundogon nimo ang atong mahigugmaong Diyos. Naeksperyensiyahan na ba nimo ang giingon sa Bibliya: “Adunay labaw nga kalipay sa paghatag kay sa pagdawat”? (Buh. 20:35) Importante kana nga kamatuoran sa kinabuhi. Busa, gusto sa Diyos nga ang imong mga plano nakapokus sa pagpakitag gugma sa uban ug sa Diyos.​—Basaha ang Mateo 22:36-39.

4, 5. Unsay nakapalipay kang Jesus?

⁴ Si Jesu-Kristo nagpakitag kinamaayohang panig-ingnan sa mga batan-on. Sa bata pa, seguradong nagdula ug naglingawlingaw siya. Ang Pulong sa Diyos nag-ingon nga may “panahon sa pagkatawa . . . ug panahon sa paglukso [o, pagsayaw].” (Eccl. 3:4) Nakigsuod sab si Jesus sa Diyos pinaagi sa pagtuon sa Kasulatan. Dihang 12 anyos siya, ang mga magtutudlo sa templo nakadayeg sa “iyang pagsabot ug sa iyang mga tubag” bahin sa espirituwal nga mga butang.​—Luc. 2:42, 46, 47.

⁵ Malipayon gihapon si Jesus pagkadako na niya. Unsay nakapalipay niya? Nahibalo siya nga gusto sa Diyos nga iyang ‘ipahayag ang maayong balita ngadto sa mga kabos . . . ug ipasig-uli ang panan-aw sa mga buta.’ (Luc. 4:18) Nakapalipay niya ang pagsunod sa gisugo sa Diyos kaniya. Ang Salmo 40:8 nagpahayag sa iyang pagbati: “Sa pagbuhat sa imong kabubut-on, Oh Diyos ko, ako nagakalipay.” Malipay siyang motudlo sa uban bahin sa iyang langitnong Amahan. (Basaha ang Lucas 10:21.) Kas-a, human niya tudloi ang usa ka babaye bahin sa tinuod nga pagsimba, giingnan ni Jesus ang iyang mga tinun-an: “Ang akong pagkaon mao ang pagbuhat sa kabubut-on niya nga nagpadala kanako ug ang paghuman sa iyang buluhaton.” (Juan 4:31-34) Nakapalipay kang Jesus ang pagpakitag gugma sa uban ug sa Diyos. Makapalipay pod nâ nimo.

6. Nganong angay nimong hisgotan ang imong mga plano uban sa eksperyensiyadong mga Kristohanon?

⁶ Daghang Kristohanon ang nagmalipayon sa ilang pagkabatan-on kay sila nagpayunir. Unsa kaha kon hisgotan nimo ang imong mga plano uban nila? “Mapakyas ang mga plano kon walay . . . panagsultihanay, apan diha sa panon sa mga magtatambag adunay kalamposan.” (Prov. 15:22) Sultian ka tingali sa maong eksperyensiyadong mga igsoon nga ang bug-os panahong ministeryo maghatag ug edukasyon nga mapuslan nimo sa tibuok nimong kinabuhi. Human matudloi sa iyang Amahan sa langit, padayong nakakat-on si Jesus panahon sa iyang ministeryo sa yuta. Pananglitan, nakat-onan niya ang kalipay sa pagtandog sa kasingkasing sa mga tawo pinaagi sa maayong balita ug ang kalipay sa pagpabiling matinumanon ilalom sa pagsulay. (Basaha ang Isaias 50:4; Heb. 5:8; 12:2) Atong hisgotan kon nganong makapalipay pag-ayo nimo ang bug-os panahong pag-alagad.

7. Nganong daghang batan-on ang ganahan sa buluhatong paghimog tinun-an?

⁷ Si Jesus miingon: “Panglakaw kamo ug paghimog mga tinun-an sa katawhan . . .  nga magatudlo kanila.” (Mat. 28:19, 20) Kon giplano nimo nga himoong karera kini nga buluhaton, ikaw magmalipayon ug magdayeg sa Diyos. Sama sa ubang karera, nagkinahanglan kag panahon aron mahanas. Di pa dugay, ang brader nga si Timothy, kinsa nagpayunir sa tin-edyer pa, miingon: “Ganahan kong mag-alagad kang Jehova nga bug-os panahon kay pinaagi ani, mapakita nako ang akong gugma kaniya. Sa sinugdan, dili ko makasugod ug pagtuon. Pero sa ulahi mibalhin ko sa laing teritoryo, ug sulod sa usa ka bulan, nakasugod kog ubay-ubayng pagtuon sa Bibliya. Usa nila tigtambongan na sa Kingdom Hall. Human moeskuylag duha ka bulan sa Bible School for Single Brothers, * nakadawat kog bag-ong asaynment diin nakasugod kog upat ka pagtuon. Ganahan kong magtudlo sa mga tawo kay makita nako ang balaang espiritu nga nagbag-o nila.”​—1 Tes. 2:19.

8. Sa unsang paagi ang pipila ka batan-on bug-os nga nakigbahin sa paghimog mga tinun-an?

⁸ Ang pipila ka batan-on nagtuon ug laing pinulongan. Pananglitan, si Jacob, nga taga-North America, misulat: “Dihang siyete anyos pa ko, daghan kog Vietnamese nga klasmet. Gusto nako silang tudloan bahin kang Jehova, maong wala madugay mihimo kog mga plano aron makakat-on sa ilang pinulongan. Nakakat-on kog dako pinaagi sa pagkomparar sa English ug Vietnamese nga Bantayanang Torre. Nakighigala pod ko sa mga igsoon sa kinadul-ang Vietnamese nga kongregasyon. Pagka-18 nako, nagsugod kog payunir. Sa ulahi, nakaeskuyla ko sa Bible School for Single Brothers. Nakatabang ni nako sa akong asaynment karon ingong payunir ug nag-inusarang ansiyano sa usa ka Vietnamese nga grupo. Daghang Vietnamese ang nalipay nga makamao ko sa ilang pinulongan. Ila kong pasudlon, ug sagad maka-Bible study ko nila. Ang pipila nagpabawtismo na.”​—Itandi ang Buhat 2:7, 8.

9. Unsay imong makat-onan sa paghimog mga tinun-an?

⁹ Daghan kag makat-onan sa paghimog mga tinun-an, sama sa pagkamakugihon, pagpakig-estorya sa uban, pagbatog kompiyansa sa kaugalingon, ug pagkamahunahunaon. (Prov. 21:5; 2 Tim. 2:24) Pero ilabinang makapalipay ang paghimog tinun-an kay tabangan ka niini nga mahimong mas pamilyar sa Kasulatanhong basehanan sa imong pagtuo. Makat-onan sab nimo ang pagkahimong isigkamagbubuhat ni Jehova.​—1 Cor. 3:9.

10. Sa unsang paagi magmalipayon ka bisag nagsangyaw sa lisod nga teritoryo?

¹⁰ Magmalipayon gihapon ka sa paghimog mga tinun-an bisag gamay ra ang maminaw sa maayong balita diha sa imong teritoryo. Magtinabangay ta sa paghimog tinun-an. Ang tibuok kongregasyon mangitag mga sinsero. Bisag usa ra ka igsoon ang makakitag tawo nga matabangan sa pagkahimong Saksi, ang tanan mitabang sa pagpangita ug ang tanan malipay. Pananglitan, si Brandon nagpayunir sulod sa siyam ka tuig diha sa teritoryo nga walay modawat. Siya miingon: “Gusto nakong isangyaw ang maayong balita kay kana ang gisugo ni Jehova kanato. Nagsugod kog payunir human nakog eskuyla. Malipay kong magdasig sa mga batan-on sa among kongregasyon ug magtan-aw sa ilang espirituwal nga pag-uswag. Paggraduwar nako sa Bible School for Single Brothers, nakadawat kog bag-ong asaynment ingong payunir. Oo, wala ko makakaplag ug tawo sa teritoryo nga natabangan nako hangtod sa bawtismo, pero nakakaplag man ang uban. Lipay kaayo kong apil sa akong plano ang buluhatong paghimog mga tinun-an.”​—Eccl. 11:6.

11. Unsang sagradong pag-alagad ang natagamtam sa daghang batan-on?

¹¹ Daghan ang kahigayonan sa pag-alagad kang Jehova. Pananglitan, daghang batan-on  ang miboluntaryo sa konstruksiyon. Gikinahanglan pa ang gatosan ka bag-ong Kingdom Hall. Sagradong pag-alagad ang pagtukod niana ug kana makadayeg sa Diyos ug makapalipay nimo. Sama sa uban pang sagradong pag-alagad, makapalipay gyod ang pagpakig-uban sa mga igsoon. Daghan pod kag makat-onan sa konstruksiyon sama sa pagkamakugihon, paghunahuna sa safety, ug pagkooperar sa mga nagapanguna.

12. Sa unsang paagi ang pagpayunir mahimong moresultag dugang pribilehiyo?

¹² Ang brader nga si Kevin miingon: “Sukad sa bata pa ko, pangandoy na nakong mag-alagad kang Jehova nga bug-os panahon. Pag-edad nakog 19, nakapayunir na gyod ko. Gisuportahan nako ang kaugalingon pinaagi sa pagtrabahog part-time diha sa brader nga naay kompaniya sa konstruksiyon. Nakakat-on ko sa pagpanaod ug atop, bentana, ug pultahan. Sa ulahi, duha ka tuig kong miboluntaryo sa pagtabang sa naigo sa bagyo, nga nagtukod ug mga Kingdom Hall ug balay sa mga igsoon. Pagkadungog nako nga nagkinahanglag boluntaryo sa konstruksiyon sa South Africa, miaplay ko ug natawag. Dinhi sa Africa, magbalhinbalhin ko sa mga proyekto sa Kingdom Hall kada pipila ka semana. Mora na nakog pamilya ang akong grupo sa konstruksiyon. Usa ra mig puy-anan, ug dungan ming magtuon sa Bibliya ug magtrabaho. Ganahan pod kong mosangyaw uban sa lokal nga mga igsoon matag semana. Ang mga plano nako sa bata pa nakapalipay nako sa paagi nga wala nako damha.”

13. Nganong daghang batan-on ang malipay sa pag-alagad sa Bethel?

¹³ Ang pipila nga nagpayunir natawag sa Bethel. Makapalipay ang pag-alagad sa Bethel kay para kang Jehova ang tanang ginahimo didto. Nagtabang ang pamilyang Bethel sa pagtaganag espirituwal nga pagkaon. Ang Bethelite nga si Dustin miingon: “Sukad niadtong nuybe anyos pa ko, tumong na nakong  magpayunir. Nagsugod kog payunir humag eskuyla. Human sa usa ka tuig ug tunga, natawag ko sa Bethel, diin nakakat-on ko sa pag-operit ug imprentahanan, ug dayon, computer programming. Sa Bethel, malipay kong madunggan mismo ang pag-uswag sa paghimog mga tinun-an sa tibuok kalibotan. Ganahan kong mag-alagad dinhi kay ang among ginahimo nakatabang sa daghan nga masuod kang Jehova.”

14. Unsaon nimo pagplano aron makasulod sa bug-os panahong ministeryo?

¹⁴ Unsaon nimo pagplano aron mahimong bug-os panahong ministro? Labaw sa bisan unsa, makatabang ang Kristohanong mga hiyas aron molampos sa bug-os panahong pag-alagad kang Jehova. Busa, pagkugi sa pagtuon sa Pulong sa Diyos, pamalandong pag-ayo sa kahulogan niana, ug pangitag mga paagi sa pagpahayag sa imong pagtuo diha sa kongregasyon. Samtang nag-eskuyla, makakuha kag eksperyensiya ug kahanas ingong magsasangyaw sa maayong balita. Kat-oni ang pagpakitag interes sa uban pinaagi sa mataktikanhong pagpangutana sa ilang opinyon ug pagpaminaw sa ilang tubag. Makaboluntaryo pod ka sa mga buluhaton sa kongregasyon, sama sa pagpanghinlo ug pagmentinar sa Kingdom Hall. Malipay si Jehova niadtong mapainubsanon ug andam motabang. (Basaha ang Salmo 110:3; Buh. 6:1-3) Gipauban ni apostol Pablo si Timoteo sa misyonaryong buluhaton kay “ang mga igsoon . . . may maayong panghimatuod” kang Timoteo.​—Buh. 16:1-5.

15. Unsaon nimo pagpangandam aron makakitag trabaho?

¹⁵ Kadaghanan sa bug-os panahong ministro kinahanglang motrabaho. (Buh. 18:2, 3) Lagmit makatabang ang pag-eskuylag mugbong kurso aron makakitag part-time nga trabaho sa inyong dapit. Samtang magplano, konsultaha ang inyong tigdumala sa sirkito ug ang ubang payunir sa inyong sirkito. Pangutan-a sila kon unsang trabaho ang praktikal para sa mga payunir. Ug sama sa giingon sa Bibliya, “itugyan ang imong mga buhat kang Jehova ug ang imong mga plano” molampos.​—Prov. 16:3; 20:18.

16. Sa unsang paagi ang pag-alagad nga bug-os panahon samtang batan-on pa mag-andam nimo sa ubang responsabilidad sa umaabot?

¹⁶ Makaseguro ka nga gusto ni Jehova nga ikaw “makapangupot pag-ayo” sa malipayong umaabot. (Basaha ang 1 Timoteo 6:18, 19.) Pinaagi sa bug-os panahong pag-alagad, mailaila nimo ang ubang naa sa bug-os panahong pag-alagad nga makatabang nimo nga mahimong hamtong nga Kristohanon. Nakita sa daghan nga ang pag-alagad nga bug-os panahon samtang batan-on pa nakatabang nila nga mas molampos sa ilang kaminyoon. Sagad, kadtong nagpayunir sa wala pa magminyo nakapadayon sa pagpayunir nga magkauban bisag minyo na.​—Roma 16:3, 4.

17, 18. Nganong ilakip sa plano kon unsay naa sa imong kasingkasing?

¹⁷ Dihang magplano, ilakip kon unsay naa sa imong kasingkasing. Ang Salmo 20:4 nag-ingon bahin kang Jehova: “Magahatag unta siya kanimo nianang nahiuyon sa imong kasingkasing, ug tumanon unta niya ang tanan nimo nga laraw [o, plano].” Busa, hunahunaag maayo kon unsay gusto nimong buhaton sa imong kinabuhi. Pamalandonga ang ginahimo ni Jehova karon ug ang puwede nimong himoon sa pag-alagad kaniya. Dayon, paghimog plano nga makapalipay niya.

¹⁸ Makapalipay kaayo ang bug-os nga pag-alagad kang Jehova kay kini ang kinabuhi nga magpasidungog kaniya. Oo, “magbaton ka . . . ug tumang kalipay diha kang Jehova, ug ihatag niya kanimo ang mga hangyo sa imong kasingkasing.”​—Sal. 37:4.