1-3. (a) Lagmit, kanus-a gisulat ang Salmo 147? (b) Unsay atong makat-onan sa Salmo 147?

ANG usa ka tawo nga makahimog kalamposan sa iyang asaynment ug makapakitag Kristohanong hiyas takos sa pagdayeg. Kon makadayeg ta sa mga tawo, unsa pa kaha sa atong Diyos nga si Jehova! Makadayeg ta niya tungod sa iyang dakong gahom nga makita sa iyang kalalangan, o tungod sa iyang gugma kanato pinaagi sa halad lukat sa iyang bugtong Anak.

² Ang magsusulat sa Salmo 147 napalihok sa pagdayeg kang Jehova. Gidasig sab niya ang uban sa pagdayeg sa Diyos.​—Basaha ang Salmo 147:1, 7, 12.

³ Wala ta mahibalo kon kinsay nagsulat niini nga salmo. Pero kini nga salmista lagmit nabuhi dihang ang mga Israelinhon nga naulipon sa Babilonya gipabalik ni Jehova sa Jerusalem. (Sal. 147:2) Napalihok ang salmista sa pagdayeg kang Jehova kay ang katawhan sa Diyos makasimba nag balik sa ilang nasod. Sa gihapon, gipahayag niya ang dugang rason. Unsa man kana? Unsay mga rason nga makaingon kag “Aleluya”?​—Sal. 147:1.

4. Unsa kahay gibati sa mga Israelinhon dihang giluwas sila ni Haring Ciro, ug ngano?

⁴ Hunahunaa ang gibati sa naulipong mga Israelinhon sa Babilonya. Giyagayagaan sila sa mga nag-ulipon nila: “Awiti kami ug usa sa mga awit sa Zion.” Nianang panahona, ang Jerusalem nga mao ang ilang kinadak-ang rason nga maglipay diha kang Jehova, nalumpag. (Sal. 137:1-3, 6) Dili sila ganahang mokanta. Ang ilang kasingkasing nagun-ob, ug kinahanglan silang hupayon. Pero, sama sa giingon sa Diyos, sila naluwas pinaagi ni Ciro nga hari sa Persia. Gipildi niya ang Babilonya ug siya miingon: “[Si] Jehova . . . nagsugo kanako sa pagtukod kaniya ug usa ka balay sa Jerusalem . . . Bisan kinsa nga anaa sa inyong taliwala sa tibuok niyang katawhan, si Jehova nga iyang Diyos magauban kaniya. Busa paadtoa siya.” (2 Cron. 36:23) Seguradong nakapahupay gyod ni sa mga Israelinhon nga nagpuyo sa Babilonya!

5. Unsay giingon sa salmista bahin sa paghupay ni Jehova?

⁵ Dili lang ang tibuok Israel ang gihupay ni Jehova, kondili ang matag indibiduwal usab. Mao man usab karon. Ang salmista miingon: “Siya nagaayo sa mga may gun-ob nga kasingkasing, ug nagabugkos sa ilang masakit nga mga bahin.” (Sal. 147:3) Oo, si Jehova naluoy niadtong may sakit sa pisikal ug emosyonal. Karon, gusto gayod ni Jehova nga hupayon ug tambalan ang atong emosyonal nga sakit. (Sal. 34:18; Isa. 57:15) Gihatagan ta niyag kaalam ug kusog sa pagsagubang sa atong mga problema.​—Sant. 1:5.

6. Unsay atong makat-onan sa giingon sa salmista diha sa Salmo 147:4? (Tan-awa ang hulagway sa sinugdan sa artikulo.)

⁶ Dayon, ang salmista mihangad sa langit ug miingon nga si Jehova “nagaihap sa gidaghanon sa mga bituon” ug ang matag usa “gitawag niya sa ilang ngalan.” (Sal. 147:4) Nganong morag giusab sa salmista ang iyang topiko? Tagda kini: Makita tingali sa salmista ang mga bituon, pero wala siyay ideya kon unsa gyod kini ka daghan. Karon, nagkadaghan ang mga bituon nga puwede natong makita. Ang pipila nag-ingon nga sa galaksiyang Milky Way pa lang, may binilyon nang bituon. Ug lagmit may trilyontrilyong galaksiya sa uniberso! Dili gyod nato maihap ang mga bituon! Pero kining tanan gihatagan sa Maglalalang ug ngalan. Nagpasabot ni nga espesyal para kang Jehova ang matag bituon. (1 Cor. 15:41) Komosta ang bahin sa mga tawo? Kon nahibalo ang Diyos sa detalye sa matag bituon, nakaila sab siya nimo​—kon asa ka, kon unsay imong gibati, ug kon unsay imong gikinahanglan sa matag situwasyon!

7, 8. (a) Dihang tabangan ni Jehova ang iyang katawhan, unsay iyang konsiderahon? (b) Paghatag ug pananglitan nga nagpakita sa pagsabot ni Jehova.

⁷ Dili lang kay interesado si Jehova nimo, siya usab may gahom ug empatiya nga makatabang nimo sa pagsagubang sa mga problema. (Basaha ang Salmo 147:5.) Mobati ka tingali nga lisod kaayo ang imong situwasyon o bug-at ra kaayo ang imong problema. Nakasabot ang Diyos sa imong limitasyon, ‘nga nahinumdom nga ikaw abog.’ (Sal. 103:14) Kay dili hingpit, balikbalik natong mahimo ang mao rang sayop. Magbasol gyod ta dihang makasulti tag sakit, makahunahunag dili maayo, o masina sa uban! Wala kana maeksperyensiyahi ni Jehova, pero makasabot gyod siya sa atong gibati!—Isa. 40:28.

⁸ Tingali naeksperyensiyahan na nimo nga gitabangan ka ni Jehova sa imong problema. (Isa. 41:10, 13) Pananglitan, ang  payunir nga sister nga si Kyoko nahigawad pag-ayo human mobalhin sa bag-ong asaynment. Giunsa pagpakita ni Jehova nga nasabtan niya ang mga problema ni Kyoko? Sa iyang gibalhinan, daghan ang nakasabot sa iyang gibati. Siya miingon nga sama rag giingnan siya ni Jehova: “Gihigugma ti ka, dili lang kay payunir ka, kondili tungod kay anak ti ka ug ako imong tag-iya. Gusto nako nga malipay ka ingong akong Saksi!” Sa imong bahin, giunsa pagpakita sa Labing Gamhanan nga “ang iyang pagsabot dili-ikabatbat”?

9, 10. Unsay unang ihatag ni Jehova sa pagtabang kanato? Paghatag ug pananglitan.

⁹ Usahay, materyal nga butang ang imong gikinahanglan. Seguro nabalaka ka nga basig wala na kay makaon. Pero, si Jehova mao ang naghimo sa natural nga proseso sa pagtaganag pagkaon—bisan sa mga kuyabog nga uwak nga nangayog pagkaon! (Basaha ang Salmo 147:8, 9.) Kon padayon niyang gipakaon ang mga uwak, makasalig sab ka nga tagan-an ka niya sa imong materyal nga panginahanglan.​—Sal. 37:25.

¹⁰ Labawng importante, si Jehova nagtagana kanato sa espirituwal, nga naghatag nato sa “kalinaw sa Diyos nga labaw sa tanang panghunahuna.” (Filip. 4:6, 7) Pananglitan, naeksperyensiyahan ni Mutsuo ug sa iyang asawa kon giunsa sila pagtabang ni Jehova panahon sa 2011 nga tsunami sa Japan. Kon wala pa sila makakatkat sa atop, dili unta sila maluwas. Pero nianang adlawa, nawala ang halos tanan nilang kabtangan. Sila nagpalabay sa kagabhion diha sa ngitngit, tugnawng kuwarto sa ikaduhang andana sa ilang nagubang balay. Pagkabuntag, nangita silag bisan unsa nga makadasig nila sa espirituwal. Ang 2006 Tinuig nga Basahon sa mga Saksi ni Jehova mao ray ilang nakit-an. Dihadiha, nakita ni Mutsuo ang ulohang “Ang Kinagrabehang Tsunami nga Nahitabo Sukad.” Bahin kini sa linog sa Sumatra niadtong 2004 nga nagpahinabo sa kinagrabehang mga tsunami sa kasaysayan. Mihilak si Mutsuo ug iyang asawa samtang gibasa nila ang mga eksperyensiya. Gibati nila ang mahigugmaong paghupay sa Diyos pinaagi sa tukmang espirituwal nga pagdasig dihang gikinahanglan nila kini. Gitagan-an sab sila ni Jehova sa materyal. Nakadawat silag hinabang gikan sa mga igsoon. Pero ang nakadasig gyod nila mao ang pagduaw sa mga representante sa organisasyon sa Diyos. Si Mutsuo miingon: “Gibati nako nga kauban namo si Jehova ug iya ming giatiman pag-ayo. Nahupayan gyod mi!” Ang unang ihatag sa Diyos mao ang espirituwal nga tagana, dayon iyang tagbawon ang atong materyal nga panginahanglan.

11. Unsay kinahanglang buhaton niadtong gustong matabangan sa Diyos?

¹¹ Kanunayng andam si Jehova sa paghatag ug “kahupayan sa mga maaghop.” (Sal. 147:6a) Pero sa unsang paagi makabenepisyo ta sa iyang tabang? Kinahanglang naa tay maayong relasyon kaniya. Aron mahimo nato kana, kinahanglan tang magpaubos. (Sof. 2:3) Ang mapainubsanong mga tawo maghulat sa Diyos nga motul-id sa mga sayop ug maghupay sa ilang kaguol. Maangkon nianang mga tawhana ang pag-uyon ni Jehova.

12, 13. (a) Unsay atong likayan aron tabangan ta sa Diyos? (b) Kang kinsa malipay si Jehova?

¹² Sa laing bahin, ang Diyos “nagapaubos sa mga daotan ngadto sa yuta.” (Sal. 147:6b) Prangka kini nga mga pulong! Aron  makabenepisyo ta sa maunongong gugma ni Jehova ug makalikay sa iyang kasuko, kinahanglan natong dumtan ang iyang gidumtan. (Sal. 97:10) Pananglitan, angay natong dumtan ang seksuwal nga imoralidad. Nagkahulogan kini nga likayan nato ang bisan unsa nga makatental nato nianang daotang buhat, apil ang pornograpiya. (Sal. 119:37; Mat. 5:28) Dili tingali kini sayon, pero dili masayang ang atong paningkamot kay si Jehova magpanalangin kanato.

¹³ Sa atong pagpakigbisog, kinahanglang mosalig ta kang Jehova, dili sa atong kaugalingon. Malipay kaha siya kon luwason nato ang atong kaugalingon pinaagi sa “kakusgan sa kabayo,” diin modangop ang mga tawo alang sa tabang? Dili! Ug dili sab ta mosalig sa kalig-on sa “mga bitiis sa tawo,” nga mora bag kita o ang ubang tawo makahatag ug kaluwasan. (Sal. 147:10) Hinuon, modangop ta kang Jehova ug mangayog tabang kaniya. Dili sama sa tawhanong mga magtatambag, siya dili kapoyon sa pagpaminaw sa atong mga hangyo, bisag balikbalik pa tang mangayo sa iyang tabang. “Si Jehova nagakalipay niadtong nahadlok kaniya, niadtong nagahulat sa iyang mahigugmaong-kalulot [o, maunongong gugma].” (Sal. 147:11) Makasalig ta nga sa iyang maunongong gugma, siya mounong ug motabang kanato aron mabuntog nato ang sayop nga mga tinguha.

14. Sa unsa masaligon ang salmista?

¹⁴ Si Jehova nagpasalig nato nga tabangan niya ang iyang katawhan kon sila manginahanglan. Sa paghunahuna bahin sa pagpasig-uli sa Jerusalem, ang salmista miawit kang Jehova: “Gipalig-on niya ang mga trangka sa imong mga ganghaan; gipanalanginan niya ang imong mga anak nga anaa sa imong taliwala. Siya nagahatag ug pakigdait diha sa imong teritoryo.” (Sal. 147:13, 14) Mibati gyod ug kasegurohan ang salmista sa pagkahibalo nga ang Diyos magpalig-on sa mga ganghaan sa siyudad aron proteksiyonan ang Iyang mga magsisimba!

15-17. (a) Unsa tingaliy atong bation kon may problema ta, pero sa unsang paagi gigamit ni Jehova ang iyang Pulong sa pagtabang kanato? (b) Iilustrar kon sa unsang paagi paspas nga ‘nagadalagan ang pulong sa Diyos.’

¹⁵ Tingali, mabalaka ka tungod sa imong mga problema. Si Jehova makahatag nimog kaalam sa pagsagubang niana. Ang salmista miingon nga ang Diyos “nagapadala sa iyang pulong sa yuta; sa katulin nagadalagan ang iyang pulong.” Dayon, siya miingon nga si Jehova ‘nagahatag ug niyebe, nagsaliyab sa nanibuok nga tun-og, ug nagsalibay sa yelo,’ ug siya nangutana: “Sa iyang katugnaw kinsa ba ang makaantos?” Siya midugang nga si Jehova “nagapadala sa iyang pulong ug nagatunaw kanila.” (Sal. 147:15-18) Ang atong labing maalamon, labing gamhanang Diyos, ang usa nga nagkontrolar sa yelo ug niyebe, makatabang nimo sa bisan unsang kalisdanan nga imong maatubang.

¹⁶ Karon, gigiyahan ta ni Jehova pinaagi sa iyang Pulong, ang Bibliya. Ug sa “katulin nagadalagan ang iyang pulong,” sa pagkaagi nga paspas siyang nagtaganag espirituwal nga giya dihang gikinahanglan nato kini. Hunahunaa ang mga kaayohan sa pagbasa sa Bibliya, pagtuon sa mga publikasyon sa “matinumanon ug maalamong ulipon,” pagtan-awg JW Broadcasting, pag-abli sa jw.org, pagpakig-estorya sa mga ansiyano, ug sa pagpakig-uban sa mga igsoon. (Mat. 24:45) Nakita ba nimo nga paspas kaayong nagtaganag giya si Jehova?

¹⁷ Naeksperyensiyahan ni Simone ang tabang sa Pulong sa Diyos. Mibati siyang walay pulos, sa punto nga nakaingon siyang  dili siya dalawaton sa Diyos. Pero, nianang mga panahona, mag-ampo siya kanunay, nga nangayog tabang kang Jehova. Puliki sab siya sa iyang personal nga pagtuon sa Bibliya. Siya miingon, “Sa tanang situwasyon, gibati nako ang paglig-on ug paggiya ni Jehova.” Nakatabang ni kaniya nga mahimong positibo.

18. Nganong gibati nimo nga giuyonan ka sa Diyos, ug unsay imong mga rason sa pagdayeg kang Jah?

¹⁸ Nahibalo ang salmista nga giuyonan sa Diyos ang Israel. Sila lang ang nasod nga gihatagan sa “pulong” sa Diyos ug sa “iyang mga regulasyon ug sa iyang hudisyal nga mga hukom.” (Basaha ang Salmo 147:19, 20.) Karon, dako gyong kadungganan nga sa tibuok kalibotan, kita lang ang katawhan nga nagdala sa ngalan sa Diyos. Kay kita nakaila kang Jehova ug nagpadapat sa iyang Pulong, napahimuslan nato ang talagsaong relasyon uban kaniya. Sama sa magsusulat sa Salmo 147, daghan gyod tag maayong rason sa pagdayeg kang Jah ug sa pagdasig sa uban sa pagduyog kanato.