1, 2. Niini nga sistema sa mga butang, nganong duna man gyoy mga pobre?

ANG ekonomiya karon lisod ug dili patas. Ang mga batan-on naglísod pagpangitag trabaho. Daghan ang nagpameligro sa ilang kinabuhi sa pagbalhin sa mas datong mga nasod. Nagkadaghan ang pobre, bisan sa datong mga nasod. Ug sa tibuok kalibotan, ang dato misamot ka dato ug ang pobre misamot ka pobre. Sumala sa bag-ong banabana, kon totalon ang kuwarta sa 1 porsiyento sa kinadatoang mga tawo, kini motumbas sa total nga kuwarta sa nahibiling 99 porsiyento sa populasyon. Bisag lisod mapamatud-an ang maong banabana, ang tanan mouyon nga binilyon karon ang pobre kaayo, samtang ang uban dato kaayo nga ang ilang bahandi magamit bisan sa sunodsunod nga kaliwatan. Giila ni Jesus kining mapait nga kamatuoran: “Ang mga kabos kanunay nga anaa kaninyo.” (Mar. 14:7) Nganong nahitabo man kini?

² Nasabtan ni Jesus nga ang ekonomiya karon dili mabag-o gawas kon moabot ang Gingharian sa Diyos. Uban sa sistema sa politika ug relihiyon, ang hakog nga sistema sa negosyo, nga girepresentahan sa “mga magpapatigayon” diha sa Pinadayag 18:3, maoy bahin sa kalibotan ni Satanas. Dili sama sa bug-os nga pagkabulag sa katawhan sa Diyos gikan sa politika ug sa bakak nga relihiyon, ang kadaghanan dili bug-os makabulag sa sistema sa negosyo sa kalibotan ni Satanas.

3. Unsang mga pangutana ang atong konsiderahon?

 ³ Ingong mga Kristohanon, angay natong susihon ang atong panglantaw sa sistema sa negosyo pinaagi sa pagpangutana sa kaugalingon: ‘Unsaon nako paggamit ang akong materyal nga mga butang sa pagpakita sa akong pagkamatinumanon sa Diyos? Unsay akong buhaton aron dili ko bug-os makapakigbahin sa sistema sa negosyo? Unsang mga eksperyensiya ang nagpakita nga ang katawhan sa Diyos bug-os nagsalig kaniya niining malisod nga panahon?’

4, 5. (a) Unsay nahitabo sa piniyalan sa ilustrasyon ni Jesus? (b) Unsay tambag ni Jesus sa iyang mga sumusunod?

⁴ Basaha ang Lucas 16:1-9. Ang ilustrasyon ni Jesus bahin sa dili matarong nga piniyalan makapahunahuna kanato. Human isumbong o akusahi nga usikan, ang piniyalan milihok nga may “praktikal nga kaalam” sa ‘paghimog mga higala’ nga makatabang niya kon matangtang na siya sa trabaho. * Siyempre, si Jesus wala magdasig sa iyang mga tinun-an sa paghimog dili matarong aron makalahutay niining kalibotana. Iyang gipakasama ang maong binuhatan nianang sa “mga anak niining sistemaha sa mga butang,” pero iyang gigamit ang ilustrasyon aron ipasiugda ang usa ka punto.

⁵ Nahibalo si Jesus nga sama sa piniyalan nga nag-atubag lisod nga situwasyon, kasagaran sa iyang mga sumusunod kinahanglang mangitag panginabuhian niining dili patas nga sistema sa negosyo. Busa siya nagdasig kanila: “Paghimo kamog mga higala alang sa inyong kaugalingon pinaagi sa dili-matarong nga mga bahandi, aron nga, inigkahurot niana, kamo ilang [si Jehova ug Jesus] dawaton ngadto sa walay kataposang puloy-anang mga dapit.” Unsay atong makat-onan sa tambag ni Jesus?

6. Nganong nahibalo ta nga ang presenteng sistema sa negosyo dili bahin sa katuyoan sa Diyos?

⁶ Bisag wala ipatin-aw ni Jesus kon nganong gitawag niya ang bahandi ingong “dili-matarong,” klaro nga gihisgotan sa Bibliya nga dili bahin sa katuyoan sa Diyos ang pagnegosyo. Si Jehova dagayang nagtagana sa panginahanglan ni Adan ug Eva sa Eden. (Gen. 2:15, 16) Sa ulahi, dihang gibubo ang balaang espiritu sa unang siglong kongregasyon sa mga dinihogan, ‘walay usa nga miingon nga ang bisan unsa sa mga butang nga iyang gipanag-iya iyang kaugalingon; apan giambitan sa tanan ang tanan nilang butang.’ (Buh. 4:32) Si propetang Isaias naghisgot sa panahon diin dagayang matagamtam sa tanang tawo ang bahandi sa yuta. (Isa. 25:6-9; 65:21, 22) Apan sa pagkakaron, kinahanglang gamiton sa mga sumusunod ni Jesus ang “praktikal nga kaalam” sa pagpanginabuhi, gamit ang “dili-matarong nga mga bahandi” niining kalibotana samtang nag-alagad sa Diyos.

7. Unsang tambag ang makita sa Lucas 16:10-13?

⁷ Basaha ang Lucas 16:10-13. Ang piniyalan sa ilustrasyon ni Jesus nangitag mga higala para sa personal nga kaayohan. Pero, si Jesus nagdasig sa iyang mga sumusunod sa paghimog mga higala sa langit dili para sa kaugalingong bentaha. Ang nagsunod nga mga bersikulo naghisgot sa koneksiyon tali sa paggamit sa “dili-matarong nga mga bahandi” ug sa pagkamatinumanon ngadto sa Diyos. Kini ang punto ni Jesus: Atong ‘mapamatud-an ang atong kaugalingon nga kasaligan’ diha sa atong paagi sa paggamit sa bahandi nga atong mabatonan. Sa unsang paagi?

8, 9. Paghatag ug pananglitan kon sa unsang paagi ang pipila nagpakitag pagkakasaligan sa paggamit sa dili matarong nga bahandi.

⁸ Ang usa ka paagi nga mapamatud-an nato  nga kasaligan ta sa materyal nga mga butang mao ang paghatag ug donasyon sa tibuok kalibotang buluhaton nga gitagna ni Jesus. (Mat. 24:14) Usa ka batang babaye sa India ang may alkansiya ug ginahulogan niya kinig mga sensilyo. Gani, dili na siya mopalit ug dulaan. Pagkapuno sa alkansiya, iyang gidonar ang kuwarta para sa buluhatong pagsangyaw. Usa ka brader sa India nga may kalubihan ang maghatod ug daghang lubi sa Malayalam remote translation office. Siya miingon nga kay mamalit man gyod ug lubi ang opisina, ang iyang paghatag ug lubi mas makatabang kay sa paghatag ug kuwarta. Praktikal kana nga kaalam. Sa susama, ang mga igsoon sa Greece regular nga moamot ug keso, mantika nga gikan sa olibo, ug ubang pagkaon para sa pamilyang Bethel.

⁹ Usa ka brader nga taga-Sri Lanka, kinsa nagpuyo na karon sa laing nasod, ang nagpagamit sa iyang propidad didto sa Sri Lanka alang sa mga tigom ug asembliya, ug aron puy-an sa bug-os panahong mga alagad. Sakripisyo gyod ni sa pinansiyal sa maong brader pero dako kinig natabang sa lokal nga mga magmamantala nga pobre. Sa mga nasod diin may restriksiyon sa atong buluhaton, gibuksan sa mga igsoon ang ilang mga balay aron gamitong Kingdom Hall. Tungod niana, nakatabang sila sa daghang payunir ug sa uban nga nagkalisod sa pinansiyal aron dili na kini magbayad ug abang.

10. Unsa ang pipila ka panalangin nga atong madawat kon kita mahinatagon?

¹⁰ Ang maong mga ehemplo nagpakita nga ang katawhan sa Diyos “kasaligan sa labing gamay” diha sa ilang paggamit sa materyal nga mga butang, nga menos ug bili kay sa espirituwal nga bahandi. (Luc. 16:10) Unsay gisulti sa mga higala ni Jehova bahin sa maong mga sakripisyo? Ilang nasabtan nga ang usa ka paagi nga mabatonan ang “matuod” nga bahandi mao ang pagkamahinatagon. (Luc. 16:11) Usa ka sister nga tighatagan ug donasyon para sa buluhaton sa Gingharian naghisgot sa panalangin nga iyang nadawat: “Tungod sa pagkamahinatagon, naeksperyensiyahan nako ang talagsaong kausaban sa akong kaugalingon sulod sa milabayng mga tuig. Akong nakita nga kon mas mahinatagon ko, mas maayo pod ang akong pagpakiglabot sa uban. Nahimo kong mas mapinasayloon, mapailobon, ug mas sayon na para nako ang pagdawat sa mga kapakyasan ug tambag.” Naamgohan sa daghan nga makapauswag sa espirituwal ang pagkamahinatagon.​—Sal. 112:5; Prov. 22:9.

11. (a) Nganong nagpakitag “praktikal nga kaalam” ang atong pagkamahinatagon? (b) Sa unsang paagi giangay-angay ang pondo sa katawhan sa Diyos? (Tan-awa ang hulagway sa sinugdan sa artikulo.)

¹¹ Nagpakita usab kitag “praktikal nga kaalam” kon gamiton nato ang atong materyal nga mga butang sa pagtabang sa uban diha sa ministeryo. Kadtong dato pero dili makaalagad nga bug-os panahon o dili makabalhin sa laing nasod malipay sa pagkahibalo nga ang ilang mga donasyon nagsuportar sa ministeryo sa uban. (Prov. 19:17) Ang mga donasyon makatabang sa pagtaganag mga literatura ug sa pagsuportar sa buluhatong pagsangyaw sa mga teritoryo nga daghag pobre pero dako  ang pag-uswag sa espirituwal. Sulod sa daghang katuigan, sa mga nasod sama sa Congo, Madagascar, ug Rwanda, ang mga igsoon sagad mopili kon unsay paliton—pagkaon para sa pamilya o Bibliya. Usahay ang presyo sa Bibliya motumbas sa usa ka semana o usa ka bulang suweldo. Karon, tungod sa mga donasyon ug sa “pag-angay-angay” sa pondo, ang organisasyon ni Jehova naghubad ug nagtaganag Bibliya sa matag membro sa pamilya, apil sa gigutom sa espirituwal nga mga Bible study. (Basaha ang 2 Corinto 8:13-15.) Busa, parehong nakapahimulos sa pagpakighigala kang Jehova ang mihatag ug ang midawat.

12. Giunsa pagpakita ni Abraham ang iyang pagsalig sa Diyos?

¹² Mahimo sab tang higala ni Jehova kon menosan nato ang atong pagpakigbahin sa sistema sa negosyo sa kalibotan ug pangitaon ang “matuod” nga bahandi. Si Abraham, usa ka tawong may pagtuo, matinumanong mibiya sa datong siyudad sa Ur ug mipuyo sa mga tolda ug nakighigala kang Jehova. (Heb. 11:8-10) Siya misalig kanunay sa Diyos ingong Tinubdan sa tinuod nga bahandi ug wala gyod mangagpas sa materyal nga bentaha nga magpakitag kawalay pagsalig. (Gen. 14:22, 23) Gipasiugda ni Jesus kini nga pagtuo dihang giingnan niya ang datong batan-on: “Kon buot ka nga mahingpit, lakaw ug ibaligya ang imong mga kabtangan ug ipanghatag sa mga kabos ug makabaton ka ug bahandi sa langit, ug umari ka mahimong akong sumusunod.” (Mat. 19:21) Ang maong batan-on kulag pagtuo, dili sama kang Abraham ug sa uban nga bug-os misalig sa Diyos.

13. (a) Unsay gitambag ni Pablo kang Timoteo? (b) Unsaon nato pagpadapat sa tambag ni Pablo?

¹³ Si Timoteo may pagtuo usab. Human siya tawga ingong “maayong sundalo ni Kristo Jesus,” giingnan siya ni Pablo: “Walay tawo nga nagserbisyo ingong sundalo ang magpalambigit sa iyang kaugalingon sa mga pamatigayon sa kinabuhi, aron nga mabatonan niya ang pag-uyon sa usa nga nagtala kaniya ingon nga sundalo.” (2 Tim. 2:3, 4) Ang mga sumusunod ni Jesus karon, apil ang kapig usa ka milyong bug-os panahong ministro, naningkamot sa pagpadapat sa tambag ni Pablo. Ilang gisuklan ang pagpangdani sa mga advertisement ug sa kalibotan kay sila nahinumdom sa prinsipyo: “Ang manghuhulam maoy sulugoon sa tawo nga nagapahulam.” (Prov. 22:7) Gusto gyod ni Satanas nga mahurot ang atong panahon ug kusog alang sa iyang sistema sa negosyo. Kon dili ta magbantay, maulipon ta sa utang sulod sa daghang katuigan. Ang dagkong bayranan sa giutang nga balay ug sakyanan, loan sa pagpaeskuyla, ug bisan gani ang engrandeng kasal moresultag grabeng kalisod sa pinansiyal. Gipakita nato ang praktikal nga kaalam dihang atong pasimplehon ang atong kinabuhi ug menosan ang pagpangutang ug paggasto. Pinaagi niini, may kagawasan ta sa pag-alagad sa Diyos imbes maulipon sa sistema sa negosyo.​—1 Tim. 6:10.

14. Unsay determinado natong buhaton? Paghatag ug mga pananglitan.

¹⁴ Aron mapasimple ang atong kinabuhi, kinahanglan tang motakdag mga prayoridad. Usa ka magtiayon ang nanag-iyag dakong negosyo. Pero, ang ilang tinguha nga mobalik sa bug-os panahong pag-alagad nagpalihok nila sa pagbaligya sa ilang negosyo, speedboat, ug ubang kabtangan. Dayon miboluntaryo sila sa konstruksiyon sa hedkuwarter sa Warwick, New York. Espesyal ni para nila kay nakauban nila sa pag-alagad sa Bethel ang ilang anak nga babaye ug umagad. Nakauban sab nila sa pipila ka semana ang ilang ginikanan (sa bana), nga miboluntaryo pod sa Warwick. Usa ka payunir nga sister sa Colorado, U.S.A., ang nakakitag part-time nga trabaho sa bangko. Ang iyang mga amo giganahan kaayo  sa iyang trabaho maong gitanyagan siyag regular nga posisyon nga triple ang suweldo. Pero, kay nagpasabot man kini nga mamenosan ang iyang panahon sa ministeryo, wala niya kini dawata. Pipila lang kini sa dili maihap nga mga sakripisyo nga gihimo sa mga alagad ni Jehova. Ang determinasyon nga unahon ang buluhaton sa Gingharian nagpakita nga mas gipabilhan nato ang pagpakighigala sa Diyos ug ang espirituwal nga bahandi imbes ang mga butang nga gitanyag sa kalibotan.

15. Unsa nga bahandi ang makapalipay kaayo?

¹⁵ Ang pagbaton ug materyal nga bahandi dili awtomatikong magpasabot nga gipanalanginan ta sa Diyos. Si Jehova nagpanalangin niadtong ‘dato sa maayong mga buhat.’ (Basaha ang 1 Timoteo 6:17-19.) Pananglitan, dihang nahibaloan ni Lucia * nga gikinahanglan ang dugang magsasangyaw sa Albania, mibalhin siya didto gikan sa Italy pagka-1993 bisag wala siyay trabaho, nga bug-os nagsalig kang Jehova. Nahanas siya sa Albanian nga pinulongan ug nakatabang sa kapig 60 nga mabawtismohan. Kadaghanan sa katawhan sa Diyos wala makasangyaw sa mabungahong mga teritoryong sama niana, apan ang bisan unsa nga atong gihimo sa pagtabang sa uban sa pagpangita ug pagpabilin diha sa dalan sa kinabuhi maoy bahandi nga dili gyod mawala.​—Mat. 6:20.

16. (a) Unsay mahitabo sa presenteng sistema sa negosyo? (b) Sa unsang paagi ang pagkahibalo sa umaabot makaapektar sa atong panglantaw sa materyal nga mga butang?

¹⁶ Si Jesus miingon: “Inigkahurot [sa dili matarong nga mga bahandi],” dili ‘kon mahurot na kini.’ (Luc. 16:9) Ang pagkabangkarote sa bangko ug krisis sa ekonomiya nga nagakahitabo niining kataposang mga adlaw halayo ra sa hapit nang mahitabo sa umaabot. Ang tibuok sistema ni Satanas​—politika, relihiyon, ug negosyo—​gitakdang mawala. Gitagna sa mga propetang si Ezequiel ug Sofonias nga mahimong walay pulos ang bulawan ug plata​—mga butang nga importante kaayo sa sistema sa negosyo. (Ezeq. 7:19; Sof. 1:18) Unsa kahay atong bation kon moabot ang panahon nga matapos na ang atong kinabuhi niining sistemaha unya atong maamgohan nga gibaylo nato ang tinuod nga bahandi sa “dili-matarong nga mga bahandi”? Bation nato ang sama sa gibati sa tawong nagtrabaho pag-ayo para magtigom ug daghang kuwarta, ug sa ulahi nakaamgo nga kini mini diay. (Prov. 18:11) Oo, kana nga bahandi mahimo gyong walay pulos, busa pahimusli ang kahigayonan sa paggamit niana sa ‘paghimog mga higala’ sa langit. Ang atong pagsuportar sa buluhaton sa Gingharian mao ang makapadato nato sa espirituwal.

17, 18. Unsay malaoman sa mga higala sa Diyos?

¹⁷ Inig-abot sa Gingharian sa Diyos, wala nay mangabang o mamalit ug balay, libre ug abunda na ang pagkaon, ug wala nay masakit. Mapahimuslan sa yutan-ong pamilya ni Jehova ang kinamaayohang tagana sa yuta. Ang bulawan, plata, ug ubang bahandi iadorno na lang, dili na inegosyo o tagoan. Ang dekalidad nga mga kahoy, bato, ug metal libreng magamit sa paghimog nindot nga mga balay. Ang atong mga higala malipayong motabang nato kay gusto nila, dili tungod sa kuwarta. Kitang tanan parehong makapahimulos sa bahandi sa yuta.

¹⁸ Bahin lang kini sa dakong ganti nga madawat niadtong mohimog mga higala sa langit. Ang yutan-ong mga magsisimba ni Jehova mosinggit sa kalipay dihang madungog nila ang mga pulong ni Jesus: “Umari, kamong gipanalanginan sa akong Amahan, panunda ninyo ang gingharian nga giandam alang kaninyo sukad pa sa pagkatukod sa kalibotan.”​—Mat. 25:34.