Bisag mohimog makataronganong mga paagi ang mga Kristohanon aron maprotektahan ang kaugalingon, himoon nila kana subay sa mga prinsipyo sa Bibliya. Kini nagdili sa pagtener ug armas, sama sa pistola, riple, o uban pa, ingong proteksiyon batok sa ubang tawo. Konsideraha ang mosunod:

Sa panglantaw ni Jehova, ang kinabuhi​—ilabina sa tawo—​balaan. Si salmistang David nahibalo nga si Jehova “ang tuboran sa kinabuhi.” (Sal. 36:9) Busa, kon ang usa ka Kristohanon mopilig makataronganong paagi aron depensahan ang kaugalingon o ang iyang propidad, buhaton niya ang tanan aron dili makapatayg tawo ug mahimong sad-an sa dugo.​—Deut. 22:8; Sal. 51:14.

Tinuod, ang bisan unsang butang puwedeng gamiton sa pagpatay ug tawo, pero ang pistola mas makapasayon niana​—gituyo man o wala. * Dugang pa, kon ang miatake​—kinsa tingali tensiyonado na—​makakita nga dunay pusil ang iyang giatake, dakog purohan nga mograbe ang situwasyon ug moresulta sa kamatayon.

Sa iyang kataposang gabii, giingnan ni Jesus ang iyang mga sumusunod nga magdalag espada, pero wala siya maghunahuna nga gamiton kana ingong proteksiyon. (Luc. 22:36, 38) Hinunoa, giingnan sila ni Jesus nga magdalag espada aron tudloan sila nga dili makig-away, bisan pag atakehon sa armadong mga tawo. (Luc.  22:52) Human tigbasa ni Pedro ang ulipon sa hataas nga saserdote, si Jesus nagsugo kang Pedro: “Ibalik ang imong espada sa sakoban niini.” Dayon, gisulti ni Jesus ang usa ka importanteng kamatuoran, usa ka prinsipyo nga naggiya sa iyang mga sumusunod hangtod karon: “Ang tanang mogamit sa espada mamatay pinaagi sa espada.”​—Mat. 26:51, 52.

Kaharmonya sa Miqueas 4:3, ang katawhan sa Diyos ‘magsalsal sa ilang mga espada ingong mga punta sa daro ug sa ilang mga bangkaw nga mga galab.’ Kini nga ilhanan sa matuod nga mga Kristohanon kaharmonya sa inspiradong tambag ni apostol Pablo: “Ayaw balosi si bisan kinsa ug daotan tungod sa daotan. . . . Kon mahimo, kutob sa inyong maarangan, makigdinaitay sa tanang tawo.” (Roma 12:17, 18) Bisan pa sa mga kapeligrohan nga naeksperyensiyahan ni Pablo, apil na ang “gikan sa mga tulisan,” gibarogan niya ang iyang gisulti, nga mas unahon ang pagsunod sa mga prinsipyo sa Kasulatan kay sa kaugalingong proteksiyon. (2 Cor. 11:26) Siya misalig hinuon sa Diyos ug sa kaalam sa Iyang Pulong nga “mas maayo pa kay sa mga hinagiban sa pagpakiggubat.”​—Eccl. 9:18.

Para sa mga Kristohanon, mas bililhon ang kinabuhi kay sa materyal nga mga butang. “Ang . . . kinabuhi wala magagikan sa mga butang nga . . . gipanag-iya [sa usa ka tawo].” (Luc. 12:15) Busa, kon dili madalag kalmadong pagpakig-estorya ang usa ka armadong kawatan, sundon sa maalamong mga Kristohanon ang prinsipyo sa giingon ni Jesus: “Ayaw sukli siya nga daotan.” Basig kinahanglan pa gani natong ihatag ang atong pangsulod ug panggawas nga sinina, ingnon ta. (Mat. 5:39, 40; Luc. 6:29) * Siyempre, mas maayong maglikay daan. Kon kita maglikay sa “mapagawalong pagpasundayag sa mga kahinguhaan sa kinabuhi” ug nailhan ingong makigdaitong mga Saksi ni Jehova, basin dili ta puntiryahon sa bayolenteng mga kriminal.​—1 Juan 2:16; Prov. 18:10.

Tahoron sa mga Kristohanon ang konsensiya sa uban. (Roma 14:21) Kon mahibaloan sa ubang membro sa kongregasyon nga may pusil ang usa ka Kristohanon ingong proteksiyon batok sa ubang tawo, basin matugaw ang pipila ka isigkamagtutuo, mapandol pa gani. Tungod sa gugma, atong unahon ang interes sa uban kay sa atoa, bisan pag nagpasabot kana nga atong isakripisyo ang atong gihunahuna nga legal natong katungod.—1 Cor. 10:32, 33; 13:4, 5.

Naningkamot ang mga Kristohanon nga mahimong maayong panig-ingnan. (2 Cor. 4:2; 1 Ped. 5:2, 3) Ang usa ka Kristohanon nga natambagan na pero nagtener gihapog pusil ingong proteksiyon batok sa ubang tawo dili makonsiderar nga maayong panig-ingnan. Busa, dili siya kuwalipikado sa mga responsabilidad o espesyal nga mga pribilehiyo sa kongregasyon. Mapadapat ang samang prinsipyo sa usa ka Kristohanon nga padayong magdalag armas ingong bahin sa iyang trabaho. Mas maayong mangitag laing trabaho! *

Siyempre, ang matag Kristohanon maoy modesisyon kon sa unsang paagi protektahan ang iyang kaugalingon, iyang pamilya, o kabtangan, ug kon unsang trabaho ang iyang sudlan. Bisan pa niana, ang mga prinsipyo sa Bibliya nagpakita sa kaalam sa Diyos ug sa iyang gugma kanato. Ingong pagtahod sa maong mga prinsipyo, ang hamtong sa espirituwal nga mga Kristohanon modesisyon nga dili magtener ug armas ingong proteksiyon batok sa ubang tawo. Sila nahibalo nga maangkon sa mga nagsalig sa Diyos ang tinuod ug malungtarong kasegurohan pinaagi sa pagkinabuhi nga kaharmonya sa mga prinsipyo sa Bibliya.​—Sal. 97:10; Prov. 1:33; 2:6, 7.