Nabasa ba nimog maayo ang mga isyu sa Ang Bantayanang Torre niining tuiga? Sulayi kon makatubag ka sa mosunod nga mga pangutana:

Unsay gipasabot sa “pagbag-o sa inyong hunahuna”? (Roma 12:2)

Wala lang ni magpasabot nga kanunay tang mohimog maayo. Kinahanglang susihon pod nato kon unsa tang klaseha sa tawo ug mohimog mga kausaban aron masunod nato ang mga sukdanan sa Diyos kutob sa mahimo.—w23.01, p. 8-9.

Unsaon nato pagpakita nga balanse ta samtang naniid sa mga panghitabo sa kalibotan?

Interesado ta kon sa unsang paagi ang mga panghitabo karon nagtuman sa mga tagna. Imbes maghatag ug kaugalingong opinyon nga posibleng magpahinabog pagkabahinbahin, mas maayong ibase nato ang atong pagpakig-estorya sa mga impormasyon nga gi-publish sa organisasyon ni Jehova. (1 Cor. 1:10)—w23.02, p. 16.

Sa unsang paagi ang bawtismo ni Jesus lahi nianang sa iyang mga sumusunod?

Si Jesus natawo sa nasod nga napahinungod sa Diyos, busa dili na niya kinahanglang ipahinungod ang iyang kaugalingon kang Jehova. Si Jesus hingpit ug walay sala maong dili siya kinahanglang maghinulsol.—w23.03, p. 5.

Sa unsang paagi matabangan nato ang uban nga mokomento sa mga tigom?

Puwede natong mub-on ang atong mga komento aron makakomento ang uban. Likayan pod nato nga mohisgot ug daghan kaayong punto aron naa pay ikakomento ang mga igsoon.—w23.04, p. 23.

Unsay gitumong sa “Dalan sa Pagkabalaan” nga gihisgotan sa Isaias 35:8?

Kining simboliko nga dakong dalan unang nagtumong sa giagian sa mga Hudiyo gikan sa Babilonya pauli sa Jerusalem. Komosta sa modernong panahon? Sa mga katuigan una pa ang 1919, ang maong dalan giandam. Apil sa gihimong pagpangandam ang paghubad ug pag-imprenta ug mga Bibliya. Ang katawhan sa Diyos nagsubay na sa “Dalan sa Pagkabalaan” paingon sa espirituwal nga paraiso nga moresulta ug mga panalangin sa Gingharian.—w23.05, p. 15-19.

Unsang duha ka simbolikong babaye ang gihisgotan sa tambag sa Proverbio kapitulo 9?

Ang Proverbio naghisgot sa “babayeng buangbuang” kansang imbitasyon mopadulong sa “Lubnganan.” Gihisgotan pod niini ang usa pa ka babaye nga gitawag ug “matuod nga kaalam” kansang imbitasyon mopadulong sa “dalan sa pagsabot” ug sa kinabuhi. (Prov. 9:​1, 6, 13, 18)—w23.06, p. 22-24.

Sa unsang paagi ang pagkamapainubsanon ug pagkamakataronganon sa Diyos makita sa iyang pagpakiglabot kang Lot?

Gisugo ni Jehova si Lot nga moikyas gikan sa Sodoma ug moadto sa kabukiran. Pero dihang mihangyo si Lot nga sa Zoar na lang sila moadto, misugot ang Diyos.—w23.07, p. 21.

Unsay puwedeng himoon sa asawa kon ang iyang bana nagatan-awg pornograpiya?

Dili niya angayng basolon ang iyang kaugalingon. Kinahanglan siyang magpokus sa iyang relasyon sa Diyos ug mamalandong sa mga babaye diha sa Bibliya nga gihupay ni Jehova. Puwede niyang tabangan ang iyang bana nga malikayan ang makapatental nga mga situwasyon.—w23.08, p. 14-17.

Dihang naay mokuwestiyon sa atong tinuohan, sa unsang paagi ang pagsabot motabang nato nga mahimong lumo?

Puwede nato nang isipon ingong kahigayonan nga mahibaloan ang gihunahuna sa usa ka tawo o kon unsay importante para niya. Pinaagi niini, matubag nato siya sa lumo nga paagi.—w23.09, p. 17.

Unsay atong makat-onan sa pagpahimulos ni Maria sa kahigayonan nga mapalig-on siya sa uban?

Dihang nahibaloan ni Maria nga mahimo siyang inahan sa Mesiyas, nakadawat siyag pagdasig gikan sa uban. Gipalig-on ni Gabriel ug Elisabet si Maria pinaagi sa Kasulatan. Kita pod mapalig-on sa atong mga igsoon sa pagtuo.—w23.10, p. 15.

Sa unsang paagi tingali tubagon ni Jehova ang atong mga pag-ampo?

Nagsaad siya nga iyang paminawon ang atong mga pag-ampo ug konsiderahon niya kon unsay koneksiyon niini sa iyang katuyoan. (Jer. 29:12) Lainlain tingali ang iyang tubag sa susamang mga hangyo, pero makasalig ta nga iya gyod tang tabangan.—w23.11, p. 21-22.

Ang Roma 5:2 naghisgot bahin sa “paglaom,” busa nganong gihisgotan ni pag-usab sa bersikulo 4?

Dihang madunggan sa usa ang maayong balita, naa siyay kahigayonan nga mabatonan ang paglaom nga mabuhing malipayon sa paraisong yuta. Pero dihang iyang malahutay ang mga kalisdanan nga iyang maatubang ug mabati ang pag-uyon sa Diyos, ang iyang paglaom mas molig-on ug mahimo ning mas tinuod para niya.—w23.12, p. 12-13.