Osukosuk nge Mwirin Äpilükülük

“Lon ekewe ränin lesopolan epwe wor fansoun weires.”​—2 TIMOTI 3:1.

KA FEN rongorong are küna ekkoch ekkeei sokkun napanap mi äletipengaw?

● Chommong aramas ra mälo ren och semwen mi chou.

● Lengita a efisi mäloon fitepükü aramas.

● Pokiten chechchechin fönü, fite ngeröü aramas ra mälo me chommong ra osupwangen imwer.

Lon ekkena pworaus mi tapwoto mwirin ei, kopwe nengeni pwal ekkoch pworaus mi alolilen usun chök ekkeei asan. Kopwe pwal küna pwe Paipel a fen oesini pwe ekkeei napanap epwe fis lon ewe fansoun a eita ngeni “ränin lesopolan.”

Iwe nge, a kawor ekkeei pworaus esap ren an epwe ämmeef ngonuk pwe sia manau woon ei fönüfan mi uren fitikoko. Ese mwääl ka pwisin küna ekkeei osukosuk. Nge ekkeei pworaus itä epwe ngonuk äpilükülük. Repwe pwär ngonuk pwe pwönütään ekkena wonu oesini a ännetatä pwe “ekewe ränin lesopolan” epwele muchulo. Repwe äiti ngonuk popun ekkoch aramas rese lükü ekkewe pisekin ännet me äweweei pwata kopwe tongeni äpilükülükü mwach kkan.