Pwiich kana mi Áchengicheng:

Lap seni 600 ier mwen Kraist, ewe soufós Isikiel a kúna eú lángipwi mi fókkun amwarar. A kúna efoch waa mi fókkun watte, efóch woken mi nóm fán manamanen ewe Sounemenemen unuselapen láng me fénúfan. Nge, ewe a kon amwarar usun, ina napanapen an ssá. An ssá a usun mwittirin inefi, inaamwo ika epwe siwili ia epwe ssáló ie nge ese pwal lamot an epwe ammanga an ssá are kulsefál!​—Is. 1:4, 9, 12, 14, 16-27.

Ena lángipwi a áchemakich pwe kinikinin án Kot we mwicheich lón láng a kan mwémmwékútúkút iteitan. Nge ifa usun kinikinin án Kot we mwicheich wóón fénúfan? Ewe repotun afalafal lón ewe ier a affata pwe Jiowa a amwékútú néún kewe aramas mi kókkótéch lón eú napanap mi pwal mwittir!

Me ikkeei ie lón Merika, chóchóón ewe familien Bethel ra fókkun angang weires le mwékút seni Brooklyn ngeni ewe mineféén ofesilap lón Warwick, New York, pwal ngeni ekkewe ekkóch leeni me leenien afalafal. Chón angangen Bethel lón fitu keangen ofesilap wóón unusen fénúfan ra pwal fókkun féri ewe angangen kaú, férsefáli imw, ochufengeni mettóch, are mwékút ngeni pwal eú leeni. Nge ámi? Inaamwo ika ouse kon pwal feffeiló ekis nge ese mwáál oua pwal áeá watteen ámi fansoun le féri och angang.

Ewe Mwichen Soupwúngúpwúng a fókkun chúng me kúna péchékkúl seni án néún Kot kewe aramas wóón unusen fénúfan alapaaló ar angang le fiti mwékútúkútún án Jiowa we mwicheich. Chómmóng ra mwékút ngeni ekkóch leeni mi wor osupwangen chón afalafal ie. Ekkóch ra pwal féri mineféén sókkun afalafal, áwewe chék ren ar fiti eú mwichefel mi eáni fósun ekis. Chómmóng ra sótuni eú napanapen afalafal mi minefé ngeniir me rese kon eéreni. Pwal eú, chómmóng ra alapaaló ar angangen afalafal lón pwal ekkóch napanap. Nge meinisin Chón Kraist mi tuppwél kapachelong ekkewe chinnap me ekkewe mi semmwen, ra fiti ewe kitirin manaw fán tuppwél, ra chék sópweló lón ar angang ngeni Jiowa me pwáraaló pwe Satan emén chón chofona!​—1 Kor. 9:24.

Oupwe lúkúlúk pwe Jiowa a silei met oua kan féfféri. (Ipru 6:10) Ámi tipemecheres a áchema ngenikem usun Apraham me Sara. Lupwen Apraham a ierini 70 som, a feiló seni ewe telinimwen Kaltea itan Ur me emmweni an we famili ngeni eú leeni mi towau itan Kanaan. Me ikenan epwe nónnóm lón tento tori án ipúkú ier lusun manawan. A ifa me ti­pe­me­che­re­siir me pwúlúwan we mi áchengicheng!​—Ken. 11:31; Föf. 7:​2, 3.

 Ámi mi pwal tipemecheres? Ámi meinisin mi likiitú fán tuppwél lón ei fansoun weires, oua álleasochisi alon Jesus ei: “Oupwe feila o asoulängala chon ekewe mwü meinisin, oupwe papataisiir ngeni iten ewe Sam, ewe Nau me ewe Ngünmifel.”​—Mat. 28:19.

Pwal mwo án Jesus néúnéú ewe kapas “feila” a ámmeef ngenikich pwe sipwe chék akkangang. A ifa me kilisouch le kúna úkúkún watteen ewe angang ekkewe chón tapweló mwirin Kraist mi tinikken ra féri lón ewe ier! Sia fókkun kúna ekkewe feiéch seni manamanen péún Jiowa lón ewe angangen esilefeili kapas allimen ewe Mwú wóón unusen fénúfan.​—Mark. 13:10.

Chómmóng ra etiwa ewe pwóróus. Ewe chóchóón chón afalafal lón ewe ier a tori 8,340,847, me néúch kewe chón káé ra tori 10,115,264 iteiten maram. A ffat, wáán Jiowa we woken a sássá iwe, pwal ámi! Lón ei lusun fansoun mi chék mwochomwoch, sópweló lón ámi féffér múrinné me mwen án Jiowa epwe éppúngaaló asamen án aramas kúna manaw.

A ifa me fichin ach lesenin ier fán iten 2017: Kopwe ápilúkúlúkú Jiowa o féri minne a múrinné! (Kölf. 37:3) Atun oua álleasochisi ekkena kapas, féfféri féffér múrinné ren ámi angang ngeni Jiowa, oua pwári ámi lúkúlúk wóón i. Ouse mochen oupwe chék chechchemeni pwe ouse fókkun ákkáláemén. Fansoun meinisin a pwúng alon Jesus ei: “Nge ngang üpwe etikemi fansoun meinisin tori lesopolan fanüfan.”​—Mat. 28:20.

Oupwe lúkúlúk pwe Jiowa epwe sópweló le efeiéchú ámi angang ngeni Jiowa fán tuppwél. Ese lifilifil ika ámi angang ngeni Kot mi watte are kúkkún chék, nge met mi aúchea ngeni Jiowa ika oua féri úkúkún ámi tufich me mi pwúng ewe popun oua féri ewe angang. Meinisin ekkena liffang ra achchúngú me apwapwaai Jiowa. (2 Kor. 9:6, 7) Ina popun, sópweló le arap ngeni Sememi mi tong ren ámi ikkiótek ngeni, kákkáé an we Kapas, fiffiti mwich me fiffiti angangen afalafal.

Atun mi chúen wor ekis lusun án ewe chón ú ngeni mi fókkun ngaw fansoun, i a achocho úkúkún an tongeni le erikikicheló seni ach tipeppós le pwáraatá pwúngún enletin ach tuppwél ngeni Jiowa. (Pwär. 12:12) Oupwe chék akkarap ngeni Jiowa, iwe ewe Tefil esap tongeni sópwéch lón an angang. (Kölf. 16:8) Oupwe silei pwe aua fókkun tongekemi me aúcheani ámi álillis lón angangen án ewe Samol we Mwú lón ekkeei ránin lesópwólóón.

Pwiimi kewe,

Mwichen Soupwúngúpwúng án Chón Pwáraatá Jiowa