KAPITULU TANU NA TTARU
Omwene wa Mulugu Txini?
1. Nlobelo gani ninfunehu osunza?
MATXIKWI menjene a attu ahiziwa Nlobelo nintxemerhiwa Baba Wehu obe Nlobelo na Nabuya. Yezu wahittiddihedha mabasa nlobelo ntti wi aasunzihe anamafara aye mukalelo wa olobela. Iyene walobelelini? Nlobelona ntti nikaleleni na makamaka wa iyo?
2. Dhilobo gani ttaru dha makamaka dhinisunzihile Yezu olobelelaga?
2 Yezu wahiloga dhahi: “Nona, mulobelaga, muloge dhahi: ‘Baba wehu muli odhulu, nzina nenyu nithithimihiwe; [obe, nitxenihiwe]. Omwene wenyu odhele iyo, ofuna wenyu okosiwege vati apano ninga odhulu.’” (Kengesa Mateu 6:9-13.) Yezu wanisunzihele nni wi nilobelelege dhilobo esi ttaru?—Koona Yowenjedha 20.
3. Ninasunze eni sabwa ya Omwene wa Mulugu?
3 Nihimala osunza wi Yehova tti nzina na Mulugu. Nihisunza vina efunelo ya Mulugu na attu vina na elabo ya vati. Kito Yezu wafuna atapulele eni valogiliye wila: “Omwene wenyu odhele iyo”? Ninele osunza ejile entapulela Omwene wa Mulugu, enakosani, vina onatxenihe dhavi nzina na Mulugu.
OMWENE WA MULUGU TXINI?
4. Omwene wa Mulugu txini, vina Mweneya bani?
4 Yehova ohimetxa olamulela wirimu nanda omusakula Yezu wi akale mweneya. Bibilia ontxemerha olamula oku, Omwene wa Mulugu. Yezu “ddíli Mwene wa amwene, Nabuya wa anabuya.” (1 Timóteo 6:15) Yezu onowodha okosa dhilobo dhinji dhihinwodha alamuleli, vina iyene ddwa guru vaddiddi mottiyana na alamuleli otene a elabo ejino.
5. Omwene wa Mulugu onlamulela ovenyedha wuvi? Onfuna ottonga wuvi?
5 Muvireli malabo makumi manai Yezu bamalile ovenyihiwa mu okwani, iyene wahiyelela wirimu. Movira mudhidhi, Yehova ohimuttoma okala Mwene wa Omwene. (Merelo 2:33) Omwene wa Mulugu onele olamulela elabo ya vati ovenyedha wirimu. (Ovuhulela 11:15) Omwene obu wa Mulugu Bibilia onkuwela ‘Omwene wa Wirimu.’—2 Timóteo 4:18.
6, 7. Txini enimukosiha Yezu okala mwene waderetu opitta amwene a mwilaboni?
6 Bibilia onologa wila Yezu munddimuwa opitta amwene otene, sabwani “ddi iyene bahi ohinkwa.” (1 Timóteo 6:16) Attu otene anttonga anokwa, mbwenye Yezu kanakwe. Dhapama dhotene dhinanikosele Yezu dhinele okalawo na mukalakala.
7 Mbibiliani nihikalamo nivuhulo ninloga wi Yezu onele okala Mwene onattonge na nttebwa vina ttagaraga: ‘Muya wa Mulugu onere okalavi na iyene, muya wa malago, na w’oligana, muya wa onona na w’omukwela Nabuya. Nanda iyene onelege omova Yehova. Kanttonga miladdu na dhohooneya, kangwadda na dhowiwa. Onowasorhiha ayelegi na murima woligana, kankona [obe, kanttonga] mwa esile dhiniweye bahi. Onowawamelela apujiwi [obe, ayelegi] na okwela waye.’ (Izaiya 11:2-4) Ogahiziveliwa okaana mwene ninga oddwene?
8. Ninziwa dhavi wila Yezu kanattonge yeka?
8 Mulugu ohasakula attu eena wi attonge na Yezu mumweneni wa wirimu. Motagiha, Murumiwi Paulo wahimwaddela Timóteo dhahi: ‘Nigavilelavi, ninele ottonga na iyene ninga amwene.’ (2 Timóteo 2:12) Aboya anattonge na Yezu ninga amwene ali angasi?
9. Attu angasi analamulele na Yezu? Mulugu oromile wasakula mudhidhi gani?
9 Ninga musunzelihu kapitulu 7, murumiwi Joau wahimoona Yezu ninga Mwene wodhulu na attu 144.000 anattonge na iyene. Attuya aba 144.000 bani? Joau ononakula wila babale ‘alebiwe vakoveni nzina na [Yezu] vina na Babe.’ Iyene ohenjedha vina: ‘Babale aninfara Mwana-Nibila, [Yezu] mwetemwene munviriye. Aweneya oboliwe vari va attu.’ (Kengesa Ovuhulela 14:1, 4.) Attu aba 144.000, Akristu ororomeleya àsakulile Mulugu, wi ‘alamulele elabo ya vati’ vamodha na Yezu. Awene agakwa, anovenyihiwa wi aakele egumi wirimu. (Ovuhulela 5:10) Oromana Malabo a arumiwi, Yehova ohasakula Akristu ororomeleya wi akose epaddi ya nikuru ntti na amwene 144.000.
10. Ninlogelani wi Yehova ononikwela sabwa ya omusakula Yezu na 144.000 wi alamulele elabo ya vati?
10 Yehova ononitanaala vaddiddi noona asakula attu eena wi alamulele wirimu vamodha na Yezu. Yezu onele okala mwene waderetu, sabwani iyene ononiziwa deretu. Iyene ohiziwa entapulela okala muttu, vina onoziwa goi. Paulo ohiloga wi Yezu, “onoziwa okubanyedha dhawobana dhehu,” vowi iyene “ohehiwa mwa dhetedhene ninga iyo.” (Ahebreu 4:15; 5:8) Vina 144.000 aba anonelamo entapulela okala muttu. Awene apattiwa na ottega vina oredda. Na eji, nihikaana ebaribari wila Yezu na 144.000 anoziwa masoso ehu etene, vina mukalelo wa okwaranya masosoya.
TXINI ENAKOSE OMWENE WA MULUGU?
11. Yezu wapangeli eni anamafara aye wila alobelege wi efunelo ya Mulugu ekoseyege wirimu?
11 Yezu wahapanga anamafara aye wi alobelelege efunelo ya Mulugu okosiwaga wirimu. Sabwaya jani? Nihisunza mu Kapitulu 3 wila Satana Ddiabo wahinvanya Yehova. Munvanyeliye, Yehova wahimuttiyavi Satana na angelo aye ohiroromeleya, obe adomonyo wi akalevi wirimu mwa mudhidhi mung’onovi. Noona, kahiyo wi otene aali wirimu ankosa efunelo ya Mulugu. Mu Kapitulu 10, ninele osunzavi mwaha wa Satana na adomonyo aye.
12. Mapadduwo gani meeli a makamaka alogiwe va Ovuhulela 2:10?
12 Noona, Bibilia onologa wila Yezu mugamaleliye okala mwene wa Omwene wa Mulugu, iyene agahiraba koddo na Satana. (Kengesa Ovuhulela 12:7-10.) Versu 10 enologa mapadduwo meeli a makamaka. Omwene wa Mulugu ohiroma olamulela nanda mweneya ddi Yezu Kristu, vina Satana ohittamagihiwa wirimu ohidha velaboni ya vati. Ninele osunza wila mapadduwo aba ahimala wireya.
13. Muttamagihedhiwe Satana na adomonyo aye txini epadduwile wirimu?
13 Bibilia onologa ohagalala wana angelo ororomeleya a wirimu mudhidhi wattamagihiwe Satana na adomonyo aye. Ninowengesa dhahi: “Nona elabo yodhulu ethabe, vina nyuwo motene munkalawo!” (Ovuhulela 12:12) Ovano wirimu ohikala murenddele wowakwana vina wiwanana sabwani etene aliwo anokosa efunelo ya Mulugu.
Elabo ya vati ehikaana masoso sabwani Satana na adomonyo aye ahitotiwa odhulu. Masosoya aba anele ogoma ovanene
14. Vattamagihiwe Satana wirimu, txini epadduwile mwilaboni?
14 Egumi ya mwilaboni ja goi vaddiddi. Dhilobo dhowopiha dhinonipadduwela ‘sabwani Satana onilupela, n’owali onddimuwa, aziwaga wi ohalilena malabo mang’onovi.’ (Ovuhulela 12:12) Satana ohisilidhiwa sabwa y’ottamagihiwa wirimu vina y’oziwa wila onele otolotxiwa ovanene. Onokosa mwilaboni mwetemwene dhilobo dhintota makattamiho, opa, vina goi.
15. Efunelo ya Mulugu na elabo ya vati jivi?
15 Masiki dhahene, efunelo ya Mulugu na elabo eji kisadduwile. Iyene onofunavi wi attu owakwana akale mwilaboni na mukalakala mparaizu. (Masalmo 37:29) Kito Omwene wa Mulugu onawodhe dhavi okosa ejene?
16, 17. Daniyel 2:44 onnaddela eni sabwa ya Omwene wa Mulugu?
16 Nivuhulo nili va Daniyel 2:44 ninologa: “Nsaka ninathongege amwene aba, Mulugu w’odhulu onere wita omwene ohinamale-wene, ohinawodheye na malogo mena. Omwene obu onere otolotxa-wene omwene mwina wotene, onere ogonela okala n’okala-wene.” Nivuhulo ntti ninnisunziha eni mwaha wa Omwene wa Mulugu?
17 Vamaromo, nivuhulo ntti ninonaddela wila Omwene wa Mulugu ogaromile olamulela “nsaka ninathongege amwene aba.” Eji entapulela wila agahikalawo alamuleli agattongavi mudhidhi onlamulela Omwene wa Mulugu wirimu. Vanawili, nivuhulo ntti ninonaddela wila Omwene wa Mulugu onokalawo na mukala-kala vina kunawodheye na malogo meena. Vanoraru, ogahikala koddo egarabile Omwene wa Mulugu na alamuleli a elabo. Omwene wa Mulugu ogahapemperha alamuleli otene a elabo. Omamalelowa, attu anele okaana mulamuleli ohinakanaga awene.
18. Nzina gani nivahiwe koddo enarabe Omwene wa Mulugu na alamuleli a elabo?
18 Omwene wa Mulugu onawodhe dhavi olamulela elabo yotene? Koddo ya Harmagedón ehinatti, adomonyo anele wanyengetta ‘amwene etene a mwilaboni wi aagumanihele koddo ya siku ninddimuwa na Mulugu munya wa guru dhetene.’ Mwebaribari, amwene a mwilaboni anele owana na Omwene wa Mulugu. Koddo eji yomariha entxemerhiwa Harmagedón.—Ovuhulela 16:14, 16; koona Yowenjedha 10.
19, 20. Ninfunela eni wi Omwene wa Mulugu olamulele elabo ya vati?
19 Ninfunela eni Omwene wa Mulugu? Vahikala sabwa ttaru. Yoroma, Iyo nili attegi, noona ninobulela vina ninokwa. Mbwenye Bibilia onloga wila Omwene wa Mulugu ogattongaga, ninelege okalawo na mukalakala. Jijene enloga, Joau 3:16: “Mulugu oakwela athu vaddiddi ofiyedha walevela Nammodha waye, wi animuroromela ahirimele, attidde egumi yohimala.”
20 Sabwa yanawili enfunela iyo Omwene wa Mulugu jowi nirijiwa attu abure. Attu enji anologa ottambi, anopelana malago vina kana meddelo aderetu. Kaninwodha watolotxa, mbwenye Mulugu onowodha. Attu andidelavi okosa merelo abure anele otolotxiwa na koddo ya Harmagedón. (Kengesa Masalmo 37:10.) Sabwa yanoraru enfunela iyo Omwene wa Mulugu, jowi alamuleli a elabo bawobana, babure vina bovirigana. Amwene aba kantanaala wakamihedha attu wi amuziwe Mulugu. Bibilia onologa wila ‘muttu onomulamulela muttu mukwaye mwa oputtuleya waye.’—Kohelét 8:9.
21. Omwene onalagihe dhavi wi yofuna ya Mulugu ehakwanihedheya velaboni ya vati?
21 Koddo ya Harmagedón egavira, Omwene wa Mulugu onele okosiha wi efunelo ya Mulugu yireye velaboni ya vati. Motagiha, Omwene obu onele omutolotxa Satana na adomonyo aye. (Ovuhulela 20:1-3) Mwa dhawene, kunakale muttu onakalege muredda obe onakwe. Vina sabwa ya yobolo, attu otene ana nroromelo anele okalawo na mukalakala Mparaizu. (Ovuhulela 22:1-3) Omweneya onele otxeniha nzina na Mulugu. Eji entapulela eni? Entapulela wi Olamulela wa Mulugu ogattongaga velaboni ya vati, attu otene anele ottittimiha nzina na Yehova.—Koona Yowenjedha 21.
MUDHIDHI GANI OKALILE YEZU MWENE?
22. Ninziwa dhavi wila Yezu kakalile Mwene bali velaboni ya vati? Vina ninziwa dhavi wila Yezu kakalile Mwene vafileye-wene odhulu?
22 Yezu ohasunziha anamafara aye olobela dhahi: “Omwene wenyu odhele iyo.” Eji entapulela wi olamulela wa Mulugu ogadhile musogorho. Yehova agahimetxa olamula waye vina agahimukosa Yezu okala Mweneya. Koddi Yezu okalile Mwene vafiliye-wene odhulu? Nne, iyene wanfanyela ojeedha vang’onovi. Mudhidhi ovenyihiwe Yezu mu okwani, Pedro na Paulo ahilabihedha nivuhulo nilebiwe va Masalmo 110:1 alogaga mwaha wa Yezu. Mu nivuhuloni ntti Yehova ohiloga: “Gilati omononi waga woja; miyo ddinoawira amwiddanawo akale adhari awo.” (Merelo 2:32-35; Ahebreu 10:12, 13) Yezu agajedheli mudhidhi mungasi wi Yehova amuttome okala Mwene?
Omwene wa Mulugu onele okosiha wi efunelo yaye ekoseye velaboni ya vati
23. (a) Yezu oromile ottonga mudhidhi gani ninga Mwene wa Omwene wa Mulugu? (b) Ninazunze eni mu kapituluni endawo?
23 Yaka ya 1914 ehinatti ofiya, nikuru na Akristu ebaribari ahinonelamo wila eji yali yaka yamakamaka mowiwanana na mavuhulu a mBibiliani. Oromana 1914 mapadduwo a mwilaboni ahoniha wila aweneya kavonyile. Txibarene, Yezu oromile olamulela ninga Mwene yakene ejile. (Masalmo 110:2) Momaguva-mwene, Satana ohittamagihiwa odhulu badha velaboni ya vati vina “ohalilena Malabo mañogovi.” (Ovuhulela 12:12) Kapitulu endawo, ninela woona dhopadduwa dhinlagiha wi ninkalawo masiku-ene abo. Vina ninele osunza wila ovanene Omwene wa Mulugu onele okosiha wi yofuna yaye yireye mwilaboni.—Koona Yowenjedha 22.
