Abali okweleya:

Vyaka mazana matanu na meeli mundduni, Kristu ahinabaliwa namavuhulela Ezekiyel wahikaana moonelo wotikiniha. Iyene wahoona mukukutta munddimuwa wa wirimu, weddihiwa na mwinya Namadhulu-dhulu. Mweddelo wa mukukuttaya wali wotikiniha vaddiddi. Mukukuttaya, wandhowa wego-wegovi wafunani!—Ezek. 1:4, 9, 12, 14, 16-27.

Moonelo obu, ontonyihedha wi nikuru na Yehova na wirimu ninoweeddavi. Kito nikuru na vati? Yaka ya mabasa evirile ehitonyihedha vina wi Yehova onoweeddiha nikuru na vati na mukalelo wotikiniha!

Okuno o Estados Unidos ya Wamerika, anamudhi a Obetel ahizuzuma na omaga mittorho dhawa amwalelaga o Brooklyn, Warwick, New York, vina dhilabo dhina, eena anomwalihiwa wi akose mabasa opionero. Abetelita ena a dhilabo dhottiyana-ttiyana ahizuzuma na mabasa meena a omaga, ovenyihedha, okoddeliha vina omwalela mimburo dhiina. Kito weyo? Masiki akala kumwaleli mburo mwina, ejo kintapulela wi oli wottugareya obe ofwasa.

Nikuru Nolamulela ninottangarhama vaddiddi woona wi nlogo na Mulugu orugunuwa elabo yotene, ninozuzumela ofwara nikuru na Yehova. Enjiya anomwalela wego onjombeliwa anamalaleya. Wi onuwihe mabasa awa, ena anomwalela dhipaddi dhinlogiwa elogelo yina. Mbwenye ena antamela osunza marhe a oshagela olaleya na mukalelo muswa vina wopureleyamo. Enjiya anovilibihedha wunuwiha mabasa awa na mukalelo wottiyana. Akristu otene, akalaba, aredda, attu okuluveleya na mabasa a omukamihedha Yehova wooniha wi Satana muttambi!—1 Kor. 9:24.

Okaane nikuluvelo nawi Yehova onowoona guru dhotene dhinimukoseliwe. (Aheb. 6:10) Ovilevela wawo ononubutxedha Abramu na Sara. Bana vyaka 70, Abramu wahimwala o’ Kaldiya sidadi ya Ur vamodha na amudhaye badhowa elabo ya Kanaá, wenewo wakaliye mmisasani mpaka ofiyedha vyaka zana dha egumi yaye yotene. Awene ahitonyihedha ovilevela onddimuwa!—Wita 11:31; Mer. 7:2, 3.

Weyo onolagiha ovilevela woligana? Motene nyuwo onvilela masaka abano orutxa, munowiwelela malago alogile Yezu wila nivirihemo. Iyene bela: “Dhowani, mwasunzihe athu a malogo otene, akale anamasunza aga; mwabatize na nzina na Baba, na Mwana, na muya wokoddela.”—Mt. 28:19.

 Mazu aba alogile Yezu wi “dhowaní” antapulela weeddela mburo mwina. Elobo yohagalaliha woona mabasa a ovivelela akosile anamafwara a Kristu yaka ajile evirile! Ejo ehooniha wila Yehova onoruriha mabasa aye a olaleya muttaka wapama wa Omwene onkosiwa orugunuwa elabo yotene.—Mk. 13:10.

Attu enjene ahirumeela miselu eso. Muttengo wa anamalaleya yaka ejile bwa 8.340.847, meri dhotene ahikosiwa masunziho a Bibilia waddamela muttengo wa 10.115.264. Mohaganyedha, mukukutta wa wirimu onoweedda, weyo vina onoweedda! Olibihegevi mabasa awo ogaliwo mudhidhi, Yehova ahinatti ofuga mulago wa nivuno. Mutoma wa yaka ya 2017 bubu onloga ‘Omuroromele Yehova weddegenavi dhapama’! (Masal. 37:3) Ogewelela mazu aba, okosagavi dhili dhapama mmabasani a Yehova, venevo onolagiha na ebaribari wa iyene. Kuwove oziwe wila kuli weka. Mazu a Yezu kanattiye okala ebaribari. “Onani, miyo ddili na nyuwo masiku otene ofiyedha omagomelo wa elabo.”—Mt. 28:20.

Ziwaní wi Yehova onodhowavi bagaruriha mabasa enyu. Masiki akala okosile mabasa mang’ono obe manddimuwa, yamakamaka ku ovivelela na murima wotene. Nvaho wotene omperheka muttu-muttu na murima wotene masiki oyeve Yehova onorumeela. (2 Kor. 9:6, 7) Onfiyedhe Babi wawo wa wirimu na malobelo, wengesa Nzu na Mulugu, woona matugumano a Okristu vina okalela ntidi mabasa olaleya.

Mpaka ovira “malabo mañgonovi” ahalilena Ddiabo wila atolotxiwe, mwiddani oddu onokosavi guru enddimuwa wi anipupurutxe nittiye ofara dila ya Yehova. (Ovuh. 12:12) Niganfiyedha Yehova, Ddiabo kanawodhe onigulugudha. (Masal. 16:8) Ziwaní wi iyo ninowukwelani venjene ttangwi ya guru enddimuwa enkosa nyuwo y’okamihedha mabasa a Omwene masaka abano orutxa.

Abali enyu,

Nikuru Nolamulela na Anamoona a Yehova