EBARIBARI ya eni? Ebaribari ya mavuzo a makamaka vaddiddi ankosetxa athu. Txino onozuzumelaga mavuzo ninga aba:

• Txibarene Mulugu ononitanaala?

• Koddo vina goi dhinela ogoma-wene?

• Txini ennipadduwela nigakwa?

• Abale akwile akala enjeedhelani?

• Ddilobele dhavi wila Mulugu addivuruwane?

• Ddiwodhe dhavi okaana egumi yosanzaya?

Dhowakula dha mavuzo aba ogaafanyile wuvi? Weyo kodhowa o bibilioteka obe mmaloja mungulihiwa manivuru, ogahifanyamo manivuru matxikwi na matxikwi alogaga yawi anowakula mavuzo aba. Txibarene, wili-wili nivuru nimodha ninoviriganiha ejile enloga nivuru niina. Mena ankala ninga ahikala mudhidhene obo mbwenye mohigoneela anokwela venevo balebiwa wili obe batxinjiwa.

Mbwenye, ohikala nivuru nimodha nina dhowakula dhororomeleya. Nthi thi nivuru na ebaribari. Yezu Kristu wahiloga mu nlobeloni vamentoni va Mulugu: “Nzu nenyu tha ebaribari.” (Joau 17:17) Ovanene ninoziwa yawila Nzu nthi ddi Bibilia Wokoddela. Mmakukuni andawo, onela woona wakula wohirutxa vina wororomeleya wa Bibilia mwa mavuzo aba akosiwe vadhulu.

SABWA ENKOSELIWA NIVUZO NTHI: Ninkala mwilaboni mudhaalile otabala vina dhohiligana. Relijiau dhinji dhinsunziha wila goi dhinoonihu Mulugu ddinfuna wi dhipadduwege.

EJILE ENSUNZIHA BIBILIA: Mulugu txipo kantota dhilobo dhabure. Job 34:10 onologa: “Mulugu kanira-wene dhohifwanyelela, Namawodha-wodha kanira dhokoromana.” Mulugu ohikaana efunelo ya okwela na athu. Ji sabwa ya ejene enisunzihedhi Yezu olobela: “Baba wehu muli odhulu . . . omwene wenyu odhele iyo, ofuna wenyu okosiwege vati apano ninga odhulu.” (Mateu 6:9, 10) Dhaene Mulugu ononitanaala kakamwe mpaka okosa guru ya osoriha ofuna waye s’ohivonya.—Joau 3:16.

Koona vina Wita 1:26-28; Tiago 1:13; na 1 Pedru 5:6, 7.

SABWA ENKOSELIWA NIVUZO NTHI: Koddo dhinowapavi athu muthengo wohengeseya. Iyo notene nihifanyiwa goi ya nlogo na athu.

EJILE ENSUNZIHA BIBILIA: Mulugu ohibaza ologa nsaka ninemetxiye murenddele velaboni ya vati. Mutxiddo mwa Omwene waye, nlamulelo na odhulu, ‘athu kanaasunze koddo.’ Mbwenye, athu “anere osaddula vipano dhawa dha koddo dhikale dhihiba.” (Izaiya 2:4) Mulugu onela ogomiha ohiligana na goi dhotene. Bibilia onororomeliha: “[Mulugu] oner’okuputha muntori bu muntori wa mmentoni mwawa. Kunakale vina okwa, kutho, obulela, segedho, vowi dhamwilaboni yawale [otaganyihavo na dhohiligana vina goi dha ovanene] dhivira.”—Ovuhulela 21:3, 4.

Koona vina Masalmo 37:10, 11; 46:9; na Mikeya 4:1-4.

SABWA ENKOSELIWA NIVUZO NTHI: Relijiau dhinji dha mwilaboni dhinsunziha wila mwari mwa muthu muhikala elobo enkalawovi muthuya agamala okwa. Athu ena anloga wila muthu okwile podi waputhula abale aliwo obe yawila Mulugu onowasosa athu abure na wathongela ososiwa wohigoma mmothoni.

EJILE ENSUNZIHA BIBILIA: Athu agakwa, anothiya okalawo. Kohelét 9:5 onloga wila “aliba okwa kanziwa elo-wene.” Vowila aliba okwa kanziwa elobo, kaniwa obe okosa elobo elobovi, aweneya kamputhula obe wakamiha athu aliwo.—Masalmo 146:3, 4.

Koona vina Wita 3:19 na Kohelét 9:6, 10.

SABWA ENKOSELIWA NIVUZO NTHI: Ninofuna okalawo, vina ninofuna ojavo egumi vamodha na abale anakwelihu. Nihibaaliwana onukeliwa wawoona wili amudhihu akwile.

EJILE ENSUNZIHA BIBILIA: Athu enjene akwile anela ovenyihiwa mu okwani. Yezu ohiroromeliha yawila: “Aliba mmasiye . . . anere ovenya mukwani.” (Joau 5:28, 29) Mowiwanana na efunelo yoroma ya Mulugu, abale anvenyihiwa mu okwani ninga athu a omaningoni anela okaana gari ya okalawo mparaizu velaboni ya vati. (Luka 23:43) Musogorho mpo muroromelihiwe munotaganyihiwa na egumi yowakwana vina okalawo na mukalakala wa athu aniwelela. Bibilia onologa: “Athu apama aner’okala anya a elabo, akalegemo masiku etene.”—Masalmo 37:29.

Koona vina Job 14:14, 15; Luka 7:11-17; na Merelo 24:15.

SABWA ENKOSELIWA NIVUZO NTHI: Athu a relijiau dhotene-wene anolobela. Masiki dhaene, enjene anoona ninga malobelo awa kanakuliwa.

EJILE ENSUNZIHA BIBILIA: Yezu ohinisunziha wi mmalobeloni mwehu nihilogege mazu akakene apanddiwe. Iyene ologile wila: ‘Mmalobeloni mwenyu kamwinjivihege mazu owileya dhebewene.’ (Mateu 6:7) Akala ninfuna wila Mulugu avuruwane malobelo ehu, nilobelege na mukalelo onfuniye. Wila nikose eji, ninofanyeela osunza ejile enfuna Mulugu nigamala nilobelege mowiwanana na ejene. Joau woroma 5:14 onotapulela: “[Mulugu] ononivuruwana nigamuloba elo bari munfuneliye.”

Koona vina Masalmo 65:2; Joau 14:6, 14; na 1 Joau 3:22.

SABWA ENKOSELIWA NIVUZO NTHI: Athu enjene anrumeela yawila kobiri, ovuwa obe okoddela omentoni onela wakaliha oosanzaya. Txibarene, awene anowararela dhilobo esi—agamala boona wila osanzaya onowathawa.

EJILE ENSUNZIHA BIBILIA: Yezu wahitonya ejile ensanzayiha mwalogeliye dhahi: ‘Asanzayi ba abale anziwa oyelega wawa wa omuyani.’ (Mateu 5:3, Tradução do Novo Mundo) Osanzaya watxibarene onfanyeya bahi akala ninothukula tharho ya osasanyedha oyelega wehu onddimuwa—ofuna wehu wa oziwa ebaribari ya Mulugu vamodha na esile dhinnifuniyena. Ebaribari eji enfanyeya Mbibiliani. Oziwa ebaribari eji podi onikamiha ozinddiyela ejile eli yofuneya kakamwe vina ejile ehili. Omuthiya Bibilia weeddihaga dhofuna vamodha na merelo ehu onokaaniha egumi yohagalaliha vaddiddi.—Luka 11:28.

Koona vina Gano dh’olelana 3:5, 6, 13-18 na 1 Timóteo 6:9, 10.

 Oku wali wañgana oñgonovi mwa dhowakula dha Bibilia mwa mavuzo matanu na nimodha. Onofuna oziwa dhowakula dhiina? Akala oli mwari mwa abale ‘anziwa oyelega wawa wa omuyani,’ mohaganyedha onela ofuna. Weyo txino onotikina mwaha wa mavuzo mena ninga aba: ‘Akala Mulugu ononitanaala, onthiyela eni obure na goi dhinji okalagawovi mwari mwa okalawo wotene wa athu? Ddiwodhe dhavi wogolela mukalelo wa egumi ya murala waga?’ Bibilia onovaha dhowakula dhinji vina dhowakwana mwa mavuzo aba vina mavuzo mena gwe.

Mbwenye, athu enjene ovanene kanfunetxa ompepesa Bibilia. Animoona ninga nivuru ninddimuwa vaddiddi nthene ninoonani ninga ninorutxa vaddiddi ononelamowa. Ogahifuna nikamihedho wila ofanye dhowakuladha Mbibiliani? Anamoona a Yehova ahikaana dhitagano biili esene dhinawodhe wukamiha.

Yoroma, nivuru Txini Ensunziha Bibilia Txibarene? nilebeliwe wakamiha athu adhaaleliwe mabasa opepesa dhowakula dhohipothowa dha Bibilia mwa mavuzo a makamaka. Etagano yanawili ji ddima ya nsunzo na Bibilia na vatakulu nihimpitxiwa kobiri. S’ohilogosa kobiri, Namoona mmodha wa Yehova onkala waddamana na weyo vina wofanyeela omusunziha Bibilia podi wufiyedha vanivawo obe mburo mwina wofanyeela balabihedha muna mudhidhi kadda sumana mmusekeserhaga Bibilia vamodha. Athu matxikwi na matxikwi ozugunuwa elabo yotene ahipuramo ddima eji. Enjiya mwa abene ahifiyedha ologa dhahi na otikiniha: “Ddihifanya ebaribari!”

Kuli yuma enddimuwa enfanyiwa empitha ejene. Ebaribari ya Bibilia enonifurula mmaganoni abure, ovirigana, vina wova wabure. Enonivaha njeedhelo, efunelo vina ohagalala. Yezu ologile dhahi: ‘Munela oziwa ebaribari, nanda ebaribari enela wufurulani.’—Joau 8:32, NM.