Nasemukinyine mu mbonge ya São Domingos, República Dominicana, mu jimo lietu tuli ana awana, ami nguli kasula-songo. Yisemi jami kalilongesele chinji, kashika o kazangile hanga ni yetu tupwe ngwe ayo. Miaka yiwana kunyima shimbu te kanda nguchisemuka, yisemi jami kalinyingikine ni amwe mishionaliu a mu yingeleja ya Mórmons, chocho yakomoka ha kumona chize o te akuzala kanawa ni vumbi lio. Ha kumona chocho, yisemi jami yakwata chiyulo ngwo usoko wetu te mapwa atu atangu mu chifuchi chetu waze te mapwa a mu Igreja de Jesus Cristo dos Santos dos Últimos Dias, hanji ngwetu Yingeleja ya Mórmon.

Muze te ngunayi ni kukola, yinguputuka kuzanga chinji yuma yize yapwile ni kulingiwa mu yingeleja ni kulemesa chinji mwono wa mu usoko ni yikuma yikwo nawa ngwe chize o te akulinga. Nazangile chinji kupwa mu yingeleja ya Mórmon, chocho yinguzanga kupwa mishionaliu.

Muze napwile ni miaka 18, usoko wami yalukila mu Estados Unidos muze te mutuhasa kunjila ku shikola yinene. Ngunamono ha kupalika cha mwaka umuwika, a matu jami waze apwile Yela ja Yehova, yeza ni kutumeneka mba yatusanyika hanga tuye ha kukunguluka cha mambonge. Nakomokene chinji ha kumona atu eswe kanakaula yisoneko mu Mbimbiliya ni kusoneka yize te anapanjika. Chocho, ni yami yingwanda mukanda hanga ngusoneke.

Hanyima lia kukunguluka, a matu yangwamba ngwo, amu ngunazange kupwa mishionaliu, o te mangukwasa kupwa ni chinyingi cha Mbimbiliya. Yinguzanga chinji nyonga lio mumu ha shimbu liacho napwile ni kutanga chinji mikanda ya Mórmon kuhiana Mbimbiliya.

Muze twapwile ni kulishimwinya ha telefone, a matu jami kapwile ni kungukolweza hanga ngupwe ni kutesa yuma yize nakufuliela ni yize Mbimbiliya yakulongesa. O kazangile hanga ngulimwene yami mwene umwenemwene.

Natayijile malongeso a mu yingeleja ya Mórmon, alioze te chanyingikine kanawa nyi malongeso jacho kalita ni yize Mbimbiliya yakulongesa. Tata pwo yangutumina Despertai! wa 8 ya Novembro 1995, wakutuhwisa kuli Yela ja Yehova yoze wapwile ni umwe mutwe te unahanjika ha yingeleja ya Mórmon. Nakomokene ha kumona ngwami, kumana te chanyingikine yuma yinji hakutwala ku yingeleja yacho. Chino changukwashile kunjila mu site ya Mórmon hanga ngupwe ni shindakenyo nyi yuma yize Despertai! yambile yapwile lume yamwenemwene. Muze nanjilile mu site ni kuya mu museu wa Utah, Estados Unidos, yingupwa ni shindakenyo.

Ami napwile ni kunyonga ngwami, mukanda wa Mórmon walita ni yize Mbimbiliya yakulongesa. Alioze muze naputukile kutanga Mbimbiliya, yinguputuka kumona kalisa hakutwala ku malongeso a Mórmon ni yize Mbimbiliya yakulongesa. Chakutalilaho, mukanda wa Ezekiele 18:4, unambe ngwo alma yakufwa. Alioze mu mukanda wa Mórmon ha mukanda wa Alma 42:9, hanambe ngwo: “Alma kuyichi keza kafwa.”

Kuchizako malongeso anji alisa, chuma chikwo chize changupinjishile mu yingeleja ya Mórmon chapwile kuhakwila yifuchi yo. Chakutalilaho, o kakulongesa ngwo, munda wa Endene wapwile ku Condado Jackson, Missouri, Estados Unidos. Kashika, aprofeta ja yingeleja yacho kakwamba ngwo, muze “Wanangana wa Zambi muukaputuka kuyula, muukayula hashi heswe kupalikila mu chiyulo cha Estados Unidos.”

Ami napwile ni kulihula yize te muyilingiwa ku chifuchi chami ni yifuchi yikwo nawa. Tangwa limwe ufuku, umwe mukweze wa mu yingeleja ya Mórmon yoze te unalilongesa hanga apwe mishionaliu yangusanyika ha telefone, chocho yituhanjika ha chikuma chacho. Yingumuhula pundu nyi te matayiza kwasa jita ni atu a mu yingeleja yenyi waze atwama mu chifuchi cheka. Nakomokene chinji muze akumbulwile ngwenyi, ewa! Yinguhengwola chinji hakutwala ku malongeso a Mórmon. Nahanjikile nawa ni mangana ja yingeleja yacho waze angukumbulwile ngwo, makumbululo a yihula yami kali yijimbikilo yize kanda yichipwa ni ulumbunwiso.

Nahongele ha kwivwa ulumbunwiso wo. Yingunyonga chinji ha nyonga liami liakupwa mishionaliu wa mu yingeleja ya Mórmon. Hachino, yingumona ngwami, ngunazange kupwa mishionaliu hanga ngukwase atu, ngwe chize te munguhasa kulinga mulimo weswawo hanga ngukwase atu. Chikwo nawa nazangile kupwa ni lufuma yoze mamishionaliu a Mórmon akwete. Alioze, hakutwala kuli Zambi, te chanyingikine chuma nichimwe. Chipwe ngwe napwile ni kutanga-tanga Mbimbiliya, nihindu te chishi kuyilemesa. Te chanyingikine upale wa Zambi hali atu ni hashi.

Ha kulilongesa Mbimbiliya ni Yela ja Yehova, yingunyingika jina lia Zambi, yize yakulingiwa kuli mutu nyi hafwa, chiteli cha Yesu mu umanunuko wa upale wa Zambi ni yuma yikwo nawa. Haliapwila, te ngunalilongesa yuma yinji hakutwala ku mukanda uno ni kuhanjika ni akwetu yuma yize te ngunalilongesa. Ami te nakutayiza ngwami Zambi kwatwama, alioze haliapwila munguhasa kuhanjika Nenyi mu yilemba ngwe sepa liami. Kangupapachishile ngwe Chela cha Yehova ha 12 ya Julho 2004, hakupalika cha tukweji asambano, yingunjila mu mulimo wa shimbu lieswe.

Nakalakalile ha miaka yitano ku chishina chinene cha Yela ja Yehova ku Brooklyn, Nova York, Estados Unidos. Nazangile chinji kukwasa ku mulimo wa kufwambwisa Mbimbiliya ni mikanda yikwo nawa yize yakuyukisa tununu a tununu twa atu a hashi heswe. Ndo musono, munguchinunga ni kukwasa atu kunyingika Zambi.